Kahlemengih Koht En Me Mehlelo

“Nan amwail wialahr sapwellimen Koht seri kompoak kei, kumwail kahlemengih Ih.”​—EPISOS 5:1.

1. Dahme ekei kin kamehlele duwen padahk mehlel, oh dahme kahrehda arail elen madamadau sapwung?

“DAHKOT me mehlelo?” (Sohn 18:38) Peideko, me kohda ni sawehwe sang rehn Pontius Pailet mpen pahr 2,000 samwalahr ako, kasalehda me padahk mehlel kin rirsang rehn aramas tohto me rapahki. Aramas tohto rahnwet kamehlele met. Poahsoan en padahk mehlel mih pahn uhwong laud. Ele ke kin rong aramas arail kin nda me aramas koaros mie pein arail kamehlele dahme mehlel, de ekei kin nda me padahk mehlel sohte duwehpenehte oh e kin wekiwekidekla ahnsou koaros. Ahpw, soangen madamadau pwukat sapwung. Poahsoan en aramas arail kin wia roporop oh kasukuhl pwe en esehla dahme mehlel me pid sampah me kitail mihmi loale. Dahme mehlel sohte kin kohsang emen emen pein kamehlele. Karasepe, ngenen aramas kin sohte kak mehla de soh. Sehdan kin uhdahn mie de soh. Mie kahrepen atail mour e kohieng kitail de soh. Nan ehuehu irair pwukat, ehute pasapeng me mehlel. Ehu pasapeng me mehlel oh ehu likamw; oh ira koaros sohte kak mehlel.

2. Ni ahl dah me Siohwa wia Koht en me mehlel, oh soangen peidek dah kan me kitail pahn koasoiapene?

² Nan artikel en mwowe, kitail tehkpene me Siohwa iei Koht en me mehlel. E mwahngih dahme mehlel me pid soahng koaros. E sansal mwahu me e weksang Sehdan me Tepil, sounlikamwo, pwe Siohwa ahnsou koaros kin mehlel. Oh pil, Siohwa kin sapanikihong aramas padahk mehlel. Wahnpoaron Pohl kangoangehki ienge Kristian kan: “Nan amwail wialahr sapwellimen Koht seri kompoak kei, kumwail kahlemengih Ih.” (Episos 5:1) Nin duwen atail wia Sounkadehdehn Siohwa kei, iaduwen atail pahn kahlemengih Ih sang ni atail koasoi oh sang ni atail kin mourki dahme mehlelo? Dahme met wiahki mehkot kesempwal kitail en wia? Oh mehn kamehlel dah me kitail kak kamehlelehki me Siohwa kin kupwurperenki irail oko me kin rapahki dahme mehlel? Kitail kilang.

3, 4. Iaduwen wahnpoaron Pohl oh Piter kawehwe duwen dahme pahn wiawi ni “imwin rahn akan”?

³ Kitail momour nan ahnsou ehu me likamw nan pelien lamalam inenen rek. Duwen me wahnpoaron Pohl kohpadahr pahn kaweid en ngehn sarawi, me aramas tohto “nan imwin rahn akan” kin liksansalamwahuki arail pelien lamalam, ahpw e pahn dehde mwahu me re sapwung pwehki manaman me re ahneki. Ekei kin pelianda dahme mehlel, oh irail “ahnekihda madamadau en widing.” Oh pil, “aramas suwed akan oh me likamw akan . . . pahn kohsang me suwed oh kohlahng me suwed sang, wiahda kaweid sapwung oh pil pein irail alehda kaweid sapwung.” Mendahki soangen aramas pwukat ar kin sukusukuhliki mehkan ahnsou koaros, irail sohte kak “esehla loalokong pwung en padahk mehlel.”​—2 Timoty 3:1, 5, 7, 8, 13.

⁴ Wahnpoaron Piter pil alehdi kaweid en ngehn sarawi en ntingihdi duwen imwin rahn akan. Nin duwen me e kohpadahr, aramas akan sohte kin ihte soikala dahme mehlel ahpw irail pahn kepitiki Mahsen en Koht oh pil kepitiki aramas oko me kin kalohki padahk mehlel. “Nin duwen dahme pein irail inengieng,” irail soun kepit pwukat kin pohnsehse me sampah ni mwehin Noha lelohng Nohlik en pihl lapalap, oh met wia kasalepen kadeik me pahn kohdo mwuhr. Arail madamadau pahn wehwehki ohla laud pahn lelohng irail ni ahnsou me sapwellimen Koht ahnsou pahn lelodo en kauwehla aramas akan me sohte pwoson Koht.​—2 Piter 3:3-7.

Sapwellimen Siohwa Ladu kan Ese Dahme Mehlel

5. Nin duwen dahme soukohp Daniel kohpada, dahme pahn wiawi ni “imwin rahn akan,” oh iaduwen sapwellime kokohpo pweida?

⁵ Nin duwen kawehwehn “imwin rahn akan,” soukohp Daniel kohpada wiewia tohrohr ehu me pahn mih rehn sapwellimen Koht aramas akan​—kehlailadahn sarawi ong padahk mehlel. E ntingihdi: “Me tohto me pahn ropseli, oh loalokong mehlel pahn rekila.” (Daniel 12:4, NW) Sounlikamw lapalapo sohte pahn kapingada madamadau en sapwellimen Siohwa aramas akan oh pil sohte karotongala masarail akan. Ni arail kin ropseli nan Pwuhk Sarawi, irail pahn sukuhliki loalokong pwung. Nan tepin ahnsoun Kristian akan, Sises kin ketikihda kamarain ong sapwellime tohnpadahk kan. E ketin “kamarainihada arail madamadau kan ni unsek pwe irail en kak dehdehkihla wehwehn iren Pwuhk Sarawi kan.” (Luk 24:45) Nan atail ahnsou, Siohwa pil ketin wia duwehte. Sang ni sapwellime Mahsen, sapwellime ngehn sarawi, oh sapwellime pwihn, e kahrehiong aramas rar rar kei wasa koaros nan sampah en wehwehkihda dahme e kin ketin mwahngih​—dahme mehlel.

6. Padahk mehlel dah kei me sapwellimen Koht aramas akan nan rahnwet kin wehwehki?

⁶ Nin duwen atail wia sapwellimen Koht aramas akan, kitail esehla soahng tohto me kitail kakete sohte iang ese. Kitail esehla pasapengpen peidek kan me aramas loalokong en sampah kan kin apwal en koledi ni erein pahr ngeder. Karasepe, kitail wehwehki dahme kahrehda apwal akan kin mie, dahme kahrehda aramas kin mehla, oh dahme kahrehda aramas sohte kak ahneki soangen meleilei oh minimin me pahn kipe sampah pwon. Kitail pil ale kapai en ahneki kaudiahl en ahnsou kohkohdo kolokoliong kitail​—Wehin Koht, paradais nin sampah, oh mour unsek me sohte imwi. Kitail esehla Siohwa, me lapalapasang aramas koaros. Kitail pil sukuhliki duwen sapwellimen Siohwa irair kadek oh pil iangahki dahme kitail en wia pwe kitail en perenki sapwellime kapai kan. Ni atail pahn esehla padahk mehlel e pahn sewese kitail en kak kasawihada dahme sohte mehlel. Ni atail pahn doadoahngki dahme mehlel, e pahn kin pere kitail en dehr wia mehkan me sohte katepe, oh kin kahrehong kitail en wia dahme keieu mwahu nan mour, oh kihong kitail koapworopwor mwahu ong ahnsou kohkohdo.

7. Ihs irail akan me ahneki padahk mehlel en Paipel, oh ihs irail akan me sohte ahneki?

⁷ Ke wehwehki padahk mehlel en Paipel? Ma iei, eri kapai laud ehu met ong komwi. Ni ahnsou me soun nting men ntingihada pwuhk ehu, e kin ntingihada en kak dokedoke soangen pwihn en aramas ieu. Ekei pwuhk ntingihda ong aramas sukuhl laud akan, meteikan oh kisin seri kan oh ekei ong aramas me perenki soangsoangen iren mehn kasukuhl akan. Mehlel me Paipel wiawihda pwe aramas koaros en kak naineki, ahpw Paipel wiawihda pwe soangen aramas ieu en wehwehki audepe oh irail pereperenki. Siohwa kaweidada pwuhk wet ong irail akan me karakarahk oh opampap en nan sampah. Soangen aramas pwukat kak koledi mwadang audepen Paipel, sohte lipilipil ia uwen laud en sukuhl me re iang, de mehnia tiahk me re keirida loale, de ma re lapalap de soh de irail mehn sahpw dah. (1 Timoty 2:3, 4) Ahpw, ni pali teio, wehwehn Paipel kin rirsang rehn irail oko me sohte ahneki madamadau pwung. Irail me aklapalap oh kala sohte kak alehdi padahk mehlel oh kesempwal en Mahsen en Koht. (Madiu 13:11-​15; Luk 10:21; Wiewia 13:48) Koht kelepw me kak ketin wiahda soangen pwuhk me duwehte met.

Sapwellimen Siohwa Ladu kan Kin Mehlel

8. Dahme kahrehda Sises wia mehn kadehde mehlel en padahk mehlel?

⁸ Duwehte Siohwa, sapwellime Sounkadehde lelepek kan wia aramas mehlel ekei. Sises Krais, me wia Sounkadehdehn Siohwa poatopoat, kamehlelehda dahme mehlel sang ni soahng kan me e kin padahki oh pil sang ni ahl me e momour oh mehla. E kin lelepekiong padahk mehlel me pid mahsen en Siohwa oh sapwellime inou kan. Kahrehda, Sises wia mehn kadehde mehlel en padahk mehlel oh ih me mehlel, nin duwen dahme pein ih mahsanih.​—Sohn 14:6; Kaudiahl 3:14; 19:10.

9. Dahme iren Paipel kan kasalehda duwen lokaia mehlel oh koasoi mehlel?

⁹ Sises kin “diren kadek oh padahk mehlel” oh “sohte likamw kohsang nan ewe.” (Sohn 1:14; Aiseia 53:9) Kristian mehlel akan kin kahlemengih dahme Sises kin wia ni e kin mehleliong aramas teikan. Pohl kaweidki ienge me pwoson akan: “Lokaia mehleliong riomw Kristian kan pwehki kitail kin miniminpene nanpwungatail.” (Episos 4:25) Mwohn met, soukohp Sekaraia ntingihdi: “Lokaia mehlel ong emen emen.” (Sekaraia 8:16) Kristian akan kin mehlel pwe re kin men kaperenda Koht. Siohwa kin mahsen mehlel oh mwahngih duwen kahpwal akan me kin kohsang likamw. Kahrehda, E ketin kupwurki sapwellime ladu kan en koasoi mehlel.

10. Dahme kahrehda aramas kin likamw, oh soangen suwed dah kan me met pahn imwikihla?

¹⁰ Ong aramas tohto, wie likamw ele kin kamengeila elen alehdi kamwahu kei. Aramas kin likamw pwehn pitsang kalokolok, de alehda mehkot me re mwahuki, de alehdi kaping sang rehn aramas teikan. Ahpw, aramas kak ahnla kalap wie likamw oh e kin apwal en kesehla. Ahpw me laudsang met, aramas likamw men sohte kak alehdi kupwur mwahu en Koht. (Kaudiahl 21:8, 27; 22:15) Ni ahnsou me aramas pahn ese me kitail kin mehlel, irail pahn kamehlele dahme kitail kin nda; irail pahn likih kitail. Ahpw, ma re pahn diarada atail likamw, mehnda ma pak ehu, irail pahn sohte kak kamehlele dahme kitail pahn nda ni ahnsou kohkohdo. Lepin koasoi en Aperika ieu kin nda: “Likamw ehu kin kak kauwehla koasoi mehlel pak kid.” Pil ehu lepin koasoi nda: “Sounlikamw emen sohte me pahn kamehlele, mehnda ma dahme e ndao me mehlel.”

11. Ni ahl dah me mehlel kin kaidehn ihte nda dahme mehlel?

¹¹ Mehlel kin laudsang ihte nda dahme mehlel. E wia elen mour en aramas emen. E kin kasalehda ihs kitail. Kitail kin kasalehiong meteikan dahme mehlel kaidehn sang dahme kitail kin nda kelepw, ahpw pil sang dahme kitail kin wia. Wahnpoaron Pohl peidekki: “Ke kin padahkih meteikan​—⁠a dahme ke sohte pil padahkih pein kowe? Ke kin nda, ‘Dehr pirap,’ a ia duwe, ke kin pirap? Ke pil kin nda, ‘Dehr kamwahl,’ a ia duwe, ke kin kamwahl?” (Rom 2:21, 22, NW) Ma kitail pahn padahkiong meteikan dahme mehlel, kitail en pil mehlel ni ahl akan koaros. Soaretail me pid mehlel oh lelepek pahn kamwekid laud iaduwen aramas ahr pahn mwekidki atail padahk.

12, 13. Dahme aramas pwulopwul men ntingihada me pid duwen mehlel, oh dahme wiawiong en kolokol irair en tiahk mwahu?

¹² Irail sapwellimen Siohwa ladu pwulopwul akan pil wehwehki kesempwalpen wia aramas mehlel. Ni ahnsou en wia nah doaropwe (essay) nan sukuhl, Jenny, me ahnsowo sounpahr 13, ntingihdi: “Mehlel mehkot me inenen kesempwal. Ahpw, meid suwed pwe kaidehn aramas tohto kin uhdahn mehlel nan rahnwet. I inoukihong pein ngehi me I pahn ahnsou koaros kolokol irair en mehlel nan ahi mour. I pahn lokaia mehlel mehnda ma lokaia mehlel sohte pahn ahnsowote wahdo kamwahu ong ngehi de kompoakepahi kan. Ahnsou koaros I kin kilang pwe kompoakepahi kan en kin wia aramas lokaia mehlel oh sohte kin likamw.”

¹³ Ni ahnsou me ahn Jenny sounpadahk kapwung nein Jenny doaropwe (essay), e ntingihdi: “Ke inenen pwulopwuliong wiahda soangen madamadau kehlail en tiahk mwahu oh pilipil mwahu duwehte met. I ese me ke pahn poadidiong ahmw pilipil pwe ke me lamalam kehlail.” Dahme kahrehda serepein tohnsukuhl menet kak ahneki irair en kasalehda tiahk mwahu ahnsou koaros? Ni tepin nah doaropwe, e koasoia me ah pelien lamalam “me kihong elen kaweid ong ah mour.” Mwurin sounpahr isuh sang ahnsou me Jenny ntingihada nah doaropwe oh nin duwen me sounpadahk kasalehda, Jenny doudoulahte mwowe oh kasalehda tiahk mwahu nan ah mour en wia Sounkadehdehn Siohwa.

Sapwellimen Siohwa Ladu kan Kin Kasalehda Dahme Mehlel

14. Dahme kahrehda sapwellimen Koht ladu kan ahneki pwukoa laud en kolokol dahme mehlel?

¹⁴ Mehlel, aramas akan likin Sounkadehdehn Siohwa kan kak pil lokaia mehlel oh nantihong kapwaiada dahme re koasoia. Ahpw, nin duwen ladu en Koht akan, kitail ahneki pwukoa en kolokol dahme mehlel. Likilik kohwong kitail en apwahpwalih padahk mehlel en Paipel​—padahk mehlel me kak kahluwalahng aramas akan ong mour soutuk. Kahrehda, kitail pwukoahki en ehukihong meteikan duwen padahk mehlel. Sises mahsanih: “Irail koaros me mehkot laud kohwong irail, kasikpen mehkot laud pahn kohsang rehrail.” (Luk 12:48, NW) Ei, met mehlel pwe ‘kasikpe laud mie’ sang rehn irail oko me ale kapai en wehwehki loalokong pwung oh kesempwal me pid duwen Koht.

15. Soangen peren dah me ke kin diar ni ahmw kin koasoiaiong aramas teikan duwen padahk mehlel?

¹⁵ E kin kaperen en ehukihong meteikan duwen padahk mehlel sang nan Paipel. Duwehte sapwellimen Sises tohnpadahk kan, pil kitail kin kalohkiseli Rongamwahu​—pahngok ieu me kaperen ong mohngiong oh kin wahdo koapworopwor​—ong irail “me seiseisang wunarail oh wiakaulahr duwehte sihpw me sohte silepahr” oh irail oko me maskun oh rotkihlahr “padahk en ngehn saut akan.” (Madiu 9:36, NW; 1 Timoty 4:1) Wahnpoaron Sohn ntingihdi: “Sohte me I perenki sang ei rong me nei seri kan kin momourki mour mehlel.” (3 Sohn 4) Lelepek en sapwellimen Sohn “seri kan”​—mwein ele irail oko me Sohn kapedolong ong nan padahk mehlel​—kin wahdohng ih peren laud. E pil kin wahdohng kitail peren laud ni atail kin kilang aramas akan me kin perenki rong Mahsen en Koht.

16, 17. (a) Dahme kahrehda kaidehn aramas koaros kin perenki padahk mehlel? (b) Soangen peren dah me ke kak ahneki ni ahmw kin kalohki padahk mehlel en Paipel?

¹⁶ Mehlel, kaidehn aramas koaros pahn alehda padahk mehlel. Sises kin padahki padahk mehlel duwen Koht, pil lel ni ahnsou me aramas kin kahng rong. Ih eri mahsanihiong mehn Suhs me kin uhwong ih: “Dahme kahrehda kumwail sohte kin kamehlele ie? Ih me sang rehn Koht kin rong kaweid akan me sapwellimen Koht. Ahpw, kumwail kaidehn sang rehn Koht, iei me kahrehda kumwail sohte kin rong.”​—Sohn 8:46, 47.

¹⁷ Duwehte Sises, kitail sohte kin pweieksang atail kin koasoiaiong padahk mehlel oh kesempwal duwen Siohwa. Kitail sohte kasik me aramas koaros pahn pwungki dahme kitail kin koasoiaiong irail, pwehki kaidehn aramas koaros kin men rong sapwellimen Sises padahk. Ahpw, mendahki met, kitail ahneki peren en ese me kitail wiewia dahme pwung. Sang nan sapwellimen Siohwa limpoak-kadek, E ketin kupwurki padahk mehlel en sansal ong aramas koaros. Pwehki Kristian akan arail wehwehki padahk mehlel, irail wiahla kamarainpen sampah nan ahnsoun rotorot. Sang ni atail pahn kapwarewei marain en padahk mehlel ki atail koasoi oh wiewia, kitail kak sewese meteikan en kapingahki Samatail nanleng. (Madiu 5:14, 16) Kitail pahn kasalehiong wehi pokon en wehwehki me kitail kin soikeweisang rehtail ahn Sehdan elen wekid padahk mehlel ong padahk likamw oh me kitail kin kolokol Mahsen en Koht me mehlel. Padahk mehlel me kitail kin ese oh ehukihong meteikan pahn kasaledengkihla aramas akan me pahn alehda padahk mehlel.​—Sohn 8:32.

Rapahki Ahl me Mehlel

18. Dahme kahrehda oh pil iaduwen Sises ah kin kupwure Nadaniel?

¹⁸ Sises kin poakohng oh pil lohkiwei padahk mehlel. Ni ahnsou me Sises kin wia doadoahk en kalohk nan sampah, e kin kasalehda me e kin poakohng irail akan me wia aramas mehlel. Sises mahsanih duwen Nadaniel: “Iet uhdahn ohl mehlel en Israel men, me sohte kin widing.” (Sohn 1:47) Kahrehda, Nadaniel, me ele pil adaneki Pardolomiu, pilipilda en wia emen sapwellimen Sises wahnpoaron 12. (Madiu 10:2-4) Ia uwen kapai!

19-21. Iaduwen ohl maskuno ah alehdi kapai sang ni ah eimah oh koasoia dahme mehlel?

¹⁹ Irelaud ehu pwon nan pwuhken Sohn kin koasoia duwen ohl emen me mehlel oh Sises ketin kapaiada ih. Kitail sehse eden ohlo. Ahpw, dahme kitail ese me ohl menet me kin wie pekipek ni keilen ahl oh e maskun sang ni ah ipwidi. Aramas akan pwuriamweikihla ni ahnsou me Sises kihong en kilangada wasa. Rohng en ire kapwuriamwei wet lelowohng ekei Parisi kan, me kin kailongki padahk mehlel, oh irail pwungkihdahr nanpwungarail me mehmen me pahn pwosonla Sises e pahn piskensang nan sinakoke oh sohla iang towe. Ni ahn ohlo pahpa oh nohno esehda duwen dahme Parisi kan pahn wia, ira masepwehkada oh ira pitih Parisi kan oh nda me ira sehse iaduwen neira ohlo ah kilangada wasa oh pil ira sehse ihs me kamwahwihala.​—Sohn 9:1-​23.

²⁰ Ohlo eri pwurehng likwerdo mwohn Parisi kan. Mendahkihla dahme kak lelohng ih, ni eimah e koasoia dahme mehlel. E kawehwehda ia mwomwen ah mwahula oh me Sises me wiahda met. Ohlo inenen pwuriamweikihla aramas lapalap oh loalokong pwukat ahr sohte kamehlele me Sises ketidohsang rehn Koht, ih eri kangoangehkin irail ni sohte masak irail en kamehlele dahme re kak kilang oh nda: “Ma ohl menet kaidehn sang rehn Koht, e sohte kak wiahda mehkot.” Parisi kan sohte kak sapeng, kahrehda re dene me ohlo loaumwohmw oh irail eri kausasang nan sinakoke.​—Sohn 9:24-​34.

²¹ Ni en Sises mwahngih ire wet, ni limpoak e rapahki ohlo. Mwurin met, e kalaudehla pwoson en aramas menet me maskun mahso ah met mwahulahr. Sises pein wehkada me ih me Mesaia. Ia uwen kapai me ohlo ale pwehki a kasalehda dahme mehlel! Ni mehlel, irail oko me kin koasoi mehlel kin alehdi sapwellimen Siohwa kupwurmwahu.​—Sohn 9:35-​37.

22. Dahme kahrehda kitail en nantihweite nan elen dahme mehlelo?

²² Wiewia dahme mehlel oh koasoi mehlel iei mehkot me kitail anahne lelepekiong. Iei poahsoanen atail en kak wonowei mwowe oh kolokol nanpwung mwahu rehn aramas oh pil rehn Koht. En mehlel kin wehwehki kitail en saledek en koasoi mehlel, dehr mwalaun, mengei en koasoiong, oh likilik, oh Siohwa kin kupwurperenki aramas me kin mehlel. (Melkahka 15:1, 2) Sohte mehlel iei wie lokaia likamw, sou likilik, oh mour likamw, oh e kin kahrehdo engieng en Siohwa. (Lepin Padahk 6:16-​19) Kahrehda, kitail en nantihong rapahki elen lokaia mehlel oh mehlel nan atail mour. Ni mehlel, ma kitail men kahlemengih Koht en me mehlelo, kitail uhdahn anahne ese dahme mehlel, koasoi mehlel oh mourki padahk mehlel.

Iaduwen Ke Pahn Sapeng?

• Dahme kahrehda kitail en kalahnganki me kitail ese padahk mehlel?

• Iaduwen kitail kak kahlemengih Siohwa ni atail kin mehlel?

• Soangen kamwahu dah kan me mie ni atail pahn kin ehukihong meteikan padahk mehlel?

• Dahme kahrehda e kesempwal kitail en nantihweite nan elen dahme mehlel?

[Kilel nan Pali 24]

Pwehki Siohwa likikihiong kitail padahk mehlel en Paipel, kitail Kristian akan kin ngoangki padahkiong meteikan padahk mehlel wet

[Kilel nan Pali 26]

Ohl maskuno me Sises kamwahuwihala ale kapai laud pwehki e lokaia mehlel