Koaros me Nda me Irail “Kristian” Uhdahn Kristian kei?
KRISTIAN depe nan sampah pwon? Pwuhk ehu koasoia me nan pahr 2010 mie aramas 2.3 lik kei nan sampah me nda irail Kristian. (Atlas of Global Christianity) Ahpw pwuhko pil kasalehda me irail pwukat kin iang pelien sarawi tohtohsang 41,000 me ehuehu pali pwukat mie pein arail padahk kan oh koasoandi en mwomwen arail wiewia kan. Pwehki irair wet, ekei kin pingkihda. Ele mwein re kin medewe ‘Koaros me nda me irail Kristian uhdahn Kristian kei?’
Kitail song kilang ire wet ni ehu ahl tohrohr. Soun seiloak men kin anahne nda me e wia towe mehlel en wasa me e kohsang ie mwohn eh pahn pedolong nan sahpw ehu. E pil anahne kadehdehda mehlelpen dahme e ndao sang ni eh pahn kasalehda nah passport ape. Pil duwehte, Kristian mehlel men anahne wia laudsang ndahte me e pwoson Krais. E anahne ahneki irair kan me kadehdehda me ih uhdahn Kristian men. Dahkei met?
Lepin lokaia “Kristian” tepin kadoadoahk ekiste mwurin pahr 44. Soupoad en Paipel Luk koasoia: “Ni eh diarada e ahpw kahredohng Andiok. Nan irair en sounpar ehu ira riemenet kin tuhwong tohn mwomwohdiso oh kin padahkih aramas tohto. Iei pil nan Andiok me tohnpadahk ko adanekihla sapwellimen Krais [“Kristian,” NW].” (Wiewia 11:26) Tehk me irail kan me adaneki Kristian kan iei sapwellimen Krais tohnpadahk kan. Ia duwen emen eh kin wia sapwellimen Sises tohnpadahk men? Ehu dikseneri kawehwehda: “En idawehn Sises nin duwen tohnpadahk men kin wehwehki en tounmeteikihla [eh] mour nan soangsoangen irair koaros . . . erein eh mour.” (The New International Dictionary of New Testament Theology) Ihme kahrehda, Kristian mehlel men iei emen me kin idawehn sapwellimen Sises padahk kan oh kaweid kan ni unsek nan soangsoangen irair koaros.
Ia duwe, kitail kak diarada soangen aramas pwukat nanpwungen irail kan me kin nda me irail Kristian kei nan rahnpwukat? Dahme pein Sises mahsanih me pahn kasansalehda ihs me uhdahn sapwellime tohnpadahk kan? Se luke iuk en tehk ia duwen Paipel eh sapengala peidek pwukat. Nan ire kan en mwuhr, kitail pahn tehkpene ire limau me Sises mahsanih me pahn kasalehda irair en Kristian mehlel kan oh pahn sewese kitail en diarada ihs me uhdahn sapwellime tohnpadahk kan. Kitail pahn tehk ia duwen tepin Kristian akan arail kasalehda mepwukat. Oh kitail pahn song kilang ihs nanpwungen me tohto me kin nda me irail Kristian me kin kasalehda irair pwukat.