Soangen Kapahrekihpene Ehu Me Keieu Katapan Me Ke Kak Wia

KE KIN wiahki kowe emen Kristian? Ma ei, ke iang wia kisehn aramas daulih rielik nan sampah, kereniong 1 nanpwungen meh 3 kin kose me irail kin idawehn Krais. Rahnwet, mie pwihnen lamalam kid kei me kin nda irail Kristian kei, ahpw arail padahk kan kin wekpeseng oh madamadau kan wekpeseng. Eri dahme ke kamehlele ele weksang douluhl dahme irail kan me kose me irail Kristian kei kin kamehlele. Ia duwe, e uhdahn kesempwal dahme ke kamehlele? Ei, e kesempwal, ma ke men kapwaiada dahme Paipel padahngki duwen pelien lamalam en Kristian.

Tepin tohnpadahk en Sises Krais kan tepida adaneki “sapwellimen Krais.” (Wiewia 11:26) Sohte anahnepen ahd tohrohr ehu pwehn kasalehda ihs irail, pwehki lamalam en Kristian ehute me mie ahnsowo. Kristian kan kin miniminpene idawehn padahk kan oh kaweid kan en Aramaso me tapiada lamalam en Kristian iei Sises Krais. Ia duwen omw pelien lamalam? Ke kamehlele me e kin padahngki dahme Krais kin padahngki oh dahme tepin tohnpadahk en Krais ko kin kamehlele? Ia duwen omw kak ese ma met mehlel? Mie ehute elen ese met iei en doadoahngki Paipel nin duwen tuhkehn mehn sosohng.

Medewe duwen met: Sises Krais uhdahn wauneki Paipel nin duwen Mahsen en Koht. E sohte kupwurki irail kan me kin kasapwungehla padahk en Paipel kan sang ni ar kin mwohneki mahs tiahk en aramas akan. (Mark 7:9-13) Ihme kahrehda kitail kak pwungki me tohnpadahk mehlel en Sises kan pahn poahsoanekihda Paipel soahng kan me re kamehlele. Eri emenemen Kristian en wia met ni eh pein idek reh, ‘Padahk kan en ei pelien lamalam kin pwungiong Paipel?’ Pwehn sapengala peideko, ke sou kapahrekihpene dahme omw pelien lamalamo kin padahngki ong dahme Paipel uhdahn mahsanih?

Sises mahsanih me atail kaudokiong Koht anahne poahsoankihda padahk mehlel, padahk mehlelo dierek nan Paipel. (Sohn 4:24; 17:17) Oh wahnpoaron Pohl koasoia me atail komourla kin pidada atail “marainkihla me mehlel.” (1 Timoty 2:4) Eri e kesempwal me soahng kan me kitail kamehlele en kin poahsoankihda padahk mehlel pwung en Paipel. Kesempwal, pwe met kin pidada atail komourla!

IA DUWEN ATAIL KAK KAPAHREKIONG DAHME KITAIL KAMEHLELE ONG PAIPEL

Se luke iuk en wadek peidek weneu me mi nan koakon wet oh tehk pasapeng en Paipel kan ong peidek pwuko. Tehk iren Paipel kan me kileldi, oh medemedewe pasapeng kan. Kowe eri pein idek rehmw, ‘Ia duwen padahk kan en ei pelien lamalamo eh pahrekiong dahme Paipel kin mahsanih?’

Kisin peidek mwotomwot pwukat ele kak seweseiuk ken wiahda mehkot katapan ong uhk ni omw kapahrekihpene soahng riau. Ia duwe, ke men kapahrekihpene padahk teikan en omw pelien lamalam ong dahme Paipel mahsanih? Sounkadehdehn Siohwa kan pahn perenki seweseiuk en tehk ni keneinei padahk mehlel en Paipel. Ke sou peki rehn emen Sounkadehde ong onop Paipel ni soh isepe? De ke kak kohla nan nait website, jw.org.

1 PEIDEK: Ihs Koht?

PASAPENG: Siohwa, iei Semen Sises, ih Koht poatopoat oh Sounkapikada lapalahpie en mehkoaros.

DAHME PAIPEL MAHSANIH:

“Se kin poaden kapingkalahngan ong Koht, Semen atail Kaun Sises Krais, ni at kin kapakapkin kumwail.”—Kolose 1:3.

“Maing at Kaun oh at Koht! Komwi me uhdahn warohng sapwellimanki lingan, wahu, oh roson. Pwe komwi me ketin wiadahr mehkoaros.”—Kaudiahl 4:11.

Menlau pil kilang Rom 10:13; 1 Timoty 1:17.

2 PEIDEK: Ihs Sises Krais?

PASAPENG: Sises iei sapwellimen Koht ohl mesenih. Sises ketin kepikipikda kahrehda mie tapi. Sises kin ketin uhpahiong Koht oh kin peikiong kupwuren Koht.

DAHME PAIPEL MAHSANIH:

“Sahmo . . . me lapalapasang ie.”—Sohn 14:28.

“Krais me kasalepen Koht me soh sansal; iei ih me mesenih oh lapalap sang soahng kan koaros me kepikipikda.”—Kolose 1:15.

Menlau pil kilang Madiu 26:39; 1 Korint 15:28.

3 PEIDEK: Dahkot “Ngehn Sarawi”?

PASAPENG: Mewet iei kehl de manaman me Koht kin ketin doadoahngki pwehn kapwaiada kupwure. Mewet kaidehkin mehmen. Aramas kin kak audaudkihda sapwellimen Koht manaman oh pil kehlailkihda kehl sang sapwellimen Koht manaman.

DAHME PAIPEL MAHSANIH:

“Ni Elisapet eh rongada en Mery eh rahnmwahwo, serio pa mwekidida nan kapehde. Elisapet eri direkihla Ngehn Sarawi [“sapwellimen Koht manaman,” NW].”—Luk 1:41.

“Kumwail pahn audaudkihda manaman ni ahnsou me Ngehn Sarawi [“sapwellimen Koht manaman,” NW] pahn ketidohng kumwail.”—Wiewia 1:8.

Menlau pil kilang Senesis 1:2; Wiewia 2:1-4; 10:38.

4 PEIDEK: Dahkot Wehin Koht?

PASAPENG: Wehin Koht iei koperment ehu nanleng. Sises me ketin wia Nanmwarki en Wehin Koht. Ni ahnsou keren Wehi wet pahn kahrehiong kupwuren Koht en pweida wasa koaros nin sampah.

DAHME PAIPEL MAHSANIH:

“Tohnleng keisimeno ahpw peuk nah sowio; a iet mwoarong laud kei ahpw kadirehla nanleng me ndinda, ‘Atail Kaun oh sapwellime Mesaia uhd sapwellimankiher manaman en kaunda sampah ahnsou wet, oh e pahn ketin kaunda erein dih koaros kohkohlahte!’”—Kaudiahl 11:15.

Menlau pil kilang Daniel 2:44; Madiu 6:9, 10.

5 PEIDEK: Aramas mwahu koaros pahn kohla nanleng?

PASAPENG: Soh. Pwihnen aramas lelepek malaulaukeite me adaneki “kisin pwihn sihpw,” me Koht ketin piladahr ren kohla nanleng. Irail pahn iang Sises kaunda tohnsampah nin duwen nanmwarki kei.

DAHME PAIPEL MAHSANIH:

“Kumwail kisin pwihn sihpw, kumwail dehr perki mehkot. Pwe Samamwail kupwurperenkidahr en ketikihong kumwail sapwellime wehi.”—Luk 12:32.

“Re pahn wiahla samworo en Koht oh Krais, oh re pahn iang kakaun erein pahr kido.”—Kaudiahl 20:6.

Menlau pil kilang Kaudiahl 14:1, 3.

6 PEIDEK: Ia kupwuren Koht ong sampah oh aramas akan?

PASAPENG: Pahn kaundahn Wehin Koht, sampah pahn wiahla paradais ehu oh aramas lelepek kan pahn nsenamwahuki ar roson unsek, popohl poatopoat oh mour soutuk.

DAHME PAIPEL MAHSANIH:

“Me aktikitik kan pahn sapwenikihla sahpwo oh re pahn paiamwahu oh popohl.”—Melkahka 37:10, 11.

“E pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.”—Kaudiahl 21:3, 4.

Menlau pil kilang Melkahka 37:29; 2 Piter 3:13.