Dahme Sounkadehde Kan En Siohwa Kamehlele?
“Ahpw se lemeleme me konehng en rong sang kumwail duwen amwail lamalam kan, pwe mehlel me pid ong pwihn wet se ese me nan wasa koaros aramas akan kin pelianda irail.” (Wiewia 28:22) Kaun en kousahpw akan ni tepin pahr en Rom wia kahlemeng mwahu. Re men ese sang rehn irail Kristian akan, kaidehn sang rehn sounkawe kan.
Duduwehte, rahnwet mie tohto aramas me kin kalikamwe Sounkadehde kan en Siohwa, oh sapwung ehu en sukuhliki padahk mehlel sang rehn irail akan me ahnikier lamalam en uhweng. Eri, se perenki en kawehwehong uhk ekei padahk kesempwal kan me se kin kamehlele.
Paipel, Sises Krais, oh Koht
Se kamehlele me “iren paipel kan koaros pwilsang rehn Koht oh e mwahuwong kitail.” (2 Timoty 3:16) Mendahki ekei kin nda kiht kaidehn Kristian mehlel, met kaidehn mehlel. Se pwungki mehlel dahme wahnpoaron Piter kadehdehier duwen Sises Krais: “Sohte pil ehu mwahr pahnlahng me kohwong aramas akan, pwe en kak komourkitailla.”—Wiewia 4:12.
Ahpw, pwehki Sises mahsanih me ih “Sapwellimen Koht Ohl” oh “Sahm kadariehdo,” eri Sounkadehde kan en Siohwa kamehlele me Koht lapalapsang Sises. (Sohn 10:36; 6:57) Sises pein mahsanih: “Sahmo lapalap sang ie.” (Sohn 14:28; 8:28) Eri, kiht sohte kamehlele me Sises pahrekiong Semeo, nin duwen padahk en Trinity koasoia. Ahpw, se kamehlele e kapikpikda sang rehn Koht oh kin ketin uhpaiong Ih.—Kolose 1:15; 1 Korint 11:3.
Ni lokaiahn wai, mwaren Koht iei Jehovah. Paipel mahsanih: “Rahpw pahn esehki me komwihte mwareneki JEHOVAH, oh me komwihte lapalap nan sahpw koaros.” (Melkahka 83:18, King James Version) Me pwungong ire wet, Sises kesempwalki laud mwaren Koht, padpadahkiong nah werek kan en kapakapki kapakap wet: “Samat me ketiket nanleng, mwaromwi en sarawihla.” Pein ih kapakap ong Koht: “I kasalehdahr mwaromwi ong irail akan me komw ketikiong ie.”—Madiu 6:9; Sohn 17:6.
Sounkadehde kan en Siohwa kamehlele me re anahne alasang Sises ni ahr kasaleong meteikan duwen mwaren Koht oh kupwure kan. Ihme kahrehda se ale mwaro Sounkadehde kan en Siohwa, pwehki se alasang Sises me “Sounkadehde Lelepeko.” (Kaudiahl 1:5; 3:14) E konehng, Aiseia 43:10 en mahsanihong sapwellimen Koht aramas akan: “‘Kumwail nei sounkadehde kan,’ Siohwa mahsanih, ‘pil nei ladu me I ketin pilada.’”
Wehin Koht
Sises padahkiong nah tohnpadahk kan en kapakap, “wehiomwi en ketido,” oh e kin keieu kesempwalki koasoi duwen Wehio me iei oaralap en ah padahk kan. (Madiu 6:10; Luk 4:43) Sounkadehde kan en Siohwa kamehlele me Wehio iei koperment mehlel ieu me kohsang nanleng, oh e pahn kaunda pohnangin sampah, oh me Sises Krais idihda en wiahla Nanmwarki soh sansal en koperment wet. “Wehio pahn mihmi pohn pwopwe,” Paipel mahsanih. “Sapwellime manaman pahn lapalahpie, oh popohl pahn poatopoat nan sapwellime wehi.”—Aiseia 9:6, 7, KJ.
Ahpw, kaidehn Sises Krais kelehpw pahn wia nanmwarki nan sapwellimen Koht koperment. Tohto pahn iang ih kaunda sang nanleng. “Ma kitail pahn dadaurete,” wahnpoaron Pohl ntingihdi, “kitail pahn iang kakaun nin duwen nanmwarki kan.” (2 Timoty 2:12) Paipel kasalehda me aramas ako me pahn iang iasada en kaunda rehn Krais nanleng ihete me “lop pahnen pahkid, me pweipweidahr sang nin sampah.”—Kaudiahl 14:1, 3.
Mehlel, koperment koaros anahne towe kan, oh Sounkadehde kan en Siohwa kamehlele me aramas lik kei likin irail kaun en nanleng kan pahn koanoahdi mour soutuk. Sampah pahn ekis ekis wikidekla ong paradais kaselel ieu oh pahn direkihla irail kan me warong wia tohn Wehin Koht, koaros uhpaiong kaunda en Krais oh sapwellime ienge kaun kan. Ihme Sounkadehde kan en Siohwa kamehlele ni unsek me sampah sohte pahn ohla, oh inou en Paipel pahn pweida: “Me pwung kan pahn koukousoan nan sampah, oh re pahn koukousoan ie kohkohlahte.”—Melkahka 37:29; 104:5.
Ahpw iaduwen Wehin Koht pahn ketido? Ki ahn aramas koaros pein uhpaiong wehin Koht? Weksang met, Paipel kasalehda me ketidohn Wehio pahn anahne en Koht kamwekidada wiewiahn sampah: “Koht en nanleng pahn ketin kauwada wehi ehu me sohte pahn sohrala. Wehio . . . pahn kauwehla oh kaimwsekala wehi teikan koaros, oh pahn mihmi kohkohlahte.”—Daniel 2:44.
Iahd Wehin Koht pahn ketido? Pwehki kokohp kan en Paipel pweidahr, ni ahnsowet Sounkadehde kan en Siohwa kamehlele e pahn kohdo ni ahnsou keren. Se luhke komwi en wadek ekei kokohp kan me kohpadahr ire kan en “imwin rahn akan” en koasondi suwed wet. Re ntingidier nan Madiu 24:3-14; Luk 21:7-13, 25-31; oh 2 Timoty 3:1-5.
Pwehki se ‘poakong Siohwa atail Koht ki atail mohngiong unsek, mour unsek, lamalam koaros unsek, oh kehl unsek, oh mehn mpatail kan duwen pein kitail,’ se sohte kin saminimin pwehki wehi, pohn kihl de irair en aramas. (Mark 12:30, 31) Aramas tohto nan sampah pohnese limpoak me sansalda nanpwungen riat Kristian kan sang wehi kan koaros. (Sohn 13:35; 1 Sohn 3:10-12) Eri se kolokol lamalam en sohpoupali ong mehkot me pid palien politik en wehi kan. Se song en alasang sapwellimen Sises tohnpadahk kan en mahs, me e mahsanihki: “Irail kaidehn kisehn sampah, duwehte ngehi kaidehn kisehn sampah.” (Sohn 17:16) Se kamehlele me en tohrohr sang sampah wehwehki liksang tiahk sapwung me kin kalapw wiawi rahnwet duwehte likamw, pirap, nenek, kamwahl, ohl mwahuki ohl, doadoahngki nta ni ahl sapwung, dikedik en eni, oh pil wiewia kan me Paipel keinapwih.—1 Korinth 6:9-11; Episos 5:3-5; Wiewia 15:28, 29.
Koapwoaroapwoar ong Ni Ahnsou Kohkohdo
Sounkadehde kan en Siohwa kamehlele atail mour en ahnsowet kaidehn ihte me mie. Se kamehlele me Siohwa kadarodohr sapwellime Krais nan sampah pwehn kakerehdi ntah kesempwal nin duwen tomw ehu pwe aramas en kak ahneki nanpwung mwahu rehn Koht oh koanohdi mour soutuk nan koasondi kapw. Nin duwen wahnpoaron en Sises mahsanih: “Kitail met pwunglahr pwehki ntah.” (Rom 5:9; Madiu 20:28) Sounkadehde kan en Siohwa inenen kalahnganki ong Koht oh sapwellime Ohl pwehki tomw wet me kahrehong mour ni ahnsou kohkohdo en kak pweida.
Sounkadehde kan en Siohwa ahneki koapwoaroapwoar laud ong mour ni ahnsou kohkohdo, poahsonda pohn kaiasada en me mehlahr akan pahnangin Wehin Koht. Se kamehlele, nin duwen padahk me kohsang Paipel, ni ahnsou emen mehla, ah mour koaros uhdier, me “ni rahno ah lamalam kin solahr.” (Melkahkah 146:3, 4; Ezekiel 18:4; Eklesiasdes 9:5) Ei, mour ni ahnsou kohkohdo ong me mehlahr kan pahn poahsonda pohn en Koht pahn tamanda irail.—Sohn 5:28, 29.
Ahpw, Sounkadehde kan en Siohwa uhdahn kamehlele me tohto me momour met pahn pitsang ahnsou me Wehin Koht pahn katokiedi koperment kan en ni ahnsowet oh, nin duwen Noah oh ah peneinei pitsang Nohliko, re pahn momourete pwehn kak paieki mour soutuk nin sampah mwakelekeldahr ehu. (Madiu 24:36-39; 2 Piter 3:5-7, 13) Ahpw se kamehlele me emen anahne kapwaiada sapwellimen Siohwa kosonned akan pwehn kak pitsang, nin duwen Paipel mahsanih: “Sampah kin sosohrala . . . , ahpw me kin kapwaiada kupwur en Koht pahn momour kohkohlahte.”—1 Sohn 2:17; Melkahka 37:11; Kaudiahl 7:9, 13-15; 21:1-5.
E sansal, kisin tract wet sohte kak koasoiada soahng koaros me Sounkadehde kan en Siohwa kamehlele, ahpw se luhke komwi en pil alehdi ire teikan.
Likin me kileldi kan, koaros iren Paipel kan kohsang kawehwehn New World Translation of the Holy Scriptures.
[Blurb on page 4]
Se ale mwaro Sounkadehde kan en Siohwa pwe se alasang Sises