Rapahki Pasapeng kan

“Kereniong aramas koaros ahneki pein arail madamadau duwen ihs [Sises]. Sohte lipilipil ia uwen atail pwoson de peikasal, kitail koaros kin medemedewe peidek wet, ‘Ihs ohl menet?’”​—SOUNNTING STAN GUTHRIE.

ARAMAS akan kin men ese duwen Sises. Aramas tohto kin men wadek pwuhk kan duwen Sises, oh re pil kin men kilang kasdo kan duwen ih. Ahpw me tohto kin ahnekihte peidek duwen Sises. Aramas akan ahneki madamadau wekpeseng duwen uhdahn ihs Sises.

Karasepe, sounpar kei samwalahr ko, sounnting en nuhs riemen luke aramas akan nan Internet ren sapeng peidek wet, “Ihs Sises?” Iet ekei pasapeng kan:

● “E sansal me ih sounpadahk men me eh mour wia mehn kahlemeng en kasalehda limpoak oh kadek.”

● “Ih aramas men me duwehte kitail, ahpw eh mour uhdahn weksang atail.”

● “Sohte mehn kadehde me Sises uhdahn mie.”

● “Sises iei sapwellimen Koht Ohl me ketin ipwidi, pwoula oh iasada pwehn kapitkitailsang dihp. E kin ieias rahnwet, oh E pahn ketin pwurodo nin sampah.”

● “I kamehlele me Sises Krais ihte sapwellimen Koht, ih uhdahn aramas men ahpw ni ahnsowohte pil koht emen.”

● “Seri kante me kin kamehlele poadopoad duwen Sises.”

E sansal me madamadau pwukat koaros sohte kak uhdahn pwung. Mie wasa ehu me kitail kak diarada pasapeng pwung kan en atail peidek kan duwen Sises? Irail me wiahda pwuhk wet kin kamehlele me Paipel iei Mahsen en Koht oh ihte me kak padahkihong kitail padahk mehlel duwen Sises.a—2 Timoty 3:16.

Nan ire mwurin met, kitail pahn koasoiapene pasapeng kan me Paipel kin kihda ong ekei peidek kan duwen Sises me kin kalapw pwarada. Pein ih mahsanih me elen komourala kohda ong koaros “me kin pwosonla.” (Sohn 3:16) Se luke iuk ken kasawih pasapeng kan oh pein pilada ma ke anahne kalaudehla omw sukuhlki Sises oh ia duwen omw pahn pwosonla.

[Nting tikitik me mi pah]