Ia Duwen Atail Miehla?

Senesis, tepin pwuhken Paipel oaralapihada duwen lahng oh sampah ara tepin miehla. E mahsanih: “Ni ahnsou me Koht tepin kapikada sampah oh mehkoaros me mi pahnlahng.” (Senesis 1:1) Mwurin Koht eh ketin kapikada tuhke, dihpw oh mahn akan, e ketin kapikada tepin aramas Adam oh Ihp. Ira weksang mahn akan pwehki aramas kapikipikda pwe ren kak kasalehda limpoak, pwung, peren oh irair kaselel teikan me Koht sapwellimanki, iangahki saledek en wiahda pilipil kan. Ihme kahrehda ira pwukoahki imwilahn ara wiewia kan. Ma ira peikiong sapwellimen Koht kaweid kan, ira kak iang sewese pweidahn kupwuren Koht oh wia tepin pahpa oh nohno en aramas koaros me pahn ahneki popohl oh mour unsek nin sampah kohkohlahte.

Ahpw mie tohnleng emen de ngehn emen me lemehda en doadoahngki aramas ong pein kamwahupe. Ih eri wiahla Sehdan me wehwehki “Sounpelian.” Ni eh doadoahngki serpent men en lokaiahiong Ihp, Sehdan pitiheki me e sohte anahne sapwellimen Koht kaweid. Adam oh Ihp idawehn Sehdan oh kauwehla ara nanpwungmwahu rehn Sounkapikparao. Pwehki ara wiahda pilipil sapwung, tepin atail pahpa oh nohno katihasang mour soutuk oh kadaurohng kitail koaros dihp, soh unsek oh mehla.

Koht ketin mwadangete kasalehda kupwure en kapwungala irair kansensuwed wet oh ketikihda ahl ehu ong kadaudoken Adam kan ren ale mour soutuk. Koht ketin kohpada me “nein liho” de kadaudoke, me wia emen me kesempwal, pahn kasohrehla douluhl Sehdan oh kihsang lokolok koaros me Sehdan, Adam oh Ihp kahrehda. (Sen. 3:15) Ihs me pahn wia kadaudoko? E pahn kedekedeo sansalda.

Ahpw erein ahnsowo, Sehdan pahn kin songosong kauhdi kupwuren Koht en pweida. Aramas suwed kan kin wie tohtohla. Koht eri ketin koasoanehdi en kasohrehkihla me suwed nohliko. E ketin kaweid Noha ohl pwungo en kauwada warihmw ehu me rasehng lapalahn koakon ehu me kak peipei, pwe en kapitala ih oh eh peneinei iangahki mahn akan me Koht ketin mahsanihong en kahrehlong nan warihmwo.

Sounpar ehu mwurin Nohliko tepida, Noha oh eh peneinei pedoisang nan warihmwo ong nan sampah ehu me kamwakeldahr. Ahpw kadaudoko saikinte pwarada.

​—Kohsang nan Senesis, irelaud 1-11, Sud 6, 14, 15; Kaudiahl 12:9.