Wiahki Omw Peneinei Wasa Ehu me Sohte Keper

“Irail pahn sempoak.” Lepin lokaia kansensuwed pwukat iei me Paipel mahsanihki duwen mwomwen aramas tohto nan atail ahnsou, ahnsou ehu me adaneki “imwin rahn akan.” (2 Timoty 3:1, 3, 4) Reklahn tiahk suwedih seri nan peneinei kadehdehda ni sansal mehlelpen kokohp wet. Ni mehlel, lepin lokaiahn Krihk aʹstor·gos, me kawehwehdi ong ni lepin lokaia wet “sempoak,” nan Paipel en Pohnpei kin wehwehki solahn limpoak me kin mi nan ehu peneinei, ahpw mehlel nanpwungen pahpa oh nohno oh seri kan.a Pali laud en ahnsou, tiahk suwedih seri kin kalapw wiawi nan peneinei.

Ekei soun roporop koasoia me pali laud en aramas me kin tiahk suwedih seri iei papahn serio, keriau iei ohl me ahn serio nohno pwoudikihda mwuhr. Ekei ohl me kisehn peneinei ohte pil kin wia tiahk wet. Mendahki pali laud en serepein kan me kin lelohng kahpwal wet, pwutak tohto pil lelohng met. Mie lih akan me pil kin wia soangen tiahk suwed wet me tohto sang dahme ke medewe. Ele me keieu sohte ripohtpe mie iei ngengersuwed nan pirien kan, ni ahnsou me me laudo de me kehlail rehrail kin lemei de tiahk suwedih rie serepein de pwutak me luwet de tikitik sang ih. Nin duwen pahpa de nohno men, ke uhdahn tateki soangen tiahk pwukat koaros.

Ia duwen omw kak irehdihsang soangen kahpwal pwukat en dehr pwarada nan omw peneinei? E sansal me emenemen tohn peneinei nan peneinei koaros anahne sukuhlki oh pil kesempwalki kaweid kan me pahn kauhdi tiahk lemei. Wasa me keieu mwahu me ke kak ale soangen kaweid pwukat iei sang Mahsen en Koht, Paipel.

Mahsen en Koht oh Nanpwungen Peneinei

Pwe peneinei ehu en wia wasa sohte keper ehu, emenemen tohn peneinei anahne idawehn kaweid en Paipel me pid tiahk mwahu. Paipel sohte kin namenengki koasoia mehkan me pid duwen wia nsenen pwopwoud. E kin kasalehda ni wahu oh inen. E kasalehda me Koht ketin wiahda koasoandi wet ong ohl oh lih pwopwoud pwe ira en perenki. (Lepin Padahk 5:15, 18-20) Ahpw e sohte mweidada tiahk en wendipene likin koasoandi en pwopwoud. Karasepe, Paipel kasalehda ni sansal me e uhwong tiahk en ngengersuwed. Lipai irelaud 18 kasalehda soangsoangen tiahk en ngengersuwed kan me sohte mweimwei. Tehk dahme ire pwukat koasoia: “KAUN-O ketikihda kosonned pwukat. Dehr wia nsenen pwopwoud ong emen me kisehn omw peneinei.”​—Lipai 18:6.

Siohwa ketin kasalehda me ngengersuwed mi nanpwungen “tiahk saut” kan me kalokepe iei mehla. (Lipai 18:26, 29) E sansal me Sounkapikadao ketikihda kosonned kehlail me pid ire wet. Rahnwet, koperment tohto kin pil ahneki madamadauohte ong ire wet. Re kin wiahda kosonned en kalekihdi tiahk suwedih seri nan peneinei. Nin duwen kosonned, seri men me aramas laud men tiahk suwedih, e duwehte eh angkehlailih. Dahme kahrehda kitail doadoahngki lepin lokaia wet mehnda ma aramaso sohte idingkihong serio?

Palien koperment tohto pohnese dahme Paipel mahsanihki duwen seri kan, me re soakoahiek sang me laud kan ong ese dahme pwung oh sapwung. Karasepe, Lepin Padahk 22:15 mahsanih: “Seri kan kin wia mehkot sapwung ni ar sohte wehwehki oh seukautih.” Wahnpoaron Pohl pil ntingihedi: “Ni ei seri, . . . ei lamalam akan, ei pepehm kan, duwehte en seri. A met, ni ei wialahr ohl mehlel emen, I solahr kin wia mwomwen seri.”​—1 Korint 13:11.

Seri men sohte kak uhdahn wehwehki dahkot wia nsenen pwopwoud oh e sohte kak medewe mwahu ia imwilahn met mwurin sounpar kei. Kahrehda me tohto pwungki me seri kan sohte kak pwungkihda en wia tiahk wet. E pil kak wehwehki me ma aramas laud men tiahk suwedih seri men, aramaso sohte kak nda me serio me mweidohng oh sohte uhwongada. Aramaso wiadahr dipen angkehlailih serio. E kauwelahr kosonned oh anahne selidi nan imweteng. Ih me pwukoahki a kaidehn serio.

E kansensuwed en ese me pali laud en mwersuwed pwukat sohte kin ale kalokepe sang palien koperment kan rahnwet. Karasepe, nan Australia, e dierekda me persent eisekte en soun mwersuwed pwukat kin ale kopwung oh me malaulaute me selidi. Soangen ripoht wet pil wiawi nan sahpw teikan. Palien koperment kan ele kak sewese pere peneinei, ahpw doadoahngki kaweid kan en Paipel kak sawas laud sang met.

Kristian mehlel kan pohnese me Koht ohte me ketikihda kaweid pwukat nan sapwellime Mahsen sohte ketin wekila. E ketin mwahngih soahng koaros me kitail kin wia, mehnda ma dahme kitail wia rirsang pali laud en aramas akan. Paipel mahsanih: “Mehkoaros nanleng oh sampah pokon kin sansal oh dehde mwohn silangi. Eri, kitail koaruhsie pahn wehkadahng ih atail wiewia kan.”​—Ipru 4:13.

Koht pahn ketin kapwukoahkin kitail atail wiewia kan ma kitail kauwehla sapwellime kosonned kan oh kamedekihala meteikan. Ni pali teio, e ketin kapaikitailda ma kitail peikiong sapwellime kosonned kan me wia kamwahu kei ong mouren peneinei. Ia ekei kaweid pwukat?

Peneinei Ehu me Miniminkihpene Limpoak

Paipel mahsanih: “Limpoak, . . . kin kapatapene oh oarepene mehkoaros pwe en wiahla ehu ni mehlel.” (Kolose 3:14) Nin duwen me Paipel kawehwehda, limpoak kaidehn ihte pepehm ehu. Limpoak kin sansalkihda soahng kan me e kin kamwakid, tiahk kan me e kin kangoange oh wiewia kan me e kin irehdi. (1 Korint 13:4-8) Nan peneinei ehu, en kasalehda limpoak kin wehwehki en wauneki oh kadek ong emenemen. E kin wehwehki en mour pahrekiong sapwellimen Koht madamadau ong emenemen tohn peneinei. Koht ketikihong emenemen pwukoa kesempwal oh wahu ehu.

Nin duwen tapwin peneinei, pahpao anahne tiengla mwowe en kasalehda limpoak. E wehwehki me Kristian pahpa men sohte ahneki pwung en kaunda ni lemei, doadoahngki eh manaman ni ahl sapwung ong eh pwoudo oh nah seri kan. Ahpw e kin alasang sapwellimen Krais mehn kahlemeng duwen emen me wia tapwi. (Episos 5:23, 25) Eri e kin kadek oh poakohng eh pwoudo oh kanengamah oh kanai nah seri kan. Ni loalopwoat e kin pere irail oh wia uwen eh kak en dehr mweidohng mehkot en kihsang arail popohl, mour mwakelekel de arail likilik oh pepehm en sohte perki mehkot.

Pil duwehte, lih pwopwoud oh nohno kan ahneki pwukoa ehu me uhdahn kesempwal oh wahu. Paipel kin mahsanih duwen pepehm me litok kan ahneki ni arail pere neirail pwurok kan pwehn karasahda uwen Siohwa oh Sises ara kin ketin pere sapwellimara aramas akan. (Madiu 23:37) Pil duwehte, nohno men anahne loalopwoatohng pere nah seri kan. Ni limpoak, e kin mwadang en pere oh apwalih mwahu nah kan laudsang pein ih. Pahpa nohno kan sohte kin mweidohng pein irail en doadoahngki arail manaman ni ahl sapwung, lemei, de kamasak tohn peneinei pwehn wia dahme re mwahuki. Re sohte pil kin mweidohng neirail seri kan en wia met nanpwungarail.

Ni tohn peneinei ar kin wauneki emenemen, koasoakoasoipene nanpwungarail pahn mwahula. Emen sounnting en pwuhk, William Prendergast, koasoia: “Pahpa nohno koaros anahne kapehse mwahu ahnsou koaros rehn neirail seri kan de neirail me pwulopwul kan ehuehu rahn.” E doula nda: “Met mwomwen ahl me keieu mwahu en kihsang kahpwal en tiahk suwedih seri.” Paipel kin kangoange soangen kapehse mwahu duwehte met. (Deuderonomi 6:6, 7) Ni peneinei ehu doadoahngki kaweid wet, imwarailo pahn wia wasa ehu me emenemen tohn peneinei kak koasoiahda ni saledek dahme mi nan mohngiongirail.

Mehlel, kitail mi nan sampah suwed ehu oh tiahk lemei koaros sohte kak uhdi. Mendahki met, wasahn kousoan ehu me sohte keper kak wia sawas laud ong peneinei. Ma mie emen tohnpeneinei me lelohng kahpwal ehu me kamedekihala ih likin nan peneineio, re uhdahn ese wasa me re pahn kohla ie pwehn ale kamweitparail. Wasa ehu me duwehte met wia wasahn ruk sang sampah suwed ehu. Koht en ketin kapaiada omw nannanti en wiahiong omw peneineio wasa ehu me sohte keper!