Dehr Mweidohng Mehkot en Kerempwa Omw Papah Siohwa

1, 2. Dahme kahrehda Sises ketin poakohng Marda, ahpw sapwung dah me Marda wiahda me kasalehda eh soh unsek?

NI OMW medewe duwen rien Lasarus lih Marda, soangen aramas dah men me ke kin medewehla? Paipel kasalehda me Marda wia sapwellimen Sises kompoakepah mwahu men, oh e mahsanih me Sises ketin poakohng Marda. Ei mehlel, kaidehn ih kelehpw lih me Sises kin ketin poakohng oh wauneki. Karasepe, rien Marda liho, Mery, pil wia sapwellimen Sises kompoakepah keren men. Oh Sises ketin poakohng pein ineo, Mery. (Sohn 11:5; 19:25-27) Eri dahme kahrehda Sises ketin poakohng Marda?

² Sises ketin poakohng Marda pwehki eh kadek sapan, oh e pil kin doadoahk laud. Ahpw keieu pwehki ahn Marda pwoson kehlail. Marda kamehlele soahng koaros me Sises ketin padahngki, oh e sohte peikasalki me Sises iei Mesaiao me inoupe mie. (Sohn 11:21-27) Marda pil sohte unsek. Duwehte kitail koaros, e pil kin wiahda sapwung kan. Karasepe, ehu pak ni Sises eh ketin mwemweitla rehrail, Marda nsensuwedla pahn rie liho, Mery, oh patohwanohng Sises en ketin kapwungala rieo. Marda patohwanohng: “Maing, komw mahsanih mahs duwen Mery eh sohte men sewese ie ni kisin doadoahk kiset. Ngehi eri kelehpwkilahr. Komw mahsanihong en sewese ie mahs!” (Wadek Luk 10:38-42.) Dahme kahrehda Marda ndahki met, oh dahme kitail kak sukuhlkihsang sapwellimen Sises pasapeng?

MARDA KEDIREPWLA

3, 4. Dahme Mery wia me Sises ketin kupwurki? Dahme Marda sukuhlki? (Menlau kilang tepin kilel.)

³ Sises ketin kalahnganki me Marda oh Mery lukehdo ih ni imwarao, oh e kupwurki doadoahngki ahnsowo en padahkihong ira padahk mehlel kesempwal kan. Mery mwadangete mwohndiong mpen Sises, “rongorong sapwellime mahsen kan.” E men sukuhlki soahng koaros me e kak sang rehn Sounpadahk Lapalapo. Marda pil kak pilada en rong Sises. Oh ma Marda uhdi dahme e wiewia pwehn iang rongorong Sises, Sises pahn pil ketin kapinga ih.

⁴ Ahpw Marda kedirepwkihla soahng teikan. E kedikedirepwiki eh kaukaunop mwenge kaselel ong Sises oh wia soahng tohto teikan pwehn kahrehiong eh ketiket ni imwarailo en kansenamwahu mehlel. Ni eh kilang me Mery sohte sewese ih, e lingeringerda oh kaulim ong Sises. Sises mwahngih me e nohn tohtohla soahng kan me Marda songosong en wia, eri ni kadek e mahsanih: “Marda, Marda! Ke pwunodkidahr oh soupisengkilahr soahng tohto.” E pil mahsanih me kisin mwengekiste, pahn pil itar. Sises eri ketin kapinga Mery pwehki eh wie rongorong kanahieng ih. E mahsanih: “Mery piladahr mehkot mwahwie; eri, sohte me pahn adihasang.” Mery ele manokehla dahme e kang ni ahnsowo, ahpw e uhdahn sohte manokehla soahng kan me e sukuhlkihsang rehn Sises oh mwomwen en Sises eh ketin kapinga ih. Daulih sounpar 60 mwuri, wahnpoaron Sohn ntingihedi: “Sises kin ketin loalloale Marda, oh rie lih.” (Sohn 11:5) Lepin lokaia pwukat kasalehda me Marda pwungki en Sises eh ketin kapwungala ih ni limpoak oh papah Siohwa ni lelepek erein eh mour.

5. Dahme kahrehda e uhdahn apwal rahnwet en mwohnkihte dahme uhdahn kesempwal, oh peidek dah me kitail pahn sapengala?

⁵ Kitail ese me mie soahng tohto rahnwet me kak kerempwa kitail sang papah Siohwa laudsang ni mwehin irail kan nan Paipel. Kahn Iroir en September 15, 1958 (lokaiahn wai), kalekehki riatail Kristian kan ren dehr mweidohng kepwe kapw kan en kerempwahla irail sang papah Siohwa. Pil ni ahnsowo, e mwomwen me rahn koaros kin mie mehkot kapw. Soahng kan duwehte makasihn kan, redio, kasdo kan, TV uhdahn wialahr mehkan me aramas tohto kin perenki. Kahn Iroiro koasoia me ni atail kerekerenlahng ni imwin koasoandi wet, “pahn tohtohla soahng kan me pahn kak kerempwahla kitail.” Rahn wet, laudsang mahs, mie soahng tohto me kak kerempwahla kitail. Dahme kitail kak wia pwe kitail en duwehla Mery oh mwohnkihte atail kaudokiong Siohwa?

DEHR NOHN DOADOAHNGKI SAMPAH

6. Ia duwen sapwellimen Siohwa aramas akan ar doadoahngki dipwisou kan?

⁶ Sapwellimen Siohwa aramas akan kin doadoahngki dipwisou kan en sampah (technology) pwehn kalohki rongamwahwo. Karasepe, mwohn oh erein Mahwen Keieu en Sampah, re kasalehda kasdohn “Photo-Drama of Creation.” Sang ni arail doadoahngki kilel kan oh kasdo mwotomwot kan me mie soangsoangen poh oh ngihl, re kalohkohng aramas rar rar kei nan sahpw tohto. Ni imwilahn kasdo wet kasalehda ahnsou meleilei ehu ni Sises Krais eh pahn ketin kaunda sampah. Mwuhr, sapwellimen Siohwa aramas akan doadoahngki redio pwehn pakairki rongamwahu en Wehio ong me rar rar kei nan sampah pwon. Rahnpwukat, kitail kin doadoahngki computer kan oh Internet pwehn lella rehn aramas akan sohte lipilipil wasa re mi ie, pil wasa me aramas sohte kin kalapw kohla ie.

7. (a) Dahme kahrehda e keper en nohn doadoahngki dipwisoun sampah? (b) Dahme kitail en kanahieng?

⁷ Paipel katamankihong kitail en dehr nohn doadoahngki sampah. Met kin pidada doadoahngkihla ahnsou laud ong soahng kan me sampah wet kihda. (Wadek 1 Korint 7:29-31.) Ekei soahng pwukat sohte sapwung, ahpw re kak kahrehiong kitail en doadoahngkihla mwahl atail ahnsou. Karasepe, kitail ele kin perenki wia sohng kei, wadawad pwuhk, kilang kasdo nan TV, mwemweitla wasa kaselel kan, kohla netinet, oh rapahki dipwisou kan me keieu kapw de kepwe kan me kitail kin perenki. Me tohto kin perenki koasoakoasoipene nan Internet, kadar text kan oh e-mail, de kin kalapw tetehk dahme wiawi nan nuhs de nan ripoht en mwadong kan. Ahpw ekei aramas nohn daulihala arail kin wia soahng pwukat. (Ekl. 3:1, 6) Ma kitail doadoahngkihla ahnsou laud ong soahng kan me sohte nohn kesempwal, ele e sohte pahn itar atail kihong ahnsou ong dahme keieu kesempwal, me iei atail kaudok ong Siohwa.​—Wadek Episos 5:15-17.

8. Dahme kahrehda e uhdahn kesempwal kitail en dehr poakohng dipwisou kan nan sampah?

⁸ Sehdan kin wia uwen eh kak pwehn kahrehiong kitail en perenki soahng kan nan eh sampah oh kerempwahla atail papah Siohwa. Sehdan wia met ni mwehin tepin Kristian ko, oh e pil kin wia met laudsang mahs. (2 Tim. 4:10) Eri kitail en kaukaule kasawih dahme kitail kin medewehkihong dipwisou kan en sampah oh wiahda wekidekla kan me anahn. Paipel mahsaniong kitail me kitail en dehr poakohng dipwisou kan en sampah. Ahpw, kitail anahne kolokol atail limpoak ong Siohwa en kin kehlail. Ma kitail wia met, e pahn mengei en peikiong Siohwa oh karanih ih.​—1 Sohn 2:15-17.

MWOHNKIHTE MEHKAN ME KEIEU KESEMPWAL

9. Dahme Sises ketin padahkihong sapwellime tohnpadahk ko en mwohnkihte, oh ia duwen eh ketin wiahda mehn kahlemeng mwahu?

⁹ Duwehte Sises eh ketin padahkihong Marda ni kadek en dehr kedirepwkihla soahng tohto, e ketin padahkihong sapwellime tohnpadahk ko mehn kasukuhlohte. E ketin kangoange irail en mwohnkihte papah Siohwa oh sapwellime Wehi. (Wadek Madiu 6:22, 33.) Pein Sises ketin kasalehda mehn kahlemeng mwahu. E sohte ketin sapwellimaniki soahng tohto, oh e sohte ketin sapwellimaniki ihmw de sahpw.​—Luk 9:58; 19:33-35.

10. Mehn kahlemeng mwahu dahieu me Sises ketikihda ong kitail?

¹⁰ Sises sohte ketin mweidohng mehkot en kerempwa ih sang doadoahk en kalohk. Karasepe, sohte werei mwurin eh tepida kalokalohk, aramas ako nan Kapernaum men Sises en ketin pousehlahte mihmi nan arail kahnimwo. Dahme Sises ketin wia? E ketin mwohnkihte sapwellime pwukoao. E mahsanih: “I uhdahn pahn pil kapahrengki Rongamwahu en Wehin Koht ong kahnimw teikan, pwe ih me Koht ketin poaronekiniehdo.” (Luk 4:42-44) Sises kin ketiket kohla wasa doh kan pwehn kalohki rongamwahwo oh padahk ong aramas tohtohie. Ih ohl unsek men, ahpw e pil kin ketin ngirala oh anahne kommoal pwehki e ketin doadoahk laud.​—Luk 8:23; Sohn 4:6.

11. Dahme Sises ketin wia ni ahnsou me ohl emen patohwanohng ih eh kahpwalo? Mehn kasukuhl dahieu me Sises ketin padahkihong sapwellime tohnpadahk ko?

¹¹ Mwuhr, ni Sises eh wia padapadahk ong sapwellime tohnpadahk ko duwen mehn kasukuhl kesempwal ehu, ohl emen sopuk ih oh patohwan: “Maing, Sounpadahk, komw mahsanihong mahs rieio en nehkpeseng nanpwungat sohsohn at pahpao.” Sises sohte ketin song en kapwungala ahn ohl menet eh kahpwalo. Met sohte kerempwahla eh ketin padapadahk ong sapwellime tohnpadahk ko. E ketin doadoahngki ahnsou mwahu wet pwehn padahkihong irail me ma re kin kilangwohngete ahneki soahng tohto, mepwukat kak kerempwahla arail papah Koht.​—Luk 12:13-15.

12, 13. (a) Dahme Sises ketin wia me kahrehiong ekei mehn Krihk ko nan Serusalem en pwuriamweikihla? (b) Dahme Sises ketin wia ni Pilip eh patohwan peki reh en tuhwong aramas ako?

¹² Kaimwiseklahn rahn akan en mouren Sises nin duwen aramas emen inenen kapwunod. (Mad. 26:38; Sohn 12:27) E mwahngih me e pahn ketin lokolok laud oh pwoula. E pil ketin mwahngih me miehte doadoahk me e anahne wia mwohn eh pahn pwoula. Karasepe, Rahn Sarawi en Nisan 9, Sises ketilong nan Serusalem dake dongki men. Aramas ako kasamwo ih nin duwen arail Nanmwarki. (Luk 19:38) Rahn mwurio, ni eimah Sises ketin kasarehieisang nan tehnpaso ohl noahrok ko me netiki kepwe kan ni pweilaud oh pirapa aramas ako.​—Luk 19:45, 46.

¹³ Ekei mehn Krihk me kohdo nan Serusalem pwehn kasarawi Pahsohpao, kilang dahme Sises ketin wia oh pwuriamweikihla. Irail eri idek rehn wahnpoaron Pilip ma re kak tuhwong Sises. Ahpw Sises sohte ketin song en rapahki aramas me kak utung ih de pere ih sang sapwellime imwintihti kan. E mwahngih dahme keieu kesempwal. E kin ketin mwohnkihte ia kupwuren Siohwa ong ih me iei en ketikihda sapwellime mour nin duwen meirong ehu. Ih eri ketin katamankihong sapwellime tohnpadahk ko me ni ahnsou keren e pahn pwoula oh me koaros me kin idawehn ih en pil men tounmeteikihla arail mour. E mahsanih: “Mehmen me kin poakohng eh mour uhdahn pahn pwupwusang; a mehmen me kin tounmeteikihla eh mour nin sampah wet, iei ih me pahn kolokolete ong mour soutuk.” Ahpw Sises pil ketin inoukihda me Semeo pahn ketin kawauwihala sapwellimen Sises tohnpadahk kan oh ketikihong irail mour soutuk. Pilip kak kangoangehki mehn Krihk ko mahsen pwukat.​—Sohn 12:20-26.

14. Mendahki Sises kin ketin mwohneki mahs doadoahk en kalohki rongamwahwo nan eh mour, dahme e kin ketin tehk mwahu en wia?

¹⁴ Ni Sises eh ketiket nin sampah, doadoahk me e keieu ketin kesempwalki iei en kalohki rongamwahwo. Mendahki e kin ketin mwohneki mahs doadoahk en kalohk nan eh mour, doadoahk wet kaidehn ihte me e kin ketin medemedewe. Karasepe, e ketila ni kapwopwoud ehu, wasa me e ketin kawekila pihl ong wain. (Sohn 2:2, 6-10) E pil ketila iang konot ni imwen kompoakepah kan oh meteikan me kin men rong duwen rongamwahwo. (Luk 5:29; Sohn 12:2) Kesempwalsang met, Sises kin kalapw ketin kihong ahnsou en kapakap, doudouloale oh kommoal.​—Mad. 14:23; Mark 1:35; 6:31, 32.

“KESEHSANG KITAIL MEHKOAROS ME KIN KATOUTOUWIH KITAIL”

15. Dahme wahnpoaron Pohl nda me Kristian kan anahne wia, oh ia duwen eh wia mehn kahlemeng mwahu?

¹⁵ Wahnpoaron Pohl nda me Kristian kan duwehte sounweiren tang kei nan weirentang reirei ehu. Pwehn kanekehla weir wet, re anahne kesehla soahng kan me kak kapwandehla irail de kauhdi irail. (Wadek Ipru 12:1.) Pein Pohl wiahda mehn kahlemeng mwahu ehu. E kakete kepwehpwehla de ndandla nin duwen kaunen pelien lamalam en Suhs men, ahpw e kesehla pwukoa wet oh kilangwohngete “dahme keieu mwahu [“kesempwal,” NW].” E uhdahn doadoahk laud nan kalohk oh seiloakla wasa tohto, iangahki Siria, Asia Minor, Masedonia, oh Sudia. Pohl kilangwohngete eh keting en mour soutik nanleng. E nda: “I kin manokehla dahme mi mwuri, oh wia uwen ei kak pwe I en lel dahme mi mwohi.” (Pil. 1:10; 3:8, 13, 14) Pohl sohte pwopwoud, oh met kin sewese ih en “papah Kaun-o ni kapehd mehlel oh unsek.”​—1 Kor. 7:32-35.

16, 17. Ma kitail pwopwoud de soh, ia duwen atail kak idawehn mehn kahlemeng en Pohl? Ia duwen Mark oh Claire ara wia met?

¹⁶ Duwehte Pohl, ekei sapwellimen Siohwa ladu kan rahnwet pilada en sohte pwopwoud pwe ren kak kalaudehla arail papah Siohwa. (Mad. 19:11, 12) Me kiripw kan kalapw malaulau arail pwukoa en peneinei sang irail kan me pwopwoud. Ahpw, ma kitail pwopwoud de soh, kitail koaros kak “kesehsang kitail mehkoaros me kin katoutouwih kitail” me kak kerempwahla atail papah Siohwa. Ele kitail anahne wekidala mehkan me kitail kin ahnla wia pwe kitail en dehr kauwehla mwahl ahnsou oh kak kalaudehla atail papah Siohwa.

¹⁷ Karasepe, Mark oh Claire, me tikida nan sapwen Wales, tepida pioneer ni ahnsou me re neksang sukuhl. Mwurin ara pwopwouda, re pousehlahte pioneer. Ahpw re men wia laudsang met. Mark nda: “Se kihsang soahng kan me sohte nohn kesempwal nan at mour sang ni at keseusang imwato me pere siluh mie oh pwilikihdi at doadoahk en lepin ahnsou pwe sen kak iang wia doadoahk en kauwada wasahn kaudok kan nan sahpw teikan.” Erein sounpar 20 samwalahro, ira seiloakla sahpw tohto nan Aperika pwehn sewese kauwada Wasahn Kaudok kan. Ekei pak neira mwohni uhdahn tikitik, ahpw Siohwa kin ketin apwalih ira ahnsou koaros. Claire nda: “Se uhdahn perenki at doadoahngki rahn koaros en papah Siohwa. Se kompoakepahnkihla me tohto ahnsou ko, oh mieier soahng koaros me se anahne. Soahng tikitik kan me se pwilikihdi sohte pahrekiong peren me kohsang at doadoahngki pali laud en at ahnsou ong papah Siohwa.” Tohto irail me doadoahngki pali laud en arail ahnsou ong papah Koht ahneki soangen pepehmohte.

18. Peidek dah kan me kitail kak pein idek rehtail?

¹⁸ Ia duwe, ke pehm me ke kak kalaudehla omw ngoangki papah Siohwa? Mie soahng kan me kin kerempwahla iuk sang mehkan me uhdahn kesempwal? Ma ei, dahme ke kak wia? Mwein ke kak kamwahwihala mwomwen omw kin wadek oh onop Paipel. Iren onop en mwuhr pahn kawehwehda ia duwen omw kak wia met.