Song en Sukuhlki Soahng Kapw kan ni Omw Kin Onop

Ni atail kin kaunopada pwehn onop, kitail kak pein idek rehtail, ‘Dahme I kasik en sukuhlki?’ Ahpw, kitail en dehr medemedewehte dahme pein kitail kasik en sukuhlki oh pohnsehsehla dahme Siohwa ketin songosong en padahkihong kitail. Ia duwen atail kak esehda mwahu dahme Siohwa ketin songosong en padahkihong kitail?

Kapakapki erpit. Peki rehn Siohwa en ketin seweseiuk en wehwehki dahme e ketin kupwurki ken sukuhlki met. (Seims 1:5) Dehr itarkihte dahme ke eseier.—Lep. Pad. 3:​5, 6.

Wauneki manaman en Paipel. “Mahsen en Koht kin momour.” (Ipru 4:12) Eri ehuehu ahnsou me kitail kin wadek Paipel, e kak padahkihong kitail mehkot kapw oh sewese kitail nan atail mour ni soangsoangen ahl akan. Ahpw met kak wiawihte ma kitail pohnese me kitail anahne sukuhlki dahme Koht kin ketin padapadahkihong kitail.

Kalahnganki soahng koaros me Siohwa ketin doadoahngki pwehn padahki kitail. Sapwellime padahk kan kin rasehng “kamadipw ehu me diren mwenge kan.” (Ais. 25:​6, NW) Nsenohki wadekala oaralap kan me ke medewe ke sohte perenki. Ni omw kin wia met, ke pahn mweidohng Koht en ketin seweseiuk en kamwahwihala pein uhk oh ke pahn uhdahn perenkihla onop!