Peidek kan Sang Sounwadawad kan
Iahd me doadoahk en kalohk pahn imwisekla?
Sises mahsanih: “Rongamwahu en Wehio pahn lohkseli wasa koaros me aramas kin mi ie nin sampah pwe en mie kadehde ong tohnwehi koaros, a mwuri, imwio ahpw pahn leledo.” (Mad. 24:14) Lepin lokaiahn Krihs me kawehwehdi ong “imwio” nan iretikitik wet, oh iretikitik 6 oh 13, kin dokedoke imwin ahn Sehdan sampah nan Armakedon. (Kaud. 16:14, 16) Met wehwehki me kitail pahn pousehlahte kalohki rongamwahwo lao mwohnte Armakedon. Met wekidala dahme kitail kin wehwehki mwoweo.
Mwoweo, kitail wehwehki me kitail pahn uhdihsang kalohki rongamwahwo ahnsou me Papilon Lapalap pahn kasohrala ni kahn kamakam kowahlapo eh tepida. (Kaud. 17:3, 5, 15, 16) Kitail kin kamehlele me mwekid wet pahn wia kilelepen imwin “pahr en sapwellimen Siohwa kupwuramwahu.” (Ais. 61:2, NW) Kitail pil kin medewe me irail kan me pahn pitsang kahn kamakam kowahlapo pahn kasalehdahr arail poadidiong Siohwa mwohn kahn kamakam kowahlapo pahn tepida. Kitail kin kapahrekiong irail mehn Suhs ko me pitsang kasohrlahn Serusalem nan pahr 607 Mwohn Krais. Irail pwukat kileldier mwowe pwehn pitila pwehki re kin kaudokiong Siohwa oh kailongki me suwed. (Esek. 5:11; 9:4) Ahpw, atail kapahrekihpene met sohte pahn pwungiong dahme Sises mahsanih nan Madiu 24:14, me kasalehda me aramas akan ele pahn ahneki ahnsou mwahu en mwekidki rongamwahwo lao mwohnte Armakedon.
Pwehki atail wehwehki Madiu 24:14 eh sansalla, kitail pil anahne wekidala dahme kitail wehwehki duwen keteu ais takai me Kaudiahl 16:21 kohpada. Petehkpen ire pwukat kasalehda me iren Paipel riau ko kin pwungpene. Ia duwen? Pasapengpen met kin sansalda sang mwomwen aramas akan ar kin mwekidki rongamwahu en Wehio. Wahnpoaron Pohl ntingihedi me rohngo wia rongamwahu ehu, “pwohtik pwohmwahu en mour,” ong “irail kan me pahn komourla.” Ahpw e wia rohng suwed ehu, “pwohn mehla,” ong sapwellimen Koht imwintihti kan. (2 Kor. 2:15, 16) Irail kailongki rohng en Wehio pwehki e kin kasansalehda me sampaho me re poakohng uhdahn suwed, oh Sehdan me kaunda, oh pahn kereniong sohrala.—Sohn 7:7; 1 Sohn 2:17; 5:19.
Pil tehk me keteu ais takai me kileldi nan Kaudiahl 16:21 pahn “inenen laud mehlel.” Met kak wehwehki me erein kahn kamakam kohwahlapo, rohngo pahn uhdahn kehlailla oh lelewohng aramas tohtohsang mahso. Imwilahn met, aramas tohtohie pahn esehla mwaren Siohwa. (Esek. 39:7) Ahpw ia duwe, ni ahnsowo mwurin kasohralahn Papilon Lapalap, e pahn mie ekei me pahn perenki rongamwahwo, duwehte ar perenki mehkot pwohmwahu? Met kakete wiawi. Mwein irail pahn tamanda de esehda me erein sounpar tohto, Sounkadehdehn Siohwa kan kin koasoia me Papilon Lapalap pahn sohrala, oh re pahn pohnese me met re kilikilang pweidahn dahme Sounkadehde kan kin koasoia.
Met duwehte dahme wiawi nan Isip mahso mwurin Kalokolok Eisek ko. Mwurin Siohwa eh ketin “[kadeikada] koht koaros en Isip,” mie “pokon en ekei aramas” me kaidehn mehn Israel iangala sapwellime aramas ako. (Eks. 12:12, 37, 38) Irail pwukat me kaidehn mehn Israel ele pilada en iangala sapwellimen Siohwa aramas ako ni arail kilang me soahng koaros me Moses koasoia pahn wiawi nan ehuehu Kalokolok Eisek ko pweidahr.
Mehmen me sohpeiong Siohwa mwurin kasohrlahn Papilon Lapalap pahn ahneki ahnsou mwahu en utung rien Krais kan me mihmihte nin sampah. (Mad. 25:34-36, 40) Ahnsou mwahu wet me irail pahn pakadeikda nin duwen sihpw kei pahn imwisekla mwohnte Armakedon tepida ni ahnsou me luhwen me keidi kan pahn kohdahla nanleng.
Pwehki atail wehwehki met eh sansalla, met kin kasalehda sapwellimen Siohwa limpoak laud oh kadek kalahngan. Ei, e “sohte kin ketin kupwurki emen en kasohrala ahpw e ketin kupwurki aramas koaros en koluhla.”—2 Pit. 3:9.