Dahme Kitail Ese Duwen Sapwellimen Siohwa Kadeik ni Ahnsou Kohkohdo?

1. Dahme kahrehda kitail kak nda me kitail kin mihmi ni ahnsou kesempwal kei?

KITAIL kin mihmi ni ahnsou kesempwal kei! Ehuehu rahn, kitail kin kilang kokohp kan en Paipel ar pweida. Karasepe, kitail kilang “nanmwarkien paliepeng” oh “nanmwarkien palieir” ara kin siaipene pwehki ira men kaunda sampah. (Dan. 11:​40, NW) Kitail kilang rongamwahu en Wehin Koht eh kalohkseli nan sampah pwon, oh aramas rar rar kei piladahr en papah Siohwa. (Ais. 60:22; Mad. 24:14) Oh kitail kin pil aliale padahk tohto sang nan Paipel me rasehng mwenge “ni ahnsou me konehng.”—Mad. 24:​45-47.

2. Dahme kitail kak kamehlele, oh dahme kitail anahne pohnese?

² Siohwa kin ketin pousehlahte sewese kitail en wehwehkihla mwahu duwen mwekid kesempwal kan me pahn wiawi ahnsou keren. (Lep. Pad. 4:18; Dan. 2:28) Kitail kak kamehlele me ni ahnsou me kahn kamakam kowahlap pahn tepida, kitail pahn ese soahng koaros me kitail anahne ese pwehn dadaur ni lelepek oh pil miniminpenehte erein ahnsou apwalo. Ahpw, kitail anahne pohnese me mie soahng kan me kitail sohte ese duwen ahnsou kohkohdo. Nan iren onop wet, keieu kitail pahn koasoiapene dahme kahrehda kitail wekidala dahme kitail koasoiaier mwoweo duwen ekei mwekid ko. Mwuri, kitail pahn kousapahlih ekei soahng kan me kitail eseier duwen ahnsou kohkohdo oh dahme Samatailo nanleng pahn ketin wia.

DAHME KITAIL SOHTE ESE

3. Mahso, dahme kitail nda pahn wiawihong irail kan me sohte kin pwoson Siohwa ni ahnsou me kahn kamakam kowahlapo tepida, oh dahme kahrehda kitail ndahki met?

³ Mahso, kitail koasoia me ahnsou me kahn kamakam kowahlapo pahn tepida, aramas akan pahn sohla ahneki ahnsou mwahu en pwosonla Siohwa oh pitsang Armakedon. Kitail nda met pwehki kitail medewe me emenemen aramas de ehuehu mwekid me wiawi ni mwehin Nohliko pahn pahrekiong dahme pahn wiawi nan atail ahnsou. Karasepe, kitail medewe me duwehte emen eh sohla kak pedolong nan warihmwo mwurin Siohwa ketin ritingdi wenihmwo, sohte emen pil pahn kak pwosonla Siohwa oh pitla ahnsou me kahn kamakam kowahlapo tepida.—Mad. 24:​37-39.

4. Dahme kahrehda kitail sohla kin nda me soahng koaros me wiawi ni mwehin Nohao pahn pil wiawi ni ahnsou kohkohdo?

⁴ Ia duwe, e pwung en nda me ehuehu mwekid me wiawi ni ahnsoun Nohliko pahn pahrekiong dahme pahn wiawi ni ahnsou kohkohdo? Soh. Dahme kahrehda? Pwehki Paipel sohte mahsanih met.a Mehlel me Sises ketin kapahrekiong “ni mwehin Nohao” ahnsou me e ketier. Ahpw e sohte mahsanih me soahng koaros me wiawi ni mwehin Nohao pahn pahrekiong dahme pahn wiawi ni ahnsou kohkohdo, duwehte ahnsou me Siohwa ketin ritingdi wenihmw en warihmwo. Ahpw met sohte wehwehki me kitail sohte kak sukuhlki mehkot sang dahme wiawihong Noha oh Nohliko.

5. (a) Dahme Noha wia mwohn Nohliko? (Ipru 11:7; 1 Piter 3:20) (b) Ia duwen atail doadoahk en kalohk rahnwet eh pahrekiong ni mwehin Nohao?

⁵ Ni Noha eh rong sapwellimen Siohwa kehkehliko, e kasalehda eh pwoson sang ni eh kauwada warihmwo. (Wadek Ipru 11:7; 1 Piter 3:20.) Duwehte met, aramas akan me rong duwen rongamwahu en Wehin Koht anahne kapwaiada dahme re rong. (Wiewia 3:​17-20) Piter kahdaneki Noha “sounkalohki pwung.” (2 Pit. 2:5) Ahpw, nin duwen me kitail koasoiapene nan iren onop en mwoweo, kitail sehse ma Noha kin song en kalohk ong aramas koaros nin sampah mwohn Nohliko. Rahnwet, kitail kin song en kalohk ong aramas koaros nin sampah, oh kin ngoangki wia met. Ahpw sohte lipilipil ia uwen laud en atail nanti, kitail sohte kak lella rehn aramas koaros mwohn imwio leledo. Dahme kahrehda?

6-7. Dahme kahrehda kitail kak nda me kitail sohte pahn kak kalohkla rehn aramas koaros nin sampah mwohn imwio eh leledo?

⁶ Medewehla dahme Sises mahsanihki duwen atail doadoahk en kalohk. E ketin kohpada me rongamwahwo pahn lohkseli “wasa koaros me aramas kin mi ie nin sampah pwe en mie kadehde ong tohnwehi koaros.” (Mad. 24:14) Kokohpo kin pweida rahnwet laudsang mahso. Rohng en Wehio kin lohkseli nan sampah pwon ni lokaia tohtohsang 1,000, oh pwehki neitail website en jw.org, pali laud en aramas akan nin sampah rahnwet kak sukuhlki duwen rongamwahu en Wehin Koht.

⁷ Ahpw, Sises pil mahsanihong sapwellime tohnpadahk ko me re sohte pahn ‘kanekehla arail pidakihpene kahnimw koaros,’ de kalohk ong koaros, mwohn eh ketido. (Mad. 10:23; 25:​31-33) Dahme Sises mahsanih pahn pil pweida nan atail ahnsou. Aramas tohto rahnwet kin kousoan wasa kan me kitail sohte kak kalohkla ni saledek. Patehng met, seri tohto kin ipwidi nan minit koaros. Eri kitail sohte pahn kak kalohkla rehn aramas koaros nin sampah mwohn imwio eh leledo, mehnda ma kitail kin wia uwen atail kak en lella rehn aramas sang “wehi koaros oh keinek koaros oh lokaia koaros.”—Kaud. 14:6.

8. Peidek dahieu me kitail kakete idek me pid ia duwen Siohwa eh pahn ketin kadeikada aramas ni ahnsou kohkohdo? (Pil kilang kilel kan.)

⁸ Eri, mie peidek ehu: Dahme pahn wiawihong irail kan me ele sohte ahneki ahnsou mwahu en rong rongamwahwo mwohn kahn kamakam kowahlapo tepida? Dahme Siohwa oh sapwellime Ohlo, me e ketikihong manaman en wia kopwung, pahn ketin wiahiong irail? (Sohn 5:​19, 22, 27; Wiewia 17:31) Iren Paipel me iren onop wet poahsoankihda koasoia me Siohwa “sohte kin ketin kupwurki emen en kasohrala.” Ahpw e ketin kupwurki “aramas koaros en koluhla.” (2 Pit. 3:9; 1 Tim. 2:4) Kitail eseier soahng pwukat duwen Siohwa, ahpw e saikinte ketin padahkihong kitail ia duwen eh pahn ketin kadeikada aramas akan me sohte rong duwen rongamwahwo. Oh e sohte anahne ketin padahkihong kitail.

9. Dahme Siohwa ketin padahkihong kitail nan Paipel?

⁹ Nan Paipel, Siohwa ketin padahkihong kitail ekei soahng kan me e pahn ketin wia. Karasepe, Paipel padahkihong kitail me Siohwa pahn ketin kaiasada “me sapwung kan” me sohte ahneki ahnsou mwahu en sukuhlki duwen rongamwahwo oh wekidala arail wiewia kan. (Wiewia 24:15; Luk 23:​42, 43) Met pil kahrehda mie peidek kesempwal teikan.

10. Peidek dah teikan me kitail kakete idek?

¹⁰ Ia duwe, koaros me mehla erein kahn kamakam kowahlapo pahn sohrala soutuk oh sohte ahneki koapworopwor en iasada? Paipel kasalehda ni sansal me irail kan me uhwong Siohwa me Ih oh sapwellime karis en nanleng pahn kasohrehla nan Armakedon sohte pahn iasada. (2 Des. 1:​6-10) Ahpw ia duwen meteikan? Karasepe, ele ekei me mehla erein kahn kamakam kowahlapo pwehki re soumwahu, de mahlahr, de mehkihla aksident, de mie me kemehla. (Ekl. 9:11; Sek. 14:13) Ia duwe, ekei irail pwukat pahn iang “me sapwung kan” iasada nan sampah kapwo? Uhdahn kitail sehse.

DAHME KITAIL ESEIER

11. Kahrepe dahieu me aramas akan pahn pakadeingkihda nan Armakedon?

¹¹ Kitail eseier duwen ekei soahng kan me pahn wiawi ahnsou kohkohdo. Karasepe, kitail ese me nan Armakedon, aramas akan pahn pakadeingkihda mwomwen arail wiewia ong rien Krais kan. (Mad. 25:40) Irail kan me pakadeikda nin duwen sihpw kei kasalehdahr arail utung me keidi kan oh pil Krais. Kitail pil ese me ekei rien Krais kan pahn mihmihte nin sampah mwurin kahn kamakam kowahlapo tepida oh sohte pahn pwekipwekdahla nanleng lao mwohnte Armakedon tepida. Erein arail pahn mihmihte nin sampah, aramas akan pahn kakete ahneki ahnsou mwahu en utungada irail oh doadoahko me irail kin wiewia. (Mad. 25:​31, 32; Kaud. 12:17) Dahme kahrehda ire mehlel pwukat kesempwal?

12-13. Dahme ekei aramas pahn kakete wia mwurin arail kilang kasohralahn “Papilon Lapalap”? (Pil kilang kilel kan.)

¹² Pil mwurin kahn kamakam kowahlapo eh tepida, ekei me kilang kasohrlahn “Papilon Lapalap” pahn kakete tamanda me erein sounpar tohto, Sounkadehdehn Siohwa kan kin koasoia me met pahn wiawi. Ia duwe, ekei me kilang mwekid pwukat wiawi pahn kakete wekidala audepen mohngiongirail?—Kaud. 17:5; Esek. 33:33.

¹³ Ma met wiawi, e pahn duwehte dahme wiawi nan Isip ni mwehin Moseso. Taman me “pokon en ekei aramas” iangala mehn Israel ko kohkohsang Isip. Ekei irail pwukat ele tepida pwosonla Siohwa ni ahnsou me irail kilang Kalokolok Eiseko me Moses koasoia duwe pweida. (Eks. 12:38) Ma mehkot duwehte met pahn wiawi mwurin kasohralahn Papilon Lapalap, ia duwe, kitail pahn medewe me e sohte pwung pahrek me aramas akan kak iangkitailla mwohnte Armakedon? Uhdahn soh! Kitail men duwehte Samatailo nanleng me ketin “diren kalahngan oh kadek, me sohte kin mwadang lingeringerda, oh me diren limpoak lapalap oh loalopwoat mehlel.”b—Eks. 34:6.

14-15. Ahn emen pahn mour kohkohlahte kin poahsoankihda iahd me e mehla de ia wasa e kin kousoan ie? Menlau kawehwehda. (Melkahka 33:​4, 5)

¹⁴ Ekei pak riatail Kristian kan ele ndahki emen tohn arail peneinei me sohte kin papah Siohwa: “E pahn mwahu ma e mehla mwohn kahn kamakam kowahlapo eh tepida, pwehki e pahn mie eh koapworopwor en iasada.” Mwein mie kahrepe mwahu me irail ndahki met. Ahpw ahn emen pahn mour kohkohlahte sohte kin poahsoankihda iahd me e mehla. Siohwa kin ketin wia Sounkopwung unsek men. Sapwellime pilipil kan kin ahnsou koaros pwung oh pahrek. (Wadek Melkahka 33:​4, 5.) Kitail kak uhdahn kamehlele me “Sounkopwung en sampah pwon” pahn ketin wia dahme pwung.—Sen. 18:25.

¹⁵ E pil pwung en nda me ahn emen pahn mour kohkohlahte sohte kin poahsoankihda wasa me e kin kousoan ie. Siohwa sohte pahn ketin kadeikada aramas tohtohie nin duwen “kuht” kei pwehki re kousoan nan sahpw kan me re sohte kak sukuhlki duwen rongamwahu en Wehio. (Mad. 25:46) Sounkopwung en sampah pwon me kin ketin kadeik ni pwung kin uhdahn ketin nsenohki aramas pwukat laudsang atail kak nsenohki irail. Kitail sehse ia duwen Siohwa eh pahn ketin kamwakid soahng kan erein kahn kamakam kowahlapo. Ele ekei irail pwukat pahn ahneki ahnsou mwahu en sukuhlki duwen Siohwa, pwosonla ih, oh uhki ih ni ahnsou me e pahn ketin kasarawihala mware mwohn wehi kan koaros.—Esek. 38:16.

16. Dahme kitail esehlahr duwen Siohwa? (Pil kilang kilel.)

¹⁶ Sang atail onopki Paipel, kitail esehlahr ia uwen Siohwa eh kin ketin kesempwalki aramas. E ketin meirongkihla sapwellime Ohlo pwe kitail koaros en kak ahneki koapworopwor en mour kohkohlahte. (Sohn 3:16) Kitail koaros kin kehn sapwellimen Siohwa limpoak kadek. (Ais. 49:15) E ketin mwahngih eden emenemen kitail. Ni mehlel, e uhdahn ketin mwahngih duwen kitail me kahrehda mehnda ma kitail mehla, e kak ketin kaiaskitailda pwehki e ketin tamataman soahng oaritik koaros duwen kitail oh dahme kitail kin tamataman! (Mad. 10:​29-31) Eri, kitail ahneki kahrepe mwahu en likih me Samatail limpoako nanleng pahn ketin kadeikada ni unsek emenemen aramas ni pahrek, pwung, oh ni kadek kalahngan.—Seims 2:13.

17. Dahme kitail pahn koasoiapene nan iren onop en mwuhr?

¹⁷ Atail wehwehkihla mwahu wekideklahn padahk pwukat kin kalaudehla karuwaru en atail doadoahk en kalohko sang mahso. Dahme kahrehda kitail kak ndahki met? Oh dahme kin kamwakid kitail en pousehlahte kalohki rongamwahwo oh sohte uhdi? Kitail pahn koasoiapene pasapengpen peidek pwukat nan iren onop en mwuhr.