IREN ONOP 20
KOUL 67 ‘Lohkiseli Mahseno’
Pousehlahte Kalohk Pwehki Limpoak!
“Nan wehi kan koaros, rongamwahu uhdahn pahn lohkseli mahs.”—MARK 13:10.
DAHME KITAIL PAHN SUKUHLKI
Ia duwen limpoak eh kin kamwakid kitail en kalohk ni ngoang oh sang ni mour unsek.
1. Dahme kitail sukuhlki nan mihting en pahr 2023?
NAN mihting en pahr en 2023,a kitail rong ekei wekidekla kan ong atail padahk kan oh ekei pakair kesempwal kan duwen atail doadoahk en kalohk. Karasepe, kitail sukuhlki me ekei kakete ahneki ahnsou mwahu en iangala sapwellimen Siohwa aramas akan pil mwurin Papilon Lapalap eh kasohrala. Kitail pil sukuhlki me tepin November 2023, kitail solahr pahn anahne ripohtki soahng koaros duwen atail kalohk. Ia duwe, wekidekla pwukat kahrehiong atail doadoahk en kalohk en sohla nohn kesempwal? Uhdahn soh!
2. Dahme kahrehda atail doadoahk en kalohk kin karuwaruhla ehuehu rahn? (Mark 13:10)
2 Ehuehu rahn, karuwaru en atail doadoahk en kalohk kin laudla. Dahme kahrehda? Pwehki ahnsou mwotomwotlahr. Medewehla dahme Sises ketin kohpada duwen doadoahk en kalohk ni imwin rahn pwukat. (Wadek Mark 13:10.) Nan pwuhken Madiu, Sises mahsanih me rongamwahwo pahn lohkiseli wasa koaros nin sampah mwohn “imwio” eh leledo. (Mad. 24:14) Imwio kin dokedoke kaimwiseklahn ahn Sehdan sampah suwed wet. Siohwa ketin koasoanedier me ‘rahno oh awao’ me mepwukat pahn wiawi. (Mad. 24:36; 25:13; Wiewia 1:7) Ehuehu rahn kitail kin kerkerenlahng ahnsowo. (Rom 13:11) Lao lel ahnsowo, kitail anahne pousehlahte kalohk.
3. Dahme kin kamwakid kitail en kalohk?
3 Mie peidek kesempwal ehu me kitail koaros anahne medemedewe: Dahme kahrehda kitail kin kalohki rongamwahwo? Pwehki limpoak. Ni atail kin kalohk, kitail kasalehda me kitail poakohng rongamwahwo, poakohng aramas akan, oh keieu kesempwal, atail poakohng Siohwa oh mwareo. Kitail pahn koasoiapene ehuehu ire pwukat.
KITAIL KIN KALOHK PWEHKI KITAIL POAKOHNG RONGAMWAHWO
4. Dahme kitail kin wia ni atail rong rongamwahwo?
4 Ke kak medewehla omw pepehm ni ahnsou me mehkot kaperen wiawi nan omw mour—mwein mie me ipwidi nan omw peneinei de ke alehdi doadoahk ehu me ke anahne? Ele ke uhdahn perenda me kahrehda ke mwadangete padahkihong omw peneinei oh kompoakepahmw kan duwen met. Ia duwe, soahng wet wiawi ahnsou me ke rong rohng me keieu mwahusang koaros me iei rongamwahu en Wehin Koht?
5. Ia omw pepehm ni omw tepin sukuhlki padahk mehlel sang Mahsen en Koht? (Pil kilang kilel kan.)
5 Medewehla ia omw pepehm ni omw tepin sukuhlki padahk mehlel sang Mahsen en Koht. Ke sukuhlki me Semomwo nanleng ketin poakohng uhk, e kupwurki ken wia kisehn sapwellime peneinei en kaudok, inoukihda en katokehdi lokolok oh medek, oh ke kak ahneki koapworopwor en pwurehng kilang irail kan me ke poakohng ar mourda nan sampah kapw ehu—oh soahng tohto teikan. (Mark 10:29, 30; Sohn 5:28, 29; Rom 8:38, 39; Kaud. 21:3, 4) Dahme ke sukuhlki uhdahn sair uhk. (Luk 24:32) Ke uhdahn perenki dahme ke sukuhlki oh ke men padahkihong koaros duwen met!—Pil kilang Seremaia 20:9.
Ni atail tepin sukuhlki rongamwahwo, kitail kin perenda oh men ehukihong koaros! (Menlau kilang parakrap 5)
6. Dahme ke sukuhlkihsang dahme wiawihong Ernest oh Rose?
6 Medewehla karasaras ehu. Ni ahnsou me brother men me adaneki Ernestb sounpar eisek, eh pahpao mehla. Ernest koasoia: “I medewe: ‘E kohdalahr nanleng? De e solahr mie douluhl?’ I kin peirinki seri teikan me arail pahpa momourte.” Ernest kin kaukaule kohla ni ahn eh pahpao sousowo, kelepwukedi oh kapakapki: “Maing Koht, I men ese wasa ei pahpao mi ie.” Mpen sounpar 17 mwurin eh pahpao mehla, mie me idek rehn Ernest ma e men onop Paipel, oh e mwadangete pwungki. E perenkihda eh sukuhlki me aramas mehla kan sohte kehn wasa, e mwomwen duwehte me re meir kelik, oh me Paipel inoukihda kaiasada ong ahnsou kohkohdo. (Ekl. 9:5, 10; Wiewia 24:15) Ih eri diarada pasapeng kan me e men ese erein sounpar tohto! Ernest uhdahn perenki padahk mehlel en Paipel kan me e sukusukuhlki. Eh pwoudo, Rose, kin iang ih onopki Paipel oh pil perenki dahme e sukuhlki. Nan 1978 ira papidaisla. Ira kin ngoangki ehukihong ara peneinei, kompoakepahra, oh meteikan duwen padahk kesempwal kan me ira sukuhlki. Imwilahn met, Ernest oh Rose sewesehier aramas daulih 70 en sukuhlki duwen Siohwa oh papidaisla.
7. Dahme kin wiawi ni atail perenki dahme kitail sukuhlkihsang nan Paipel? (Luk 6:45)
7 Ni atail kin perenki dahme kitail sukuhlkihsang nan Paipel, kitail kin men padahkihong koaros duwen met. (Wadek Luk 6:45.) Atail pepehm duwehte ahn sapwellimen Sises tohnpadahk ko me koasoia: “Se sohte kak uhdihsang koasoia duwen soahng kan me se kilangehr oh rongehr.” (Wiewia 4:20) Kitail uhdahn poakohng padahk mehlel me kahrehda kitail men padahkihong aramas tohto ni uwen me kitail kak.
KITAIL KIN KALOHK PWEHKI KITAIL POAKOHNG ARAMAS
8. Dahme kahrehda kitail men padahkihong koaros duwen rongamwahwo? (Menlau kilang koakono “Love People—Make Disciples.”) (Pil kilang kilel.)
8 Duwehte Siohwa oh sapwellime Ohlo, kitail poakohng aramas akan. (Lep. Pad. 8:31; Sohn 3:16) Kitail kin uhdahn poakehla irail kan me “sohte ese Koht” oh “sohte ahneki koapworopwor.” (Ep. 2:12) Pwehki arail kahpwal kan, irail kakete pehm me irail mi nan pwoahr loal ehu. Ahpw mie neitail sahl me kak waikirailda, me iei rongamwahu en Wehin Koht. Pwehki atail poakohng oh poakeirailla, kitail men wia uwen atail kak koaros en padahkihong irail rongamwahwo. Ni arail sukuhlki met, e kak kihong irail koapworopwor, sewese irail en peren pil ni ahnsou wet, oh kihong irail koapworopwor me ehu rahn irail kak ahneki “mour mehlelo,” me iei mour soutuk nan sapwellimen Koht sampah kapwo.—1 Tim. 6:19.
Atail limpoak oh poakehla aramas akan kin kamwakid kitail en wia uwen atail kak en padahkihong irail rongamwahwo (Menlau kilang parakrap 8)
9. Dahme kitail kin padahkihong aramas akan duwen ahnsou kohkohdo, oh dahme kahrehda? (Esekiel 33:7, 8)
9 Atail poakohng aramas akan pil kin kamwakid kitail en padahkihong irail me imwin koasoandi suwed wet kerendohr. (Wadek Esekiel 33:7, 8.) Kitail kin poakehla aramas koaros, iangahki tohn atail peneinei me sohte kin papah Siohwa. Aramas tohto kin momour oh sehse dahme pahn wiawi, me iei “kahn kamakam kowahlap me saikinte wiawi sangete tepin sampah leledo met, soh, pil sohte pahn pwurehng wiawi.” (Mad. 24:21) Kitail men irail en ese dahme pahn wiawi ni ahnsoun kadeiko. Keieu, pelien lamalam likamw pahn kasohrala, mwuri sampah suwed wet nan Armakedon. (Kaud. 16:14, 16; 17:16, 17; 19:11, 19, 20) Kitail kin kapakapki me aramas tohto pahn rong dahme kitail padahkihong irail oh pilada ren iang kitail papah Siohwa ahnsou wet. Ahpw ia duwen irail kan me sohte men rong kitail ahnsou wet, iangahki tohn atail peneinei kan me kitail poakohng?
10. Dahme kahrehda e kesempwal en pousehlahte padahkihong aramas akan dahme pahn wiawi ni ahnsou keren?
10 Nin duwen me kitail koasoiapene mwoweo, ele kupwuren Siohwa iei en ketin doarehla aramas akan me tepida pwosonla ih mwurin arail kilang kasohralahn Papilon Lapalap. Ma ei, e uhdahn kesempwal en pousehlahte padahkihong irail duwen met. Medewehla met: Ni ahnsowo, irail kakete tamanda dahme kitail padahkihong irail ahnsou wet. (Pil kilang Esekiel 33:33.) Mwein irail kakete tamanda dahme irail rongasang kitail oh men iang kitail papah Siohwa mwohn eh pwandala. Duwehte silepen imwetengo nan Pilipai eh mwadangete wekidala eh madamadau mwurinte ‘rerrer en sahpw laud ehu eh wiawi,’ ele ekei me sohte mwekidki ahnsou wet pahn wekidala arail madamadau mwurinte kasohralahn Papilon Lapalap.—Wiewia 16:25-34.
KITAIL KIN KALOHK PWEHKI KITAIL POAKOHNG SIOHWA OH MWAREO
11. Ia duwen atail kin kalinganahla, kawauwih, oh patohwanohng Siohwa atail roson? (Kaudiahl 4:11) (Pil kilang kilel kan.)
11 Kahrepe keieu kesempwal me kitail kin kalohki rongamwahwo iei pwehki kitail poakohng Siohwa Koht oh mware sarawio. Kitail kin wiahki kalohk ehu ahl en kapinga Kohto me kitail kin poakohng. (Wadek Kaudiahl 4:11.) Kitail kin iang pwungki me Siohwa Koht me ketin warohng ale lingan, wahu oh roson sang sapwellime tohnkaudok lelepek kan. Kitail kin kalinganahla oh kawauwih Siohwa ni atail ehukihong meteikan mehn kadehde kan me e ketin “kapikada mehkoaros” oh me kitail momour pwehki ih. Kitail kin patohwanohng Siohwa atail roson ni atail doadoahngki atail ahnsou, kehl, oh kepwe kan pwehn kalohk ni uwen me kitail kak. (Mad. 6:33; Luk 13:24; Kol. 3:23) Kitail kin perenki koasoia duwen Kohto me kitail poakohng. Kitail pil kin mwekidki en padahkihong meteikan duwen mwareo oh soangen Koht dahmen ih. Dahme kahrehda?
Kitail kin patohwanohng Siohwa atail roson ni atail doadoahngki atail ahnsou, kehl, oh kepwe kan pwehn kalohk ni uwen me kitail kak (Menlau kilang parakrap 11)
12. Ia duwen atail kin kasarawihala mwaren Siohwa nan atail kalohk?
12 Atail poakohng Siohwa kin kamwakid kitail en kasarawihala mwareo. (Mad. 6:9) Met wehwehki me kitail men padahkihong meteikan me soahng suwed kan me Sehdan ndahki duwen Siohwa sohte mehlel. (Sen. 3:1-5; Sohp 2:4; Sohn 8:44) Ni atail kin kalohk, kitail kin inengieng padahkihong koaros me men rong duwen Siohwa. Kitail men koaros en ese me sapwellime irair keieu kaselel iei limpoak, me sapwellime elen kaunda kin pwung pahrek, oh me sapwellime Wehio pahn kereniong katokehdi lokolok koaros oh wahdo popohl oh peren ong aramas akan. (Mel. 37:10, 11, 29; 1 Sohn 4:8) Ni atail kin padahkihong aramas akan soahng pwukat, kitail kin kasarawihala mwareo. Kitail pil kin peren pwehki kitail kin wiewia dahme kitail konehng wia nin duwen Sounkadehdehn Siohwa kan. Ia duwen?
13. Dahme kahrehda kitail kin pohlki atail adaneki Sounkadehdehn Siohwa kan? (Aiseia 43:10-12)
13 Siohwa ketin pilada kitail en wia sapwellime “sounkadehde.” (Wadek Aiseia 43:10-12.) Sounpar kei samwalahro, kisinlikou ehu sang Pwihn me Kin Apwalih Mwomwohdiso nan Sampah Pwon koasoia: “Pwais keieu kaselel me kitail kak ahneki iei en adaneki Sounkadehdehn Siohwa kan.”c Dahme kahrehda? Medewehla ehu karasaras. Medewehla me emen kapwukoahkin uhk mehkot sapwung. Eri ke anahne emen en padahkihong meteikan me likamw pwoat mwo oh me kowe aramas mwahu men me sohte douluhl pahn wia soahng wet. Ihs me ke pahn pilada? Ke pahn pilada emen me ke ese, kin likih, oh me kin tiahk mwahu pwe meteikan en kamehlele. Sang ni Siohwa eh ketin pilada kitail en wia sapwellime Sounkadehde, e ketin kasalehda me e uhdahn mwahngih kitail oh likih me kitail pahn padahkihong meteikan me ihete me Koht mehlel. Kitail uhdahn pohlki atail wia sapwellime Sounkadehde, ihme kahrehda kitail kin doadoahngki ahnsou mwahu koaros pwehn kalohki duwen mwareo oh kadehdehda me soangen likamw tohto me pid ih sohte mehlel. Ni ahl wet, kitail kin kadehdehda wehwehn adatailo, Sounkadehdehn Siohwa kan!—Mel. 83:18; Rom 10:13-15.
KITAIL PAHN POUSEHLAHTE KALOHK LAO LEL NI IMWI
14. Soahng dah kan me kitail kasikasik en wiawi ni ahnsou kohkohdo?
14 Kitail kin kasikasik en kilang dahme kakete wiawi ni ahnsou kohkohdo! Sang ni sapwellimen Siohwa sawas, kitail kin koapworopworki en kilang me aramas me iangkitailla mwohn kahn kamakam kowahlapo eh tepida pahn tohtohla. Kitail pil perenki me ahnsoun kahn kamakam kowahlapo, me wia ahnsou keieu apwal, aramas tohtohie ele pahn pedoisang ahn Sehdan sampah oh iang kitail kapinga Siohwa!—Wiewia 13:48.
15-16. Dahme kitail pahn pousehlahte wia, oh lel iahd?
15 Ahnsou wet, mie doadoahk kesempwal ehu me kitail en wia, doadoahk ehu me kitail sohla pahn pwurehng wia. Kitail ahneki pwais kaselel en kalohki rongamwahu en Wehin Koht nan sampah pwon. Ni ahnsowohte, kitail anahne pousehlahte padahkihong aramas akan dahme pahn wiawi ni ahnsou keren. Aramas akan anahne ese me imwin koasoandi suwed wet kerendohr. Eri ni ahnsoun kadeiko leledo, irail pahn ese me rohng me kitail kin kalohki kohsang rehn Siohwa Koht.—Esek. 38:23.
16 Eri, dahme kitail en koasoandi teng en wia? Kitail kin mwekidki atail poakohng rongamwahwo, poakohng aramas akan oh, keieu kesempwal, poakohng Siohwa Koht oh mwareo—ihme kahrehda kitail pahn pousehlahte kalohk ni ngoang oh karuwaru lao Siohwa ketin mahsanih, “Doadoahk en kalohko nekier!”
KOUL 54 “Iet Ahlo”
a Mihting en pahr wiawi nan October 7, 2023 nan Newburgh Assembly Hall en Sounkadehdehn Siohwa kan nan New York, U.S.A. Mwuhr, prokramo pwon kohda nan JW Broadcasting®—Pali 1 nan November 2023 oh Pali 2 nan January 2024.
b Menlau kilang artikelo “The Bible Changes Lives—I Was Impressed by the Bible’s Clear, Logical Answers,” me mi nan The Watchtower en February 1, 2015.
c Menlau kilang 2007 Yearbook of Jehovah’s Witnesses, pali 3.