“Kowe Emen me Uhdahn Kesempwal”!

1-2. Dahme kak sewese kitail en kamehlele me kitail kesempwal mwohn silangin Siohwa?

SAPWELLIMEN Siohwa aramas akan uhdahn kesempwal mwohn silangi. Ahpw ekei sohte kin kamehlele me Siohwa uhdahn ketin poakohng irail. Mwein met pwehki mie me kahrehiong irail en pehm me re sohte kesempwal. Mie pak ke ahneki soangen pepehm wet? Ma ei, dahme sewese iuk ken kamehlele me ke uhdahn kesempwal mwohn silangin Siohwa?

² Dahme kak seweseiuk iei en wadek duwen irail kan nan Paipel me kasalehda ia duwen Siohwa eh kin ketin kupwurki kilengwohng oh apwalih aramas akan. Sapwellime Ohlo Sises kin ketin wauneki oh kadek ong aramas akan. Sang ni eh ketin wia met, e kasalehda me ih oh Semeo kin ketin kesempwalki irail kan me pehm me sohte kateparail. (Sohn 5:19; Ipru 1:3) Nan iren onop wet, kitail pahn koasoiapene: (1) ia duwen Sises eh ketin sewese aramas akan en ese me re kesempwal oh (2) oh ia duwen atail kak kamehlelehiong pein kitail me kitail uhdahn kesempwal mwohn silangin Siohwa.—Ak. 2:7.

IA DUWEN SISES EH KETIN SEWESE ARAMAS AKAN REN ESE ME RE KESEMPWAL

3. Ia mwomwen sapwellimen Sises wiewia ong mehn Kalili ko me kohla peksawas reh?

³ Ni ahnsou me Sises ketin kalokalohk nan Kalili, aramas tohto patohla reh pwe ren rong oh en kamwahwihala arail soumwahu. Sises ketin tehk me “irail wiakaula oh sohte epwelparail rasehng sihpw kan me sohte sileparail.” (Mad. 9:36) Arail kaunen pelien lamalam kan kin mwamwahliki oh pil ekerkin irail “aramas riahla kei.” (Sohn 7:​47-49) Ahpw Sises ketin kadek ong irail oh pil waunekin irail sang ni eh wiahda ahnsou pwehn padahkih irail oh kamwahwihala arail soumwahu kan. (Mad. 9:35) Patehng met, pwehn pil sewese meteikan, e ketin kaiahnehda sapwellime wahnpoaron ko en iang kalohk oh kihong irail manaman en kamwahwihala soumwahu kan.—Mad. 10:​5-8.

4. Dahme kitail sukuhlkihsang sapwellimen Sises wiewia ong irail kan me meteikan kin mwamwahliki?

⁴ Sang ni eh kin kasalehda kadek oh wauneki irail kan me kin rong ih, Sises kasalehda me ih oh Semeo kin ketin kesempwal irail kan me meteikan kalapw mwamwahliki. Ma ke kin papah Siohwa ahpw peikasalki me ke kesempwal reh, medewehla ia duwen Sises eh kin ketin kesempwalki irail kan me kin men sukuhlsang reh. Omw wia met kak seweseiuk en kilang ia uwen omw kesempwal mwohn silangin Siohwa.

5. Dahme kitail ese duwen liho me Sises ketin tuhwong nan Kalili?

⁵ Sises sohte ketin padahkihte pokon en aramas akan ahpw e pil padahkih oh sewese emenemen. Karasepe, erein eh kalokalohk nan Kalili, Sises ketin tuhwong lih emen me lokolongkier soumwahu en nta pwilipwil erein sounpar 12. (Mark 5:25) Pwehki eh soumwahwo kahrehiong en samin, nin duwen kosonnedo, mehmen me doahke pahn saminkihla. Eri e sohte kin patehng aramas akan oh ele e kin kalapw kelekelehpw. Patehng met, e sohte kak iang meteikan kaudokiong Siohwa nan sinakoke kan de erein kasarawi kan. (Lip. 15:​19, 25) Eri lih menet sohte ahnekihte soumwahu ahpw e pil ahneki pepehm me sohte me nsenohki.—Mark 5:26.

6. Dahme liho wia pwehn mwahudahsang eh soumwahu en nta pwilipwilo?

⁶ Lih menet me lokolongkier eh soumwahu men Sises en ketin kamwahwihala. Ahpw e sohte peki en kamwahwihala. Dahme kahrehda? Ele pwehki e namenengki eh soumwahwo. De mwein e perki me Sises pahn ketin lipwoare pwehki e kohla nan pokon erein eh mi nan irair samin. Eri e doahke en Sises likowo pwe e kamehlele me met pahn kamwahwihala. (Mark 5:​27, 28) Eri e paiekihda eh pwoson pwehki eh soumwahwo mwahula. Sises eri keinemwe rehn pokono ihs me doahke ih, liho eri wehkada me ih. Ia duwen Sises eh ketin mwekidki met?

7. Ia mwomwen sapwellimen Sises wiewia ong lih menet me uhdahn lokolok? (Mark 5:34)

⁷ Sises ketin kasalehda wahu oh kadek ong liho. E mwahngih en liho eh “masepwehkada oh rerrer.” (Mark 5:33) Eri e uhdahn kadekohng oh kangoange ih. E pil ketin ekerki ih “nei serepein.” Ni eh ketin doadoahngki lepin lokaia wet, Sises sohte kasalehdahte me e wauneki ih ahpw e pil kadek oh poakohng. (Wadek Mark 5:34.) Ihte ahnsou wet nan Paipel me Sises ketin ekerki lih emen “nei serepein.” Ele e doadoahngki lepin lokaia kadek wet pwehki e mwahngihada liho eh uhdahn masepwehkada. Medewehla ia uwen eh nsenamwahula! Dahme e mahsaniho kansenamwahwihala liho pwe en dehr suwedki eh doahke sapwellime likowo oh kohla nan pokono. Sises kupwurki wia laudsang kamwahwihala en liho soumwahwo. Ahpw e men en ese me Sahm limpoako nanleng ketin wiahki ih sapwellime serepein kesempwal.

8. Soangen kahpwal dah me emen sister sang Brazil ahneki?

⁸ Pil rahnpwukat, ekei sapwellimen Koht ladu kan ahneki soumwahu me kak kahrehiong irail en nsensuwed oh pehm me sohte kateparail. Maria,a wia pioneer men nan Brazil. Ni ahnsou me e ipwidi, sohte neh kan oh peh ni palimeing. E koasoia: “Iengei tohnsukuhl kan kin kalapw liderehkin ie ei soumwahwo oh ekerkin ie ahd akan me kin kansensuwedihiehla. Oh ekei pak, pein ei peneinei kin kahrehiong ien pehm me sohte katepei.”

9. Dahme sewese Maria en kilang me e kesempwal mwohn silangin Siohwa?

⁹ Dahme sewese Maria? Ni ahnsou me e wiahla emen Sounkadehdehn Siohwa, ienge Kristian kan kansenamwahwih oh sewese en kilang pein ih nin duwen me Siohwa ketin wia. E koasoia: “Uwen tohtohn iengei Kristian kan me sewese ie, I sohte kak kilelehdi! I kalahngankihong Siohwa sang ei mohngiong unsek eh ketikihong ie peneinei kaselel ehu.” Iengen Maria Kristian ko sewese en pehm me e kesempwal mwohn silangin Koht.

10. Soangen kahpwal dah me Mery mehn Makdala kin lokolongki? (Pil kilang kilel kan.)

¹⁰ Medewehla ia duwen Sises eh ketin sewese emen lih me adaneki Mery mehn Makdala. Ngehn suwed isimen tiada powe! (Luk 8:2) Mwein ngehn suwed ko kin kahrehiong en wia soahng kan me ehusoahng oh met kakete kahrehda aramas akan ren sohte men patehng. E uhdahn lokolongki met oh mweinele kahrehiong en uhdahn masepwehk oh medewe me sohte me poakohng de pil kak sewese ih. Mwein Sises me ketikihsang ngehn suwed ko reh, ih eri wiahla sapwellime tohnpadahk. Pil soangen ahl dah me Sises sewese Mery mehn Makdala en kilang ia uwen eh kesempwal mwohn silangin Koht?

11. Ia duwen Sises eh ketin kasalehiong Mery mehn Makdala me e kesempwal rehn Siohwa? (Pil kilang kilel kan.)

¹¹ Sises ketin luke Mery mehn Makdala en iangih nan sapwellime seiloak en kalohk.b Pwehki met, e pousehlahte paiekihda eh rongorong sapwellimen Sises padahk ong meteikan. Sises pil ketin pwarohng ih rahnohte me e ketin iasada. Oh ih emen tepin tohnpadahk ko me Sises mahseniong rahno. Sises pil ketin peki reh en kairehki sapwellime wahnpoaron ko me e ketin iasadahr. Nan soangen ahl pwukat koaros, Sises ketin sewese en kilang me e uhdahn kesempwal mwohn silangin Siohwa!—Sohn 20:​11-18.

12. Dahme kahrehda Lidia kin pehm me sohte me kak poakohng?

¹² Duwehte dahme wiawihong Mery mehn Makdala, me tohto rahn pwukat kin ele pehm me sohte me kak poakohng irail. Lidia, sister men sang Spein, koasoia me mwohn e ipwidi, eh nohnou medemedewehier en kauwehla eh liseiano. Ni eh wie kisin serihte, Lidia tamataman ia duwen eh nohnou eh kin pohnsehsehla oh ndaiong soahng kamedek kan. E koasoia: “Pwehki ei nohnou eh sohte kin kasalehiong ie limpoak, I kin ahnsou koaros men meteikan en poakohng ie oh wia kompoakepahi. I perki me I sohte pahn warohng soangen limpoak wet pwehki ei nohnou kamehlelehiong ie me I wia aramas suwed men.”

13. Dahme sewese Lidia en kilang me e kesempwal rehn Siohwa?

¹³ Mwurin Lidia eh esehla duwen padahk mehlel, eh madamadau wekila. Eh kin kapakapohng Siohwa, wadek Paipel, oh koasoi oh wiewia kadek kan en rie Kristian kan ong ih, kin sewese en wehwehki me e kesempwal mwohn silangin Siohwa. E koasoia: “Ei pwoudo kin kalapw ndaiong ie ia uwen eh poakohng ie. Oh ahnsou koaros, e kin katamankihong ie ei irair mwahu kan. Kompoakepahi teikan pil kin wia duwehte.” Ke kak medewehla emen me anahne sawas en wehwehki ia uwen eh kesempwal mwohn silangin Siohwa?

IA DUWEN ATAIL PAHN KILANG PEIN KITAIL NIN DUWEN ME SIOHWA KIN KETIN WIA

14. Ia duwen 1 Samuel 16:7 eh sewese kitail en kilang mwomwen Siohwa eh kin ketin kilengwohng aramas akan? (Pil kilang koakon “Dahme Kahrehda Siohwa Kin Ketin Kesempwalki Sapwellime Aramas akan?”)

¹⁴ Tamataman me Siohwa sohte kin ketin kilengwohng uhk duwehte me aramas en sampah wet kin wia. (Wadek 1 Samuel 16:7.) Aramas tohto kin medewe me kesempwalpen aramas emen kin kohsang ni mwomwe, uwen tohtohn nah mwohni, oh uwen sukuhl me e alehdi. Ahpw Siohwa sohte kin ketin ahneki soangen madamadau wet. (Ais. 55:​8, 9) Eri song en kilengwohng pein uhk nin duwen me Siohwa kin ketin wia ahpw kaidehn nin duwen me aramas en sampah wet kin wia. Paipel koasoia duwen aramas akan me kin ekei pak pehm me sohte kateparail, duwehte Elaisa, Naomi, oh Ana. Ni omw kin wadek duwen irail, tehk ia uwen laud en Siohwa eh uhdahn ketin poakohng oh kesempwalkin irail. Ele ke pahn pil men ntingihdi dahme wiawihong uhk me kamehlelehiong uhk me Siohwa uhdahn ketin poakohng oh kesempwalkin uhk. Patehng met, ke pil kak kilang nan neitail sawasepen Paipel kan ire kan me kasalehda uwen ahn emen eh kesempwal.c

15. Dahme kahrehda Siohwa ketin kilengwohng Daniel nin duwen “emen me uhdahn kesempwal”? (Daniel 9:​23, NW)

¹⁵ Katamankihong pein kowe me pwehki omw lelepek, ke uhdahn kesempwal ong Siohwa. Ele ni eh kereniong sounpar 100, soukohp Daniel pehm me e ‘uhdahn pwangada’ oh mworusala. (Dan. 9:​20, 21) Ahpw ia duwen Siohwa eh ketin kangoange? Koht ketin poaronehla tohnleng Kapriel pwehn katamankihong Daniel me e wia “emen me uhdahn kesempwal” oh me e ketin karongehier eh kapakap. (Wadek Daniel 9:​23, NW.)d Dahme kahrehda Daniel uhdahn kesempwal rehn Koht? Pwehki Daniel kin poakohng dahme pwung oh lelepek. (Esek. 14:14) Siohwa ketikihdiong ire pwukat nan sapwellime Mahsen pwehn kansenamwahwih kitail. (Rom 15:4) Siohwa pil kin ketin karonge omw kapakap kan oh kesempwalkin uhk pwehki ke kin poakohng dahme pwung oh omw lelepek papah ih.—Maika 6:8; Ipru 6:10.

16. Dahme kak seweseiuk en kilengwohng Siohwa nin duwen Sahm limpoak men?

¹⁶ Kilengwohng Siohwa nin duwen Sahm men me ketin poakohng uhk. E ketin kupwurki seweseiuk a kaidehn en kilang omw sapwung kan. (Mel. 130:3; Mad. 7:11; Luk 12:​6, 7) Dahme sewese me tohto me kin pehm me sohte kateparail, iei en doudouloale duwen met. Karasepe, medewehla sister men sang Spain me adaneki Michelle, me pehm me sohte me poakohng oh sohte katepe pwehki eh pwoudo kin lokaia lemeiong erein sounpar tohto. E koasoia: “Ni ahnsou me I kin pehm me sohte katepei, I kin song medewehla me Siohwa kin ketin weuwa ie oh ketin kasalehiong ie me e poakohng oh kin apwahpwalih ie.” (Mel. 28:9) Sister men sang South Africa me adaneki Lauren, katamankihong pein ih, “Ma Siohwa ketin kakerenihiehdo reh, karanihete erein sounpar tohto, oh pil ketin doadoahngkin ie pwehn padahkih meteikan, eri e uhdahn ketin kesempwalki oh wiahkin ie emen me katapan.”—Os. 11:4.

17. Dahme kak sewese kamehlelehiong uhk me Siohwa ketin kupwurkin uhk? (Melkahka 5:12) (Pil kilang kilel.)

¹⁷ Kamehlelehiong uhk me Siohwa ketin kupwurkin uhk. (Wadek Melkahka 5:12.) Depit kapahrekihong sapwellimen Siohwa kupwuramwahu “mehnsansar” laud ehu me kin pere aramas pwung kan. En ese me Siohwa kin ketin utung oh kupwurkin uhk kak pereiuk sang madamadau me sohte katepomw. Ia duwen omw kak ese me Siohwa ketin kupwurkin uhk? Sang ni atail kilangehr, Siohwa ketikihong kitail Paipel pwehn padahkihong kitail sapwellime pepehm ong kitail. Patehng met, e ketin doadoahngki elder kan, kompoakepahmw keren kan, oh meteikan pwehn katamankihong uhk me ke kesempwal mwohn silangi. Ia duwen omw pahn mwekidki soangen mehn kangoang pwukat?

18. Dahme kahrehda ke anahne kamehlele ni meteikan ar kapingaiuk?

¹⁸ Ni ahnsou me irail kan me poakohng uhk oh ese iuk ndawei soahng mwahu kan duwen kowe, dehr medewe me irail sapwung. Tamataman me Siohwa me mwein ketin doadoahngkin irail pwehn kamehlelehiong uhk me e ketin kupwurkin uhk. Michelle, me kitail koasoiapene mwoweo, koasoia: “I kin ekisekis kamehlelehla lokaia kadek sang meteikan. E apwal, ahpw I ese me Siohwa ketin kupwurki ien wia met.” Elder kan pil kin sewese Michelle ni kadek pwehn kilang me Siohwa ketin poakohng ih. Met e wia pioneer men oh kin sewese doadoahk nan Pedel sang ni imweo.

19. Dahme kahrehda ke kak kamehlele me ke kesempwal mwohn silangin Koht?

¹⁹ Sises ni kadek katamankihong kitail me kitail uhdahn kesempwal ong Samatailo nanleng. (Luk 12:24) Eri kitail kak kamehlele me kitail kesempwal mwohn silangin Siohwa. Kitail en dehr manokehla met! Oh kitail en wia uwen atail kak en sewese meteikan en kilang uwen arail kesempwal mwohn silangin Koht!