Sawas ong Lih akan me Kin Wiakaula
“LIH oh serepein rar kei nan sampah pwon kin wiakaula. Kowe emen irail? Tehk dahme kahrehda Koht ketin kesempwalki omw epwel mwahu oh dahme e pahn ketin wiahiong duwen wiakauwe lih.”
Ih met me tepin pwarada nan artikel me koasoia “Dahme Kak Wiawi Pwe Lih akan en Sohte Perki Mehkot?—Dahme Paipel Mahsanih?” Ni imwin artikelo, mie link ehu me ke kak padik pwehn download PDF, oh ke kak print oh welikpene wiahda pali pahieu. Sister men nan Wehin Amerika me ede Stacy koasoia, “I print ekei doaropwe pwukat, ngehi oh emen sister eri wahla wasa ehu me kin apwalih lih akan.”
Emen tohndoadoahk idek ma e kak ale pil ekei doaropwe pwehn nehkohng irail akan me kin kousoan wasao. Sister riemeno eri kihla kisin doaropwe 40 iangahki jw.org contact card 30. Mwuhr, tohndoadoahk me kin apwalih wasao men Sounkadehde ko ren kasalehiong lih akan me kin kousoan wasao mwomwen onop Paipel.
Stacy oh pil sister riemen kohla pil ehu wasa me kin apwalih lih akan. Sister ko kihla kisin doaropwe limau oh tohn wasao pil peki ekei doaropwe. Emen tohndoadoahk ko koasoia, “Doaropwe wet pahn sewese lih akan wasaht, oh se anahne met.” Ni ahnsou me sister ko pwurala, ekei lih ako men kilang mwomwen onop Paipel, oh meh riemen nda me ira men iang towehda mihting en imwin wihko nan Wasahn Kaudok.
Stacy koasoia: “Se pwuriamweiki aramas akan ar kin peren ni ar wadek artikel wet. Ni omw print oh welikpene kisin doaropweo, e kin mengei en doadoahngki pwehn lohki rohng en Wehio ong lih akan me wiakaula. E kaperen kilang duwen aramas akan ar kin peren ni ar wadek ire pwukat. Se perenki kilang duwen Siohwa eh pahn ketin sewesei kitail en pousehlahte lohki rongamwahwo ong lih pwukat.”