Alasang Sapwellimen Siohwa Aktikitik

1. Dahme kapwuriamwei duwen sapwellimen Siohwa aktikitik?

NI OMW kin medewehla kaunen koperment kan rahnwet, ke pahn nda me re kin aktikitik? Mwein soh. Mendahki Siohwa me keieu manaman ahpw e kin aktikitik. (Mel. 113:​5-8) Sohte me aktikitik duwehte Siohwa; E sohte mwahn kin aklapalap. Nan iren onop wet, kitail pahn koasoiapene soahng kaselel pahieu me Siohwa kin ketin wiahiong kitail oh kitail pahn kilang ia duwen ehuehu mepwukat eh kin kasalehda me e uhdahn ketin aktikitik. Kitail pil pahn tehkpene ia duwen Sises eh kin ketin alasang en Semeo aktikitik. Ni atail tehkpene soahng pwukat, met pahn sewese kitail en karanihala Siohwa oh kitail pahn aktikitikla duwehte ih.

SIOHWA KUPWURKI KARONGE KITAIL

2. Dahme Melkahka 62:8 padahkihong kitail duwen Siohwa? (Menlau pil kilang kilel ni kilin Kahn Iroir wet.)

² E sohte mengei en kin koasoiong aramas aklapalap. Aramas aklapalap sohte kin kalapw kadekohng meteikan pwehki re medewe me re mwahusang irail, kahrehda aramas akan kin soikirailla. Siohwa uhdahn ketin weksang met! Samatail nanleng me aktikitik ketin luke kitail en patohwanohng soahng koaros me kitail kin pwunodki oh pehm. (Wadek Melkahka 62:8.) Duwehte pahpa nsenoh men me men ese dahme nah seri kan kin medemedewe oh pwunodki, Siohwa uhdahn ketin kupwurki karonge atail kapakap kan. Mie soangen kapakap pwukat me kileldi nan Paipel. Met kasalehda me Siohwa ketin kupwurki karonge atail kapakap kan. (Sos. 10:​12-14; 1 Sam. 1:​10-18) Ahpw, mwein ekei pak ke kin pehm me ke sohte kak kapakapohng Siohwa pwehki sapwung kan me ke wiahda.

3. Dahme kahrehda ke kamehlele me Siohwa kupwurki ken kin kapakapohng ih ahnsou koaros?

³ Kitail kak kapakapohng Siohwa mehnda ma kitail pehm me kitail sohte warohng sapwellime limpoak. Dahme kitail kak ndahki met? Nan sapwellimen Sises karasaras en pwutak salongalao, e ketin karasahiong Siohwa pahpa limpoak men, me naineki pwutak men me wiahda sapwung tohto oh pehm me eh pahpao sohte men en pwurala nan eh peneineio. Ahpw dahme pahpao wia ni pwutako eh pwurala ni imwarailo? Sises mahsanih me ni ahnsowohte me pahpao kilangada nah pwutako, pahpao ahpw “tangalahte pwoalehdi oh metik.” (Luk 15:​17-20) Siohwa ketin duwehte pahpa menet. Ni eh kin ketin karonge atail kin kapakapohng ih pwehki atail kin nsensuwedki atail sapwung de pwunod kan, e kin uhdahn ketin karonge kitail. (Koul Ked. 3:​19, 20) Siohwa kin uhdahn ketin poakeikitailla, oh duwehte pahpao me tangatang kohdo, e kin ketin kamehlelehiong kitail me e kin poakohng kitail oh kin kaloalamwahwih kitail. (Ais. 57:15) Ia duwen Siohwa eh kin ketin wia met? E kin ketin kalapw doadoahngki elder kan, atail peneinei oh kompoakepatail kan me poakohng ih ren kansenamwahwih kitail. (Seims 5:​14, 15) Siohwa ketikihda soangen sawas wet pwehki e ketin kupwurki kitail en kin karanih ih.

4. Dahme kahrehda aramas akan kin mengeiki koasoiong Sises?

⁴ Sises kin ketin alasang Semeo. Sises duwehte Semeo me kin ketin aktikitik. Ni eh ketiket nin sampah, aramas akan kin perenki kohdo reh. Re sohte kin masak kalelapak reh. (Mark 4:​10, 11) Oh ni eh kin ketin kalelapak rehrail arail madamadau duwen mehkot ehu, re kin patohwanohng ih arail pepehm. (Mad. 16:​13-16) Oh ni ar kin wiahda sapwung, re sohte kin masak me Sises pahn engiengda pahrail, pwehki Sises kin ketin kadek, mahk oh kanengamah. (Mad. 17:​24-27) Pwehki Sises uhdahn kin alasang Semeo, sapwellime tohnpadahk ko pil esehla mwahu duwen Siohwa. (Sohn 14:9) Pwehki Sises, aramas ako pil kak kilang me Siohwa kin aktikitik oh kin kupwurki karanih irail. E sohte douluhl duwehte arail kaunen pelien lamalam kan me kin lemei oh aklapalap.

5. Dahme kahrehda meteikan pahn mengeiki koasoiong kitail ma kitail kin aktikitik?

⁵ Ia duwen atail kak alasang Siohwa? Ni atail kin kakairada aktikitik met kin kahrehiong meteikan ren mengeiki koasoiong kitail. Aktikitik pahn pereikitailsang peirin, aklapalap oh soh mahk—irair kan me kin kadohwankitailsang meteikan. Ahpw aktikitik pahn kin sewese kitail en kin kadek, kanengamah oh mahk—irair kan me kin kakerenihedo meteikan rehtail. (Kol. 3:​12-14) Elder kan anahne kanahieng pwe riarail kan nan mwomwohdiso en kin mengeiki koasoiong irail. Pwe ren wia met, elder kan anahne kin mi rehn riarail kan. Met wehwehki me re anahne iang towehda mihting nan wasahn kaudok, mehnda ma re perenki iang mihting nan Zoom. Oh ni ahnsou me re kak, re kin iang riarail Kristian kan kalohk ihmw lel ihmw. Riarail kan nan mwomwohdiso pahn esehla mwahu irail oh pahn kin saledek en koasoiong irail ma re anahne sawas.

SIOHWA KIN KETIN TOUPAHREK

6-7. Menlau kihda karasepe kan me kasalehda Siohwa kin ketin kupwurki wekidala kupwure ni sapwellime kan ar kin kapakapohng.

⁶ Aramas aklapalap kin kalapw medewe me re ese dahme keieu mwahu oh sohte kin men wekidala arail madamadau. Ahpw Siohwa, me kin ketin mwahngih dahme keieu mwahu, sohte ketin duwehte met. Pwehki e ketin aktikitik, e kin kupwurki karonge dahme meteikan kin medewe oh wekidala sapwellime pilipil kan. Medewehla dahme e ketin wiahiong Miriam, rien Moses. Ih oh Aaron lipahnedehda Moses me wia wiliepen Siohwa. Miriam kasalehda eh mwamwahliki Siohwa. Ahpw Aaron peki rehn Moses en sewesehda Miriam. Oh Moses peki rehn Siohwa en ketin kamwahwihala ih. Eri, dahme Siohwa ketin wia? Aramas aklapalap men sohte pahn wekidala eh madamadau, ahpw dahme Siohwa ketin wia weksang met. Pwehki e ketin aktikitik, e karonge Moses oh kamwahwihala Miriam.—Nemp. 12:​1-15.

⁷ Siohwa pil ketin kasalehda aktikitik sang dahme e wiahiong Nanmwarki Esekaia. Siohwa ketin doadoahngki sapwellime soukohpo en padahkihong nanmwarkio me e pahn mehla. Esekaia eri sengiseng oh peki Siohwa en ketin kamwahwihala ih. Ni kadek, Siohwa ketin karonge en Esekaia kapakapo oh padahkihong me e pil pahn momourki sounpar 15. (2 Nan. 20:​1, 5, 6) Siohwa kin ketin poakehla aramas akan oh pwehki e ketin aktikitik, e kin kupwurki karonge irail.

8. Karasepe dah kan me kin kasalehda Sises kin ketin toupahrek? (Mark 3:​1-6)

⁸ Sises kin ketin alasang Semeo. Sises kin ketin wia me mwahu ong meteikan ahnsou koaros me e kak. Karasepe, e ketin kamwahwihala aramas ni rahnen Sapad mendahki kaunen pelien lamalam kan medewe me met sohte konehng. (Wadek Mark 3:​1-6.) Sises kin ketin toupahrek oh poakehla aramas akan sang ni mwomwen eh kin kaweid mwomwohdiso rahnwet. Karasepe, ni emen nan mwomwohdiso eh wiahda dihp laud ehu, e kin ketin kanengamahiong oh kihong ih ahnsou en kapwungala eh wiewia kan.—Kaud. 2:​2-5.

9. Ia duwen atail kak medewe oh mwekid ni ahl toupahrek? (Pil kilang kilel kan.)

⁹ Ia duwen atail kak alasang Siohwa? Kitail anahne sukuhlkihsang Siohwa mwomwen atail pahn kin medewe oh mwekid ni ahl toupahrek. (Seims 3:17) Karasepe, pahpa oh nohno kan me kin alasang Siohwa, sohte pahn kasik neirail seri kan en wia mehkot me re sohte kakohng. Ehu mehn kahlemeng mwahu duwen met iei Seikop me kin nsenohki nah seri kan. (Sen. 33:​12-14) Pahpa oh nohno kan me kin toupahrek, sohte pahn kin song en kapahrekihpene neirail seri kan. Elder kan pil anahne kin toupahrek. Karasepe, elder men sohte pahn kin ngihtehtehki eh madamadau, ahpw e pahn kin utung dahme pali laud en elder kan pilada ma met sohte kauwehla kaweid en Paipel. (1 Tim. 3:​2, 3) Oh kitail koaros anahne nantihong en wehwehki dahme meteikan medewe oh arail pepehm mehnda ma atail madamadau oh pepehm weksang arail. (Rom 14:1) Ei, koaros nan mwomwohdiso anahne nantihong pwe aramas ‘koaros en kilang arail madamadau toupahrek.’—Pil. 4:5.

SIOHWA KIN KETIN KANENGAMAH

10. Ia duwen Siohwa eh kin ketin kasalehda kanengamah?

¹⁰ Mweinele ke kin tehk me aramas aklapalap sohte kin perenki awih meteikan. Aklapalap kin kahrehiong irail en sohte kanengamah. Met uhdahn weksang douluhl Siohwa, ih me kin keieu ketin kanengamah. Karasepe, ni mwehin Noha, Siohwa ketin mahsanih me e pahn ketin awih sounpar 120 mwohn eh pahn ketin kasohrehla me suwed. (Sen. 6:3) Mie ahnsou ong Noha en kakairada nah seri kan oh kauwada warihmwo sang sawas en eh peneinei. Mwuhr ni kanengamah Siohwa ketin karonge Eipraam ni eh kin kalelapak reh duwen kamwomwmwomwlahn Sodom oh Komora. Aramas aklapalap men kakete nda, ‘Sohte ahmw pwuhng en kapeidakih ie!’ Ahpw pwehki Siohwa kin ketin aktikitik, e ketin kanengamahiong Eipraam.—Sen. 18:​20-33.

11. Nin duwen me 2 Piter 3:9 mahsanih, dahme kahrehda Siohwa kin ketin kanengamah nan atail ahnsou?

¹¹ Siohwa pil kin ketin kanengamah nan atail ahnsou. E ketin awiawih ahnsou me e ketin pilada en kasohrehla koasoandi wet. Dahme kahrehda e kin ketin kanengamah? “Pwehki e sohte ketin kupwurki emen en kasohrala ahpw e ketin kupwurki aramas koaros en koluhla.” (Wadek 2 Piter 3:9.) Mie katepen sapwellimen Siohwa kanengamah? Ei! Aramas rar kei me ahneki mohngiong mwahu kin karanihala ih. Oh kitail koapworopworki me tohto pahn wia met. Ahpw, Siohwa sohte pahn ketin kanengamah kohkohlahte. E kin ketin poakohng aramas akan, ahpw e sohte pahn ahnsou koaros mweidohng irail en wia soahng koaros me re mwahuki. E sohte pahn ketin mweidohng suwed en mihmi kohkohlahte.—Apak. 2:3.

12. Ia duwen Sises eh kin ketin alasang sapwellimen Siohwa kanengamah?

¹² Sises kin ketin alasang Semeo. Erein sounpar kid kei, Sises kin ketin alasang sapwellimen Siohwa kanengamah. Sises pil kilang Sehdan eh karaunlikamwih Siohwa oh aramas lelepek kan. (Sen. 3:​4, 5; Sohp 1:11; Kaud. 12:10) Sises pil mahsaniher aramas tohto ar kin lokolongki soahng suwed kan. Medewehla ia uwen Sises eh inengieng “kauwehla doadoahk en Tepil.” (1 Sohn 3:8) Dahme kahrehda Sises kak ketin kanengamah awiawih lao Siohwa ketin mahsanihong ahnsou en kamwomwala doadoahk en Tepilo koaros? Ehu kahrepe iei pwehki Sises kin ketin aktikitik, e patohwan ese me Siohwa me pahn ketin pilada ahnsou en kamwomwala koasoandi wet.—Wiewia 1:7.

13. Ia duwen oh dahme kahrehda Sises kin ketin kanengamahiong sapwellime wahnpoaron ko?

¹³ Sises pil kin ketin kanengamahiong sapwellime wahnpoaron ko. Karasepe, ni wahnpoaron ko ar pwurupwurehng akamaiki ihs me keieu lapalap nanpwungarail, Sises sohte ketin pwangahkinirailda. Ahpw, e ketin pousehlahte kanengamahiong irail. (Luk 9:46; 22:​24-27) E ketin kamehlele me re pahn kak wekila. Mie pak ke kin pwurupwurehng wiahda sapwungohte? Ma iei, ke sou kalahnganki me mie omw nanmwarki aktikitik oh kanengamah men?

14. Dahme kak sewese kitail en kalaudehla atail kanengamah?

¹⁴ Ia duwen atail kak alasang Siohwa? Ni atail kin kakairada “sapwellimen Krais madamadau,” atail madamadau oh mwekid kak duwehte sapwellimen Siohwa. (1 Kor. 2:16) Ia duwen atail kak wehwehki sapwellimen Krais madamadau? Ehu ahl me keieu mwahu, iei kaukaule wadek sapwellimen Sises mour me kileldi nan Paipel. Mwuri kitail anahne doadoahngki ahnsou pwehn medewe mwahu dahme Sises ketin wia oh kahrepen eh ketin wia met. Oh kitail pil anahne kapakapohng Siohwa en ketin sewese kitail en kin aktikitik oh kanengamah duwehte Sises. Ni atail kakairada sapwellimen Krais madamadau, kitail pahn kak duwehla Koht ni atail kin kasalehda kanengamah ong meteikan oh ong pein kitail.—Mad. 18:​26-30, 35.

SIOHWA KIN KETIN TETEHK ME AKTIKITIK KAN

15. Menlau kihda ekei karasepe kan me kasalehda Siohwa kin ketin kesempwalki aramas aktikitik kan. (Melkahka 138:6)

¹⁵ Wadek Melkahka 138:6. Nna medewehla, Siohwa me keieu lapalap nanleng oh nin sampah, kin ketin kesempwalki aramas aktikitik kan! Sangete mahs, mie aramas tohto me meteikan kin mwamwahliki ahpw Siohwa kin ketin nsenohkin irail. Kitail sohte ese ekei irail ahpw re kileldi nan Paipel. Karasepe, Depora wia sounpapah lelepek men ong peneinei en Aisek oh Seikop erein sounpar 125. Mendahki aramas akan sohte nohn ese lih loalopwoat menet, Siohwa ketin kamwakid Moses en ntingihedi oaritik kan me kasalehda uwen aramas kin poakohng ih. (Sen. 24:59; 35:8) Erein sounpar epwiki kei mwuhr, Siohwa ketin pilada silepen sihpw pwulopwul men me adaneki Depit en wiahla nanmwarki en wehin Israel. (2 Sam. 22:​1, 36) Mwurin Sises eh ipwidi, Koht ketin poaronehla tohnleng kei rehn pwihnen silepen sihpw kei oh ketikihong irail pwais kaselel en tepin ese me Mesaiao ipwidier nan Pedleem. (Luk 2:​8-11) Oh ni ahnsou me Sosep oh Mery wahdo Sises ni tehnpas sarawio, Siohwa ketikihong aramas mah riemen Simion oh Ana pwais kaselel en kilangedi sapwellime Ohlo. (Luk 2:​25-30, 36-38) Ei, ‘mehnda ma Siohwa kin ketiket wasa ileilehie, ahpw e kin ketin kupwure me tikitik kan’!

16. Ia duwen Sises eh kin ketin alasang Semeo sang ni mwomwen eh wiewia ong meteikan?

¹⁶ Sises kin ketin alasang Semeo. Sises duwehte Semeo, me kin ketin kesempwalki aramas akan me meteikan kin mwamwahliki. E ketin padahkihong aramas akan me “sohte iang sukuhl oh sohte wad” duwen padahk mehlel en Wehin Koht. (Wiewia 4:13; Mad. 11:25) Sises pil ketin kamwahwihala me soumwahu kan. E ketin wia met ni ahl me kahrehiong ren pehm me e ketin poakohng oh waunekin irail. (Luk 5:13) Oh nipwongo mwohnte Sises ketin pwoula, e ketin widen patehnehn sapwellime wahnpoaron ko, mehkot me ladu kante kelehpw kin wia. (Sohn 13:5) Oh mwohn eh ketidahla nanleng, e ketikihong sapwellime tohnpadahk kan koaros, iangahki kitail rahnwet, en wia doadoahk kesempwal ehu, iei sewese aramas akan ren ahneki mour soutuk.—Mad. 28:​19, 20.

17. Ia duwen atail kak poakohng oh wauneki meteikan? (Pil kilang kilel.)

¹⁷ Ia duwen atail kak alasang Siohwa? Kitail kin poakohng oh wauneki aramas akan sang ni atail kin kalohkihong irail rongamwahwo, sohte lipilipil wasa me re kohsang ie, pohn kilirail de ma re sukuhl de soh. Oh kitail kin poakohng oh wauneki riatail Kristian kan sohte lipilipil ma kitail ahneki pwukoa laudsang irail nan mwomwohdiso de ma kitail kak wia soahng teikan mwahusang irail. (Pil. 2:3) Siohwa kin ketin kupwurperenki ni atail kin aktikitik oh limpoakpene oh wauneki emenemen ni soangen ahl wet oh ni soahng teikan.—Rom 12:10; Sep. 3:12.

18. Dahme kahrehda ke men alasang sapwellimen Siohwa aktikitik?

¹⁸ Ni atail kin nantihong alasang aktikitik me Samatail nanleng kin ketin kasalehda, met pahn kahrehiong meteikan ren mengeiki kohdo rehtail, oh atail toupahrek oh kanengamah pahn laudla. Oh kitail pil pahn poakohng oh wauneki meteikan duwehte Siohwa. Oh tamataman, ni atail kin nantihong uwen atail kak koaros en duwehla atail Koht aktikitiko, met pahn kahrehiong kitail en kesempwalla mwohn silangi!—Ais. 43:4.