Tustumuñas di Jeova — Na ke ku e ta fia nel?

Aos, Tustumuñas di Jeova i un riliẑion mundial ku tene diferensa garandi ku utrus grupus riliẑiosus. Suma ki manga di bias i ta ten mau nformason aserka di nos, i na sedu eradu sibi di nos atraves di utru kau. Asin no tene praser di splikau alguns di kusas prinsipal ku no ta fia nel.

Deus, Biblia i Mesias

Tustumuñas di Jeova fia di kuma Deus tene si nomi propi, i ki es nomi dibi di usadu. Deus Tudu Puderosu fala Moises kuma si nomi i “Jeova.” (Saida 3:15; Salmu 83:18, NM.) Moises, Abron, ku manga di utrus omis fiel di tempus pasadu usaba nomi di Deus. (Kumsada 12:8; Ruti 2:​4, 12, NM.) Na bardadi, nomi Jeova ojadu milyaris di bias na Palabra di Deus. Asin, suma kil omis fiel di tempus antigu, anos tambi no ta usa nomi di Deus i no ta difindil. — Isaias 43: 10.

Tustumuñas di Jeova sta konvensidu di ki Palabra di Deus, kunsidu tambi ku nomi di Biblia, i nspiradu pa Jeova Deus. Tambi e sta konvensidu di ki i prinsipal kusa ku Deus ta usa pa papia ku jintis aos. Rei Davi fala des asin: “Spiritu di Siñor papia na ña boka; si palabra staba na ña lingua.” (2 Samuel 23:⁠2) No ta sigi di pertu ke ki Palabra di Deus fala. No ta disal pa i nterpreta si kabesa.

Tustumuñas di Jeova ta seta kil ki comadu di Nobu Testamentu suma livru nspiradu, tambi e ta setal suma kontinuason di “Antigu Testamentu,” o Skrituras Ebraiku. “Nobu Testamentu,” i un parti di Li­vru Sagradu di Deus. Na kumsada i skirbidu na lingua Gregu; Judeus ki viviba na purmeru sekulu di no era ku skirbil. Es omis seduba tustumuñus bibu di kusas ki faladuba pa profetas. Profeta Moises, Isaias ku Daniel, falaba ja aserka di Mesias. I tudu kusas ke falaba bin kumpri na Jesus, sinadur ku ka ten kumpañer na si tempu. Tambi e seduba tustumuñus di kusas ki faladuba nes livrus di Biblia: Kumsada 49:10; Isaias 52:13–53:​12; i Daniel 9:​24-27.

Asin, Tustumuñas di Jeova ta seta Jesus suma Me­sias ki Deus da pa salba jintis di pekadu di Adon ku malis ki tisi. Na kontratu ki Deus fasiba ku Israelitas, lei ku daduba ta mostraba kuma i pirsis sakrifisiu pa pekadus pudi purdadu. (Sirmonias 16:​6, 11, 15, 30; Numerus 15:22-29) Ma es kontratu i seduba so pa puku tempu, tambi i tenba kondison ki pudu. (Saida 19:5, 6) Profeta Jeremias falaba di “un kontratu nobu” ku na tisi purdon kompletu di pekadus i pa tudu tempu. (Jeremias 31:​31-34) Es “kontratu nobu” ku basiaba na sakrifisiu perfeitu, na fasi pa jintis fiel bin vivi na Paraisu ku purmitidu li na tera.— Isaias 53:4-6, 10-12; 65:21-25.

Tustumuñas di Jeova diferenti ku riliẑions ku ta fala ki e sedu Kristons. Na bardadi, es riliẑions fundadu 300 anus dipus di mortu di Jesus, i se krensas disvia ciu di ke ki Jesus nsina. Pur isemplu, no ka ta seta se krensas di Trindadi, ku ta nsina di kuma ­Jesus i Deus. Na nin un parti di Palabra di Deus bu ka na oja es nsinu ku ta nsulta Deus. (Ripitison di Lei 6:4; Markus 12:29; Jon 14:28) No ka ta usa krus suma simbulu, nin no ka ta usa statuas na no kau di adorason. Biblia kondena tudu es kusas. — Saida 20:3-5; 1 Jon 5:21.

Renu di Deus

Na bardadi, Renu di Deus, i prinsipal tema di Palabra di Deus. Aserka di Mesias, profeta Daniel fala es: “I dadu puder pa manda, ku gloria, ku renu, pa tudu rasas ku nasons ku jinti di tudu linguas pudi adoral. Si puder pa manda i pa sempri, i ka na pasa. Si renu i uniku ku ka na kabadu ku el.” (Daniel 7:​13, 14) Tustumuñas di Jeova fia ki Renu di Deus na mon di Mesias, i un guvernu sertu ku na ribanta pas di bardadi pa tera. — Isaias 9:6, 7; Salmu 46:8, 9; 72:7.

Palabra di Deus mostra ki lugar des guvernu i na seu. Tambi i mostranu ki Mesias ku lantandadu di mortu, dipus i bai pa direita di Deus, i Rei des gu­vernu. (Salmu 110:​1, 2) Tustumuñas di Jeova fia ki milyons di jintis na risibi vida ku ka ta kaba na tera. E na sedu povu ku na sta bas di guvernu di Mesias. Asin, no sta konvensidu di ki tera nunka ka na da­nadu. Tambi purmesa di Biblia na kumpri: “Justus na yarda ki tera, e na mora nel pa sempri.” — Salmu 37:⁠29.

Ma kuma ki Renu di Deus na bin? Biblia mostra ku tudu sertesa ki, ora ki Renu di Deus na bin, i na sedu tambi tempu di Deus miti na asuntus di pekaduris li na tera: “Deus di seu na lantanda utru renu ku nunka ka na danadu. Ki renu . . . na kebra-kebra tudu utru renus, i kaba ku elis. Ki renu na firmantadu di-ritu pa sempri.” — Daniel 2:44.

Kal tempu ku Renu di Deus na bin? Di akordu ku ke ki faladuba ja na Biblia i ku sta na kumpri, Tustumuñas di Jeova, fia di ki Renu di Deus na bin na no tempu. Skrituras Gregu o “Nobu Testamentu” tene palabras di profetas ki falaba ja di kusas ki na bin sedu na “fin de tempu.” No na kumbidau pa jubi alguns des palabras ki faladuba nes livrus di Biblia: Mateus 24:3-14; Lukas 21:7-13, 25-32; i 2 Timótiu 3:1-5.

Suma no ama Jeova Deus ku tudu no korson, ku tudu no alma, ku tudu no ntindimentu i ku tudu no forsa, tambi no ama no visiñus suma no propi kabesa, no ka sta divididu pa patria, rasa o pa pusison sosial. (Sirmonias 19:18; Ripitison di Lei 6:4, 5; Markus 12:30, 31) No kunsidu ciu pa amor ku union ku ta ojadu entri no ermons na fe, na tudu tera. Es i sta di akordu ku profesia ki fala ki “na dias di kabantada,” jintis di tudu tera na adora Deus na union i e ka na ‘aprindi mas gera.’ (Isaias 2:2-4; Sofonias 3:9; Jon 13:35) Asin, no ka ta miti na asuntus di pulitika des mundu. No fia ki adora Deus diritu, signifika nega es kusas: Konta mintida, furta, pekadu seksual, kai cai, omis ku ta ten ku omi, mau usu di sangi, idolatria, ku utrus kusas ku kondenadu na Palabra di Deus. — Saida 20:3-5, 13-17; Sirmonias 17:10; 20:13; Salmu 15:1-5; 1 Koríntius 6:9-11.

Speransa pa futuru

Es mundu i un mundu nunde ki jintis ta padidu, e vivi i e muri. Ma Tustumuñas di Jeova fia di kuma i ten minjor di ki es. No tene konfiansa total na vida di futuru, ku resureson di mortus bas di Renu di Deus. Suma ki Biblia sina, no fia ki ora ki algin muri i ka ta izisti mas. (Salmu 146:3, 4; Eklesiastis 9:5; Ezekiel 18:4) Asin, Biblia ka ta sina ideia di kuma alma ka ta muri o si pekadur muri i ta padidu utru bias. Ma pa kontrariu, futuru di algin ki muri dipindi di Deus lembra del na resureson. — Isaias 25:8; Daniel 12:1, 2, 13.

Tambi Tustumuñas di Jeova sta konvensidu di ki manga di jintis ki na vivi gosi, na bin salba ora ki Renu di Deus bin pa kaba ku tudu guvernus di aos. Na ki tempu, suma ki Noe ku si familia salba na Diluviu, kilis ku na bin salba, na bin vivi na un tera limpu. (Isaias 11:1-9; 65:17; Mateus 24:36-39) Pa no pudi salba fin des mundu no dibi di kunsi ke ki Jeova misti, pabia Biblia fala: “Kilis ku sedu retu, ku ka ten kulpa, e na fika ntidu ne tera.” — Ditus 2:20-22; Salmu 37:9-11, 29.

I klaru ki, nformason ku sta li, i ka sufisenti pa fala di tudu ke ki Tustumuñas di Jeova ta fia nel, ma no na kumbidau pa tene mas nformason na mon di ­Tustumuñas di Jeova di bu visiñansa.

Si i ka ten utru indikason, testus di Biblia tiradu di Biblia (1998), Bíblia no Crioulo da Guiné-Bissau publicada como BIBLIA. Testus sigidu di NM, ta mostra ki traduson i di Tradução do Novo Mundo das Escrituras Sagradas com Referências na Purtugis.