Sta sabi na vida di familia

Sera ki familias pudi sta sabi?

Kuma ki kila pudi sedu?

Bu kunsi kualker familia ki sta unidu i sta sabi suma esis ki bu sta na oja na foto? Na tudu ladu familias sta na pajiga. Kaba kasamenti, falta di bon tarbaju, purbulemas di omi o minjer ki sta na vivi so, diskontentamentu — esis tudu ta omenta kasabi. Sertu algin ku kunsi vida di familia ciga di miskiña asin: “Gosi falta di familia sta ja na ojadu na tudu ladu suma ki faladu.”

Ke ku manda familias aos tene es tipus di purbulemas? Kuma ki no pudi sta sabi na vida di familia?

Kumsada di familia

Pa ruspundi es purguntas, no pirsisa di sibi kal ki kumsada di kasamenti ku familia. Si ten un Algin ki fasi pa kasamenti ku familia ten — ki sedu kin ki kumpunu — membrus di familia dibi di bai pa el pa pudi oca orientason. Pabia el i kunsi diritu kuma ki no pudi sta sabi na vida di familia.

Manga di jintis ta pensa kuma i ka ten un algin ki fasi pa familia ten. Ma, Jesus Kristu papia di kriason di omi ku minjer. I apoia si kombersa ku ke ki faladuba ja na Biblia: “Kil ku Deus junta, omi ka dibi di rapatil.” — Mateus 19:4-6.

Jesus Kristu tene roson. Un Deus jiru kumpuba purmeru omi ku minjer i fasi pa e sta sabi na se vida di familia. Deus kasanta es purmeru omi ku minjer i fala omi dibi di “junta ku si minjer; elis dus e ta sedu un kurpu son.” (Kumsada 2:22-24) Sera ki kila signifika di kuma, purbulemas ki ta ten aos na familia, i pabia di buska yangasa stilu di vida ki ta bai kontra ke ku Deus fala na si Palabra, Biblia?

Kal ki kamiñu di susesu? 

Suma ki sibidu, mundu di gos ta fala kuma i bon pa bu ba ta buska ke ku na kontenta bu vida. Un finansiadur ciga di fala asin pa alu-nus di un skola na Stadus Unidu: “I bon faima pa un kusa. Bu pudi ba ta faima i mesmu tempu kontinua na sinti ben.” Ma mpeña pa kusas material ka ta tisi susesu. Na bardadi i un di kusas ki mas ta tisi purbulema pa vida di familia. Pabia i ta dana bon ralason entri jintis, i ta roba tempu i gasta diñeru. Pa utru ladu, jubi kuma ki dus ditus di Biblia pudi judanu diskubri ke ki no dibi di fasi pa tene sabura.

“Minjor kumida di orta, ku amor, di ki karni di baka gurdu, ku odiu.”

“Minjor un bokadu di kumida seku, ku susegu, di ki kasa ku inci karni, ku jus.”

Ditus 15:17; 17:1.

Es palabras tene forsa, i ka bardadi? Pensa so kuma ku mundu na seduba si tudu familia ta fasi asin! Biblia tambi ta da bon orientason aserka di kuma ki kada kin na familia dibi di trata si kumpañer. Jubi so alguns orientasons ki da.

Omis: ‘Bo ama bo minjer suma bo propi kurpu.’ — Efésius 5:28-30.

Simplis, ma ku ta da bon rusultadu! Tambi Biblia ta fala ki omi dibi di ‘rispita si minjer.’ (1 Pedru 3:7) I ta fasi kila ora ki dal atenson spesial, sinti pa el, ntindil, i usa sempri palabras di amor. Tambi i ta da si opinion balur i sukutal. (Jubi tambi Kumsada 21:12.) Bu ka konkorda di kuma ­kualker familia na sta sabi si omi ta trata si minjer ku ntindimentu, suma manera ki i misti pa sedu tratadu? — ­Mateus 7:12.

Minjeris: ‘Bo rispita bo omi.’ — Efésius 5:33.

Un minjer ta fasi pa familia sta mas sabi, ora ki sta na juda si omi kumpri si tarbaju duru. Es ki faladuba del, pabia Deus kumpu minjer pa i sedu “un algin ku na judal, pa i sedu si kumpañer.” (Kumsada 2:18) Bu ka na apresia bensons ki familia na tene, ora ki minjer na mostra rispitu pa si omi, apoia si disisons i kopera ku el, pa i pudi kumpri ku si tarbaju?

Omi ku Minjer: “Pa tudu jintis rispita kasamenti.” — Ebreus 13:4.

Ora ki omi ku minjer sedu fiel pa n̈utru, vida di familia ta sta sabi. Manga di bias kai cai ta dana familia. (Ditus 6:27-29, 32) Pa kila, Biblia da bon konsiju: “Minjer ku bu kasa ocau nobu, pa i sedu bensuadu; kontenti ku el. . . . Kuma ku bu na barsa pitu di minjer di utru omi?” — Ditus 5:18-20.

Pape ku Mame: “Nsina [bo fijus] na kamiñu ki [pa rel].” — Ditus 22:6.

Ora ku pape ku mame da se fijus atenson, sin falta vida di familia ta minjoria. Pa kila, Biblia manda pape ku mame pa e da se fijus bon orientason ‘ora ke sinta na kasa, ora ke na yanda na kamiñu, o ora ke na bai dita, o ora ke na lanta na kama.’ (Ripitison di Lei 11:19) Biblia fala tambi ki pape ku mame dibi di mostra amor pa se fijus ku disiplina. — Efésius 6:4.

Fijus: “Abos fijus, bo obdisi bo papes, . . . suma ku bo sedu di Siñor.” — Efésius 6:1.

I bardadi ki nes mundu sin lei, obdisi pape ku mame i ka sempri fasil. Asin, bu ka konkorda di kuma i bon fasi ke ku Kumpudur di familia falanu? El i sibi ke ki no dibi di fasi pa pui no familia sta mas sabi. Pa kila, sforsa na obdisi bu pape ku bu mame. Disidi ivita manga di tentasons di fasi ke ki mal na mundu. — Ditus 1:​10-19.

Kunformi kada kin na familia sta na aplika konsiju di Bi­blia, asin tambi ki vida na familia na minjoria. Familia ka na gosa son di vida minjor gosi, ma tambi e na tene speransa di un futuru garandi na nobu mundu ki Deus purmiti. (2 Pedru 3:13; Apokalipsi 21:3,  4) Asin, kustuma studa Biblia juntu ku bu familia! Milion di familia na tudu mundu benefisia di gia ki dadu na livru comadu O Segredo de Uma Familia Feliz. Es livru pudi konsigidu na Purtugis, Inglis i Fransis.

Si i ka ten utru indikason, testus di Biblia ti­radu di Biblia (1998), Bíblia no Crioulo da Guiné-Bissau publicada como BIBLIA.