Jesus Kristu — Mesias purmitidu

PA judau identifika Mesias, Jeova Deus nspira manga di profetas di tempu bibliku pa furnisi nformasons aserka di nasimentu, tarbaju di pregason ku mortu des Salbadur purmitidu. Tudu es profesias di Biblia kumpri na Jesus Kristu. E sedu izatu i spesifiku di un manera ku ta adimira. Pur izemplu, no jubi alguns profesias ku falaba di akontisimentus aserka di nasimentu ku infansia di Mesias.

Profeta Isaias falaba ki Mesias na bin di jorson di Rei Davi. (Isaias 9:7) Na bardadi, Jesus padidu na jorson di Davi. — Mateus 1:1, 6-17.

Mikeias, utru profeta di Deus, falaba ki es mininu na bin sedu un rei i na bin padidu na “Belen Efrata.” (Mikeias 5:2) Na tempu ki Jesus padidu, i tenba dus sidadis na Israel ku teneba nomi di Belen. Un staba pertu di Nazare na norti di Israel, utru staba pertu di Jerusalen na Juda. Belen pertu di Jerusalen ta comaduba Efrata. Jesus padidu na ki sidadi, izatamenti suma ki profesia falaba! — Mateus 2:1.

Utru profesia di Biblia falaba ki Fiju di Deus na comadu “na Ejitu.” Mininu Jesus tiradu di Ejitu. I riba dipus di mortu di Erodis, asin profesia kumpri. — Oseias 11:1; Mateus 2:15.

Na tabela “Profesias Aserka di Mesias,” versikulus ku sta na lista bas di titulu “Profesia” tene mas nformasons aserka di Mesias. Di fabur kompara elis ku kilis ku sta bas di titulu “Kumprimentu.” Fasi kila na fortalisi bu fe na bardadi di Palabra di Deus.

Nkuantu bu na izamina es versikulus, lembra di kuma versikulus ku na fala di profesia skirbidu sentenas di anu antis di Jesus padidu. Jesus fala: “Tudu ku staba Skritu di mi na lei di Moisés, ku livru di anunsiaduris, ku salmus, i ten ku sedu.” (Lukas 24:44) Suma ku bu pudi konfirma na bu propi Biblia, es profesias kumpri — suma ki faladu!