Mesias ojadu

OCA i pasa mas di 500 anu disna ki Daniel falaba ja di tempu ku Mesias na ojadu, anju di Deus, Gabriel bin pa un bajuda virẑen comadu Maria, ki sedu di jorson di Rei Davi. Gabriel falal: “Minjer sortiadu, N dijau pas. Siñor sta ku bo.” (Lukas 1:28) Oca ku Maria obi es palabras i panta. I fika i na pensaba, es i kal koldadi di manteña?

Anju Gabriel falal: “Maria, ka bu medi, pabia bu oja fabur dianti di Deus. Jubi, bu na paña bariga, bu na padi un fiju, bu na pul nomi di Jesus. . . . Siñor Deus na dal renu di Davi, si pape di antigu. . . . Si renu ka na kaba.” (Lukas 1:30-33) Forti noba bonitu! Maria na bin padi Mesias, “fiju” ki tardaba ja na peradu!

Novi mis dipus, Jesus padidu na Belen. Na kil noti, un anju fala bakiaduris es: “N tisi bos noba di garandi alegria . . . Aos na tabanka di Davi i padidu un Salbadur pa bos, ku sedu Kristu, Siñor.” (Lukas 2:10, 11) Mas tardi, familia di Jesus munda pa Nazare, tabanka ku Jesus kirsi nel.

Na anu 29 di no era — ki sedu mesmu anu ki speraduba kuma Mesias na ojadu — Jesus kumsa ku sirbi suma profeta di Deus. I teneba “kuas trinta anu.” (Lukas 3:23) Manga di jintis bin oja ki na bardadi i Deus ku mandal. Kil jintis fala sin: “Un garandi anunsiadur lanta na no metadi.” (Lukas 7:16, 17) Ma ke ki Jesus sinaba?

Jesus sinaba jintis pa ama Deus i tambi pa adora Deus: I fala asin: “Siñor no Deus, i el son ki Siñor. Ama Siñor bu Deus ku tudu bu korson, ku tudu bu alma, ku tudu bu ntindimentu, ku tudu bu forsa.” (Markus 12:29, 30) Tambi Jesus fala: “Bu na adora Siñor bu Deus; son el ku bu na sirbi.” — Lukas 4:8.

Jesus falaba jintis pa ama n̈utru: I fala asin: “Ama bu kumpañer suma bo propi.” (Markus 12:31) Tambi i fala: “Bo fasi utru jinti suma ku bo misti pa e fasi bos, pabia i asin ku lei di Moisés ku anunsiaduris manda.” — Mateus 7:12.

Jesus mpeñaba ciu na konta utrus aserka di Renu di Deus: I fala si disipulus es: “I pirsis pa N bai konta Bon Noba di renu di Deus na utru prasas tambi, pabia el ku N mandadu pa el.” (Lukas 4:43) Ke ku manda Renu di Deus i importanti dimas?

Palabra di Deus kontanu ki Renu di Deus i un guvernu ku sta na seu, ku na bin manda na tera. Jesus, ki sedu Mesias, i algin ku Deus kuji suma Rei. Profeta Daniel teneba vison di tempu ku Deus na bin da Mesias “puder pa manda, ku gloria, ku renu.” (Daniel 7:14) Kil Renu na bin pui Paraisu na tera ntidu, i tambi i na da servus di Deus vida ku ka ta kaba suma labaremu. Sera ki es i ka minjor noba?