Aprindi di Mesias, ki sedu Ŝef

DEUS falaba ja ki i na kuji Mesias suma Ŝef pa tudu jintis. Deus sibi kal tipu di ŝef ki no pirsisa del. Asin i kuji minjor Ŝef pa nos. Kal tipu di Ŝef ki Mesias mostra sedu? Un general puderosu? Un pulitiku di fama? Un filosufu jiru? Sugundu Palabra di Deus, Mesias i Jesus, un profeta diferenti di tudu utrus. — Mateus 23:10.

Deus fasi pa Jesus padidu sin pekadu, santu. Alen di kila, Jesus nguenta tudu sforsu ki Satanas fasi pa disvial. Na si palabras ku asons, Jesus kopia sin falia puder di Deus, si justisa, jiresa ku amor. No na jubi kuma ku no pudi aprindi di isemplu di Jesus.

Jesus usa puder ku Deus dal pa juda utrus. Na bardadi, Jesus ta preokupa ku jintis. I ta usa si puder di bon manera pa juda utrus. I fala sin: “N ten pena di jinti, pabia . . . nada di kume e ka tene.” (Markus 8:2) Logu Jesus fasi un milagri, nde ki i kumenti manga di jintis ku bin obil.

Tambi Jesus ta yandaba na tudu parti pa sina jintis. I ta “kuraba jintis di tudu se duensa ku sufrimentu molostu.” (Mateus 4:23) I di spera ki manga di jintis sigil i “tudu ki jintis mistiba tokal, pabia puder ta sai nel ku ta kura elis tudu.” (Lukas 6:19) Na bardadi, Jesus “ka bin pa i sirbidu, ma pa sirbi, pa da si vida pa libra manga di jinti.” (Mateus 20:28)a Kantu ŝefis ki ta sta pruntu pa fasi mesmu kusa?

Jesus mostra justisa di Deus. I sigi di pertu lei di Deus. Tambi i aẑi sugundu orientasons ku dadu na ki leis. Ku si asons i kumpri ke ki faladuba pa profeta Davi ki fala sin: “Ña Deus, N kontenti pa fasi bu vontadi; bu lei sta dentru di ña korson.” (Salmu 40:8) Tantu riku ku pobri, macu ku femia, mininus ku garandis, Jesus ta trataba elis tudu ku dignidadi, ku rispitu i sin skuju, suma ki Deus ta fasi. Un bias, disipulus di Jesus raprindi jintis ki lebaba se fijus pa Jesus. Ma Jesus fala elis: “Bo disa mininus bin pa mi. Ka bo tuji elis, pabia Deus ta rena riba di jinti suma elis.” — Markus 10:14.

Jesus mostra jiresa ki Deus dal. I kunsiba jintis diritu. “El i sibi diritu ke ku sta na se korson.” (Jon 2:25) Oca inimigus di Jesus mandadu pa prindil, te mesmu e rukuñisi si jiresa, i e fala sin: “Nunka ningin ka papia suma ki omi!” Nunde ki Jesus konsigi tene ki jiresa? I ruspundi: “Ña nsinamentu i ka di mi, ma i di kil ku mandan.” — Jon 7:16, 46.

Jesus mostra amor di Deus. Tambi i ta teneba pena di jintis. Un omi ku “mpincu toma konta di si kurpu” pidil: “Siñor, si bu misti, bu pudi limpan.” Ku pena Jesus “distindi si mon, i toka nel, i falal: ‘N misti. Fika limpu!’ I kaba papia son, mpincu pirdi nel.” (Lukas 5:12, 13; Markus 1:41, 42) Na bardadi Jesus mistiba kura ki omi koitadi ki staba na sufri.

Sera ki Jesus ta preokupa ku bo tambi? El propi i ruspundi: “Bo bin pa mi, abos tudu ku kansa ku kargu pisadu; N na diskansa bos. Bo toma ña kanga pa bos, bo nsina di mi, pabia ami i mansu, umildi di korson; bo ta bin oca diskansu pa bo alma.” — Mateus 11:28, 29.

Jesus i minjor Ŝef ku no pudi tene. Suma ki sedu, i fala asin: “Bo nsina di mi.” Bu na seta es konviti amorosu? Si bu fasi kila bu na bin tene un vida filis.