Kuma ku bu familia pudi sedu filis?

1. Pabia di ke ku manda kasamenti i importanti pa filisidadi di familia?

Bon noba bin di Jeova, “Deus filis,” ku misti pa familias sedu filis. (1 Timótiu 1:11, NM) El ku orijina kasamenti. Kasamenti legal ta pui pa omi, minjer ku fijus sinti filis i amadu. Kilis ku misti obdisi Deus, dibi di rispita leis lokal aserka di legalisa kasamenti. — Lei Lukas 2:1, 4, 5.

Kuma ku Deus ta nkara kasamenti? I misti pa i sedu un union permanenti entri un omi ku un minjer. Jeova misti pa omi ku minjer sedu fiel pa n̈utru. (Ebreus 13:4) El i odia kaba-kasamenti. (Malakias 2:16) Ma i ta pirmiti pa kristons kaba-kasamenti i kasa di nobu si kontra omi o minjer kai cai. — Lei Mateus 19:3-6, 9.

2. Kuma ki omi ku minjer dibi di trata n̈utru?

Jeova kumpu omi ku minjer pa e kompleta n̈utru. (Kumsada 2:18) Suma kabesa di familia, un omi dibi di toma diantera na sustenta si familia i sina elis aserka di Deus. I dibi mostra amor garandi pa si minjer. Omi ku minjer dibi di ama i rispita n̈utru. Suma tudu omis ku minjeris ta yara, aprindi purda i sigridu pa un kasamenti sedu filis. — Lei Efésius 4:31, 32; 5:22-25, 33; 1 Pedru 3:7.

3. Sera ki bu dibi di abandona un kasamenti infilis?

Si bu sta na pasa difikuldadis na bu kasamenti, abos tudu dus bo dibi di sforsa na trata n̈utru ku amor. (1 Koríntius 13:4, 5) Palabra di Deus ka ta insentiva siparason suma un meiu di resolvi purblemas ki ta ojadu na kasamenti. — Lei 1 Koríntius 7:10-13.

4. Fijus, ke ki Deus misti pa bo fasi?

Jeova misti pa bo sedu filis. I da bos minjor konsiju di kuma ku bo pudi vivi sabi na bo juventudi. I misti pa bo benefisia di jiresa ku speriensia di bo garandis. (Kolosensis 3:20) Jeova misti tambi pa bo sperimenta alegria di fasi vontadi di bo Kriadur ku si Fiju. — Lei Eklesiastis 11:9–12:1; Mateus 19:13-15; 21:15, 16.

5. Pape ku mame, kuma ki bo fijus pudi sedu filis?

Bo dibi bi tarbaja duru pa ranja sustentu, kau di mora ku ropa pa bo fijus. (1 Timótiu 5:8) Ma pa bo fijus sedu filis, bo pirsisa tambi di sina elis ama Deus i aprindi del. (Efésius 6:4) Bo isemplu na mostra amor pa Deus pudi nfluensia ciu korson di bo fijus. Ora ki bo instruson basia na Palabra di Deus, i pudi juda bo fijus di un manera pusitivu. — Lei Ripitison di Lei 6:4-7; Ditus 22:6.

Mininus ta benefisia ora ke nkorajadu i ngabadu. E pirsisa tambi di koreson ku disiplina. E trenamentu ta protiji elis kontra komportamentu ki pudi tuji elis sedu filis. (Ditus 22:15) Mesmu asin, disiplina nunka dibi sedu duru o sin bondadi. — Lei Kolosensis 3:21.

Tustumuñas di Jeova publika manga di livrus ku fasidu so pa juda papes, mames ku se fijus. E livrus basia na Biblia. — Lei Salmu 19:7, 11.