4 ABRAON
Purmeru omi ku ngaña un gera justu
JEOVA fasi si amigu Abraon un purmesa garandi ku na afeta futuru di tudu jintis na tera. I falal: “N na fasiu un garandi nason.” Tambi, Deus mostra Abraon tera bonitu ku si futuru nason na bin mora nel. (Kum 12:2; 13:14, 15) Ma Satanas staba disididu pa kaba ku ki nason antis di i formadu. Diabu sibiba di kuma, i nes nason ki na sai “jorson” ku na bin kaba ku el i ku si mundu mau. — Kum 3:15.
Satanas ataka Abraon ku si familia. Un di kilis ku sufri ciu di atakis di Satanas, i Lo, subriñu di Abraon. Di livri vontadi, Abraon disa Lo pa i kuji purmeru nunde ki misti vivi nel na Tera di Purmesa. Lo kuji ladu riku ku mas ta padi ciu. Ki ladu staba pertu di Sodoma, nunde ku omis “seduba mau, e ta fasiba pekadu ciu kontra” Jeova. (Kum 13:8-13) Rei di Sodoma ku utrus kuatru rei di Kanaan staba ku raiba, pabia e tenba ku paga mpustu pa rei di Elan. E rebela kontra el. Pabia di kila, rei di Elan juntu ku tris utrus reis bin di lunju, e geria ku reis di Kanaan i e ngaña elis. Rei di Elan ku kilis ku junta kel riba se tera i e leba manga di kusas ku katibus. Lo ku si familia staba entri ki katibus.
Abraon sta na kumanda si grupu di 318 omis ku na serka i geria ku tropas di kuatru reis puderosu.
Ke ku Abraon fasi? I pudiba pensa di kuma Lo ku miti si kabesa na purblema pabia el ku disidi bai mora na ki ladu. O i pudiba preokupa di kuma si bai pa liberta Lo, i ten ku geria ku tropas puderosu di Elan ku kilis ku junta kel. Abraon ka seduba tropa. El i bakiadur i ta viviba na tendas. Tambi un di ki reis ta mandaba na Sinar tera ku Abraon bin del. Si Abraon geria kontra ki rei, i pusivel di kuma nunka i ka na pudi riba pa si bon kasa ki teneba na sidadi di Ur, pabia Ur staba na tera di Sinar. Ma Abraon ka pensaba sin. I sibi di kuma Jeova misti pa i liberta Lo.
Na ki tempu, jintis di kasa di Abraon aumenta, e pudi mas mil jinti. I junta 318 di si tarbajaduris macu ben trenadu i leba elis pa gera. Juntu ku alguns jintis ku junta ku elis, e pega tras di ki reis. E viaẑa lunju pa norti, pa riẑion di Dan e oja ki reis ku se tropas. Abraon dividi si omis na dus grupu, dipus di noiti e ataka elis. Apesar di kuma omis ku staba ku Abraon ka ciu, e vensi se inimigus, kilas kumsa ku kuri delis. Nkuantu ki kuatru reis ku se omis na kuriba pa norti, Abraon kontinua serka elis. Finalmenti pertu di Damasku, i ngaña elis tudu, i liberta jintis ku tudu kusas ke toma di Kanaan. Lo ku si familia libertadu!
Sera ki Jeova fika kontenti ku koraẑen ku fe ku Abraon mostra? Resposta sedu klaru oca ku Abraon pasa pertu di sidadi di Salen. Melkisedeki, rei di ki sidadi, seduba tambi un saserdoti di Jeova. Melkisedeki sai di sidadi i bai kontra ku Abraon, i bensual. Di manera umildi Abraon da Melkisedeki desimu parti di tudu ki toma na mon di ki reis.
I klaru di kuma Abraon ka geria pa si propi interesi o ku si forsa, ma i fasil pa Jeova, i ku ajuda di Jeova i ngaña. Biblia fala di ‘livru di geras di Jeova’. (Num 21:14) I pudi sedu di kuma, gera ku Abraon fasi i purmeru ku skribidu na ki livru. Sekulus mas tardi, jorson di Abraon, ku bin ta comadu di israelitas, geria kontra povu mau di Kanaan ku moraba na Tera di Purmesa. Jeova juda si povu fiel ngaña gera manga di bias.
Ma, oca ke bandonal, Jeova para juda elis. Pa fin, Jeova bandona elis oca ke nega si Fiju, Mesias. En ves di bensua nason di Israel, Jeova kumsa ku bensua un grupu di kristons unjidu ku sta na giadu pa Kristu. Jesus tuji si disipulus partisipa na gera fisiku. (Mat 26:52) En ves di kila, i nsina elis kuma ke pudi ngaña gera spiritual. Jesus disa un isemplu oca ki staba na tera, i mostra di kuma no pirsisa di koraẑen garandi pa gera spritual.
Lei es storia na Biblia:
Kumsada 14:1-24
Ebreus 7:1-4
Pa kombersa del:
Di kal maneras ku Abraon mostra koraẑen nes mumentu di si vida?
Fasi piskisa pa ntindi minjor
1. Kal provas ku ta mostra di kuma kusas ku faladu del nes storia i bardadi? (w89-T 1/7 paẑina 5 paragrafu 4 te paẑina 6 paragrafu 1)
2. Kal prova jeografiku ku ta apoia manera ku Biblia fala di Sodoma ku Gomora? (it-T “Mar Salgado” paragrafu 6) A
BestTravelPhotography/iStock via Getty Images Plus
Foto A: Te aos, pes di tamara ku utrus planta ciu na zona nunde ku talves antigu Sodoma staba nel
3. Melkisedeki seduba rei i saserdoti di Salen. Nunde ki Salen? (it-T “Salém”)
4. Di kal manera ku Melkisedeki representa Jesus? (it-T “Sumo Sacerdote” paragrafu 27 ku 28) B
Diseñu B
Pensa na kuma di aplika es lisons
Abraon disa Lo kuji minjor parti di tera. Kuma ku no pudi kopia Abraon na no manera di lida ku no familia, no ermons ku irmas na fe, i ku utrus? C
Foto C
Ke ku no aprindi manera ku Abraon staba dispostu pa bai liberta si subriñu?
Di kal utrus manera ku bu pudi kopia koraẑen ku Abraon mostra nes storia?
Pensa fundu na lisons mas garandi
Ke ku es storia nsinan aserka di Jeova?
Kal ligason ku es storia tene ku intenson di Jeova?
Ke ku N na gostaba di punta Abraon ora ki resusitadu?
Aprindi mas
Jubi ke ku juda Abraon pui tudu si konfiansa na Jeova.
Kuma ku Abraon mostra koraẑen mesmu antis di sai di Ur?