Karta di Korpu Guvernanti

Kiridus ermons ku irmas:

Na si mensaẑen pa kongregason di Smirna, Jesus fala: “Ka bu medi kil ku bu na bin sufri.” (Apok 2:10) Es nkoraẑamentu ki da elis pa e ka medi, bali tambi pa nos aos ku sta na vivi na “dia di Siñor.” (Apok 1:10) Ku sertesa no sta na “dias di kansera.” No sinti tokadu dimas, di oja kuma ku kada un di bos na mundu ntidu sta na mostra fe garandi ku koraẑen pa pudi manti fiel pa Jeova! — 2 Tim 3:​1-5.

Ke gora ku no pudi fasi pa kontinua manti firmi i nega “rakua” pabia di medu? (Eb 10:39) I ka sempri ki fasil nguenta ora ku un algin sta kontra nos o i na pirsiginu. Ma nin ku sin, no pudi disidi fasi ke ki sertu. Mesmu si no sedu algin ku ta burguñu o algin kinti sangi, no pudi disidi sedu koraẑosu i fasi ke ku Jeova fala i sertu. Ke ku pudi judanu?

Palabra di Deus pudi judau tene koraẑen. I tene manga di isemplus di omis ku minjeris koraẑosu. Es livru fasidu pa judanu studa ke ku es omis ku minjeris fasi, i pensa fundu na se isemplu. Ora ku bu na lei se storia, ora Jeova pa i judau oja kuma ku se isemplu pudi judau lida ku bu purblemas aos o na futuru. Pensa na kuma ku Jeova pudi judau sedu koraẑosu. Pensa tambi na kuma ku koraẑen ku es omis ku minjeris mostra pudi judau pa:

Fasi ke ku Jeova misti. (Tiagu 3:17) Oca ku Jeova nega Saul, i kuji joven Davi suma prosimu rei. Jonatan mostra fidelidadi ku koraẑen manera ki apoia di tudu korson disison ku Jeova toma di kuji Davi.

Difindi ke ku Jeova fala kuma i sertu. (Eb 11:​32-34) Ananias, Misael, ku Azarias nega mpina dianti di un statua. E staba pruntu pa muri na un furnu ku na yardi pa kontinua fiel pa Jeova.

Konta utrus bardadi aserka di Jeova ku Jesus. (Mat 22:16) Pensa na Saulu di Tarsu, ku konta bardadi aserka di Jesus pa jintis ku pensaba di kuma i na juda elis pirsigi sigiduris di Jesus.

No na ora pa es livru judau tene mas fe ku koraẑen. (Sal 27:14) Pa Jeova bensuau nkuantu bu na juda membrus di bu familia ku utrus na kongregason pa e kontinua tene koraẑen i difindi Renu di Deus!