Bu pudi tene mas koraẑen!

1-3. Ke ku manda palabras di Jesus: “Bo lanta, no bai,” sedu palabras koraẑosu?

PENSA na ultimu noiti di Jesus Kristu na tera. I staba fora di sidadi di Jerusalen, na jardin di Jetsemane. Ora baiba ja, i Jesus sibiba di kuma un grupu di omis ku staba armadu ku spadas sta na bin. I sibiba di kuma, pirigu, turtura ku mortu staba na peral. I staba pa pasa un situason difisil dimas ku nin un algin ka ciga di pasa. I sibiba di kuma i na pasa es pirigu el son, ma mesmu asin i ka disa pa medu toma konta del.

² Jesus pudiba coma anjus puderosu pa e proteẑil, ma i ka fasi kila. (Mat 26:53) En ves di kila, ku koraẑen i fala si disipulus: “Bo lanta, no bai.” (Mat 26:46) I cigaba ja di fala elis es palabras. (Jon 14:31) Ma es bias, situason i diferenti.

³ Ke ku palabras di Jesus signifika? Sera ki i staba na kuri di pirigu? Nau, i staba pruntu pa nfrenta omis ku na bin pa prindil. I staba dispostu pa turturadu i muri pabia di amor ki tene pa si Pape i amor ki tene pa si sigiduris. No jubi ke ku manda Jesus sedu un isemplu garandi di koraẑen.

4-5. Kuma ku un algin pudi mostra koraẑen suma Jesus, i pabia ku kila i importanti?

⁴ Sin duvida, Jesus Kristu i algin mas koraẑosu ku ciga ja di vivi na tera. Sera ki abo i un di si sigiduris? Si sin, abo tan i koraẑosu. Kristons di bardadi dibi di sedu koraẑosu. Aos, no sta na vivi na tempu difisil i pirigosu, pa kila, no pirsisa di koraẑen mas di nunka.

⁵ Kuma ku un algin pudi mostra koraẑen suma Jesus? Alguns jintis ta pensa di kuma, mostra koraẑen signifika ka tene medu di nada, pui se kabesa na situasons pirigosu ke pudiba ivita, o pensa di kuma nada ka pudi fasi elis mal. Tambi e ta pensa di kuma, i signifika fasi kusas violentu pa prova di kuma e sedu forti. (Sal 11:5) Ma koraẑen ku Jesus mostra ka parsi nin un bokadu kes! Un algin ku ta mostra koraẑen suma Jesus, ta tene forsa di fasi ke ku Deus fala i sertu, mesmu si i difisil pa rel o i sta ku medu.

Bu pudi kopia koraẑen di Jesus!

6. Si bu sinti di kuma koraẑen na faltau, kuma ku palabras di Jesus pa si disipulus pudi nkoraẑau?

⁶ Talves bu sta na punta, si kontra bu na tene koraẑen suma Jesus ora ku bu sta na pasa un situason difisil. Si asin, lembra des: Jesus ta ntindi. Suma si Pape, i ka na spera nunka pa no fasi kil ku no ka pudi. (Sal 103:14; Jon 14:9) Pur isemplu, na ki noiti na jardin di Jetsemane, Jesus pidi si apostolus pa e sta atentu, ma kilas ka konsigi e kaba pa durmi. Nin ku sin, ku bondadi i fala elis: “Vontadi sta pruntu, ma kurpu i fraku.” (Mat 26:41) Jesus ntindiba se frakesas, i ntindi tambi di bo.

7-8. Kuma ku Jesus kalma si sigiduris?

⁷ Jesus mostraba tambi konfiansa na si sigiduris. Imaẑina kalma ke sinti oca ki i fala elis: “Bo ten koraẑen; ami N ngaña mundu.” (Jon 16:33) I sibiba di kuma, si disipulus pudi sigi si isemplu, i kila propi ke fasi. Jesus usa palabras “ten koraẑen” manga di bias. I fala es palabras pa un omi ku ka pudiba yanda, antis di garantil di kuma si pekadus purdadu. (Mat 9:2) I falal pa un minjer dipus di kura kila di un duensa gravi. (Mat 9:22) I falal tambi pa si disipulus oca ke ojal i na yanda na yagu pa bai nunde elis ma e ka rapadal i e staba ku medu. (Mat 14:27) I apartir di seu, i fala es mesmu palabras pa apostolu Paulu, oca ku un grupu di omis ku staba ku raiba staba kuas pa matal. — Atus 23:​9-11.

⁸ Aos tambi, Jesus sta na dau es mesmu nkoraẑamentu. I misti pa bu “ten koraẑen”! I sibi di kuma bu pudi. Si Pape, Jeova dau tudu ke ku bu pirsisa del pa tene koraẑen.

Kuma ku Biblia pudi judanu tene mas koraẑen?

9. Kuma ku Biblia pudi judanu tene mas koraẑen?

⁹ Pabia di si amor, Jeova pui na Biblia, manga di isemplus ku pudi judanu tene mas koraẑen. Na Biblia, no pudi oja storias di bardadi aserka di omis ku minjeris, mininus ku garandis, ku pasa diferentis situasons na vida. Elis tudu e teneba sintimentus “suma nos”, suma di profeta Elias. (Tiagu 5:17) Suma nos tudu, e seduba imperfeitu, e teneba se frakesas ku medu. I suma kada un di nos, e pasa diferentis situasons difisil, te mesmu situasons pirigosu. Ma nin ku sin, e vensi elis, suma ku Jesus fasi. E teneba koraẑen i e disa un isemplu garandi ku kontinua nkoraẑanu te aos.

10-11. Kuma ku es livru pudi judau, i kuma ku bu pudi usal? (Jubi tambi kuadru “Kuma ku bu pudi usa es livru pa studu pesual i pa adorason na familia.”)

¹⁰ Es livru fasidu pa judau tene mas koraẑen. Na si 54 kapitulus, bu na oja kuma ku Jeova judaba jintis imperfeitu suma bo, pa e tene koraẑen ke pirsisaba del. Pa kila, lei kada storia, i fasi piskisa pa ntindi minjor vida di kada un delis. Nkuantu bu na fasi kila, bu na kunsi es omis ku minjeris mas minjor inda.

¹¹ Pa se isemplu judau tene mas koraẑen, asin bu na pudi nguenta “fin de tempu” difisil ku no sta nel. (2 Tim 3:1) Kada dia ku sol na mansi, pa no lembra sempri des garantia ku Jeova danu: “N ka na disau, nin N ka na bandonau.” Suma rusultadu, bu na pudi fala ku konfiansa: ‘Jeova i ña Judadur; N ka na medi.’ — Eb 13:​5, 6.