Kontinua sta pruntu pa dia di Jeova

1. Ke ku no pirsisa di fasi pa pudi salva na dia di Jeova?

ORA ku Biblia na fala di “dia di SIÑOR”, kila signifika tempu nunde ku Jeova na bin julga si inimigus i tisi salvason pa si povu. Na pasadu, Jeova julga alguns nasons. (Isa 13:1, 6; Eze 13:5; Sof 1:8) Na no tempu, “dia di SIÑOR” na kumsa ku ataki di Garandi Babilonia, i na kaba ku gera di Armajedon. Pa pudi salva na ki “dia”, no pirsisa di purpara desdi gosi. Jesus nsinanu di kuma no ka dibi di sta so purparadu pa “garandi foronta”, ma tambi kontinua sta “pruntu” pa rel. — Mat 24:21; Luk 12:40.

2. Pabia ku no pudi benefisia di 1 Tesalonisensis?

² Na si purmeru karta nspiradu pa Tesalonisensis, apostolu Paulu usa manga di komparasons pa juda kristons kontinua sta pruntu pa dia garandi di julgamentu di Jeova. Paulu sibiba di kuma dia di Jeova ka na bin na ki tempu. (2 Tes 2:1-3) Ma, i nsentiva si ermons pa e purpara pa ki dia, suma si kontra i na bin amaña. I anos tambi no pudi sigi si konsiju. No jubi splikason ki da aserka di: (1) Kuma ku dia di Jeova na bin, (2) ba kin ku ka na salva na ki dia, i (3) kuma ku no pudi purpara pa salva.

KUMA KU DIA DI JEOVA NA BIN?

3. Na kal sintidu ku dia di Jeova na bin suma un ladron di noti? (Jubi tambi diseñu.)

³ “Suma ku ladron ta bin di noti.” (1 Tes 5:2) Na tris komparason ku usadu pa fala aserka di dia di Jeova, es i purmeru. Manga di bias, ladrons ta aẑi rapidu, tambi e ta bin di noti ora ku jintis ka spera. Tambi dia di Jeova na bin di repenti, i na surprendi manga di jintis. Te mesmu kristons di bardadi pudi surprendidu manera ku kusas na kontisi rapidu. Ma, diferenti di jintis mau, no ka na kabadu kel.

4. Di kal manera ku dia di Jeova na sedu suma dur di partu?

⁴ “Suma ku dur di partu ta ciga na minjer preñada.” (1 Tes 5:3) Un minjer preñada ka pudi konta ora izatu ki na padi. Ma, i ka ta tene duvida di kuma ki ora na ciga. Ora ki ora ciga, i ta bin di repenti ku dur ku ka pudi paradu. Di mesmu manera, no ka sibi kal dia i kal ora ku dia di Jeova na kumsa. Ma, no tene sertesa di kuma ki dia na bin, i julgamentu di Deus kontra jintis mau na sedu di repenti i e ka na pudi kapli.

5. Na kal sintidu ku garandi tribulason na sedu suma mandrugada?

⁵ Suma mandrugada. Paulu fala mas di ladrons ku ta furta di noti na si terseru komparason. Ma de bias, parsi kuma apostolu Paulu kompara dia di Jeova ku mandrugada. (1 Tes 5:4) Ladrons ku ta bin di noti, pudi ka nota di kuma ora na bai. Lus di parmaña pudi pui pa e pañadu i pa e rapadadu. Di mesmu manera, garandi tribulason na pui pa i rapadadu kilis ku suma ladrons sta inda na sukuru i e kontinua fasi kusas ku ka ta kontenta Deus. Diferenti delis, no pudi sta pruntu ora ku no nega fasi kusas ku ka ta kontenta Deus i buska ‘tudu bondadi, ku kusa justu, ku bardadi.’ (Ef 5:8-12) Na utru dus komparason, apostolu Paulu fala di kilis ku ka na salva.

BA KIN KU KA NA SALVA NA DIA DI JEOVA?

6. Na kal sintidu ku maioria di jintis sta na durmi? (1 Tesalonisensis 5:6, 7)

⁶ ‘Jintis ku ta durmi.’ (Lei 1 Tesalonisensis 5:6, 7.) Paulu kompara kilis ku ka na salva na dia di Jeova suma kilis ku sta na durmi. E ka sibi ke ku sta na pasa, o kuma ku tempu sta na bai. Asin, e ka sibi kal tempu ku kusa importanti kontisi i ke ke na fasi. Maioria di jintis aos sta na durmi na sintidu spiritual. (Rom 11:8) E ka fia di kuma no sta na vivi na “fin de tempu” i di kuma garandi tribulason na bin, nin i ka na tarda. Ora ki ten mudansas garandi na mundu, alguns jintis ku sta na durmi na sintidu spiritual ta kumsa ku mostra interesi na no mensaẑen di Renu. Ma, manga delis ta durmi mas en ves di kontinua korda. Mesmu alguns ku fia di kuma dia di julgamentu na bin, e ta pensa di kuma i lunju. (2 Ped 3:3, 4) Ma, i importanti pa no fika kordadu kada dia.

7. Kuma ku jintis ku Deus na kaba ku el parsi ku jintis ku ta cami?

⁷ ‘Jintis ku ta cami’. Apostolu Paulu kompara jintis ku Deus na kaba ku el ku camiduris. Jintis ku ta cami ta tarda pa reaẑi ora ke oja ke ku sta na pasa, i e ta toma mau disisons. Di mesmu manera, jintis mau ka ta reaẑi ora ke obi avisus di Deus. E ta disidi leba un manera di vivi ku na pui pa e kabadu ku el. Ma kristons faladu pa e pensa diritu. (1 Tes 5:6) Un piskisadur di Biblia fala kuma un algin ku ka cami “ta manti kalmu, i ka ta panta. I ta konsigi pensa diritu i toma un bon disison.” Pabia ku no dibi di manti kalmu i sta firmi? Si no fasi kila, no ka na nvolvi na asuntus pulitiku o sosial des mundu. Preson di apoia asuntus pulitiku o sosial sta na aumenta, nkuantu dia di Jeova sta na pertusi kada bias mas. Ma, no ka pirsisa di preokupa di kuma ku no na bin reaẑi. Spiritu di Jeova pudi judanu manti kalmu, pensa diritu i toma bon disisons. — Luk 12:11, 12.

KE KU NO PUDI FASI PA PURPARA PA DIA DI JEOVA?

8. Kal komparason ku 1 Tesalonisensis 5:8 fasi aserka di maneras di sedu ku na judanu fika kordadu i sedu seriu, o tene un bon sintidu? (Jubi tambi diseñu.)

⁸ ‘Pui armadura di pitu ku kapasiti.’ Paulu komparanu ku soldadus ku sta atentu i ku farda pa gera. (Lei 1 Tesalonisensis 5:8.) Jintis ta spera pa un soldadu sta pruntu pa kualker ora ku gera ten. I mesmu kusa ku nos. No ta sta pruntu pa dia di Jeova, ora ku no pui fe ku amor suma armadura di pitu i no speransa di salvason suma kapasiti. Es maneras di sedu pudi judanu ciu.

9. Kuma ku no fe ta proteẑinu?

⁹ Armadura di pitu ta proteẑi korson di soldadu. Fe ku amor ta proteẑi no korson simboliku. E na judanu kontinua sirbi Deus i sigi Jesus. Fe ta danu garantia di kuma Jeova na paganu pa manera ku no buskal di tudu korson. (Eb 11:6) I na lebanu pa no kontinua fiel pa Jesus, no Lider, mesmu si no dibi di nguenta purblemas. No pudi aprindi di jintis di no tempu ku kontinua sedu fiel mesmu ku pirsigison o purblemas ekonomiku. Asin no pudi torna no fe mas forti pa nguenta purblemas. Tambi no pudi ivita pirigu di ama diñeru ku kusas material si no kopia isemplu di kilis ku simplifika se vida, pa pudi pui interesis di Renu na purmeru lugar.b

10. Kuma ku amor pa Deus i pa no kumpañer pudi judanu kontinua prega?

¹⁰ Tambi i importanti tene amor pa fika kordadu i tene un bon sintidu. (Mat 22:37-39) Amor pa Deus na judanu kontinua prega mesmu si kila na tisinu purblema. (2 Tim 1:7, 8) Suma no tene tambi amor pa kilis ku ka ta sirbi Jeova, no ta kontinua prega i kontinua tarbaja no tiritoriu, te mesmu da tustumuñu pa telefoni i pa kartas. No ka ta pirdi speransa di kuma un dia, no kumpañeris na bin fasi mudansa i kumsa fasi ke ki sertu. — Eze 18:27, 28.

11. Kuma ku amor pa no ermons ku irmas pudi judanu? (1 Tesalonisensis 5:11)

¹¹ Amor pa no kumpañer nklui tambi amor pa no ermons ku irmas. No ta mostra es tipu di amor ora ku no ‘da n̈utru koraẑen i juda n̈utru.’ (Lei 1 Tesalonisensis 5:11.) Suma soldadus ku ta sta pertu di n̈utru na gera, no ta nkoraẑa n̈utru. Na bardadi, un soldadu pudi molostra si kumpañer na gera, ma nunka i ka na ciga di fasil ku diskarna. Di mesmu manera, nunka no ka na molostra no ermons ku irmas ku diskarna, o torna mal pa mal. (1 Tes 5:13, 15) Tambi no ta mostra amor ora ku no rispita kilis ku ta diriẑi kongregason. (1 Tes 5:12) Kontra Paulu skirbi es karta, kongregason di Tesalonika izistiba ja menus di un anu. I pudi sedu di kuma ermons disignadu ka teneba spiriensia i e ta fasiba erus. Ma, e mersiba rispitu. Nkuantu garandi tribulason sta na pertusi, no pudi pirsisa inda mas di orientason di ansions lokal. No pudi ka konsigi risibi orientason di ermons ku sta na sedi mundial ku filial. Pa kila, i importanti aprindi ama i rispita no ansions desdi gosi. I ka mporta ke ku kontisi, no kontinua tene un bon sintidu. Ka no konsentra na se erus, ma no konsentra na kuma ku Jeova atraves di Jesus, sta na gia es omis fiel.

12. Kuma ku no speransa ta proteẑi no menti i judanu pensa diritu?

¹² Suma ku kapasiti ta proteẑi kabesa di un soldadu, asin tambi ku no speransa di salvason ta proteẑi no menti i judanu pensa diritu. Ku speransa forti, no ta rikuñisi di kuma tudu ke kes mundu ta da, ka bali nada. (Fil 3:8) No speransa ta judanu manti kalmu i sta firmi. Es ku kontisi ku Wallace ku Laurinda, ku sirbi na Afrika. Na spasu di tris semana, kada un delis pirdi un di se papes. Pabia di duensa di COVID-19, e ka pudi riba pa sta ku se familias. Wallace fala sin: “Speransa di resureison judan pensa nelis, i ka di manera ke staba na ultimu mumentus di se vida nes mundu. Ma, pensa na kuma ke na sta na se purmeru dias na nobu mundu. Es speransa kalman kontra na luta ku tristesa o sentimentu di pirdi un algin.”

13. Ke ku no pudi fasi pa risibi spiritu santu?

¹³ “Ka bo paga fugu di Spiritu di Deus.” (1 Tes 5:19) Apostolu Paulu kompara spiritu santu ku fugu ku sta na nos. Ora ku no tene spiritu di Deus, no ta tene diseẑu forti ku animu di fasi ke ki sertu i tene forsa pa tarbaja pa Jeova. (Rom 12:11) Ke ku no pudi fasi pa risibi spiritu santu? No pudi ora pa pidil, studa Palabra nspiradu di Deus i junta ku si organizason ku ta giadu pa spiritu. Fasi es na judanu tene ‘frutu di spiritu.’ — Gal 5:22, 23.

14. Si no misti kontinua risibi spiritu di Deus, ke ku no dibi di ivita? (Jubi tambi foto.)

¹⁴ Ora ku Deus danu si spiritu santu, no dibi di toma kuidadu pa ka “paga fugu di Spiritu di Deus.” Deus ta da si spiritu santu so pa kilis ku tene pensamentu ku komportamentu limpu. I ka na kontinua danu si spiritu, si no tene pensamentus susu i no ta aẑi di akordu ku ki pensamentus. (1 Tes 4:7, 8) Pa kontinua risibi spiritu santu, no dibi di tambi ka ‘njuti rekadu ku Deus manda pa nos na boka di algin.’ (1 Tes 5:20) “Rekadu ku Deus manda” i mensaẑen ku Jeova mandanu atraves di si spiritu santu. Dia di Jeova ku urẑensia di no tempu fasi parti des mensaẑen. No ka dibi di pensa di kuma dia di Jeova o Armajedon ka na sedu na no tempu. En ves di kila, no ta mostra di kuma no misti pa es dia ciga mas rapidu, o kontinua pensa nel, ora ku kada dia no kontinua tene un bon komportamentu i manti okupadu na leba un vida “son pa Deus”. — 2 Ped 3:11, 12.

“BO PROBA TUDU”

15. Kuma ku no pudi ivita sedu nganadu ku informasons falsu i ku publisidadi di dimonius? (1 Tesalonisensis 5:21)

¹⁵ Na futuru ku sta pertu, jintis ku sta kontra Deus, di un manera o di utru, e na bin fala: “Tudu sta susegadu, suguru”. (1 Tes 5:3) Publisidadi ku bin di dimonius na inci Tera, i na ngana maioria di jintis. (Apok 16:13, 14) I anos gora? No ka na nganadu si no “proba tudu”. (Lei 1 Tesalonisensis 5:21.) Palabra Gregu ku traduzidu pa “proba” usadu pa fala di manera ku jintis ta proba metal, suma uru ku prata, pa tene sertesa di kuma e sedu di bardadi. Asin, no pirsisa di proba pa sibi si ke ku no ta obi, o ke ku no ta lei i bardadi. Es seduba importanti pa Tesalonisensis. Tambi, i na sedu inda mas importanti pa nos nkuantu garandi tribulason sta na pertusi. En ves di fia na tudu ke ku utrus fala, no ta usa bon juisu pa kompara ke ku no lei o ke ku no obi, ku ke ku Biblia ku organizason di Jeova fala. Ora ku no fasi kila, no ka na nganadu pa kualker publisidadi di dimonius. — Dit 14:15; 1 Tim 4:1.

16. Kal speransa suguru ku no tene, i ke ku no sta disididu pa fasi?

¹⁶ No sibi kuma povu di Jeova na salva suma un grupu, na garandi tribulason. Ma, kada un di nos ka sibi ke ku na kontisi ku el amaña. (Tiagu 4:14) Ma, si no kontinua vivi te na garandi tribulason o si no muri antis, no na risibi pagamentu di vida ku ka ta kaba, si no kontinua fiel. Unjidus na sta ku Kristu na seu. Utrus karnelis na sta na paraísu na Tera. Pa anos tudu no konsentra na speransa bonitu ku no tene i kontinua sta pruntu pa dia di Jeova!