Sera ki bu sta pruntu pa garandi tribulason?

1. Pabia ki bon purpara pa disastris?

PURPARASON ta salva no vida. Pur isemplu, ora ki i ten un disastri jintis ku sta purparadu tene mas pusibilidadi di salva i konsigi juda utrus. Un organizason di ajuda umanitariu na Europa, fala sin: “Un bon purparason pudi salva vida di jintis.”

2. Pabia ku no dibi di purpara pa garandi tribulason? (Mateus 24:44)

² “Garandi foronta” o garandi tribulason, na kumsa di repenti. (Mat 24:21) Ma, garandi tribulason na sedu diferenti di manga di utrus disastris, pabia no sibi di kuma i na bin. Serka di 2.000 anus atras, Jesus avisa si sigiduris pa e sta pruntu pa ki dia. (Lei Mateus 24:44.) Si no sta purparadu, i na sedu mas fasil fika firmi na ki tempu difisil i juda utrus fasi mesmu kusa. — Luk 21:36.

3. Kuma ku fika firmi, sinti pena i mostra amor na judanu sta pruntu pa garandi tribulason?

³ No pirsisa di mostra es tris maneras di sedu ku na judanu sta pruntu pa garandi tribulason. Ke ku no na fasi si no faladu pa prega un mensaẑen forti di julgamentu i jintis sta kontra nos? (Apok 16:21) No na bin pirsisa di fika firmi pa obdisi Jeova i tene konfiansa di kuma i na bin proteẑinu. Ke ku no na fasi si no ermons pirdi alguns kusas material o pirdi tudu? (Aba 3:17, 18) Pabia di pena ku no sinti pa relis, no na da elis ajuda ke pirsisa del. Kuma ku no na reaẑi, si pabia di ataki di grupu di nasons, no obrigadu vivi pa un tempu juntu ku no ermons ku irmas? (Eze 38:10-12) No na pirsisa di tene amor garandi pa relis, i kila na judanu fika firmi na kil tempu difisil.

4. Kuma ku Biblia mostra di kuma no dibi di kontinua fika firmi, sinti pena i mostra amor?

⁴ Palabra di Deus nkoraẑanu pa no kontinua fika firmi, sinti pena i mostra amor. Lukas 21:19 fala sin: “Bo fika firmi, bo na sedu salbu.” Kolosensis 3:12 fala sin: “Bo ten ku bisti un korson di miserikordia”. Tambi 1 Tesalonisensis 4:9, 10 fala sin: “Deus nsina bos kuma ku bo dibi di ama n̈utru. . . . Ma no na pidi bos, ermons, pa bo fasi forsa mas inda.” Tudu es versikulus na fala di disipulus ku fikaba ja firmi, ku sintiba ja pena i ku mostraba ja amor. Ma, e dibi di kontinua aprindi kuma ke pudi mostra es maneras di sedu. Anos tambi no dibi di fasi mesmu kusa. Pa judanu, no na jubi kuma ku purmeru kristons mostra kada un des maneras di sedu. Dipus no na bin oja kuma ku no pudi kopia es disipulus i mostra di kuma, no sta pruntu pa garandi tribulason.

TORNA BU FIRMESA MAS FORTI

5. Kuma ku purmeru kristons fika firmi oca ke na pasaba purblemas?

⁵ Purmeru kristons pirsisaba di fika firmi. (Eb 10:36) E teneba mesmu purblemas ku maioria di jintis teneba na ki tempu. Ma, e teneba tambi purblemas, pabia e seduba kristons. Manga delis pirsigidu i ka so pa lideris riliẑiosu judeu ku otridadis romanu, ma tambi pa se propi familia. (Mat 10:21) Tambi e dibi di fasi tudu pa ka nsinus falsu di apostatas ku ta tenta dividi kongregason influensia elis. (At 20:29, 30) Ma es kristons kontinua firmi. (Apok 2:3) Ke ku juda elis? E pensa fundu na isemplu di jintis ku fika firmi ku faladu del na Skrituras, suma Jo. (Tiagu 5:10, 11) E ora pa pidi forsa. (At 4:29-31) Tambi e kontinua lembra di kuma Jeova na paga elis, si e kontinua firmi. — At 5:41.

6. Ke ku bu aprindi di ke ku Merita fasi pa fika firmi dianti di pirsigison?

⁶ Anos tambi no pudi fika firmi, si no ta studa sempri isemplu di kilis ku fika firmi ku faladu del na Palabra di Deus ku no publikasons i pensa fundu nelis. Merita, un irma na Albania, fasi es, i kila judal fika firmi dianti di pirsigison violentu di si familia. I fala sin: “Storia di Jo ku sta na Biblia nkoraẑan ciu. I sufriba ciu, i ka sibiba kin ku pulba na ki sufrimentu, ma nin ku sin i fala sin: ‘N ka na nega ña bardadi tok N muri’! (Jo 27:5) N pensa na kuma ku purblemas di Jo seduba mas difisil di ki ña purblemas. Diferenti di Jo, N sibi kin ku staba na pirsigin.”

7. Mesmu si no ka sta na pasa pa purblemas garandi gosi, ke ku no dibi di fasi?

⁷ No pudi tambi torna no firmesa mas forti, ora ku no na ora Jeova sempri i kontal no preokupasons. (Fil 4:6; 1 Tes 5:17) Talves gosi bu ka sta na pasa pa purblemas garandi. Nin ku sin, sera ki bu ta buska orientason di Jeova ora ku bu sta tristi o bu ka sibi ke ku bu na fasi? Si bu ta ora sempri Deus pa pidil ajuda pa purblemas ku bu tene kada dia, bu na sta avontadi pa fasil ora ku bu bin tene purblemas mas garandi na futuru. Bu na tene konfiansa di kuma, el i sibi diritu kal ora ki na judau i ke ki i dibi di fasi pa judau. — Sal 27:1, 3

8. Kuma ku isemplu di Mira mostra di kuma fika firmi dianti di purblemas aos pudi judanu fika firmi dianti di purblemas na futuru? (Tiagu 1:2-4) (Jubi tambi foto.)

⁸ No na mas pudi fika firmi na garandi tribulason ku na bin, si no fika firmi dianti di purblemas ku no tene aos. (Rom 5:3) Pabia ku no pudi fala kila? Manga di ermons ku irmas diskubri di kuma, kada bias ke fika firmi dianti di un situason ku testa se fe, kila ta juda elis fika firmi dianti di utru situason difisil ku na bin. Ora ke nguenta un purblema ku ajuda di Jeova, se fe ta torna mas forti. E ta fia di kuma Jeova sta pruntu pa juda elis, tambi i misti fasil. Suma e tene fe na Jeova e pudi fika firmi dianti di utru situason difisil ku na bin. (Lei Tiagu 1:2-4.) Un pionera na Albania comadu Mira diskubri di kuma, manera ki fika firmi na pasadu kila judal kontinua fika firmi. I fala di kuma utrora i ta sinti suma si el so ku tene manga di purblemas. Ma i lembra di manga di kusas ku Jeova fasi pa apoial na 20 anu ku pasa, i fala sin pa si kabesa: ‘Kontinua fiel. Ka bu disa pa tudu ki anus ku tudu lutas ku bu ngaña ku ajuda di Jeova bai sin na nada.’ Abo tambi bu pudi pensa na kuma ku Jeova judauba ja pa fika firmi. Tene konfiansa di kuma i ta nota kada bias ku bu fika firmi dianti di un situason difisil, tambi tene konfiansa di kuma i na bin pagau. (Mat 5:10-12) Dipus, ora ku garandi tribulason kumsa, i ta kontra bu aprindiba ja kuma ku bu pudi fika firmi, i bu na sta disididu pa kontinua fika firmi.

MOSTRA DI KUMA BU SINTI PENA

9. Kuma ku kongregason na Antiokia di Siria mostra di kuma e sinti pena?

⁹ Jubi ke ku kontisi oca kristons na Judeia pasaba pa un fomi garandi. Oca kongregason na Antiokia di Siria obi faladu des fomi, e sinti pena di se ermons di Judeia. Ma dipus, pa se ason e mostra di kuma e sinti pena. E “konkorda pa kada un delis da konformi i pudi, pa manda juda ermons na fe ku staba na Judeia.” (At 11:27-30) Mesmu manera ku ermons ku irmas ku sufri mora lunju, kristons di Antiokia staba disididu pa juda elis. — 1 Jon 3:17, 18.

10. Di kal maneras ku no pudi mostra di kuma no sinti pena ora ku no ermons na fe sta na sufri pabia di un disastri? (Jubi tambi foto.)

¹⁰ Anos tambi no pudi mostra di kuma no sinti pena, ora ku no sibi di kuma no ermons na fe sta na sufri pabia di un disastri. No ta da ajuda rapidu, talves no ta pidi ansions si no pudi tarbaja na un projetu, no ta da oferta pa obra mundial o ora pa kilis ku sta na sufri pabia di un disastri.b (Dit 17:17) Pur isemplu, na 2020, i formadu mas di 950 Kumison di Ajuda Umanitariu na mundu ntidu, pa kuida di kilis ku staba na sufri pabia di duensa di COVID-19. No na gardisi ciu no ermons ku irmas ku partisipa na da Ajuda Umanitariu. Pabia di pena ke sinti pa se ermons ku irmas, e leba elis kusas material, e kuida delis na sintidu spiritual, i na utru situasons, e kumpu se kasas ku kaus di adorason ku dana. — Komparal ku 2 Koríntius 8:1-4.

11. Kuma ku no ta ngaba no Pape ku sta na seu ora ku no mostra di kuma no sinti pena?

¹¹ Ora ku no mostra di kuma no sinti pena dipus di un disastri, utrus ta nota sforsu garandi ku no fasi. Pur isemplu, na 2019, bentu ku cuba forti comadu Dorian dana Salon di Renu na Bahamas. Oca no ermons staba na kumpu Salon e punta un algin ki ka sedu Tustumuña di Jeova kantu ki na kusta pa i fasi elis tarbaju. I fala sin: “N misti da oferta . . . di makinas, mon di obra ku materialis. . . . N misti so fasi es pa bo organizason. N fika dimiradu pa manera ku bo ta trata bo amigus.” Manga di jintis na mundu ka kunsi Jeova. Ma manga delis ta oja ke ku Tustumuñas di Jeova ta fasi pa juda utrus. No ta sta kontenti ora ku no nota di kuma utrus ta misti aprindi mas aserka di Jeova, Algin “ku ta ten pena dimas”, ora ku no mostra di kuma no sinti pena pa utrus! — Ef 2:4.

12. Kuma ku mostra di kuma no sinti pena, na purparanu pa garandi tribulason? (Apokalipsi 13:16, 17)

¹² Pabia ku no na bin pirsisa di mostra di kuma no sinti pena na garandi tribulason? Biblia mostra di kuma kilis ku ka apoia guvernus des mundu, na tene purblemas gosi i na garandi tribulason. (Lei Apokalipsi 13:16, 17.) No ermons ku irmas pudi pirsisa di ajuda pa tene kusas ke na pirsisa del pa vivi. Ora ku no Rei, Kristu Jesus, bin pa julga jintis, no misti pa i ojanu suma jintis ku ta mostra di kuma e sinti pena. Tambi no misti pa i kumbidanu “toma yardansa na renu”. — Mat 25:34-40.

TORNA BU AMOR MAS FORTI

13. Suma ki mostradu na Romanus 15:7, kuma ku purmeru kristons aumenta amor ke tene pa n̈utru?

¹³ Tudu jintis sibiba di kuma purmeru kristons ama n̈utru. Ma sera ki i seduba fasil pa e mostra amor? Nota diferensa ku tenba na kongregason di Roma. Alguns seduba judeus ku nsinaduba obdisi Lei di Moisés, ma utrus seduba di utru nasons ku teneba kultura diferenti. Alguns kristons seduba skravus i utrus seduba omis livri, te mesmu alguns talves seduba dunu di skravus. Kuma ku es kristons pudi kontinua mostra se amor pa n̈utru mesmu ku es diferensa ke tene? Apostolu Paulu fala elis pa e “risibi n̈utru”. (Lei Romanus 15:7.) Ke ki misti fala? Palabra traduzidu pa “risibi” signifika risibi un algin diritu o ku bondadi, suma na bu kasa o pa i fasi parti di bu amigus. Pur isemplu, Paulu fala Filemon kuma ki pudi risibi Onésimu, un skravu ku kuri. I falal asin: “Risibil suma mi propi.” (Filem 17) Apolu teneba puku kunsimentu aserka di kristianismu di ki Ákila ku Prisila. Ma mesmu asin e risibil diritu i “e lebal pa se kasa”. (At 18:26) Es kristons ka disa pa es diferensa tisi purblemas na se metadi, i e risibi n̈utru diritu.

14. Kuma ku Anna ku si omi mostra amor?

¹⁴ Anos tambi no pudi mostra amor pa no ermons ku irmas, ora ku no disa pa e fasi parti di no amigus. Kila na leba elis pa e mostra amor pa nos tambi. (2 Kor 6:11-13) Jubi spriensia di Anna ku si omi. Puku tempu dipus ke bai pa nobu disignason misionariu na Afrika Osidental, duensa di COVID-19 kumsa. Suma e kumsa ciga e ka pudiba bai runion na Salon di Renu juntu ku se kongregason. Kuma ku es kasal pudi mostra se amor? E usa videokonferensia pa kontakta se ermons ku irmas, i konta elis di kuma e misti kunsi elis minjor. Ki familias fika tokadu pa amor ku misionarius mostra elis, e kumsa ku liga elis i manda elis mensaẑens manga di bias. Pabia ku es kasal fasi sforsu pa kunsi ermons ku irmas di se nobu kongregason? Anna fala sin: “N ka na diskisi nunka di ermons ku irmas ku mostra amor pa mi ku ña familia, na bon ku mau mumentus. Se isemplu leban na mostra amor.”

15. Ke ku bu aprindi di isemplu di Vanessa aserka di ama tudu no ermons ku irmas? (Jubi tambi foto.)

¹⁵ Maioria di nos, sta na kongregasons ku tene ermons ku irmas di diferenti kultura i ku tene maneras di sedu diferenti. No pudi pui pa no amor pa relis sedu mas forti, ora ku no konsentra na se bon maneras di sedu. Un irma comadu Vanessa, ku sta na sirbi na Nova Zelandia, tene sempri difikuldadi di da ben ku utrus na si kongregason. Ma dipus, i disidi di kuma, en ves di i ivita kilis ku tene maneras di sedu ku ta pul i paña raiba, i pasa mas tempu ku elis. Fasi es judal pa i oja ke ku pui Jeova ama elis. I fala sin: “Suma ña omi sedu superintendenti di sirkuitu, no ta pasa tempu ku manga di ermons ku irmas ku tene diferenti maneras di sedu. N nota di kuma i sedu mas fasil pa ntindi elis. Gosi N gosta di jintis diferenti. Sin duvida, Jeova ama elis tambi, pabia jintis ki disa pa adoral sedu diferenti di n̈utru.” Ora ku no aprindi oja elis suma ku Jeova ta oja elis, no ta mostra di kuma no ama elis. — 2 Kor 8:24.

16. Pabia ki importanti ama no ermons ku irmas na garandi tribulason? (Jubi tambi foto.)

¹⁶ I importanti ama no ermons ku irmas na garandi tribulason. Nunde ku no na oja proteson ora ku garandi tribulason kumsa? Jubi ke ku Jeova fala si povu pa e fasi oca antigu Babilonia atakadu: “Ña pobu, bo bai, bo yentra na bo kuartus, bo fica porta, bo sukundi un bokadu tok raiba di Deus pasa.” (Isa 26:20) Talves no na sigi mesmu instruson na garandi tribulason. Talves “kuartus” signifika no kongregasons. Na garandi tribulason, Jeova purmiti di kuma i na proteẑinu si no kontinua sirbil juntu ku no ermons ku irmas. Pa kila, no dibi di sforsa ciu desdi gosi pa tene amor garandi pa no ermons ku irmas. No salvason dipindi di kila!

PURPARA DESDI GOSI

17. Si no purpara desdi gosi, ke ku no na konsigi fasi na garandi tribulason?

¹⁷ “Ki garandi dia di SIÑOR” na sedu tempu difisil dimas pa tudu pekaduris. (Sof 1:14, 15) I na sedu tambi tempu difisil pa povu di Jeova. Ma, si no purpara desdi gosi, no na konsigi sta kalmu i juda utrus. No na pudi fika firmi dianti di kualker purblema ku no pudi tene. Ora ku no ermons ku irmas sta na sufri, no na fasi no minjor pa juda elis, ora ku no mostra di kuma no sinti pena i da elis ke ke pirsisa del. Tambi si no aprindi ama no ermons ku irmas desdi gosi, no na mostra amor pa relis na futuru. Dipus Jeova na bin paganu ku vida ku ka ta kaba na un mundu nunde ku no na diskisi tudu disastris ku purblemas. — Isa 65:17.