“Bo sedu firmi; ka bo bulbuli”

1-2. Na kal sintidu ku un kriston parsi ku un prediu altu dimas? (1 Koríntius 15:58)

NA 1978, i kumpudu un prediu altu dimas na Tokiu, Japon. Jintis punta kuma ku es prediu pudi nguenta manga di tirmidura di con ku ta ten na ki sidadi. Kuma ku kila pudi sedu? Njeñerus kumpul pa i sedu forti dimas i na mesmu tempu pa i pudi nguenta tirmidura di con. Kristons i suma es prediu altu dimas. Na kal sintidu?

² Un kriston dibi di manti ekilibriu entri sedu firmi i ka nsisti na si ideia. I pirsisa di sedu firmi i ka bulbuli ora ki na trata di sigi leis ku normas di Jeova. (Lei 1 Koríntius 15:58.) I un algin “ntindidu” o ku sta pruntu pa obdisi, i ka ta konkorda ku tudu ke ki faladu pa i fasi. Pa utru ladu, i pirsisa di sedu “mansu” o ka nsisti na si ideia, ora ku situason pirmiti o ora ki pirsis. (Tiagu 3:17) Un kriston ku aprindi sedu ekilibradu ka ta sedu duru dimas o toleranti dimas. Nes studu, no na bin fala di kuma ku no pudi sedu firmi. No na fala tambi di sinku kusas ku Satanas ta fasi pa pudi pui pa i difisil pa no kontinua firmi, i kuma ku no pudi risisti kontra si sforsu.

KUMA KU NO PUDI SEDU FIRMI?

3. Kal leis ku sta na Atus 15:28, 29 ku Fasidur di lei mas Garandi da?

³ Jeova i algin ku tene diritu mas garandi di fasi leis. Tambi i ta fasi sempri pa si povu ntindi si leis. (Isa 33:22) Pur isemplu, korpu guvernanti di purmeru sekulu fala di tris kusas ku kristons dibi di fasi pa kontinua firmi: (1) Nega idolatria i adora so Jeova, (2) oja sangi suma un kusa sagradu i (3) obdisi lei di Biblia aserka di ivita pekadu seksual. (Lei Atus 15:28, 29.) Kuma ku kristons aos pudi manti firmi nes tris kusas?

4. Kuma ku no pudi adora so Jeova? (Apokalipsi 4:11)

⁴ No nega idolatria, no adora so Jeova. I da israelitas ordi pa e adoral el so. (Lei 5:6-10) Tambi oca Diabu tenta Jesus, Jesus fala di manera klaru di kuma no dibi di adora so Jeova. (Mat 4:8-10) Pa kila, no ka ta adora idulus riliẑiosu. Tambi no ka ta adora pekaduris. Pur isemplu, no ka ta trata un lider riliẑiosu, un pulitiku, un jugadur famosu, un autor di filmi, o un artista suma se sedu un deus. No ta sta na ladu di Jeova i adora so kil ku “kumpu tudu kusa.” — Lei Apokalipsi 4:11.

5. Pabia ku no dibi di obdisi lei di Jeova aserka di santidadi di vida ku sangi?

⁵ No ta obdisi lei di Jeova aserka di santidadi di vida ku sangi. Pabia? Pabia Jeova fala di kuma sangi ta representa vida, un prenda di balur ki danu. (Sir 17:14) Oca Jeova disa pa pekaduris kume karni di limarias pa purmeru bias, i fala elis pa ka e kume sangi. (Kum 9:4) I ripiti es ordi oca ki da Israel Lei di Moisés. (Sir 17:10) Tambi i orienta korpu guvernanti di purmeru sekulu pa i fala tudu kristons pa e ‘ka kume sangi.’ (At 15:28, 29) No ta sedu firmi na obdisi es ordi, ora ku no disidi kal tratamentu mediku ku no na seta.b

6. Ke ku no dibi di fasi pa pudi obdisi normas garandi di Jeova aserka di seksu?

⁶ No dibi di sigi ku firmesa normas garandi di Jeova aserka di seksu. (Eb 13:4) Di manera simboliku, apostolu Paulu falanu pa no “mata” partis di no kurpu. Es signifika di kuma no dibi di fasi tudu ku no pudi, pa kaba ku kualker diseẑu mau. No ta ivita jubi o fasi kualker kusa ku pudi lebanu kai na pekadu seksual. (Kol 3:5; Jo 31:1) Ora ku no tentadu fasi un kusa di mau, no dibi di nega logu kualker pensamentu o ason ku pudi dana no amisadi ku Deus.

7. Ke ku no dibi di sta disididu pa fasi i pabia di ke?

⁷ Jeova misti pa no seta o obdisi di “tudu korson.” (Rom 6:17) Si orientason i sempri pa no ben, i si leis ka pudi mudadu. (Isa 48:17, 18; 1 Kor 6:9, 10) No ta fasi no minjor pa kontenta Jeova i mostra mesmu atitudi ku di salmista ku fala sin: “N pui sintidu pa obdisi bu ordi, pa sempri, te na kabantada.” (Sal 119:112) Ma, Satanas na tenta pui pa i sedu difisil pa no manti firmi. Kal kusas ki ta usa?

KUMA KU SATANAS TA TENTA PUI PA I SEDU DIFISIL PA NO MANTI FIRMI?

8. Kuma ku Satanas ta usa pirsigison pa pudi pui pa i difisil pa no manti firmi?

⁸ Pirsigison. Diabu ta usa violensia ku preson pa pudi pui pa i difisil pa no manti firmi. Si objetivu i pa ‘ngulinu’, ku sedu, kaba ku no amisadi ku Jeova. (1 Ped 5:8) Purmeru kristons ameasadu, sutadu i matadu pabia e staba disididu pa manti firmi. (At 5:27, 28, 40; 7:54-60) Satanas kontinua inda usa pirsigison. I es ku no sta na oja na Rusia ku utrus teras, nunde ku inimigus ta maltrata Tustumuñas di Jeova, o ataka no ermons ku irmas di utru maneras.

9. Da isemplu di nesesidadi di sta atentu ku presons finu.

⁹ Presons finu. Fora di pirsigison, Satanas ta usa tambi “armadilia di astusia”. (Ef 6:11) Jubi isemplu di un ermon comadu Bob ku baŝa pa fasi un operason garandi. I fala medikus di kuma nunka i ka na seta transfuson di sangi. Mediku konkorda di kuma i na rispita si disison. Ma, na noti antis di operason, utru mediku visita Bob oca ku si familia bai pa kasa. I fala Bob di kuma e ka na dal sangi, ma e na tenel ora ki bin pirsisa. Talves mediku pensa di kuma Bob na muda di ideia si si familia ka sta pertu. Ma Bob kontinua firmi, i fala di kuma i ka na seta sangi, i ka mporta ke ku pudi bin kontisi.

10. Pabia ku manera di pensa di kilis ku ka rispita leis di Jeova i pirigosu? (1 Koríntius 3:19, 20)

¹⁰ Manera di pensa di kilis ku ka rispita leis di Jeova. Si no ta pensa suma jintis ku ka rispita leis di Jeova, no pudi tambi kumsa ka rispita Jeova ku si leis. (Lei 1 Koríntius 3:19, 20.) Manga di bias, “jiresa de mundu” ta pui jintis na disobdisi Deus. Alguns kristons di Pérgamu ku Tiatira disa lebadu pa jintis ku sta na se sidadi, ku ta adora idulus i fasi pekadu seksual. Jesus da konsiju forti pa es dus kongregason, pabia e ta setaba pekadu seksual na se kongregasons. (Apok 2:14, 20) Aos tambi, jintis pudi tentanu pa no seta se mau manera di pensa. Membrus di no familia ku kilis ku no kunsi pudi tenta konvensinu di kuma, no ciu regras i no dibi para sigi leis di Jeova. Pur isemplu, e pudi fala di kuma fartanda no diseẑus i ka mal, i normas di Biblia aserka di seksu pasa prazu.

11. Ke ku no dibi di ivita nkuantu no sta firmi?

¹¹ Utrora no pudi pensa di kuma orientason ku Jeova ta danu i ka klaru. No pudi te mesmu tentadu pa “pasanta mas di kil ku sta skritu”. (1 Kor 4:6) Lideris riliẑiosu di tempu di Jesus seduba kulpadu pa es tipu di pekadu. E ta buriba se propi regras riba di Lei. Tambi e ta puiba pa i difisil pa jintis simplis obdisi ki regras. (Mat 23:4) Jeova danu orientason klaru atraves di si Palabra ku si organizason. No ka tene motivu di buri instrusons ki danu. (Dit 3:5-7) Pa kila, no ka dibi di bai alen di ke ku skirbidu na Biblia, o pui regras pa no ermons na kusas ku Biblia ka fala del.

12. Kuma ku Satanas ta usa “ideias di nganu”?

¹² Ideias di nganu. Pa pudi ngana i dividi jintis, Satanas ta usa “ideias di nganu ku ka ten balur” ku “nsinamentu di mundu”. (Kol 2:8) Na purmeru sekulu, es nklui ideias ku basia na ideias di pekaduris, nsinus di judeus ku ka basia na Skrituras ku nsinu di kuma kristons dibi di obdisi Lei di Moisés. Es ideias ta ngana jintis, pabia e ka ta da atenson pa Dunu di jiresa di bardadi, ku sedu Jeova. Aos, Satanas ta usa meius di kumunikason ku redis sosial pa spalia informasons ku ka tene basi, ku notisias ku ta bin di lideris pulitiku. No oja es duranti duensa di COVID-19.c Tustumuñas di Jeova ku obi orientason ku organizason di Jeova da, ivita preokupasons ku kilis ku ta obi informasons falsu ta tene. — Mat 24:45.

13. Pabia ku no dibi di toma kuidadu pa ka distrai?

¹³ Distrasons. No dibi di konsentra na “kusa mas bon.” (Fil 1:9, 10) Ora ku no sta distraidu no ta pirdi manga di tempu ku inerẑia ku no pudiba usa na kusas ku mas na judanu. Kusas ku no kustuma fasi suma kume, bibi, divirti ku tarbaja, pudi distrainu si no disa pa e sedu kusas mas importanti na no vida. (Luk 21:34, 35) Tambi kada dia no ta obi i lei notisias aserka di manifestasons ku dibatis pulitiku. No dibi di fasi tudu pa ka es dibatis distrainu. Si i ka sin, no pudi kumsa ku toma ladu di un o utru na no menti ku korson. Satanas ta usa tudu es kusas ku faladu del pa torna fraku no disison di fasi ke ki sertu. No jubi kuma ku no pudi risisti kontra sforsu ku Satanas ta fasi i kontinua firmi.

KUMA KU NO PUDI KONTINUA FIRMI?

14. Kal ki un di kusas ku pudi judanu kontinua firmi na ladu di Jeova?

¹⁴ Pensa fundu na bu dedikason ku batismu. Bu fasi es pabia bu misti sta na ladu di Jeova. Lembra di ke ki judau sta konvensidu di kuma bu oja bardadi. Bu kunsi Jeova i bu kumsa ku rispital i amal suma bu Pape ku sta na seu. Bu kumsa ku tene fe i kila lebau pa bu ripindi. Bu korson lebau pa bu bandona kusas ku ka bali i vivi di akordu ku vontadi di Deus. Bu sinti ben oca bu nota di kuma Deus purdau. (Sal 32:1, 2) Bu ta bai runions i bu kumsa ku konta utrus kusas bonitu ku bu aprindi. Suma un kriston dedikadu i batisadu, bu sta na yanda na kamiñu pa vida i bu sta disididu pa kontinua yanda nes kamiñu. — Mat 7:13, 14.

15. Pabia ku studa i pensa fundu na Palabra di Deus ta benefisianu?

¹⁵ Studa Palabra di Deus i pensa fundu nel. Suma ku un arvuri pudi sta firmi si i tene rais fundu, asin tambi ku no pudi kontinua firmi, si no fe tene rais fundu na Palabra di Deus. Ora ku un arvuri na kirsi, si rais ta bai mas fundu tambi i ta spalia mas lunju. Ora ku no studa i pensa fundu, no fe ta torna mas forti i no ta sta mas konvensidu di kuma kamiñus di Deus i minjor. (Kol 2:6, 7) Pensa na kuma ku instrusons, orientasons ku proteson di Jeova juda si servus na tempu antigu. Pur isemplu, Ezekiel presta atenson oca ku un anju na midi diritu templu ki oja na un vison. Es vison fortalisi Ezekiel, i danu lisons pratiku di kuma ku no pudi difindi normas di Jeova aserka di adorason puru.d (Eze 40:1-4; 43:10-12) Anos tambi no pudi benefisia ora ku no toma tempu pa studa i medita na kusas fundu di Palabra di Deus.

16. Kuma ku tene korson firmi juda Bob? (Sal 112:7)

¹⁶ Torna bu korson firmi. Rei Davi fala di kuma, nunka i ka na disa di ama Jeova oca ki kanta sin: “Ña korson sta firmi, o Deus”. (Sal 57:7) Anos tambi no pudi tene korson firmi, i tene konfiansa total na Jeova. (Lei Salmu 112:7.) No jubi kuma ku es juda Bob ku faladuba del na kumsada. Oca e falal di kuma e na tene sangi ora ki bin pirsisa, i ruspundi logu di kuma si e na bin dal sangi i na sai logu di ospital. Mas tardi, Bob fala: “N ka teneba nin duvida, i N ka preokupaba di ke ku pudi bin kontisi.”

17. Ke ku no pudi aprindi di isemplu di Bob? (Jubi tambi foto ku diseñu.)

¹⁷ Bob seduba firmi pabia i tomaba ja si disison di manti firmi antis di bai pa ospital. Purmeru, i tene diseẑu di kontenta Jeova. Sugundu, i studa diritu ke ku Biblia ku no publikasons basiadu na Biblia fala aserka di santidadi di vida ku sangi. Terseru, i staba konvensidu di kuma Jeova na pagal pa si disison di obdisi si lei. Anos tambi no pudi tene un korson firmi, i ka mporta kal purblemas ku no pudi pasa.

18. Kuma ku isemplu di Baraki nsinanu konfia na Jeova? (Jubi diseñu ku sta na kapa.)

¹⁸ Konfia na Jeova. Jubi kuma ku Baraki sai ben pabia i konfia na orientason di Jeova. Na ki tempu, povu di Israel ka staba purparadu pa gera. Te mesmu e ka teneba materialis pa gera. Ma Jeova fala Baraki pa i bai geria kontra ŝef di tropas kananeu comadu Sísera ku si tropas, ku teneba manga di materialis di gera. (Ŝef 5:8) Profeta Debora fala Baraki pa i ria bas di montaña pa i kontra ku Sísera ku si 900 karu di gera. Bas di montaña i na seduba difisil pa Israelitas gera kontra karus di gera ku mas rapidu. Mesmu manera ku Baraki sibiba es i obdisi. Oca tropas ria di monti Tabor, Jeova pui pa cuba cubi risu. Karus di Sísera ntola na lama i Jeova pui pa Baraki ngaña gera. (Ŝef 4:1-7, 10, 13-16) Di mesmu manera, Jeova na pui pa no ngaña, si no konfia nel i konfia na orientason ki ta danu atraves di si organizason. — Lei 31:6.

STA DISIDIDU PA KONTINUA FIRMI

19. Pabia ku bu misti kontinua firmi?

¹⁹ No luta pa kontinua firmi na kontinua nkuantu no sta na vivi nes mundu. (1 Tim 6:11, 12; 2 Ped 3:17) Pa no sta disididu pa ka disa pa pirsigison, presons finu, manera di pensa di kilis ku ka rispita leis di Jeova, ideias di nganu ku distrasons, lebanu di un ladu pa utru. (Ef 4:14) En ves di kila, no kontinua firmi na no adorason pa Jeova i obdisi si mandamentus sempri. Na mesmu tempu, no pirsisa di sedu mansu o ka nsisti na no ideia. Na studu ku na bin, no na oja kuma ku Jeova ku Jesus sedu isemplu perfeitu di jintis ku ka ta nsisti na se ideia.