Hulda yangasa si objetivu

SI ALGUNS anus atras bu visitaba un ilia pikininu comadu Sangir Besar na Indonesia, talves bu na oja tris di no irmas na praia. Jintis di ilia kunsi elis diritu pabia di se pregason, e ta juda jintis ntindi Biblia. Ma na ki mumentu, e staba na fasi utru tipu di tarbaju.

Purmeru, e ta bai pa mar pa buska pedras pisadu dipus e ta karga elis, e leba elis pa praia. I ten pedras garandi suma bola di jugu. Dipus, minjeris ta sinta na bankusiñus di madera, e ta usa martelis pa kebra pedras pa e torna mas pikininu di ki ovu di galiña. Dipus, e ta pui kaskajus na baldus e ta kargal, e subi skada i e ta lebal elis nunde ke mora. Dipus, e ta pui pedras na sakus garandi ku na pudu na kamions i usadu suma material pa kumpu strada.

Hulda i un des irmas. Si situason ta pirmitil pasa mas tempu nes tarbaju di ki utrus. I ta usa diñeru ki ngaña pa sustenta si familia. Ma gosi, i sta na tarbaja tambi ku utru objetivu. I misti tene un tablet, pa pudi tene aplikativu JW Library^®. Hulda sibi di kuma videos ku utru kusas ku sta na aplikativu na judal minjoria si pregason i ntindi Biblia diritu.

Na un mis i meiu, Hulda buri mas dus ora di tempu kada dia, pa pudi kebra manga di pedras ku na inci un kamionsiñu. Pa fin, i konsigi diñeru pa kumpra tablet.

Hulda fala sin: “N ta kansaba mal, i N ta staba ku manga di duris pabia di kebra pedras. Ma mesmu asin, N diskisi tudu ña duris, oca ku N oja ña nobu tablet ku na judan minjoria ña pregason i purpara runions ku fasilidadi.” Tambi i fala di kuma tablet judal na kumsada di COVID-19, pabia tudu atividadis di kongregason ta fasiduba atraves di videokonferensia. No kontenti ku Hulda pa manera ki konsigi yangasa si objetivu.