N oja suguransa di bardadi pabia N konfia na Jeova

KUMA KU N KUNSI JEOVA I KONFIA NEL

N padidu na 1948, na un tabankasiñu na sudoesti di Nijeria. Na ki mumentu, ña tiu Moustapha, ermonsiñu di ña pape, juntu ku Wahabi, ña ermon mas garandi, batisadu suma Tustumuñas di Jeova. Ña pape muri oca N tene novi anu. N staba tristi dimas. Wahabi falan kuma N pudi oja ña pape mas na resureison. Es palabras ku ta konsola, pun pa N studa Biblia. N batisadu na 1963. I ka tarda, tris di ña utrus ermons batisadu tambi.

Na 1965, N bai nunde ña ermon garandi Wilson, na Lagus. No teneba bon kumpañerasku ku utrus pionerus regular na kongregason di Igbobi. Se kontentamentu ku animu nkoraẑan, i na Janeru di 1968, N kumsa sirvisu di pioneru.

Un ermon ku staba na sirbi na Betel, comadu Albert Olugbebi, organiza un runion spesial ku anos jovens aserka di nesesidadi di pionerus spesial na norti di Nijeria. N kontinua lembra inda di kombersa animadu di ermon Olugbebi ku fala sin: “Abos i jovens, i bo pudi usa bo tempu ku inerẑia pa Jeova. Kampu sta abertu!” N mistiba sedu suma Isaias i bai nunde ku Jeova misti pa N bai. Pa kila, N prenŝi pitison pa sirbi suma pioneru spesial. — Isa 6:8.

Na Maiu di 1968, N disignadu suma pioneru spesial pa sidadi di Kano, na norti di Nijeria. Un ermon ku teneba bon intenson tenta konvensinba pa N ka bai. Ma N falal: “Obrigadu pa bu preokupason. Ma si Jeova misti pa N sirbi nes disignason sin duvida, i na sta ku mi”.

N KONFIA NA JEOVA NA UN KAU KU DANADUBA PA GERA

Situason na Kano seduba tristi dimas. Gera sivil danaba es sidadi garandi. Na pregason, utrora no ta oja kadaveris di kilis ku matadu na gera. I tenba manga di kongregasons na Kano, ma mesmu asin maioria di ermons fusi. Menus di 15 publikaduris fika, i e staba ku medu i disanimadu. Oca ku no ciga, ku sedu seis pionerus spesial, es ermons ku irmas staba kontenti dimas. Oca ku no nkoraẑa elis e sintiba ben. No juda elis pa e kumsa mas organiza runions ku pregason i manda relatorius di pregason ku pididu di publikasons pa filial.

Anos pionerus spesial no kumsa ku aprindi lingua Hausa. Ora ke obi mensaẑen di Renu na lingua ke mama, manga di jintis di la ta sukutanu. Ma, membrus di riliẑion mas garandi na Kano, ka gostaba di no pregason. Pa kila, no pirsisaba di toma manga di kuidadu. Un bias, ami ku ña kumpañer no serkadu pa un omi ku pegaba faka. No kuri mas rapidu di ki el, i ka konsigi pañanu! Mesmu ku pirigus, Jeova punu “mora suguru”, i numeru di publikaduris kumsa ku aumenta. (Sal 4:8) Gosi, mas di 500 publikaduris sta na sirbi na 11 kongregasons na Kano.

NO PIRSIGIDU NA NIJER

Mas tardi na Agustu di 1968, dipus ku no sta na Kano pa alguns misis, no mandadu pa Niamei, kapital di Republika di Nijer, juntu ku dus utrus pionerus spesial. I ka tarda no diskubri di kuma Nijer, ku sta na Afrika Osidental, i un di zonas mas kinti na Tera. Fora di lida ku kalur, no tenba di aprindi lingua ofisial, ku sedu Fransis. Ku tudu es situasons difisil, no pui no konfiansa na Jeova i no kumsa prega na kapital juntu ku puku publikaduris ku mora la. Dentru di puku tempu, kuas tudu jintis na Niamei ku pudi lei, risibi livru di studu di Biblia A Verdade Que Conduz à Vida Eterna. Te mesmu jintis ta buskanu pa tene livru!

I ka tarda no diskubri di kuma otridadis ka gostaba di Tustumuñas di Jeova. Na Juliu di 1969, no fasi no purmeru Asembleia di Sirkuitu na pais, i serka di 20 jintis mati. No staba ku presa di oja batismu di dus nobu publikaduris. Ma, na purmeru dia di Asembleia, polisia ciga i e para programa. E leba pionerus spesial ku superintendenti di sirkuitu pa polisia. Dipus ke fasinu purguntas, e danu ordi pa no riba utru dia. No nota di kuma otridadis pudi ranjanu purblema, pa kila no fasi aranẑu pa diskursu di batismu fasidu na kasa di un algin, dipus sin fasi utrus sibi no batisa kandidatus na un riu.

Puku semanas dipus, Ministru di Intirior serkanu di Nijer ami ku utrus sinku pionerus spesial. E danuba 48 oras pa disa Nijer, i anos propi ku na ranjaba no manera di sai. No obdisi, i no bai diretu pa filial di Nijeria, i oca no ciga e danu nobu disignason.

N disignadu pa tabanka di Orisunbare na Nijeria, nunde ku N pasa un bon mumentu na pregason juntu ku un grupusiñu di publikaduris ku staba la. Ma dipus di seis mis, filial falan pa N riba pa Nijer ami so. Na kumsada, N fikaba surprendidu i un bokadu ku medu, ma dipus N staba ku presa di oja mas ermons na Nijer!

N riba pa Niamei. Dia dipus ku N ciga, un omi di nogos ku sedu nijerianu, nota di kuma ami i Tustumuña di Jeova i kumsa fasi purguntas aserka di Biblia. N studa Biblia kel, dipus di para fuma i bibi ciu, i batisadu. N staba kontenti di prega juntu ku ermons ku irmas na diferenti partis di Nijer i oja kuma ku manga di anus dipus jintis seta bardadi. Oca ku N ciga, i tenba 31 Tustumuñas di Jeova na Nijer, i kontra N sai i tenba 69.

“NO KA SIBI CIU ASERKA DI ATIVIDADI DI RENU NA GINE-KONAKRI”

Na Dizembru di 1977, N riba pa Nijeria pa risibi trenamentu. Na fin di tris semana di formason, kordenadur di Kumison di Filial, Malcolm Vigo, dan karta di filial di Sera Lioa pa N lei. Ermons staba na buska un pioneru solteru ku tene bon saudi, i ku ta papia Inglis ku Fransis i ku pudi sirbi suma superintendenti di sirkuitu na Gine-Konakri. Ermon Vigo falan di kuma, N trenadu pa es disignason. I splikan di manera klaru di kuma es i ka un disignason fasil. I dan es konsiju: “Pensa diritu antis di seta”. N ruspundi logu: “Suma i Jeova ku mandan, N na bai.”

N bai pa Sera Lioa, N oja ermons na filial. Un membru di Kumison di Filial falan sin: “No ka sibi ciu aserka di atividadi di Renu na Gine-Konakri.” I filial ku ta kuidaba di tarbaju di pregason na Gine-Konakri, ma mesmu asin, e ka pudiba kumunika ku publikaduris, pabia di purblema pulitiku ku tenba la. E tenta manga di bias manda un ermon pa visita ermons na Gine-Konakri, ma e ka konsigi. Pa kila, e pidin pa N bai pa kapital, ku sedu Konakri, pa tenta pidi un dukumentu ku na pirmitin fika la.

Oca N ciga Konakri, N bai pa mbaŝada di Nijeria N papia ku mbaŝadur. N falal di kuma N misti prega na Gine-Konakri. I falan pa N ka fika la, pabia N pudi prindidu o algun kusa di mal pudi kontisi ku mi. I falan: “Riba pa Nijeria i bu prega la”. N ruspundil: “N sta disididu pa fika li.” Asin, i skirbi un karta i pidi Ministru di Intirior di Gine-Konakri pa i judan, i ministru judan.

Puku tempu dipus, N riba pa filial di Sera Lioa i N konta ermons kal ki disison di ministru. Ermons kontentiba dimas di oja kuma ku Jeova bensua ña bias. Guvernu disan N fika na Gine-Konakri!

Di 1978 te 1989, N sirbi na sirkuitu na Gine-Konakri, Sera Lioa, tambi suma superintendenti di sirkuitu substitutu na Liberia. Na kumsada, N ta duensiba sempri. Utrora es ta kontisi na zonas isoladu. Ma ermons ta fasi ke ke pudi pa leban ospital.

Un bias, N duensiba risu papia di paludismu tambi N teneba bijus na bariga. Oca N bin san, N diskubri di kuma ermons pensaba di kuma N na muri, pa kila e staba na papia nunde ke na nteran! Mesmu kes situasons ku pui ña vida na pirigu, nunka N pensa disa ña disignason. N sta konvensidu di kuma so Deus ku pudi danu suguransa di bardadi, pabia mesmu si no muri i pudi lantandanu.

AMI KU ÑA MINJER NO KONFIA NA JEOVA

Na 1988, N kunsi Dorcas, un irma pionera ku amaba Jeova ciu i ku seduba umildi dimas. No kasa, i disignadu pa sirbi juntu ku mi na sirkuitu. Dorcas ta tarbajaba ciu ku mi na no disignason, i staba dispostu pa fasi manga di sakrifisiu pa Jeova. No ta yanda te 25 kilometru di un kongregason pa utru i no ta karga no kargus. Pa kongregasons lunju, no ta usa kualker transporti ku no konsigi, pa bai na strada ku tene lama i manga di burakus.

Dorcas i koraẑosu dimas. Pur isemplu, utrora no ta pasa na kaus ku tene lagartus. Un bias, no dibi di viaẑaba sinku dia, i kamba un riu ku kanua, pabia puntu di madera kebraba. Kontra Dorcas firma pa sai di kanua, i kai na yagu. Nin un di nos ka pudiba nada, i tenba lagartus na riu. Filismenti, jovens entra na yagu i e salval. Utrora, anos tudu dus no ta tene suñus meduñu pabia di ke ku pasa, ma no kontinua sirbi na sirkuitu.

Na kumsada di 1992, no teneba surpresa garandi di sibi di kuma Dorcas preña. Sera ki es i fin di no sirvisu di tempu kompletu? No fala sin: “Jeova danu un prenda! Pa kila, no disidi coma no fiju femia di Jahgift (na inglis i signifika prenda di Jah).” Kuatru anu dipus ku Jahgift padidu, si ermon Eric padidu tambi. Tudu no dus fijus sedu un prenda ku bin di Jeova. Jahgift sirbi pa algun tempu na skritoriu di traduson na Konakri, i Eric sta na sirbi suma servu ministerial.

Dorcas bin para sirvisu di pioneru spesial, ma i kontinua na sirbi suma pioneru regular, mesmu pa manera ki i sta na kuida di no fijus. Ku ajuda di Jeova, N kontinua na sirbi suma pioneru spesial. Dipus ku no fijus garandi, Dorcas konsigi sirbi mas suma pioneru spesial. Gosi anos dus no sta na sirbi suma misionarius na kampu na Konakri.

JEOVA DANU SUGURANSA DI BARDADI

Sempri N ta bai nunde ku Jeova leban. Manga di bias ami ku ña minjer no sinti proteson ku benson di Jeova. Konfia na Jeova libranu di manga di preokupasons, ku kilis ku ta buska kusas material ta tene. Na tudu ke ku no pasa, ami ku Dorcas no aprindi di kuma kin ku ta da suguransa di bardadi i “Deus no Salbadur,” ku sedu Jeova. (1 Kron 16:35) N tene konfiansa di kuma vida di tudu kilis ku konfia na Jeova ‘na maradu suguru juntu ku kilis ku tene vida.’ — 1 Sam 25:29.