Purguntas di kilis ku ta lei no publikasons

Kin ku faladu pa “lanta” i pa “brilia”, i kuma ki fasil?

Isaias 60:1 fala sin: “Lanta, bu brilia, pabia bu lus bin; gloria di SIÑOR na mansi riba di bo.” Kontestu mostra di kuma i sta na faladu di un minjer, ku sedu Sion o Jerusalen, kapital di Judá na ki tempu. (Isa 60:14; 62:​1, 2) Jerusalen na representa tudu nason di Israel. I ten dus purguntas ku no na ruspundi aserka des testu: Purmeru, kal tempu i kuma ku Jerusalen “lanta” i brilia na sintidu spiritual? Sugundu, sera ki no sta na oja kumprimentu di palabras di Isaias?

Kal tempu i kuma ku Jerusalen “lanta” i brilia na sintidu spiritual? Jerusalen ku si templu dana oca judeus staba na katiberasku na Babilonia pa 70 anu. Ma, dipus ku Babilonia konkistadu pa Medus ku Persas, israelitas ku staba na vivi na diferenti partis di Mperiu di Babilonia staba livri pa riba se tera i adora mas Jeova. (Esd 1:​1-4) Na kumsada di 537 AEK, israelitas fiel ku sobra di tudu 12 jorsons riba pa se tera i adora mas Jeova. (Isa 60:4) Asin, e kumsa ku fasi sakrifisius pa Jeova, fasi festivalis i torna kumpu templu. (Esd 3:​1-4, 7-11; 6:​16-22) Gloria di Jeova kumsa ku brilia mas na Jerusalen, ku sedu, i kumsa ku brilia riba di si povu. Elis tambi e kumsa ku sedu lus simboliku pa nasons ku ka kunsi Jeova.

Ma, so un parti di profesias di Isaias ku kumpriba na ki tempu. Maioria di israelitas ka kontinua obdisi Deus. (Ne 13:27; Mal 1:​6-8; 2:​13, 14; Mat 15:​7-9) Mas tardi, te mesmu e nega Mesias, ku sedu Jesus Kristu. (Mat 27:​1, 2) Na 70 EK, Jerusalen ku si templu kabadu ku el mas un bias.

Jeova kontaba ja di kuma es na kontisi. (Dan 9:​24-27) Na bardadi, i ka di vontadi di Jeova pa Jerusalen ku sta na Tera kumpri tudu profesias ku sta na Isaias kapitulu 60 ku fala di adorason di Jeova ku na ribantadu.

Sera ki no sta na oja kumprimentu di palabras di Isaias? Sin, i sta na kumpri. Ma ku utru minjer simboliku, ku sedu, ‘Jerusalen di seu’. Apostolu Paulu fala sin aserka del: “El ki no mame.” (Gal 4:26) Jerusalen di seu i parti di organizason di Deus ku sta na seu ku formadu pa anjus fiel. Si fijus i Jesus ku 144.000 kristons unjidu pa spiritu, ku tene speransa di vivi na seu suma Paulu. Kristons unjidu i “nason santu”, ku sedu, “Israel di Deus.” — 1 Ped 2:9; Gal 6:16.

Kuma ku Jerusalen di seu “lanta” i “brilia”? I fasil atraves di si fijus unjidu ku sta na Tera. Jubi kuma ku se spiriensias parsi ku profesia ku sta na Isaias kapitulu 60.

Kristons unjidu dibi di “lanta”, pabia e staba na sukuru spiritual oca apostasia spaja dipus di mortu di apostolus. (Mat 13:​37-43) Na ki tempu, e staba bas di kontrolu di Garandi Babilonia, ku sedu, tudu grupu di riliẑions falsu. Unjidus kontinua bas di si kontrolu te na tempu di “fin di mundu” ku kumsa na 1914. (Mat 13:​39, 40) Logu dipus na 1919, e libertadu i e kumsa logu ku brilia na sintidu spiritual, oca ke kumsa pega tesu na prega bon noba di Renu.a Pa manga di anus, jintis di tudu nasons bin pa ki lus, nkluindu kilis ku sobra di Israel di Deus, ku sedu, “reis” ku faladu del na Isaias 60:3. — Apok 5:​9, 10.

Na futuru, kristons unjidu na bin brilia mas forti. Di kal manera? Ora ke muri na Tera, e na fasi parti di “nobu Jerusalen,” o noiva di Kristu ku formadu pa 144.000 reis i saserdotis. — Apok 14:1; 21:​1, 2, 24; 22:​3-5.

Nobu Jerusalen na bin tene un parti importanti na kumprimentu di Isaias 60:1. (Kompara Isaias 60:​1, 3, 5, 11, 19, 20 ku Apokalipsi 21:​2, 9-11, 22-26.) Suma ku Jerusalen ku sta na Tera seduba sentru di guvernu di antigu Israel, asin tambi ku nobu Jerusalen ku Kristu na bin sedu guvernu di nobu mundu. Kuma ku nobu Jerusalen na ‘disi di seu’? I ora ki da atenson pa jintis na Tera i fasi kusas ku na benefisia elis. Jintis di tudu nasons ku rispita Deus “na yanda na si lus.” Te mesmu e na sta livri di pekadu ku mortu. (Apok 21:​3, 4, 24) Asin, i na ‘arnobadu tudu kusa’ di manera kompletu, suma ku Isaias ku utrus profetas falaba ja del. (At 3:21) Es tarbaju garandi di arnoba tudu kusa kumsa oca Jesus sedu Rei, i na bin kaba na fin di si Renansa di Mil Anu.