Ke ku pudi judanu adapta na un nobu kongregason

Nicolas ku Céline teneba utru difikuldadi. E setaba un disignason di filial di Fransa, pa munda pa un nobu kongregason. E fala sin: “Na kumsada no kontentiba dimas, ma dipus no kumsa ku sinti falta di no amigus. No ka teneba inda amisadi forti ku ermons di no nobu kongregason.”a Kuma ku no pudi sai ben ora ku no munda pa un nobu kongregason, mesmu ku es difikuldadis? Ke ku utrus pudi fasi pa juda? Kuma ku bu pudi nkoraẑa utrus i risibi nkoraẑamentu na bu nobu kongregason?

KUATRU PRINSIPIU DI BIBLIA KU PUDI JUDAU ADAPTA

1. Konfia na Jeova. (Sal 37:5) Kazumi, un irma na Japon, munda di kongregason ki staba nel pa 20 anu, oca ku si omi transfiridu di kau di tarbaju. Kuma ki ‘ntrega si vida pa Jeova’? I fala sin: “N konta Jeova ke ku sta na ña korson, aserka di tudu ña medu, sintimentu di sta so ku preokupason ku N teneba. Kada bias ku N fasil, i ta dan forsa ku N pirsisa del.”

Kuma ku bu pudi aumenta bu konfiansa na Jeova? Suma ku un planta pirsisa di yagu ku strumu pa pudi torna forti, asin tambi ku no fe pirsisa di yagu ku strumu na sintidu simboliku pa i pudi torna forti. Nicolas, ku faladuba del na kumsada, ta pensaba fundu na isemplu di Abraon, Jesus ku Paulu, ku fasi manga di sakrifisius pa fasi vontadi di Deus. Fasi es aumenta si konfiansa di kuma Jeova na judal. Tene un programa di studu pesual kada semana, na judau lida ku kualker mudansas ku bu tene na bu vida, tambi bu na aprindi kusas ku bu pudi usa pa nkoraẑa utrus na bu nobu kongregason.

2. Ivita fasi komparasons. (Ekl 7:10) Jules tenba di adapta pa un kultura ku tene manga di diferensa ku di sel, oca ki munda di Benin pa Stadus Unidu. I fala sin: “N pensaba di kuma N dibi di papia di ña vida ku tudu algin ku N oja”. Suma es ambienti seduba diferenti di kil ki kustumaba, i kumsa ku lunjusi di ermons ku irmas. Ma, oca ki kunsi minjor ermons ku irmas, i muda si manera di pensa. I fala sin: “N fia di kuma na tudu parti di tera, tudu pekaduris i mesmu. Diferensa i so na manera di papia ku di fasi kusas. Ke ku mas importanti i seta jintis suma ke sedu.” Pa kila, ivita fasi komparasons ku bu antigu kongregason. Un irma pionera comadu Anne-Lise fala tambi sin: “N ka munda pa buska ke ku N disa pa tras. N munda pa diskubri nobu kusas.”

Ansions tambi pirsisa di ivita fasi komparasons ku se antigu kongregason. So pabia di kuma ermons ta fasi kusas di diferenti manera na bu nobu kongregason, ka signifika sempri di kuma e ka sta na fasi kusas diritu. I bon pa bu kunsi diritu situasons lokal antis di bu da bu ideias. (Ekl 3:​1, 7b) I mas minjor nsina ermons atraves di bu bon isemplu di ki tenta forsija elis pensa suma bo. — 2 Kor 1:24.

3. Partisipa na atividadis di bu nobu kongregason. (Fil 1:27) Munda ta iziẑi manga di tempu ku inerẑia, ma tambi i importanti pa bu mati logu na kumsada, runions di kongregason na Salon, si pusivel. Si jintis di bu nobu kongregason ka ta ojau o e ta dati e ojau, kuma ke pudi judau? Lucinda, ku munda ku si dus fijus femia pa un sidadi garandi na Afrika di Sul, fala sin: “N konsijadu pa N sforsa pa tene amigus na nobu kongregason, prega ku utrus i da kumentarius na runions. N konta tambi ermons di kuma e pudi usa no kau pa runions di pregason.”

Tarbaja “juntu” ku ermons ku irmas na atividadis di kongregason, na nkoraẑau i nkoraẑa utrus tambi. Ansions nkoraẑa Anne-Lise ku faladuba del na kumsada, pa i tenta prega ku kada ermon na nobu kongregason. Kal ku sedu rusultadu? I fala sin: “N nota rapidu di kuma, es i un bon manera pa N sinti di kuma N fasi parti di kongregason”. Tambi, ora ku bu juda na limpesa ku manutenson di Salon di Renu bu na mostra di kuma, bu ta oja bu nobu kongregason suma bu kongregason. Mas bu na partisipa na atividadis di bu nobu kongregason, ermons ku irmas na lestu ku sta avontadi ku bo, i bu na sinti di kuma e sedu bu familia.

4. Fasi nobu amigus. (2 Kor 6:​11-13) Mostra interesi na utrus i minjor manera di fasi amisadi, pa kila, ciga sedu na runion i fika un bokadu dipus di runions pa bu pudi tene tempu di papia ku utrus i kunsi elis. Sforsa pa kunsi se nomi. Ora ku bu lembra di nomi di jintis, bu sedu amigavel i pui pa e sta avontadi pa papia ku bo, e na misti kunsiu i bu na pudi tene bon amigus.

En ves di preokupa dimas pa jintis setau, pirmiti pa bu ermons ku irmas sibi kin na bardadi ku bu sedu. Fasi suma Lucinda. I fala sin: “En ves di pera pa e kumbidanu, no ta kumbida elis no kau, i gosi no tene bon amigus.”

“BO RISIBI N̈UTRU”

Alguns pudi tene medu, ora ke yentra na Salon di Renu ku tene manga di jintis ke ka kunsi. Kuma ku bu pudi pui pa utrus ku munda pa bu kongregason sta mas avontadi? Apostolu Paulu nkoraẑanu pa no “risibi n̈utru, suma tambi Kristu risibinu”. (Rom 15:7) Ora ku ansions kopia Jesus, e pudi juda nobus sta avontadi. (Jubi kuadru “Ke ku pudi juda pa bu mudansa kuri diritu?”) Ma, tudu jintis na kongregason, nkluindu mininus, pudi juda nobus sinti avontadi.

Risibi utrus nklui kumbida elis pa bu kau, ma tambi i pudi nvolvi da elis ajuda ke na pirsisa. Pur isemplu, un irma usa si tempu pa mostra diferenti parti di sidadi pa un irma ku kumsa ciga, i mostral tambi kuma ki pudi paña transporti. Ke ku ki irma fasi pa rel tokal, i judal sta mas avontadi.

UN OPORTUNIDADI PA KIRSI

Ora ku gafañotu na kirsi, si peli ta torkia manga di bias, antis di i pudi bua. Di mesmu manera, ora ku bu munda pa un nobu kongregason, bu pirsisa di larga kualker medu ku pudi tujiu bua na sintidu simboliku na sirvisu di Jeova. Nicolas ku Céline fala sin: “Mudansa i un bon formason. Adapta ku nobu jintis i ku nobu ambienti, ta lebanu na tene nobu maneras di sedu.” Jean-Charles ku faladu del na kumsada, konta kal benefisiu ku el ku si familia e tene. I fala sin: “Oca ku no munda pa no nobu kongregason, no fijus sedu mas maduru i e pertusi mas di Jeova. Dipus di alguns misis, no fiju femia kumsa ku fasi disignasons na runion di semana, i no fiju macu sedu publikadur ku ka batisa.”

Ke ku bu pudi fasi si bu situason ka pirmitiu munda, pur isemplu, pa nunde ku ten mas nesesidadi? Bu pudi fasi pa bu antigu kongregason sedu suma si nobu, ora ku bu aplika alguns ideias ku faladu del nes artigu. Nkuantu bu na mostra bu konfiansa na Jeova, sforsa pa partisipa na atividadis di bu kongregason. Bu pudi fasil, ora ku bu fasi planus pa prega ku utrus i fasi nobu amisadis o torna kilis ku bu teneba ja mas forti. Sera ki bu pudi pertusi di nobus o juda kilis ku pirsisa di ajuda? Suma amor ta mostra ba kin ki kristons di bardadi, juda utrus pudi torna bu amisadi ku Jeova mas forti. (Jon 13:35) Bu pudi tene sertesa di kuma es “koldadi sakrifisiu ku Deus ta kontenti ku el.” — Eb 13:16.

Mesmu ku difikuldadis, manga di kristons konsigi sai ben oca ke munda pa nobu kongregason, i abo tambi bu pudi konsigi! Anne-Lise fala sin: “Munda di kongregasons judan yabri ña korson.” Kazumi sta gosi konvensidu di kuma, ora ku bu munda “bu ta oja di kuma Jeova judau di un manera ku nunka bu ciga di oja.” Ke gora ku Jules fala? I fala sin: “Amigus ku N tene judan pa N sta avontadi. Gosi N sinti suma si N fasi parti di ña nobu kongregason, i na sedu difisil munda di la.”