Ke ku pudi judau studa kada semana
SERA ki i ta difisil pa bu fasi bu studu di Biblia kada semana? Sera ki utrora bu ka ta sinti ben ora ku bu na studa Biblia? Utrora anos tudu no ta sinti asin. Ma pensa na utru kusas ku no ta fasi sempri, suma laba. Laba kurpu ta toma tempu tambi i ta iziẑi sforsu, ma dipus bu ta sinti ben! Studu Biblia pudi komparadu tambi ku ‘laba ku yagu ku palabra’. (Ef 5:26) Jubi alguns kusas ku pudi judau:
Fasi un programa. Studu pesual di Biblia fasi parti di “kusa mas bon” ku un kriston dibi di fasi. (Fil 1:10) Pa judau lembra di ora di studu, skirbi dia ku ora na un foja i pul na un kau ku bu na pudi ojal ku fasilidadi. O bu pudi pui alarmi pa i lembrantau, ora ku bu ora di studu na pertu.
Pensa na ke ku na judau konsentra. Kuma ku bu misti studa? Pur isemplu, sera ki i mas fasil pa bu konsentra si bu studa pa un ora tempu? O sera ki bu pirfiri studa pa tempu mas kurtu ma manga di bias? Bu sibi ke ku na sedu mas minjor pa bo. Pa kila, programa tempu di studu konformi bu situason. Si bu sinti di kuma bu ka gosta di studa na tempu ku bu programa, pabia ku bu ka na studa so pa 10 minutu? 10 minutu di studu i mas minjor di ki ka studa nada. Talves dipus di 10 minutu di studu, bu na gosta ciu i bu na misti kontinua studa un bokadu mas. — Fil 2:13.
Kuji ke ku bu na studa. Si bu pera te ora di studa pa kumsa kuji ke ku bu na studa, bu ka na ‘purbita pa fasi tudu ku bu pudi’. (Ef 5:16) Pabia ku bu ka na fasi un lista di asuntus ku bu misti studa? Pur isemplu, si bu tene un purgunta aserka di un asuntu ku bu ka ntindi diritu, skirbi ki purgunta. Na fin di kada studu bu pudi buri utrus ideias na lista di kusas ku bu misti bin studa.
Fasi mudansas ora ki pirsis. Si bu teneba ja un programa bu pudi muda konformi bu nesesidadi. Pur isemplu, bu pudi muda tempu ku bu ta gasta na studa, o asuntus ku bu kuji pa studa. Ke ki mas importanti i pa bu studa sempri, i ka mporta kal ora, kantu tempu o ke ku bu na studa.
No ta benefisia ciu si no ta studa kada semana. No amisadi ku Jeova ta torna mas forti, no ta toma bon disisons na vida i no ta sinti nkoraẑadu. — Jos 1:8.