Jeova danu forsa na tempu di gera i na tempu di pas

Paul: No staba kontenti dimas! Na Novembru di 1985, no staba na bai pa Liberia, na Afrika Osidental, nunde ku no na bai kumsa no sirvisu misionariu. No avion para na Senegal. Anne fala sin: “No na ciga Liberia li pa un ora di tempu!” Dipus no obi un anunsiu: “Jintis ku na bai pa Liberia dibi di sai di avion. No ka pudi bai pa la, pabia i fasidu golpi di stadu.” No fika ku misionarius na Senegal pa 10 dia. No obi notisia di kuma manga di jintis matadu i guvernu tuji jintis sai di se kasa di noti. Si e sai, e na matadu logu-logu.

Anne: No ka gosta di pui no vida na pirigu. Desdi pikininu N ta teneba sempri medu, pa kila jintis ta comanba di Annie kobardu. N ta mediba te pa kamba strada! Ma, no staba disididu pa bai pa Liberia mesmu si seduba pirigosu.

Paul: Ami ku Anne no kirsi na mesmu sidadi, na Oesti di Inglatera. Ña papes ku mame di Anne ta nkoraẑanu sempri pa sedu pioneru. Pa kila, no kumsa sirvisu di pioneru logu dipus di no kaba liseu. E staba kontenti pa manera ku no misti usa no vida na sirvisu di tempu kompletu. Ku 19 anu, N kumbidadu pa sirbi na Betel i Anne kumbidadu tambi dipus di no kasamenti na 1982.

Anne: No gosta di Betel, ma sempri no mistiba sirbi nunde ki tenba mas nesesidadi. Tarbaja juntu ku kilis ku seduba misionarius aumenta no diseẑu di sedu tambi misionarius. Kada dia di noti, duranti tris anu, no ta oraba Jeova aserka di no diseẑu di sedu misionarius. Na 1985, no staba kontenti dimas oca no risibi konviti pa fasi parti di turma 79 di Skola di Jileadi! No disignadu pa Liberia, na Afrika Osidental.

AMOR PA NO ERMONS KU IRMAS JUDANU NGUENTA TEMPUS DIFISIL

Paul: No mbarka na purmeru avion ku dibi di bai pa Liberia. Jintis staba ku medu dimas, pabia guvernu kontinua ka pirmiti jintis pa e sai di se kasa di noti. Jintis ta panta ora ku un karu fasi baruju di repenti, e ta pupa i kuri. Pa pudi manti kalmu, no ta lei partis di Salmus juntu kada dia di noti. Ma, no gostaba ciu di no disignason. Anne ta baiba pregason kada dia, i ami N ta tarbajaba na Betel ku ermon John Charuk.a N aprindi ciu ku el, pabia i vivi na Liberia pa manga di tempu, tambi i kunsi purblemas di ermons ku irmas diritu.

Anne: Ke ku manda no lestu di gosta di Liberia? Pabia di no ermons ku irmas. E amanu ciu, tambi e sedu fiel. No sedu bon amigus i e pasa sedu no familia. E ta danu bon konsijus i e ta nkoraẑanu. Pregason seduba interesanti dimas. Jintis na tiritoriu ka ta kontenti ora ku no lestu di sai di se kasa! Jintis gosta di papia di Palabra di Deus na kualker kau. I fasil pa no yentra na se kombersa. No teneba manga di studantis di Biblia, i ta seduba difisil studa ku elis tudu. I seduba un purblema, ma na mesmu tempu i ta danuba kontentamentu!

JEOVA DANU FORSA OCA NO TENE MEDU

Paul: Pa kuatru anu, situason na Liberia staba kalmu. Ma, na 1989, tudu kusas muda i no kumsa na vivi na metadi di un gera garandi. Kilis ku staba kontra guvernu toma konta di zona pertu di Betel, na 2 di Juliu di 1990. Pa tris mis no ka pudi papia ku ningin fora di Liberia, te mesmu no familia ku sedi mundial. I tenba violensia, konfuson na tudu ladu, kumida ka tenba ciu i manga di minjeris violadu. Es situason tristi kontinua pa 14 anu na tudu parti di Liberia.

Anne: Membrus di alguns etnias staba na geria i mata jintis di utrus etnia. I tenba tropas rebeldi na tudu ladu di rua. E teneba manga di armas, e bistiba di un manera strañu, e ta baiba na kada kasa i toma kualker kusa ke mistiba. Pa alguns delis, mata pekadur i suma mata galiña. Tropas rebeldi blokia stradas pa kontrola jintis, i manga di bias e ta mata kilis ku mistiba pasa. Dipus e ta pui se kurpu riba di n̈utru. Es ta kontisi te mesmu pertu di Betel. Tustumuñas di Jeova ku sedu fiel matadu, nkluindu dus di no kiridu misionarius.

Ermons ta puiba se vida na pirigu pa pudi sukundi se kumpañeris di utru etnia ku staba na buskadu pa mata. Misionarius ku betelitas ta fasiba tambi mesmu kusa. Suma Betel seduba un prediu, alguns ermons ku irmas ku sai di se kasa ta durmi bas, i utrus ta durmi na kuartus di riba. Na no kuartu, no risibi seti jintis.

Paul: Kada dia, tropas rebeldi ta tenta yentra na Betel pa jubi si kontra no sta na sukundi jintis. Kada bias ku es kontisi, dus ermons ta bai pa porton di Betel pa papia ku rebeldis i un irma ku un ermon ta fika e na jubi na janela tudu ke ku staba na pasa. Si dus ermons ku bai pa porton pui se mons dianti, i signifika di kuma tudu sta ben. Ma, si e pui se mons pa tras, i signifika di kuma rebeldis sta ku raiba. Asin, kilis ku ta staba na jubi pa janela ta sukundi no ermons rapidu.

Anne: Un dia, un grupu di rebeldis ku pañaba raiba yentra aforsa. Ami ku un irma no yentra na kasa di bañu i no tranka porta, i staba la un armariu ku teneba un kau di sukundi. Irma yentra na spasu pikininu pa sukundi. Tropas rebeldi subi riba ku se armas. E konki no porta ku raiba. Paul tenta fasi elis pa e ka yentra. I fala elis: “Ña minjer sta na kasa di bañu.” Oca N fica ki kau ku irma sukundiba, i fasi baruju. Dipus N tenba di ribanta tudu kusas na armariu, i kila toma algun tempu. N teneba sertesa di kuma, tropas rebeldi staba na punta ke ku N staba na fasi. Kil ora N pantaba, i tudu ña kurpu staba na tirmi. Si N yabri porta, tropas rebeldi pudi nota di kuma N panta i e pudi diskunfia inda mas. Ke ku N pudi fasi? N fasi un orason na sintidu, N pidi Jeova pa i judan. Dipus, N yabri porta i N konsigi fala elis manteña ku kalma. Un delis pincan, i bai logu pa armariu, i yabril i tira tudu kusas ku staba la. I ka pudiba fia di kuma nada ka staba la. El ku si grupu e rabista utrus kuartus, tambi e rabista na tetu. Mas un bias, e ka oja nada.

BARDADI SEDUBA SUMA LUS NA UN KAU SUKURU

Paul: Pa manga di misis, no teneba puku kusas di kume. Ma, no teneba kumida spiritual. Programa spiritual di parmaña na Betel seduba suma matabicu. No sibiba di kuma lei i studa Biblia na danu forsa pa nguenta kada dia.

No sibiba di kuma, si no bai buska kumida o yagu, no ka na konsigi proteẑi kilis ku sukundi, i e pudiba matadu. Utrora, Jeova ta danu ke ku no pirsisa del na mumentu sertu i di manera dimiradu. Jeova kuidaba di nos i judanu kontinua sta kalmu.

Situason na Liberia staba na piora, ma bardadi danuba speransa. No ermons ku irmas kuri manga di bias pa salba se vida, ma e kontinua tene fe forti i manti kalmu mesmu ku tudu purblemas. Alguns fala di kuma, nguenta gera seduba “purparason pa garandi tribulason.” Ansions ku jovens koraẑosu fasi tudu ke pudi pa juda se ermons ku irmas. Ermons ku irmas ku bai pa utru ladu juda n̈utru i e kumsa ku prega na ki zonas. E usa kualker kusa ke oja na matu pa kumpu Salons di Renu i fasi runions. Na ki tempus difisil, bai runions i prega utrus daba ermons ku irmas speransa, tambi e nkoraẑadu ciu. Oca no na da jintis kumida, ropas ku utrus kusas, no fikaba tokadu dimas, manera ku manga di no ermons pidi pastas di pregason en ves di ropas. Manga di jintis ku oja i pasa manga di mau kusas na gera, mistiba obi bon noba. Jintis fikaba dimiradu manera ku Tustumuñas di Jeova seduba diferenti, pabia entri elis i tenba amor di bardadi ku filisidadi. Ermons ku irmas seduba suma lus na un kau sukuru. (Mat 5:​14-16) Suma no ermons ta pegaba tesu, te mesmu alguns tropas rebeldi ku seduba mau dimas, pasa sedu no ermons.

JEOVA DANU FORSA OCA NO DISA NO ERMONS

Paul: Na piriudu di 14 anu ku purblema tenba, ami ku Anne no sai di Liberia 5 bias: Tris bias pa puku tempu i dus bias no fika fora duranti un anu. Un irma misionariu splika diritu kuma ku no sinti oca no dibi di disa Liberia. I fala sin: “Na Jileadi, e nsinanu pa no ama no ermons ku irmas na no disignason, i pa fasil di tudu no korson. I kila ku no fasi. Pa kila, oca no tenba di disa no ermons ku irmas nes situason difisil, no staba ku dur na korson!” No staba kontenti di pudi juda no ermons ku irmas ku tarbaju di pregason na Liberia, mesmu pa manera ku no staba na teras pertu.

Anne: Na Maiu di 1996, no bai ku karu di Betel, no seduba kuatru i no teneba manga di dukumentus importanti aserka di tarbaju na Liberia. No mistiba bai pa un kau suguru, na utru ladu di sidadi ku teneba distansia di 16 kilometru. Puku dipus ku no sai no ciga na zona ku sta na atakadu. Tropas ku paña raiba fugia riba, e para no karu e riantan juntu ku ki dus ermons, i e bai ku karu juntu ku Paul. No mediba mal. Di repenti, no oja Paul na pertusi di nos. Sangi staba na sai na si kabesa. Na kumsada, no pensaba di kuma i fugiadu, ma dipus no kaba pa pirsibi di kuma i ka pudiba sedu, pabia algin ku fugiadu ka na pudiba yanda! Un di tropas molostraba Paul oca ki pincalba fora di karu. Filismenti, i seduba so un kausiñu ki molostraba nel.

I tenba un karu di militar ku inciba di jintis ku staba ku medu i ku staba pruntu pa bai. No disidi mbarka nel, ma suma i ka teneba spasu dentru no obrigadu lendri fora. I ka teneba nada pa pega. Kondutor staba na kurinti karu ku forsa tok no staba kuas pa kai. No gritaba pa i para, ma i staba ku medu di para. No fasi jitu pa ka kai, ma oca karu ciga na purmeru kau, no kansaba mal i no kurpu staba na tirmi pabia di medu.

Paul: No ropa susuba i rumpi. Oca no jubi n̈utru no ka fiaba di kuma no staba di vida. No durmiba pertu di un elikopturu ku pañaba manga di balas. Es elikopturu lebanu pa Sera Lioa dia dipus. No staba kontenti di sta di vida, ma no preokupaba ciu ku no ermons ku irmas na Liberia.

JEOVA DANU FORSA PA NGUENTA UTRUS SITUASONS DIFISIL

Anne: No ciga diritu na Betel di Freetown, Sera Lioa, nunde ku ermons kuida ben di nos. Ma di repenti N kumsa ku lembra di mau kusas ku kontisi na Liberia. Kada dia N ta staba sempri ku medu di kuma un kusa di mal pudi kontisi, i N ka ta konsigi pensa di manera klaru. Tudu kusas ta sta suma un imaẑinason. Di noti, N ta korda sempri ku tirmidura i ku medu di kuma, un kusa di mal pudi kontisi. I ta seduba difisil da folgu. Paul ta peganba i ora juntu ku mi. No ta kanta kantikus di Renu te ora ku medu pasa. N pensaba di kuma N na dudu i N ka na pudi sedu mas misionariu.

Nunka N ka na diskisi ke ku kontisi dipus. Na ki mesmu semana, no risibi dus rivistas. Un seduba di No Korda! di 8 di Juñu di 1996. I teneba un artigu ku tene tema “Como lidar com a síndrome do pânico.” Dipus N ntindi ke ku staba na kontisi ku mi. Sugundu seduba Sintinela di 15 di Maiu di 1996, ku teneba un artigu ku tene tema “Como obtêm essa força?” Sintinela teneba foto di un burbuleta ku pirdi un parti di asa. Artigu komparanu ku burbuleta ku ta kontinua kume i bua, mesmu si kontra si asas dana ciu. I splika di kuma si no sta fraku pabia di mau kusas ku kontisi na no vida, Jeova pudi danu forsa pa kontinua juda utrus. Atraves des artigus, Jeova danba ke ku N pirsisa del na tempu sertu. (Mat 24:45) N buska utrus artigus ku na fala des asuntu i N junta elis na un kau. E judan ciu. Dipus di algun tempu, N para sufri di mau lembransas.

JEOVA DANU FORSA PA SETA NOBU DISIGNASON

Paul: Kada bias ku no dibi di baiba pa Liberia, no ta kontentiba dimas. Na fin di 2004 i fasi kuas 20 anu ku no staba na no disignason. Gera kababa ja. I staba na fasidu planus pa kumpu filial. Ma di repenti no risibi un nobu disignason.

Es seduba difisil dimas pa nos. No gostaba ciu di no ermons ku irmas di Liberia. E seduba suma un familia pa nos i no ka mistiba disa elis. No oja kuma ku Jeova bensuanu oca ku no disa no propi familia pa bai pa Jileadi. Pa kila, no seta nobu disignason. No mandadu pa Gana ku sta pertu Liberia.

Anne: No cora ciu oca no disa Liberia. No fikaba ku surpresa kontra Frank, un ermon di idadi i ku seduba jiru, falanu sin: “Bo dibi di diskisinu!” Dipus i splika: “No sibi di kuma nunka bo ka na diskisinu, ma bo dibi di ama bo ermons ku irmas di Gana ku tudu bo korson. Jeova ku da bos es disignason, pa kila, bo konsentra na bo ermons ku irmas di la.” Es judanu sta pruntu pa fasi nobu amigus na tera nunde ku puku jintis kunsinu, i nunde ku tudu kusas seduba nobu pa nos.

Paul: Ma i ka tarda, no kumsa ku ama no ermons ku irmas di Gana. I tenba manga di Tustumuñas di Jeova la! No aprindi ciu di fidelidadi ku fe forti di no nobu amigus. Dipus ku no fasi 13 anu na Gana, no risibi utru surpresa. No pididu pa sirbi na filial di Afrika di Lesti, na Kenia. Na bardadi, no dija mal no ermons ku irmas na Gana ku Liberia, ma no tene logu nobu amigus na Kenia. No kontinua sirbi na un tiritoriu garandi, nunde ki ten manga di nesesidadi.

KE KU NO APRINDI DI NO DIFERENTI DISIGNASONS

Anne: Pa manga di anus, N pasa situasons difisil, i utrora N ta staba ku medu garandi. Ora ku no mora na zonas pirigosu i pasa situasons difisil, kila pudi punu duensi i sta ku medu garandi. No ka ta spera pa Jeova proteẑinu des kusas. Te aos, ora ku N obi tirus, N ta sta ku dur di stomagu i ña mons ta paña kayambra. Ma N aprindi apruveita di tudu meius ku Jeova ta usa pa danu forsa, suma no ermons ku irmas. Tambi N nota di kuma ora ku no kontinua studa, ora, bai runions i prega, Jeova pudi judanu kontinua na no disignason.

Paul: Utrora, jintis ta puntanu: “Sera ki bo gosta di bo disignason?” Un tera pudi bonitu, ma i pudi tambi ka sedu stavel i sedu pirigosu. Pa kila, ke ku no mas gosta del di ki un tera? No kiridu ermons ku irmas, ku sedu no familia. Mesmu manera ku no bin di diferenti familias ku diferenti zonas, no ta pensa di mesmu manera aserka di Jeova. No pensaba di kuma no mandadu pa nkoraẑa elis, ma na bardadi i elis propi ku nkoraẑanu.

No ermondadi na mundu ntidu i un milagri ku bin di Jeova! No tene familia na mundu ntidu! Nkuantu no fasi parti di un kongregason, no ta tene un familia ku un kau nunde ku no pudi sta avontadi. No tene sertesa di kuma, si no kontinua konfia na Jeova, i na danu forsa ku no pirsisa del. — Fil 4:13.