“Guarda suguru ki unidadi ku Spiritu ta da”
Apostolu Paulu konsija kristons di Éfesu ku es palabras: “Bo nguenta n̈utru ku amor. Bo fasi forsa pa ten ligason di pas pa guarda suguru ki unidadi ku Spiritu ta da.” — Ef 4:2, 3.
“Unidadi” ku no tene, bin di “spiritu” di Deus. Es signifika di kuma i rusultadu di forsa ativu di Deus. Ma suma ku Paulu splika, i pirsis sforsu pa manti es unidadi. Ba kin ku dibi di manti es unidadi? Na bardadi, kada ermon ku irma dibi di fasi si parti pa “guarda suguru ki unidadi ku Spiritu ta da.”
Pur isemplu, imaẑina kuma algin patiu un karu nobu. Kin ku tene responsabilidadi di kuida del? I klaru ki abo. Bu ka na kulpa ki algin ku patiu karu, si kontra bu karu dana pabia bu ka kuida del.
Di mesmu manera, mesmu manera ku unidadi kriston i un prenda ku Deus danu, i kada un di nos ku tene responsabilidadi di mantil. Si no ka ta da ben ku un ermon o un irma, no pirsisa di fasi no kabesa es purgunta: ‘Sera ki N ta fasi tudu ku N pudi pa manti unidadi na kongregason?’
‘BO FASI FORSA PA I TEN UNIDADI’
Suma ku Paulu splika, utrora no pirsisa di sforsa ciu pa manti “unidadi ku Spiritu ta da.” Es pudi kontisi si un ermon o irma fasi un kusa ku denu. Sera ki sempri i pirsis papia ku algin ku yaranu pa unidadi kontinua ten? Nau, i ka tudu ora ki pirsis. Punta bu kabesa: ‘Sera ki papia ku el aserka des purblema na pui pa i ten pas, o i na buri inda mas purblema?’ Utrora i minjor pa bu purda o diskisi ki purblema. — Dit 19:11; Mar 11:25.
Punta bu kabesa: ‘Sera ki papia ku el aserka des purblema na pui pa i ten pas, o i na buri inda mas purblema?’
Apostolu Paulu fala pa no kontinua “nguenta n̈utru ku amor.” (Ef 4:2) Un livru fala kuma, es frasi pudi traduzidu tambi pa, “risibi elis suma ke sedu.” Es misti fala kuma, no rikuñisi di kuma no ermons ku irmas ta yara, suma ku anos tambi no ta yara. I bardadi di kuma, anos tudu no ta sforsa pa bisti “nobu naturesa”. (Ef 4:23, 24) Ma, nin un son di nos ka pudi bisti nobu naturesa di manera perfeitu. (Rom 3:23) Si no rikuñisi es, i na sedu mas fasil nguenta n̈utru, purda i manti “unidadi ku Spiritu ta da.”
No pudi tene “ligason di pas” na kongregason, si no ta purda i diskisi ora ku utrus yaranu. Palabra Gregu ku traduzidu pa “ligason di pas” na Efésius 4:3 traduzidu tambi pa “ligamentus” na Kolosensis 2:19. Ligamentu i un kusa forti ku ta liga os na n̈utru. Di mesmu manera, pas ku amor ku no tene pa no ermons ku irmas ta judanu kontinua tene amisadi ku elis, mesmu si utrora e ta fasi kusas ku no ka gosta del.
Ora ku un ermon o irma yaranu, o fasinu paña raiba, no dibi di sforsa pa ka oja so mau kusas ki ta fasi. (Kol 3:12) Suma anos tudu no ta yara, utrora no pudi fasi kusas ku na pui utrus fika mal. Si no lembra des, i na judanu fasi no parti pa manti “unidadi ku Spiritu ta da.”