Kuma ku bu pudi ngaba Jeova ora ku bu na purpara pa kasamenti

1-2. Kuma ku Jeova misti pa bo dia di kasamenti sedu?

SERA ki bo sta na fasi planus pa bin kasa? Si i sedu asin, bo sta di parabens! Talves bo sta okupadu dimas na fasi planus pa bo kasamenti. Jeova sta interesadu na bo kasamenti. I misti pa bo sta kontenti na dia di bo kasamentia i pa bo tene un fututu filis juntu. — Dit 5:18; Kan 3:11.

² I importanti dimas pa dia di bo kasamenti ngaba Jeova. Pabia ku no pudi fala kila? Kuma ku no pudi fasil? Es studu fasidu pa kilis ku sta na purpara pa se kasamenti. Mesmu asin, orientasons ku faladu del pudi judanu ngaba Jeova si no na mati kasamenti, o si kilis ku na kasa pidinu konsiju aserka di purparason pa dia di se kasamenti.

PABIA KU BO DIBI DI NGABA JEOVA NA DIA DI BO KASAMENTI?

3. Ke ku bo dibi di pensa nel ora ku bo na purpara pa bo kasamenti, i pabia di ke?

³ Ermons ku irmas ku sta na purpara pa kasamenti dibi di fasil konformi prinsipius ku Jeova danu na si Palabra. Pabia? Pabia i Jeova ku pui pa kasamenti ten. I el ku pui pa Adon ku Eva kasa. (Kum 1:28; 2:24) Pa kila, kilis ku sta na purpara pa bin kasa dibi di pensa na kuma ku se kasamenti na ngaba Jeova.

4. Kal utru motivu ku kilis ku sta na purpara kasamenti tene pa ngaba Jeova na dia di se kasamenti?

⁴ I tene utru motivu importanti ku pui bo dibi di pensa na kuma ku Jeova na sinti, aserka di ke ku bo na fasi na dia di bo kasamenti. El i bo Pape ku sta na seu, tambi i bo minjor amigu. (Eb 12:9) Sin duvida, bo na misti kontinua sedu si amigu. Bo ka na misti pa kualker kusa kontisi na ki dia, i nin na utru dia ku na pui pa bo amigu fika mal. (Sal 25:14) Ora ku bo pensa na tudu ke ku Jeova fasi pa bos, i na ke ki na bin fasi, bo ka konkorda di kuma i mersi ngabadu na dia di bo kasamenti? — Sal 116:12.

KUMA KU BU PUDI NGABA JEOVA?

5. Kuma ku Biblia pudi juda bos toma bon disison aserka di dia di bo kasamenti?

⁵ Biblia ka tene regra aserka di kuma ku kasamenti dibi di fasidu, i kuma ku kualker festa dibi di fasidu dipus. Pa kila, kilis ku na kasa pudi disidi ke ke na fasi na se dia di kasamenti di akordu ku se situason, se kultura ku ke ke gosta del. Ma kristons di bardadi dibi di obdisi leis di guvernu aserka di kasamenti. (Mat 22:21) Ma si kilis ku na kasa organiza se kasamenti di akordu ku prinsipius di Biblia, e na ngaba Jeova i pul pa i kontenti. Gosi, kal prinsipius ke dibi di pensa nel?

6. Pabia ki importanti pa kilis ku na kasa sigi leis di guvernu aserka di kasamenti?

⁶ Sigi leis di guvernu. (Rom 13:​1, 2) Na maioria di teras, guvernus tene leis aserka di kasamenti ku kilis ku na kasa dibi di sigi antis de kasa. Kilis ku na kasa dibi di buska sibi kal ki leis ku sta na tera nunde ke na vivi nel. Si bu pirsisa di ajuda pa tene es informason, bu pudi pidi ansions pa e judau.b

7. Kal tipu di ambienti ki bon pa un kasamenti?

⁷ Bo fasi pa i ten un bon ambienti. (1 Kor 10:​31, 32) Bo sforsa pa i ten un ambienti ku na mostra frutu di spiritu di Deus, en ves di spiritu di mundu. (Gal 5:​19-26) Suma noivu ku na bin sedu ŝef di familia, i pirsisa di tene sertesa di kuma, tudu ke ku na fasidu antis i na dia di si kasamenti, na sedu mumentu filis i ku na ngaba nomi di Jeova. Ke ku pudi juda pa es dia sedu asin? Diskursu di kasamenti basiadu na Biblia ku fasidu ku rispitu i ku amor, ta juda tudu kilis ku na obil pa e ntindi di kuma, kasamenti i un prenda ku bin di Jeova. I na juda tambi kilis ku mati pa e oja di kuma, kasamenti i un dia importanti. Pa kila, maioria di jintis ku na purpara pa kasa, ta disidi pa diskursu fasidu na Salon di Renu, si pusivel. Si bu misti usa Salon di Renu pa bu dia di kasamenti, bu dibi di skirbi un karta sedu, pa pidi korpu di ansions di un di kongregasons ku ta usa Salon di Renu.

8. Si bo na fasi festa di kasamenti, kuma ku bo pudi tene sertesa di kuma i na ngaba Jeova? (Romanus 13:13)

⁸ Lei Romanus 13:13. Si bo disidi pa i ten festa di kasamenti, ke ku bo pudi fasi pa i ka ten spiritu di mundu? Palabra gregu ku traduzidu pa “wukesa” na Biblia di kriol, na trata di festas di mampasada. Na ki festas jintis ta cami ciu, tambi e ta pui musika altu te altas ora. (Jubi “festas descontroladas” na nota di studu ku sta na Romanus 13:13.) Si bo disidi pa i sirbidu bibidas alkoliku, bo pensa antis na ke ku bo pudi fasi, i tene sertesa di kuma ningin ka na bibi ciu.c Si i ten musika, bo fasi pa volumi ka sedu altu dimas, pa kilis ku kumbidadu pudi papia ku n̈utru. Bo kuji ku kuidadu musikas ku na tokadu, i bo jubi letras di musikas pa ka ningin fika mal.

9. Ke ku kilis ku na kasa dibi di lembra del, aserka di da utrus palabra, o divirtimentu ke na tene na se festa?

⁹ Sera ki i na ten jintis ku na papia algun kusa, fotos ku na mostradu, videos o utru tipu di divirtimentu na bo festa di kasamenti? Manga di bias es kusas pudi pui pa dia torna spesial. Ma, tene sertesa di kuma ke ku na mostradu na sedu nkoraẑanti. (Fil 4:8) Punta bu kabesa: ‘Sera ki kila na mostra rispitu pa utrus? Sera ki i na mostra rispitu pa kasamenti?’ Mas importanti inda: ‘Sera ki i na ngaba Jeova?’ I ka mal pa un algin fala un kusa ku na pui utrus ri, ma i ka dibi di fala nada susu ku na pui utrus pensa na seksu. (Ef 5:3) Si bo familia ku amigus na papia algun kusa, bo tene sertesa di kuma e ntindi kal tipu di kusas ku bo misti pa e papia.

10. Pabia ku kilis ku na kasa ka dibi di da manga di atenson pa se kabesa ora ke na purpara pa se dia di kasamenti? (1 Jon 2:​15-17)

¹⁰ Ka bo coma manga di atenson pa bo kabesa. (Lei 1 Jon 2:​15-17.) Jeova ta kontenti ora ku si servus buska ngabal, en ves di coma manga di atenson pa se kabesa. Kristons ka ta coma manga di atenson pa se kabesa, e ta ivita gasta manga di diñeru, i e ta ivita tene “vida di ronku.” Kal benefisiu ku bo na tene si bo buska fasi un kasamenti simplis? Talves dia di bo kasamenti na sedu suma di Mike, un ermon di Noruega. I fala sin: “No ivita dibidas i no kontinua sedu pioneru. No kasamenti seduba simplis, ma i bonitu, tambi no teneba bon lembransas.” Tabitha, un irma di India, fala sin: “No ivita manga di kudadi. Manera ku no fasi un kasamenti simplis, no ka teneba manga di kusas di purpara. Tambi no ivita manga di kusas ku no familia pudi ka konkordaba ku el.”

11. Kuma ku noivu ku noiva ta ivita coma manga di atenson pa se kabesa, na se manera di bisti ku se aparensia? (Jubi tambi fotos.)

¹¹ Bo disidi ja ke ku bo na bisti? Na bardadi bo misti sta bonitu. Mesmu na tempu ku Biblia skirbidu, noivu ku noiva ta kuidaba ciu di kuma ke na bisti. (Isa 61:10) Ke ku bo na bisti na dia di bo kasamenti pudi sedu un bokadu diferenti ku ke ku bo ta bisti na utrus mumentus. Ma bo ka dibi di bisti di un manera ku na pui pa utrus fika mal. (1 Tim 2:9) Bo konsentra mas na kusas ku na ngaba Jeova na dia di bo kasamenti di ki na ke ku bo na bisti. — 1 Ped 3:​3, 4.

12. Pabia ku kilis ku na kasa dibi di ivita kualker kusa ku sta kontra Biblia ku jintis ta fasi na mumentu di kasamenti?

¹² Bo nega kusas ku jintis ta fasi ku sta kontra Biblia. (Apok 18:4) Na mundu di aos, manga di jintis ta fasi kusas na dia di kasamenti ku sta ligadu ku riliẑion falsu, spiritismu ku ideias falsu. Jeova avisanu di manera klaru pa no lunjusi des kusas susu. (2 Kor 6:​14-17) Si ten kusas ku jintis ta fasi na bo zona, ma bo ka tene sertesa di kuma Jeova misti pa no fasil, bo fasi piskisa pa tene informason i pa oja prinsipius di Biblia ku na juda bos toma bon disison.

13. Kuma ku kilis ku na kasa pudi kopia Jeova ora ke na risibi prendas?

¹³ Sera ki nunde ku bo mora, kumbidadus kustuma da prenda pa kilis ku na kasa? Tipu di prenda ku alguns kumbidadu na da pudi dipindi di diñeru ke tene. Na bardadi, kristons nkoraẑadu pa da, i kila ta fasi elis sinti filis. (Dit 11:25; At 20:35) Ma no ka misti pa no kumbidadus sinti di kuma e obrigadu da. Nin no ka misti fasi elis sinti di kuma ke ke da ka tene balur pabia i ka karu. No ta kopia Jeova ora ku no kontenti ku kualker prenda ku jintis da. I ka pabia e obrigadu dal, ma pabia e dal di korson. — 2 Kor 9:7.

KUSAS DIFISIL KU BO PUDI IVITA I KU BO PUDI VENSI

14. Kal kusas difisil ku alguns jintis ku na kasa ta tene?

¹⁴ Bo pudi tene situasons difisil, ora ku bo na purpara pa dia di kasamenti ku na ngaba Jeova. Pur isemplu, i pudi sedu difisil fasi un kasamenti simplis. Charlie ku sta na Ilia di Salomon fala sin: “I difisil dimas disidi ba kin ku no na kumbida pa festa. No tene manga di amigus, i na no kultura tudu jintis ta misti kumbidadu!” Tabitha ku faladuba del na kumsada fala sin: Nunde ku no ta vivi, i kustuma fasidu festas garandi. I tomaba tempu pa no pape ku mame seta pa no kumbida so serka di 100 jintis.” Sarah di India fala sin: “I ten jintis ku ta da balur garandi pa diñeru ku bu tene i pa ke ku utrus ta pensa aserka di bo. Ña primus ku primas fasiba festas karu, pa kila, N sintiba preson pa fasi festa mas karu inda.” Ke ku pudi juda bos vensi es situasons ku utru situasons difisil.

15. Pabia ku orason i un kusa importanti ora ku no na purpara pa kasamenti?

¹⁵ Bo ora sempri ora ku bo na purpara pa bo dia di kasamenti. Bo pudi konta Jeova na orason kualker purblema ku bo sta na pasa, o ke ku bo sta na sinti. (Fil 4:​6, 7 ku nota di studu “em tudo”.) Bo pudi pidil pa i juda bos toma bon disisons, pa manti kalmu ora ku bo sta preokupadu dimas, i pa bo mostra koraẑen si ke ku bo disidi sedu diferenti di ke ku utrus misti pa bo fasi. (1 Ped 5:7) Bo konfiansa na Jeova na aumenta, si bo nota di kuma i ruspundi bo orasons. Tabitha ku faladuba del, fala sin: “Ami ku ña noivu no staba preokupadu, aserka di disintindimentu ku no pudiba tene ku n̈utru i ku no familias. Pa kila, kada bias ku no na papia di planus aserka di no kasamenti, no ta kumsal ku orason. Na bardadi, no sinti ajuda di Jeova, i no tene pas ku n̈utru i ku no familias.”

16-17. Kuma ku bon kumunikason ta juda, ora ku bo na purpara pa dia di bo kasamenti?

¹⁶ Bo papia ku rispitu ku n̈utru i ku bo familias. (Dit 15:22) Bo na pirsisa di toma manga di disisons aserka di dia di bo kasamenti. Bo na pirsisa di kuji data, disidi kantu ku bo na gasta, ba kin ku bo na kumbida, ku manga di utrus kusas. Antis di toma un disison, bo papia ku n̈utru, i bo papia di prinsipius di Biblia ku na aplika na kil situason. Tambi bo papia di konsijus ku bo risibi di ermons ku irmas maduru i ku sibi aplika prinsipius di Biblia di manera ekilibradu. Ora ku bo na papia ku n̈utru i ku bo familias aserka di ke ku bo gosta del, bo mostra bondadi, ekilibriu i bo adapta. Pur isemplu, si bo pape ku mame misti pa bo fasi un kusa na dia di bo kasamenti ki ka mal, bo pudi fasi ke ke pidi. Es i mumentu spesial tambi pa relis. Si bo ka na konsigi fasi ke ke pidi, bo pudi splika elis ku bondadi i ku amor, pabia ku bo ka na pudi fasil. (Kol 4:6) Bo splika di manera klaru pa bo familia di kuma, bo objetivu prinsipal i pa dia di bo kasamenti sedu un mumentu filis ku na ngaba Jeova.

¹⁷ Splika ke ku bo misti pa bo pape ku mame, pudi sedu difisil se ka sedu Tustumuñas di Jeova, ma bo pudi tene bon rusultadu. Santhosh un ermon na India fala sin: “No familia mistiba pa no fasi tradisons di Indu. Ami ku ña noiva no pasa manga di tempu na splika elis no disison. No fasi alguns mudansas nunde ku no pensa di kuma i ka na pui pa Jeova fika mal. Pur isemplu, no muda kumida ku no mistiba sirbi pa kumida ku no familia misti. Tambi no disidi pa ka kanta o baja pabia e ka kustumaba ku ki kusas.”

18. Ke ku pudi juda bos pa tene sertesa di kuma, tudu kusa na kuri diritu na dia di bo kasamenti? (1 Koríntius 14:40) (Jubi tambi foto.)

¹⁸ Bo organiza diritu. Si bo sedu ben organizadu, kila na rapati manga di preokupason na bo dia di kasamenti. (Lei 1 Koríntius 14:40.) Wayne di Taiwan, fala sin: “Puku dias antis di no kasamenti, no teneba un runion siñu ku kilis ku na judanu. No papia di kuma ku kusas na organizadu. Tambi no fasi nsaiu di kuma ku kusas na sedu na Salon di Renu, pa tudu kusas pudi kuri diritu.” Pa mostra rispitu pa kumbidadus, bo fasi tudu ku bo pudi pa rispita ora.

19. Kuma ku bo pudi tene sertesa di kuma, festa di bo kasamenti na ngaba Jeova?

¹⁹ Si bo pensa antis na ke ku pudi bin kontisi, manga di purblemas pudi ivitadu. (Dit 22:3) Pur isemplu, si bo ta vivi na un zona nunde ku kilis ku ka kumbidadu kustuma mati un festa di kasamenti, bo jubi ke ku bo pudi fasi pa kila ka kontisi. Fasi pa bo familia ku ka sedu Tustumuñas di Jeova sibi ke ku bo na spera delis, i bo splika elis kuma ku bo ta oja sertus kusas ku jintis ta fasi na dia di kasamenti. Bo pudi mostra elis artigu, “Como é que são os casamentos das Testemunhas de Jeová?” ku sta na site jw.org. Pa juda pa tudu kusas kuri diritu, bo pudi kuji un ermon maduru pa i sirbi suma diretor di festa. (Jon 2:8) Si bo splika es ermon di manera klaru kuma ku bo misti pa bo festa di kasamenti fasidu, i pudi juda pa bo festa di kasamenti ngaba Jeova i pa tudu kusas kuri suma ku bo misti.

20. Ke ku kilis ku na kasa dibi di lembra del aserka di se dia di kasamenti?

²⁰ Talves bo na tene manga di preokupason, ora ku bo na pensa na tudu kusas ku sta ligadu ku purpara bo kasamenti. Ma, bo lembra di kuma dia di bo kasamenti i so un dia. I so kumsada di un vida bonitu na sirbi Jeova juntu. Bo fasi bo minjor pa manti dia di bo kasamenti simplis i ku na ngaba Jeova. Bo konfia na Jeova. Ku si orientason, bo pudi konsigi organiza un kasamenti ku ora ku bo jubi pa tras, bo na tene lembransas bonitu i ku bo ka na ripindi. — Sal 37:​3, 4.