Ke ku signifika sedu un kriston? — Ke ku Biblia fala?

Aos, manga di jintis ta fala di kuma e sedu kriston, ma, e ta trata utrus mal. Alguns sedu disonestu o e mau. Utrus ka ta sedu fiel ku se parseru. Se komportamentu ta leba alguns jintis na punta: ‘Ke na bardadi ku signifika sedu un kriston?’

Na bardadi, ke ku signifika sedu un kriston

I fasil algin fala kuma el i kriston. Sedu kriston nvolvi manga di utrus kusas. Di akordu ku Biblia, un kriston i algin ku sedu disipulu di Jesus Kristu. (At 11:26) Jesus fala sin: “Si bo kontinua na ña palabra, bo ta sedu ña disipulus na bardadi.” (Jon 8:31) I bardadi, no ka pudi obdisi ke ku Jesus fala di manera perfeitu. Ma, kristons dibi di aplika nsinus di Jesus i mostral na se vida di kada dia. No jubi alguns isemplus.

Kristons ta mostra amor di bardadi pa utrus

Ke ku Jesus fala: “N na da bos mandamentu nobu, pa bo ama n̈utru; suma ku N ama bos, asin tambi ku bo ta ama n̈utru. Si bo ama n̈utru, tudu jinti ta rapara kuma abos i ña disipulus.” — Jon 13:34, 35.

Ke ku Jesus fasi: Jesus mostra amor di bardadi pa tudu jintis, i ka mporta kantu diñeru o fama ke tene, o di nunde ke bin. I kura duentis, i da di kume pa kilis ku tene fomi, te mesmu i da si vida pa utrus. — Mateus 14:14-21; 20:28.

Kuma ku kristons dibi di komporta: Kristons ta mostra amor di bardadi ora ke ta pati utrus. E ka ta fasi skuju di jintis, tambi e ta purda. E ta juda kilis ku tene difikuldadis, i e ta sta pruntu pa fasi sakrifisius pa utrus. — 1 Jon 3:16.

Kristons ta sedu onestu

Ke ku Jesus fala: “Ami i bardadi.” — Jon 14:6.

Ke ku Jesus fasi: Jesus sedu onestu na tudu ke ki fala i fasi. Nunka i ka tenta manipula o ngana jintis. I kunsidu suma algin onestu, mesmu si kila na tisil purblema. — Mateus 22:16; 26:63-67.

Kuma ku kristons dibi di komporta: Kristons ka ta konta mintida. E ta paga se mpustu, e ka ta furta, e ta tarbaja duru pa tudu tempu ke ta pagadu pa rel. (Romanus 13:5-7; Efésius 4:28) E ka ta ngana utrus pa se propi interesis, e ka ta fasi kabula na provas, nin e ka ta da informasons falsu na se dukumentu di pididu di tarbaju. — Ebreus 13:18.

Kristons ta sedu bondosu ku utrus

Ke ku Jesus fala: “Bo bin pa mi, abos tudu ku kansa ku kargu pisadu; N na diskansa bos. Bo toma ña kanga pa bos, bo nsina di mi, pabia ami i mansu, umildi di korson; bo ta bin oca diskansu pa bo alma, pabia ña kanga i sabi, ña kargu i lebi.” — Mateus 11:28-30.

Ke ku Jesus fasi: Jesus sedu bon ku utrus, i manga di jintis ta sinti ben pertu del. I risibi mininus diritu, i konsola kilis ku sta disanimadu, tambi i trata utrus ku rispitu. — Markus 10:13-15; Lukas 9:11.

Kuma ku kristons dibi di komporta: Kristons ta papia ku bondadi i e ka ta sedu brabu o duru dimas ku utrus. (Efésius 4:29, 31, 32) E ta mostra interesi na utrus i e ta buska oportunidadi di juda elis. — Gálatas 6:10.

Kristons ta kontinua sedu fiel pa se parseru

Ke ku Jesus fala: “E ku manda kil ku Deus junta, omi ka dibi di rapatil.” — Markus 10:9.

Ke ku Jesus fasi: Apesar di kuma Jesus nunka i kasa, i nkoraẑa kilis ku kasa pa e sedu fiel pa n̈utru. (Mateus 19:9) I alerta aserka di kusas ku pudi pui un algin kumiti adulteriu i ku pudi dana amisadi ke tene ku n̈utru. — Mateus 5:28.

Kuma ku kristons dibi di komporta: Kristons ta ivita kualker komportamentu ku ta mostra falta di rispitu pa se kasamenti. (Ebreus 13:4) Omi ku minjer ta trata n̈utru ku amor i ku rispitu. — Efésius 5:28, 33.