Objetivus i suma un planta di kasa, ku sforsu bu pudi tornal na un realidadi
PA JOVENS
12 Objetivus
KE KI SIGNIFIKA
Un objetivu, i mas di ki so un suñu o un kusa ku bu ta misti pa i akontisi. Objetivu di bardadi i nvolvi fasi planu, sedu fleksivel, i sforsa pa yangasal.
I ten diferentis tipu di objetivus, objetivus ku bu pudi yangasa dentru di dias o semanas, objetivus ku bu pudi yangasa dentru di misis, ku objetivus ku bu pudi yangasa dentru di un anu o mas. Objetivu di longu prazu, pudi divididu na objetivus mas pikininu.
PABIA KI IMPORTANTI
Yangasa bu objetivus pudi omenta bu konfiansa, fortalisi bu amizadis, i omenta bu kontentamentu.
Tene konfiansa na bu kabesa: Ora ku bu fiksa objetivus pikininu i bu yangasa elis, bu na tene konfiansa di fiksa objetivus mas garandi. Tambi bu na tene mas konfiansa, ora ku bu na nfrenta purblemas di kada dia — suma manti firmi dianti di preson di kolegas.
Amizadis: Jintis gosta di sta pertu di kilis ku tene objetivu na vida, ku sedu, kilis ku sibi ke ke misti, i e ta sforsa pa yangasal. Ma, un di minjoris manera di fortalisi un amizadi, i tarbaja juntu pa yangasa mesmu objetivu.
Kontentamentu: Ora ku bu fiksa objetivus i bu yangasa elis, bu ta kontenti di sibi di kuma bu fasi algun kusa.
“N gosta di tene objetivus. I ta mantin okupadu, tambi N ta tene algun kusa di sforsa pa yangasa. I ora ku bu yangasa un objetivu bu ta sinti ben. Bu ta jubi pa tras bu fala: ‘Wau, N konsigi fasi es! N konsigi fasi ke ku N planiaba.’ ” — Christopher.
PRINSIPIU DI BIBLIA: “Kil ku na oja pa bentu, nunka i ka na sumia; kil ku na jubi nuvens, nunka i ka na kebra.” — Eklesiastis 11:4.
KE KU BU PUDI FASI
Sigi es pasus pa pudi fiksa i yangasa bu objetivus.
Identifika objetivus. Fasi lista di objetivus ku bu misti yangasa, i organiza elis konformi prioridadi. Kuji kal ku bu misti tarbaja purmeru, sugundu, terseru i asin pa dianti.
Fasi planu. Pa kada objetivu, fasi es ku faladu li:
Fiksa un data ku bu na pudi yangasa bu objetivu.
Fasi planu di kusas ku na judau yangasal.
Pensa na obstakulus ku bu pudi bin tene, i pensa na kuma ku bu pudi vensi elis.
Aẑi. Ka bu pera te ora ku bu tene tudu ditalis prontu, pa bu kumsa. Punta bu kabesa: ‘Kal ki purmeru kusa ku N pirsisa di fasi, pa yangasa ña objetivu?’ Dipus fasil. Toma nota di bu progresu, konformi bu na da kada pasu.
PRINSIPIU DI BIBLIA: “Algin ku fasi planu ku kudadi, i tarbaja diritu, i na tene ciu”. — Ditus 21:5.