Bu misti sibi respostas des purguntas?

KAL purguntas? Alguns di purguntas mas importanti ki jintis fasi ja. Talves bu fasi ja es purguntas:

• Sera ki Deus na bardadi ta preokupa ku nos?

• Sera ki un dia gera ku sufrimentu na bin kaba?

• Ke ku ta pasa ku nos ora ki no muri?

• Sera ki jintis ki muri pudi bin vivi un dia?

• Kuma ki n pudi fasi orason i obidu pa Deus?

• Kuma ki n pudi sta sabi na vida?

Nunde ki bu na bai buska respostas des purguntas? Si bu bai na biblioteka o kau di bindi librus, talves bu na oja manga i manga di librus ki ta afirma da resposta des purguntas ki sta riba. Ma, manga di bias, un libru ta fala un kusa, utru ta fala kontra. Na mumentu utrus ta parsi bon, ma i ka ta tarda e ta pasa prazu i dipus e ta mudadu o trokadu.

Ma, i ten un libru ku tene respostas di konfiansa. I un libru ki sempri ta konta bardadi. Jesus Kristu fala Deus na un orason: “Bu palabra i bardadi.” (Jon 17:17) Aos no sibi kuma kil palabra i Biblia Sagradu. Gosi, no na bin oja na puku palabras, kuma ki Biblia ruspundi es purguntas ki fasidu riba. Es respostas i klaru i sertu.

Sera ki Deus na bardadi ta preokupa ku nos?

RASON DES PURGUNTA: No sta na vivi na un mundu ki inci di maldadi i injustisa. Manga di riliẑions ta fala kuma sufrimentu ki no ta pasa i vontadi di Deus.

ES KI BIBLIA FALA: Deus nunka fasi ke ki mau. Biblia fala na Jo 34:10 ki: “ Fasi mal i lunju di Deus. Fasi kusa injustu i lunju di kil ku ten tudu puder.” Ke ku Deus misti pa pekaduris i bon i ta mostra ki i ama elis. I pabia di kila ki Jesus sinanu pa ora asin: “No Pape ku sta na seu, . . . pa bu renu bin, pa bu vontadi fasidu na tera suma na seu.” (Mateus 6:9, 10) Deus amanu ciu, kila lebal na fasi ke ki kustal ciu, pa pudi kumpri sin falta ke ki i misti. — Jon 3:16.

Lei tambi Kumsada 1:26-28; Tiagu 1:13 i 1 Pedru 5:6, 7.

Sera ki un dia gera ku sufrimentu na bin kaba?

RASON DES PURGUNTA: Gera kontinua na mata manga i manga di jintis. Anos tudu no sinti ja tokadu pa sufrimentu ki na pasa na mundu.

ES KI BIBLIA FALA: Deus fala di un tempu nunde ki i na bin pui susegu na tudu tera. Bas di si Renu ki sedu un guvernu di seu, jintis ka na “nsina mas gera.” Ma e na “bidanta se spadas radis.” (Isaias 2:4) Deus na bin kaba ku tudu injustisa ku sufrimentu. Biblia fasi es promesa: “[Deus] na limpa tudu larma na se uju. Mortu ka na ten mas, nin tristesa, nin cur, nin dur, pabia purmeru kusas [inkluindu injustisa ku sufrimentu di aos] pasa ja.” — Apokalipsi 21:3, 4.

Lei tambi Salmu 37:10, 11; 46:9 i Mikeias 4:1-4.

Ke ku ta pasa ku nos ora ki no muri?

RASON DES PURGUNTA: Maioria di riliẑions di mundu ta sina ki ora ki algin muri, i ten un kusa dentru del ku ta kontinua vivi. Alguns ta fia ki jintis ki muri pudi fasi bibus mal o Deus ta kastiga maus, kondena elis pa sempri na un nfernu di fugu.

ES KI BIBLIA FALA: Ora ki algin muri, i ta disa di izisti. “Kilis ku muri ja . . . ka sibi nada,” asin ki Eklesiastis 9:5 fala. Suma jintis ki muri ka pudi sibi nada, sinti nada o pasa algun kusa, e ka pudi fasi mal — o juda — bibus. — Salmu 146:3, 4.

Lei tambi Kumsada 3:19 i Eklesiastis 9:6, 10.

Sera ki jintis ki muri pudi bin vivi un dia?

RASON DES PURGUNTA: Anos no misti vivi i goza vida ku kilis ki no gosta del. Asin i normal tene saudadi di oja di nobu kilis ki no gosta del, ki muri ja.

ES KI BIBLIA FALA: Maioria di jintis ki muri ja na bin lantandadu. Jesus pirmiti ki “mortus ku nteradu na . . . sai na koba.” (Jon 5:28, 29) Suma ki Deus mistiba na kumsada, kilis ki lantandadu ku kurpu umanu na bin pudi vivi na paraisu li na tera. (Lukas 23:43) Vida ku ka ta kaba sin kualker duensa fasi parti des promesa di Deus pa kilis ku ta obil. Biblia fala asin: “Justus na yarda ki tera, e na mora nel pa sempri.” — Salmu 37:29.

Lei tambi Jo 14:14, 15; Lukas 7:11-17 i Atus 24:15.

Kuma ki n pudi fasi orason i obidu pa Deus?

RASON DES PURGUNTA: Kuas na tudu riliẑions jintis ta ora. Ma, pa manga delis se orasons ta parsi ki i ka rispundidu.

ES KI BIBLIA FALA: Jesus sinanu pa ka ripiti mesmu orasons ku mesmu palabras. I fala: “Si bo na ora, ka bo ripiti palabra ciu [ripiti i ripiti mesmu palabras, NM].” (Mateus 6:7) Si no misti pa Deus obi no orasons, no dibidi ora di manera ki el i misti. Pa fasi kila, i pirsis pa no aprindi kal ki vontadi di Deus i ora di akordu ku si vontadi. Purmeru di Jon 5:14 fala: “Si no pidi un kusa na . . . vontadi [di Deus], i na obinu.”

Lei tambi Salmu 65:2; Jon 14:6, 14 i 1 Jon 3:22.

Kuma ki n pudi sta sabi na vida?

RASON DES PURGUNTA: Manga di jintis ta fia ki diñeru, fama, o bunitasku na pui elis sta sabi. Pa kila, e ta kuri tras des kusas. Pa fin, e ta bin oja ki e ka sta sabi.

ES KI BIBLIA FALA: Jesus mostra ke ki no dibidi fasi pa sta sabi oca i fala asin: “Filis i kilis ki sibi ki e pirsisa di kusas spiritual.” (Mateus 5:3, NM) Sabura di bardadi pudi ojadu so si no fasi ke ki pirsis pa satisfasi ke ku no mas pirsisa del—ki sedu no diseẑu di kunsi Deus i ke ki manda i kumpunu. Es bardadi sta na Biblia. Kunsi es bardadi pudi judanu sibi ke ki na bardadi i importanti i ku ka importanti. Si no disa pa bardadi ki sta na Biblia gia no disisons i asons, no vida na tene mas sintidu. — Lukas 11:28.

Lei tambi Ditus 3:5, 6, 13-18 i 1 Timótiu 6:9, 10.

Gosi, no kaba di oja na puku palabras respostas di Biblia pa seis purguntas. Bu misti sibi mas di ki es? Si bu fasi parti di “kilis ki sibi ki e pirsisa di kusas spiritual”, i klaru ki bu na misti sibi mas. Talves bu tene utrus purguntas suma esis: ‘Si Deus ta preokupa ku nos, pabia di ke ku manda i disa tudu es maldadi ku sufrimentu na mundu, desdi tempu antigu te gosi? Kuma ki n pudi fasi pa ña familia sta mas diritu?’ Biblia da bon respostas i kompletu pa es purguntas i manga di utrus purguntas tambi.

Ma, manga di jintis aos ta sta ku duvida pa studa Biblia. E ta ojal suma un libru ki tene ciu kusas di lei i talves difisil di ntindi. Bu misti pa bu judadu oja respostas ki sta na Biblia? Tustumuñas di Jeova tene dus manera ki pudi judau.

Purmeru, i libru ku tene es titulu: Ke ki Biblia Na Bardadi ta Sina? i fasidu pa juda jintis okupadu oja respostas klaru di Biblia pa purguntas importanti dimas. Sugundu manera i un programa di studu di Biblia na kasa, sin paga nada. Un di Tustumuñas di Jeova ki mora pertu di bo i ki pudi sina Biblia pudi bin bu kasa o utru kau ku bu misti kada semana, pa pudi papia ku bo un bokadu di tempu aserka di Biblia sin bu pididu paga nada. Milions di jintis na mundu benefisia ja des programa di studu di Biblia. Manga delis pa fin kaba pa fala ku kontentamentu garandi: “Gosi n oja bardadi!”

I ka ten rikesa mas garandi ki no pudi oja. Bardadi di Biblia ta libertanu di nsinamentus ki ta fasi jintis vivi na medu, libertanu tambi di konfuson i di vivi na preokupason garandi dimas. I ta danu speransa, kontentamentu, i pui no vida tene sintidu. Jesus fala: “Bo ta kunsi bardadi; bardadi ta liberta bos.” — Jon 8:32.