Ke ki fe di bardadi?

TENE fe di bardadi i mas di ki so fia di kuma Deus ten. I ten milyons di jintis ki fia na Deus, ma e ta fasi mau kusas ku diskarna. Ki “fe” i suma diñeru falsu. I ta parsi diñeru di bardadi, ma sin balur. Asin, purgunta i es: Ke ki fe di bardadi?

Fe di bardadi ta basia na kunsi diritu Palabra di Deus. Si Palabra ta kontanu bardadi aserka del, i ta judanu pa no kunsil. Tambi i ta judanu kunsi si leis, ke ki misti, ku kusas ki sina. Ali sertus kusas ki sina:

• Deus i un son. I ka ten kumpañer.

• Jesus i ka Deus Tudu Puderosu. El i profeta di Deus.

• Deus kondena tudu koldadi di usu di imaẑens pa adoral.

• Dia di julgamentu na bin riba di pekaduris.

• Manga di jintis ku muri na bin lanta pa vivi na Paraisu.

Fe di bardadi ta punu fasi bon obras. Es obras ta ngaba Deus tambi i pudi tisi bon kusas pa nos i pa utrus. Ali alguns des bon obras:

• adora Deus.

• tene kualidadis ki Deus misti pa no tene — purmeru delis, amor.

• nega maus pensamentus ku maus diseẑus.

• kontinua tene fe na Deus, mesmu ku purblemas i ku difikuldadis.

• sina utrus aserka di Deus.

Kuma ku bu pudi torna bu fe di bardadi mas forti?

Pidi Deus pa i judau. Profeta Moises pidi Deus es: “Fasin kunsi bu kamiñu. Asin N ta kunsiu, pa N pudi kontinua oca fabur na bu uju.”a Deus obi orason di Moises, dipus i dal rasposta. Moises bin torna un isemplu garandi di fe. Di mesmu manera Deus na judau tambi pa bu omenta fe di bardadi.

Ranja tempu pa studa Palabra di Deus. Livrus sagradu: Tora, Salmus, ku Ivanjelius fasi parti di Biblia. Livru ku mas traduzidu i ku mas distribuidu na mundu ntidu. Sera ki bu tene alguns des livrus?

Aplika konsiju di Palabra di Deus kada dia na bu vida. Fe i suma no kurpu. I mas ta kirsi ora ki bu na pratikal. Mas ki bu na vivi sugundu Palabra di Deus, bu fe ta sedu mas forti. Asin, bu na bin oja ki konsiju di Deus bali pena. Na bardadi konsijus ku sta na Palabra di Deus minjoria ja manga di vidas. Kontinua lei pa oja alguns isemplus.