Mostra di kuma bu tene fe di bardadi!

DEUS alerta si servus di kuma se fe na testadu. Si Palabra fala sin: “Bo sedu jiru, pabia bo inimigu, ku sedu diabu, i na yanda na bo roda, suma lion ku na somna, i na buska kil ki pudi nguli.” (1 Pedru 5:8) Kuma ku Satanas ta tenta kaba ku bu fe?

Satanas pudi usa utru jintis, te mesmu jintis ku gosta di bo, pa presionau pa bu para studa Palabra di Deus. E ku manda Jesus falaba sin: “Inimigu di algin i ta sedu si propi familia.” (Mateus 10:36) Parentis ku amigus pudi ka sibi aserka di bardadi garandi ki sta na Palabra di Deus. O talves e pudi tene medu di ke ku utrus na pensa. Ma Palabra di Deus fala sin: “Medu ku algin ten pa omi i na sedu si armadilia, ma kin ku fiansa na SIÑOR i sta suguru.” (Ditus 29:25) Si bu para studa Palabra di Deus so pa pudi kontenta pekadur, bu pensa Deus na kontenti? Nau. I ka na kontenti! Pa utru ladu, si no mostra fe di bardadi, Deus na judanu. “Anos i ka kilis ku rakua pa distruison, ma kilis ku tene fe, pa ngaña salbason.” — Ebreus 10:39, NM.

Lembra di ke ku pasa ku Dumas ku faladu del na kumsada des livru. Si minjer ta gozalba pabia di si fe. Ma dipus i bin junta ku el na studa Palabra di Deus. Di mesmu manera, si bu kontinua na fasi ke ki sertu, bu pudi pui pa bu amigus ku parentis fasi mesmu kusa. Manga di bias, un parenti pudi ‘ngañadu sin palabra, pa . . . bon komportamentu ku rispitu pa Deus’ di parti di kin ku ta mostra fe di bardadi. — 1 Pedru 3:1, 2.

Tambi Satanas ta tenta fasi jintis pensa kuma e ka tene tempu pa studa Palabra di Deus. I misti pa purblemas di vida suma kudadi, preokupason ku diñeru “perta palabra [di Deus],” pa bu fe ka “padi” o ka da frutu. (Markus 4:19) Ka bu seta tene es tipu di pensamentu sin sintidu! Palabra di Deus fala sin: “Vida ku ka ta kaba i es: Pa tudu jinti kunsiu, abo son, uniku Deus di bardadi, ku Jesus Kristu, kil ku bu manda.” (Jon 17:3) Na bardadi, i pirsis kontinua aprindi aserka di Deus ku Jesus, Mesias, pa ngaña vida ku ka ta kaba na Paraisu!

Pensa na Moises, algin ku fasiba parti di familia di rei di Ejitu. I pudiba pega tras di rikesa, fama ku puder. Ma, Moises kuji “pa sufri maltratu juntu ku pobu di Deus, te pa i goza puku tempu di sabura di pekadu.” Pabia? “I fika firmi suma kin ku na oja Deus ku ka ta ojadu.” (Ebreus 11:24, 25, 27) Na bardadi, Moises tene fe forti na Deus. I pui interes di Deus dianti di buska so kusas ki na kontental. I Deus bensual ciu. Si bu fasi mesmu kusa, Deus na bensuau tambi.

Satanas pudi tenta atakau di manga di manera. Ma i ka signifika kuma bu ka pudi fasi nada kontra el. Palabra di Deus falanu asin: “Bo firma kontra diabu; i ta kuri di bos.” (Tiagu 4:7) Kuma ku bu pudi firma kontra el?

Kontinua studa Palabra di Deus. Lei Palabra di Deus kada dia. Studa si nsinus. Vivi sugundu si konsijus. Si bu fasi kila, bu na “bisti tudu armadura di Deus,” ki pudi judau nguenta atakis di Satanas. — Efésius 6:13.

Junta ku jintis ku tene fe di bardadi. Buska jinti ku ta lei, ku ta studa i vivi sugundu Palabra di Deus. Es jintis ta ‘pensa na n̈utru, pa disperta n̈utru pa mostra amor, pa fasi bon tarbaju. . . . E ta anima n̈utru.’ E na judau kirsi na fe. — Ebreus 10:24, 25.

Pertusi di Jeova. Pidi Deus pa i judau, i konfia nel. Ka bu diskisi nunka, Deus misti judau. “Bo pui tudu bo kudadi riba [di Deus], pabia i ta toma konta di bos.” (1 Pedru 5:6, 7) “Deus i fiel; i ka na disa pa bo tentadu mas di ki kil ku bo pudi ku el; na ora di tentason i ta da tambi manera di kapli, pa bo pudi nguental.” —1 Koríntius 10:13.

Satanas ta njuti Deus. I fala kuma ningin ka pudi kontinua na sirbi Deus si sta na pasa manga di purblemas. Ma abo bu tene opurtunidadi di mostra ki Satanas i muntrus! Deus fala sin: “Sedu jiru, bu pun pa N kontenti, pa N pudi sibi ruspundi kil ku njutin.” (Ditus 27:11) Disidi mostra di kuma bu tene fe di bardadi!