Fe di bardadi ta da filisidadi ku ka ta kaba

PALABRA di Deus fala: “Omi justu i na vivi pabia di si fe.” (Romanus 1:17) Es palabras tene un purmesa animadur pa bo. Di kal manera?

Dipus ki kumpri si tarbaju li na tera, Jesus, ki sedu Mesias, bai pa seu pa sta juntu ku Deus. Nkuantu si disipulus staba na jubi, i “lebadu pa riba; nuven kontra ku el, i kubril di se uju.” (Atus 1:9) Na seu, Deus pui pa i sedu un Rei puderosu. I ka na tarda, Jesus, “fiju di omi,” na bin “na si gloria, ku tudu anjus, i na sinta na tronu di si gloria. Tudu nasons na juntadu si dianti; i na rapati elis na dus grupu suma ku bakiadur ta rapati karnel ku kabra.” (Mateus 25:31, 32) Kal tempu kes na bin sedu?

Palabra di Deus falaba di un tempu nunde ki na bin ten manga di purblemas na mundu. I kila na sedu un sinal ki na mostra ki julgamentu ki Mesias na bin fasi sta pertu. Jesus splika kuma ku kil sinal na sedu: “Nason na lanta kontra utru nason, renu kontra utru renu. Na manga di lugar con na tirmi ku forsa, fomi na ten, duensa na laga. I na ten tambi kusas meduñu ku na bin ojadu.” — Lukas 21:7, 10, 11.

Aos, no sta na oja klaru kuma ki palabra di Jesus sta na kumpri. I ka na tarda, Jesus na bin kaba ku jintis mau. Pa fin, te mesmu Satanas na bin kabadu kel! Tudu ladu di tera na bin tornadu paraisu. Tudu jintis na bin vivi na pas ku n̈utru, te mesmu ku limarias. “Lubu na mora juntu ku fiju di karnel, leopardu na dita juntu ku kabritu, fijus di baka ku di lion e na yanda, e kume juntu; mininu pikininu na bakia elis.” (Isaias 11:6). “Nin un algin . . . ka na fala kuma i sta duenti . . . Na ki tempu ujus di segu na yabridu; orejas di surdu na disintupidu.” (Isaias 33:24; 35:5) Te mesmu kilis ku muri na lantandadu. “Deus na limpa larma di tudu uju.” I “mortu ka na ten mas, nin tristesa, nin cur, nin dur.” (Isaias 25:8; Apokalipsi 21:4) Ke ki Deus mistiba pa tera, na bin kumpri. Es i un speransa garandi!

Kontinua kirsi na fe

Kal tipu di jintis ki Deus na bin pui pa e vivi na Paraisu? Jintis ku tene fe di bardadi!

Lembra di kuma fe di bardadi ta basia na kuñisimentu koretu di Palabra di Deus. Kontinua kunsi mas inda Deus ku Jesus!

Fe di bardadi ta apoiadu ku bon obras. Palabra di Deus fala: “Fe, si i ka mostra na obras, i sta mortu.” (Tiagu 2:26) Si bu kontinua na fasi bon obras, bu na kopia kualidadis bonitu di Deus ki sedu puder, justisa, jiresa ku amor. Kontinua sforsa na mostra es kualidadis di Deus!

Si bu mostra fe di bardadi, bu na ngaña ciu. Fe di bardadi na pui pa bu tene un vida filis — disna di gos te na futuru ku ka na kaba!