Mostra fe di bardadi aos

MANGA di jintis aos ta fala ki e tene fe. Ma Jesus sina kuma so puku jintis ku tene fe di bardadi. I fala: “Porton i largu, kamiñu i garandi ku ta bai pa pirdison; manga di jinti ta yentra nel. Ma porton i pikininu, kamiñu i pertadu ku ta bai pa vida; puku jintis ku ta ocal.” — Mateus 7:13, 14.

Kuma ki jintis ta mostra kuma e tene fe di bardadi aos? Jesus fala: “Bo ta rapara elis pa se frutu. . . . Tudu arvuri bon ta da bon fruta; tudu arvuri ku ka bali ta da fruta ku ka bali.” (Mateus 7:16, 17) Asin, fe di bardadi ta da “bon fruta.” I ta pui jintis mostra kualidadis ki Deus misti pa no tene. Kuma ke ta mostra ki kualidadis?

Usa forsa na bon manera

Jintis ku tene fe di bardadi ta usa forsa ku otridadi ke tene pa ngaba Deus, i tambi pa fasi ben pa utrus. Jesus fala sin: “Kil ku misti sedu garandi na bos, el i na sedu bo kriadu.” (Markus 10:43) Asin, omis ku tene fe di bardadi, ka ta trata utrus di manera duru; nin na kasa, nin fora di kasa. E ta da se minjer balur, e ta rispita elis, i e ta kuida delis ku amor. Palabra di Deus fala es: “Abos omis, bo ama bo minjeris; ka bo sedu brabu pa elis.” (Kolosensis 3:19) Palabra di Deus fala mas asin: “Di mesmu manera, abos omis, bo yanda ku bo minjeris na ntindimentu, bo rispita elis pabia se kurpu i mas fraku, tambi pabia bo ten parti juntu na vida ku Deus da bos. Bo fasi asin pa ka nada taja bo orason dianti di Deus.” — 1 Pedru 3:7.

Pa si ladu tambi, minjer ku tene fe di bardadi “dibi di rispita si omi.” (Efésius 5:33) E dibi di “ama se omis, ku se fijus.” (Titu 2:4) Pape ku mame ku tene fe di bardadi ta pasa tempu ku se fijus pa sina elis leis i orientasons di Deus. Pape ku mame, ta trata utrus ku dignidadi i ku rispitu na kasa, na kau di tarbaju, i na kualker lugar. E ta sigi konsiju di Palabra di Deus ki fala sin: “Bo da n̈utru purmeru lugar ku rispitu.” — Romanus 12:10.

Servus di Deus ta obdisi es leis di Deus ki fala: “Ka bu toma suku di bas.” (Saida 23:8) E ka ta abusa di kargu ke tene so pa se interes. Ma pa kontrariu, e ta buska manera di juda utrus, ma purmeru e ta juda kilis ku mas pirsisa. Tambi e ta obdisi es konsiju ku fala: “Ka bo diskisi di fasi ben, bo rapati ku utrus kil ku bo tene, pabia i e koldadi sakrifisiu ku Deus ta kontenti ku el.” (Ebreus 13:16) Asin, servus di Deus ta sinti bardadi di palabras di Jesus ku fala sin: “I mas minjor da di ki bo risibi.” — Atus 20:35.

Sigi leis justus di Deus

Jintis di fe ta obdisi leis di Deus ku bon vontadi. Pa elis “si mandamentus gora, nin e ka kansadu.” (1 Jon 5:3) E sibi kuma “lei di SIÑOR i pirfitu, . . . Ordis di SIÑOR i retu, i ta kontenta korson; mandamentu di SIÑOR i puru, i ta da ntindimentu klaru.” — Salmu 19:7, 8.

Kilis ku tene fe di bardadi, ta nega tudu koldadi di mau tratus kontra jintis di utru rasa. E ka ta pensa kuma utru rasa, o tera o jintis i minjor di ki utrus. Ma pa kontrariu e ta kopia Deus. “Deus ka ta fasi skuju di jinti, ma i ta seta tudu, di kalker rasa, ku rispital, ku ta fasi kil ki justu.” — Atus 10:34, 35.

Fe di bardadi ta pui pa jintis “fasi sempri kil ki diritu.” (Ebreus 13:18) Algin ku tene fe di bardadi tambi i ta nega konta mintida o papia mal di utrus. Na livru di Salmus profeta Davi skirbi aserka di kal koldadi di pekadur ku Deus ta seta. Ali ke ki i skirbi: “I ka ta disfama ku si boka; i ka ta fasi mal pa si kumpañer.” — Salmu 15:3.

Mostra jiresa ku bin di Deus

Kilis ku tene fe di bardadi ta basia se nsinamentu so na Palabra di Deus. E fia ki “tudu Skritura, i Deus ku nspiral; i ten purbitu pa nsina, pa raprindi, pa kuriẑi, pa mostra manera di yanda diritu.” (2 Timótiu 3:16) Na se tratu ku utrus, e ta mostra “jiresa ku bin di riba.” Es jiresa i “puru, i ta buska pas, i sedu mansu, ntindidu, i ta mostra pena, ku frutu di bon obras.” (Tiagu 3:17) E ta ivita kusas di muru, kusas di iran, ku kusas di us di con, ku sta kontra ke ki Palabra di Deus fala. E ta “libra di idulus.” — 1 Jon 5:21.

Mostra amor di bardadi

Profeta Moises fala asin: “Ama SIÑOR bu Deus ku tudu bu korson, ku tudu bu alma, ku tudu bu forsa.” (Ripitison di Lei 6:5) Jintis di fe ta mostra es koldadi di amor pa Deus. E ta rispita nomi di Deus, Jeova. E ta “ngaba SIÑOR” i “coma si nomi” ku fe. (Salmu 105:1) Tambi servus di Deus ta obdisi es ordi: “Ama bu kumpañer suma bo propri.” (Sirmonias 19:18) E ta nega violensia i e ta fasi tudu ke pudi pa “ten pas ku tudu jinti.” (Romanus 12:18) Suma e ka ta aprindi gera, nes sintidu e “bidanta se spadas radis, e ta bidanta se kañakus n̈orotos.” (Isaias 2:4) Suma rusultadu des e ta “ama n̈utru” i e ta goza di un ermondadi na mundu ntidu. (Jon 13:35) Sera ki bu pudi oja es koldadi di jintis aos?