Na bardadi bon noba bin di Deus?

1. Kin ki Dunu di Biblia?

I na Biblia ki skribidu bon noba di kuma, jintis na bin vivi pa sempri na tera. (Salmu 37:29) Biblia tene 66 livrusiñus. Deus usa serka di 40 omis fiel pa skribi e livrus. Purmeru sinku livrus skribidu pa Moises serka di 3.500 anu atras. Ultimu livru skribidu pa apostulu Jon mas di 1.900 anu atras. Ideia di kin ku skribidu na Biblia? Deus usa spiritu santu pa kumunika ku skribiduris di Biblia. (2 Samuel 23:2) E skribi pensamentu di Deus, i ka se propi pensamentu. E ku manda, i Jeova ki Dunu di Biblia. — Lei 2 Timótiu 3:16; 2 Pedru 1:20, 21.

Jubi video Kin ki Dunu di Biblia?

2. Kuma ku no pudi tene sertesa di kuma Biblia bin di Deus?

No sibi ki Biblia bin di Deus, pabia i ta kontanu kusas aserka di futuru di un manera izatu. Nin un pekadur ka pudi fasi kila. (Josué 23:14) So Deus Puderosu ki pudi sibi di manera izatu, kal ki na bin sedu futuru di pekaduris. — Lei Isaias 42:9; 46:10.

No na speraba pa un livru ki bin di Deus pa i sedu uniku, suma ki i sedu. Bilyons di Biblia distribuidu ja na sentenas di linguas. Biblia i antigu, i ka un livru di skola, ma mesmu asin, ora ki i toka na asuntu di kriason suma tera, i ta sedu izatu. Tambi, si 40 skribiduris ka kontraria n̈utru.a Alen di kila, amor di Deus ki faladu del na Biblia tene puder di muda vida di jintis pa minjor. Es konvensi milyons di jintis di kuma Biblia i Palabra di Deus. — Lei 1 Tesalonisensis 2:13.

Jubi video Kuma ku no pudi tene sertesa di kuma Biblia bin di Deus?

3. Ke ki Biblia ta fala del?

Biblia ta konsentra na bon noba di kuma Deus tene un bon intenson pa pekaduris. Biblia splika kuma ki pekadur pirdi opurtunidadi di vivi na paraisu na kumsada di storia di mundu, i kuma ki tera na bin tornadu mas na un paraisu. — Lei Apokalipsi 21:4, 5.

Palabra di Deus tene tambi leis, orientasons ku konsiju. Alen di kila, Biblia tene isemplus di kuma ki Deus trata jintis. Atraves des isemplus no pudi sibi kal tipu di algin ki Deus sedu. Asin, Biblia pudi judau kunsi Deus. I ta splika kuma ku bu pudi sedu si amigu. — Lei Salmu 19:7, 11; Tiagu 2:23; 4:8.

4. Kuma ku bu pudi ntindi Biblia?

Es broŝura na judau ntindi Biblia atraves di mesmu metudu ki Jesus usaba. I ta falaba di diferenti testu di Biblia, dipus i ta splika ‘signifikadu di Skritura.’ — Lei Lukas 24:27, 45.

Bon noba ku bin di Deus i mas nteresanti di ki kualker kusa. Ma, i ten jintis ku ka ta nteresa del, utrus te mesmu ta sinti mal kel. Ka bu disanima. Bu speransa di tene vida ku ka ta kaba dipindi di kunsi Deus. — Lei Jon 17:3.