Samuel kontinua fasi ke ki bon

Oca Samuel seduba inda mas joven, i moraba pertu di tenda, lugar nunde ki jintis ta bai pa adora Jeova. Bu sibi kuma ku Samuel yanda i bai pa tenda? Purmeru, no aprindi aserka di mame di Samuel comadu Ana.

Pa manga di tempu Ana mistiba tene fiju, ma i ka pudi. E ku manda i ora pa Jeova i pidi pa i judal. I purmiti Jeova kuma si i tene fiju, i na mandal pa i bai tarbaja na tenda i mora pertu di la. Jeova ruspundi si orason, i tene un fiju. I dal nomi di Samuel. I suma ki purmitiba, oca Samuel tene tris o kuatru anu, i mandal pa i bai tarbaja na tenda pa sirbi Deus la.

Eli seduba ŝef di saserdoti na tenda. Asin, el i algin ku ta papia ku Deus na nomi di povu. Si dus fijus ta tarbaja la tambi. Lembra kuma, tenda seduba kau di adora Deus, i jintis dibi di fasi bon kusas la. Ma fijus di Eli staba na fasi kusas mau dimas. Samuel oja ke ku e ta fasiba. Sera ki Samuel fasi mau kusas suma fijus di Eli? — Nau, i kontinua fasi bon kusas, suma ku si pape ku si mame falal pa i fasi.

Ke ku bu pensa Eli dibi di fasi si dus fijus? — I dibi di kastigaba elis. I ka dibi di disaba elis tarbaja mas na kasa di Deus. Ma Eli ka fasi kila, e ku manda Jeova paña raiba del ku si dus fijus. Jeova disidi kastiga elis.

Un dia di noti oca Samuel na durmi, i obi un algin na comal: ‘Samuel!’ I kuri i bai nunde Eli, ma Eli falal: ‘N ka comau.’ Es akontisi dus bias. Dipus di tirseru bias, Eli fala Samuel kuma si torna obi vos mas, i dibi di fala: ‘Di fabur, Jeova, papia; N na obiu.’ Kila ku Samuel fasi. Dipus Jeova fala Samuel: ‘Fala Eli kuma N na kastiga si familia, pabia di mau kusas ke fasi.’ Bu pensa kuma i seduba fasil pa Samuel konta Eli es rekadu? — Nau, i ka seduba fasil. Mesmu pa manera ku Samuel staba ku medu, i fasi ke ku Jeova falal. Ke ku Jeova fala i bin sedu. Dus fijus di Eli matadu i Eli muri tambi.

Samuel i un bon isemplu pa nos. I ojaba mau kusas ku utrus na fasi, ma mesmu asin i fasi ke ki bon. Abo gora? Bu na sedu suma Samuel i kontinua fasi ke ki bon? Si bu fasi kila bu na pui pa Jeova ku bu papes kontenti.