E skirbi aserka di Jesus

Bu oja e omis na foto? — I Mateus, Markus, Lukas, Jon, Pedru, Tiagu, Judas ku Paulu. E omis tudu viviba na mesmu tempu ku Jesus, i e skirbi aserka del. Gosi no na aprindi mas aserka delis.

Tris delis seduba apostulus ku prega juntu ku Jesus. Bu sibi i ba kin? — I Mateus, Jon ku Pedru. Apostulu Mateus ku Jon kunsi Jesus diritu, i elis tudu e skirbi aserka di vida di Jesus. Apostulu Jon tambi skirbi un livru comadu Apokalipsi ku tris kartas comadu Purmeru di Jon, Sugundu di Jon ku Tirseru di Jon. Apostulu Pedru skirbi dus kartas ku sta na Biblia. E ta comadu Purmeru di Pedru ku Sugundu di Pedru. Na si sugundu karta, Pedru skirbi aserka di mumentu ku vos di Jeova sai di seu i fala aserka di Jesus: ‘Es i ña fiju ku N ama ciu. N ten garandi kontentamentu nel.’

Ki utru omis na foto ta sinanu tambi aserka di Jesus na livrus ke skirbi. Un delis i Markus. Talves i matiba oca Jesus prindidu i oja tudu ku akontisi. Utru i Lukas. I seduba un mediku i talves i torna Kriston dipus di Jesus muri.

Ki utrus dus skirbiduris di Biblia ku bu na oja na foto i ermonsiñus di Jesus. Bu kunsi se nomi? — Se nomi i Tiagu ku Judas. Na kumsada, e ka fiaba na Jesus. Te mesmu e pensaba kuma i ka sta ben di kabesa. Ma dipus e bin fia na Jesus i e sedu Kristons.

Ultimu skirbidur di Biblia ku bu na oja na foto i Paulu. Antis di i sedu Kriston, i ta comaduba Saulu. I odiaba Kristons i ta trata elis mal. Bu sibi ke ku pui Paulu misti sedu Kriston? — Un bias, Paulu na baiba pa Damasku, di repenti i obi vos di un algin ku sai di seu. I Jesus! I punta Paulu: ‘Ke ku manda bu na maltrata kilis ku fia na mi?’ Dipus di kila, Paulu muda i sedu Kriston. Paulu skirbi 14 livrus di Biblia, di Romanus te Ebreus.

No ta lei Biblia kada dia, i ka bardadi? — Atraves di lei Biblia, no ta aprindi manga di kusas aserka di Jesus. Sera ki bu misti aprindi mas aserka di Jesus? —