Suma Pedru ka bu disisti

1. Kuma ku Pedru sinti dipus ku Jesus fasi milagri i judal paña manga di pis?

PEDRU pasa tudu noti na piska sin paña nada. Pa si surpresa Jesus falal: “Bo bai pa kau fundu, bo bota bo ridias pa piska.” (Luk 5:4) Pedru teneba duvida di kuma i na paña pis, ma i fasi ke ku Jesus falal pa i fasi. E paña manga di pis i ridia kumsa ku rumpi. Pedru ku kilis ku na piskaba ku el “fika spantadu.” Pedru panta i fala sin: “Siñor, lunjusi di mi, pabia ami i un omi di pekadu!” (Luk 5:​6-9) Talves Pedru sinti di kuma i ka mersi, te mesmu sta dianti di Jesus.

2. Pabia ki na sedu bon pa nos studa isemplu di Pedru?

² Pedru tene rason, i seduba “omi di pekadu”. Biblia mostra di kuma i ta papia i fasi kusas ku mas tardi i ta ripindi. Sera ki utrora bu ta sinti suma Pedru? Sera ki i ten un kusa na bu manera di sedu ku bu sta na luta pa minjoria, o bu sta na luta ku un frakesa pa manga di tempu? Si sedu sin, isemplu di Pedru pudi nkoraẑau. Pabia? Bu pudi pensa nes: Jeova pudiba pui pa erus di Pedru ka skirbidu na Biblia. Ma i fasi pa e erus skirbidu pa no pudi aprindi algun kusa delis. (2 Tim 3:​16, 17) Aprindi di Pedru ku teneba frakesas ku sentimentu suma nos ta judanu ntindi di kuma, Jeova ka ta spera pa no sedu jintis perfeitu. I misti pa no ka disisti mesmu ku no frakesas.

3. Pabia ku no ka dibi di disisti?

³ Pabia ki importanti pa no ka disisti? Pabia si no ta fasi un kusa sempri, no mas ta fasil diritu. Pur isemplu: Un tokadur di tambur pudi pasa manga di anus pa pudi sibi tokal diritu. Na ki anus, i pudi fasi manga di erus, ma si kontinua toka i na minjoria. Ma mesmu si sibi toka tambur diritu, i pudi dati i fasi erus. Nin ku sin i ka ta disisti. I ta kontinua toka pa pudi minjoria. Di mesmu manera, mesmu si no sinti di kuma no kaba ku un frakesa, no pudi kai mas na ki eru. Ma no ta kontinua sforsa pa minjoria. Anos tudu no ta fala o fasi kusas ku mas tardi no ta ripindi, ma si no ka disisti Jeova na judanu kontinua minjoria. (1 Ped 5:10) No jubi isemplu di Pedru ku ka disisti. Pena ku Jesus sinti pa Pedru, mesmu ku si erus, pudi motivanu kontinua sirbi Jeova.

SFORSUS KU PEDRU FASI KU BENSONS KI RISIBI

4. Suma ki faladu na Lukas 5:​5-10, ke ku Pedru fala aserka del, ma kuma ku Jesus animal?

⁴ Biblia ka kontanu pabia ku Pedru fala el i “omi di pekadu” o kal pekadus ki staba na fala del. (Lei Lukas 5:​5-10.) Ma talves i fasi alguns erus gravi. Jesus sibiba di kuma Pedru staba ku medu, talves pabia Pedru pensaba di kuma i ka mersi. Jesus sibiba tambi di kuma Pedru pudi kontinua fiel. Pa kila, ku bondadi Jesus fala Pedru “ka bu medi”. Konfiansa ku Jesus teneba na Pedru muda si vida. Mas tardi Pedru ku si ermon André disa se tarbaju di piska e pasa sedu sigiduris di Mesias, di tempu kompletu. Jeova bensua elis di manga di manera. — Mar 1:​16-18.

5. Kal bensons ku Pedru risibi pa manera ki vensi si medu i seta konviti di Jesus?

⁵ Pedru tene manga di spiriensias interesanti suma sigidur di Kristu. I oja Jesus kura duentis, serka dimonius i te mesmu lantanda kilis ku muri.b (Mat 8:​14-17; Mar 5:​37, 41, 42) Pedru oja tambi vison interesanti di Jesus suma futuru Rei di Renu di Deus, i nunka i diskisi des. (Mar 9:​1-8; 2 Ped 1:​16-18) Pedru nunka ka na ciga di oja kusas ki oja si ka seduba sigidur di Jesus. I dibi di staba kontenti pa manera ki ka disa nin un sentimentu negativu tujil pirdi es bensons!

6. Kuma ku Pedru vensi si frakesas rapidu? Bu pudi splika.

⁶ Mesmu pa ke ki oja ku ke ki obi, Pedru kontinua luta ku si frakesas. Jubi alguns isemplus. Oca Jesus splika kuma ki na sufri i muri pa kumpri profesia di Biblia, Pedru raprindil. (Mar 8:​31-33) Manga di bias, Pedru ku utrus apostolus diskuti aserka di kin ku mas garandi. (Mar 9:​33, 34) Na ultimu noti antis di Jesus muri, ku turmenta, Pedru sapa oreja di un omi. (Jon 18:10) Na ki mesmu noti, pabia di medu, Pedru nega tris bias di kuma i kunsi si amigu Jesus. (Mar 14:​66-72) Es pui Pedru cora risu. — Mat 26:75.

7. Kal oportunidadi ku Jesus da Pedru dipus ki resusitadu?

⁷ Jesus ka disisti di si apostolu ku disanimaba dimas. Dipus ku Jesus lantandadu, i da Pedru oportunidadi pa i mostra di kuma i kontinua inda amal. Jesus kumbida Pedru pa i sirbi suma un bakiadur umildi pa si karnelis. (Jon 21:​15-17) Pedru seta fasi ke ku Jesus falal. I bai Jerusalen na dia di Pentekostis i staba entri purmeru jintis ku unjidu pa spiritu santu.

8. Kal eru gravi ku Pedru fasi na Antiokia?

⁸ Mesmu dipus di torna kriston unjidu, Pedru dibi di lidaba ku si frakesas. Na 36 EK, Deus manda Pedru pa Kornéliu ku ka seduba un Judeu. Deus unji Kornéliu ku spiritu santu, asin i torna klaru di kuma “Deus ka ta fasi skuju di jinti”, i di kuma kilis ki ka judeus pudi fasi parti di kongregason kriston. (At 10:​34, 44, 45) Dipus Pedru sta avontadi pa kume ku kilis ki ka judeus, kusa ku nunka i ciga di fasi. (Gal 2:12) Ma alguns kristons judeu pensaba di kuma, judeus ku kilis ki ka judeus ka dibi di kume juntu. Oca alguns ku tene es manera di pensa bai pa Antiokia, Pedru para kume ku si ermons kilis ki ka judeus, talves pabia di medu di pui pa kristons judeus fika mal. Apostolu Paulu nota des finjimentu, i raprindi Pedru dianti di utrus. (Gal 2:​13, 14) Mesmu ku es eru Pedru ka disisti. Ke ku judal?

KE KU JUDA PEDRU PA KA DISISTI?

9. Kuma ku Jon 6:​68, 69 mostra fidelidadi di Pedru?

⁹ Pedru seduba fiel, i ka disa pa nada pul disisti di un bias. Pur isemplu, un bias i mostra si fidelidadi oca Jesus fala un kusa ku si disipulus ka ntindiba. (Lei Jon 6:​68, 69.) En ves de pera o buska un splikason, manga delis para sigi Jesus. Ma Pedru ka fasi kila. E seduba fiel, e fala di kuma Jesus i uniku ku tene “palabra ku ta da vida ku ka ta kaba.”

10. Kuma ku Jesus mostra konfiansa na Pedru? (Jubi tambi diseñu.)

¹⁰ Jesus ka bandona Pedru. Na ultimu noti di si vida na Tera, Jesus sibiba di kuma Pedru ku utrus apostolus na bandonal. Mesmu asin, Jesus mostra konfiasa di kuma Pedru na riba pa rel, i kontinua fiel. (Luk 22:​31, 32) Jesus ntindiba di kuma “vontadi sta pruntu, ma kurpu i fraku.” (Mar 14:38) Pa kila, mesmu dipus ku Pedru nega di kuma i kunsil, Jesus ka disisti di si apostolu. Dipus di si resureison Jesus parsi pa Pedru, oca i staba el son. (Mar 16:7; Luk 24:34; 1 Kor 15:5) Es dibi di nkoraẑaba ciu Pedru, ku staba tristi dimas!

11. Kuma ku Jesus da Pedru garantia di kuma Jeova na judal?

¹¹ Jesus da Pedru garantia di kuma Jeova na judal. Dipus di si resureison, Jesus fasi utru milagri pa Pedru ku si kumpañeris apostolu paña pis. (Jon 21:​4-6) Sin duvida, es milagri mostra Pedru di kuma Jeova pudi ku fasilidadi kuida di si nesesidadi material. Talves Pedru lembra di palabras di Jesus ku fala di kuma, Jeova na kuida di kilis ku kontinua “buska renu di Deus” na purmeru lugar. (Mat 6:33) Es tudu juda Pedru pa pui pregason na purmeru lugar na si vida, en ves di tarbaju di piska. I prega ku koraẑen na dia di Pentekostis di anu 33 EK, i juda manga di jintis seta bon noba. (At 2:​14, 37-41) Dipus i juda Samaritanus ku jintius pa seta Kristu. (At 8:​14-17; 10:​44-48) Na bardadi, Jeova usa Pedru di un manera puderosu, pa tisi tudu tipu di jintis na kongregason.

KE KU NO PUDI APRINDI?

12. Kuma ku isemplu di Pedru ta judanu si no sta na luta ku un frakesa ku tarda?

¹² Jeova pudi judanu pa ka disisti. I pudi sedu difisil, prinsipalmenti ora ku no sta na luta ku mesmu frakesa pa manga di tempu. Utrora no frakesas pudi sedu mas difisil di ki di Pedru. Ma Jeova pudi danu forsa pa ka disisti. (Sal 94:​17-19) Pur isemplu, un ermon ku ta lebaba vida omoseksual pa manga di anus antis di kunsi bardadi. I muda si vida di un manera kompletu, gosi i sta na vivi di akordu ku ke ku Biblia fala. Ma utrora i ta luta ku mau diseẑu. Ke ku judal pa ka disisti? I fala sin: “Jeova ta danu forsa. Ku spiritu di Jeova . . . , N aprindi di kuma i pusivel kontinua vivi suma ku Jeova misti . . . Jeova konsigi usan i mesmu ku ña imperfeison i kontinua dan forsa.”

13. Kuma ku no pudi kopia isemplu di Pedru suma ki faladu na Atus 4:​13, 29, 31? (Jubi tambi foto.)

¹³ Suma ku no oja, Pedru fasi alguns erus pabia i mediba jintis. Ma suma i ora pa tene koraẑen, Pedru konsigi sedu koraẑosu. (Lei Atus 4:​13, 29, 31.) Anos tambi no pudi vensi no medu. Jubi ke ku kontisi ku Horst, ermon joven ku mora na Almaña Nazista. Utrora jintis ta iziẑi pa fala manteña spesial ku signifika “Hitler salvanu!” En ves di kuriẑil, papes di Horst ora ku el, e pidi Jeova pa i dal koraẑen. Ku ajuda di si papes i ku konfiansa na Jeova, Horst bin konsigi tene forsa pa manti firmi. I fala sin mas tardi: “Jeova nunka bandonan.”c

14. Kuma ku bon pastoris pudi nkoraẑa kilis ku sta disanimadu?

¹⁴ Jeova ku Jesus ka na disisti di nos. Dipus di nega Jesus, Pedru dibi di tomaba un disison importanti. Sera ki i na disisti o i na kontinua sedu disipulu di Kristu? Jesus ora Jeova risu pa Pedru ka pirdi fe. Jesus fala Pedru di ki orason, i mostra konfiansa di kuma Pedru, mas tardi, na bin konsigi da si ermons forsa. (Luk 22:​31, 32) Pedru dibi di sinti nkoraẑadu ora ki lembra di palabras di Jesus! Ora ku no dibi di toma un disison importanti, Jeova pudi usa bon pastoris pa danu nkoraẑamentu ku no pirsisa del, pa kontinua sedu fiel. (Ef 4:​8, 11) Paul, un ansion ku sirbi pa manga di anus ta tenta da es tipu di nkoraẑamentu. I ta punta kilis ku misti disisti, pa e pensa na kuma ku Jeova tisi elis pa bardadi. Dipus, i ta garanti elis di kuma amor fiel di Jeova ka na pirmitil pa i bandona elis. I fala sin: “N oja manga di jintis ku fika disanimadu ku ka disisti ku ajuda di Jeova.”

15. Kuma ku isemplu Pedru ku ermon Horst ta mostra di kuma ke ku faladu na Mateus 6:33 i bardadi?

¹⁵ Suma ku Jeova kuida di Pedru ku utrus apostolus na sintidu material, i na kuida di no nesesidadi material si no pui pregason na purmeru lugar na no vida. (Mat 6:33) Dipus di Sugundu Gera Mundial, Horst ku faladuba del na kumsada pensa na kumsa sirvisu di pioneru. Ma i seduba koitadi dimas, i teneba duvida si i na pudi sustenta si kabesa i kontinua na sirvisu di tempu kompletu. Ke ki i fasi? I disidi pui Jeova na prova, i pasa semana ntidu na pregason duranti visita di superintendenti di sirkuitu. Na fin di ki semana i fikaba dimiradu oca superintendenti di sirkuitu dal un invulopi ku teneba diñeru ku ka tene nomi di kin ku da ki diñeru. I teneba diñeru sufisienti pa sustental na sirvisu di pioneru pa manga di misis. Horst oja ki prenda suma garantia di kuma Jeova na sustental. I pasa tudu si vida na pui interesi di Renu na purmeru lugar. — Mal 3:10.

16. Pabia ku isemplu di Pedru ku ke ki skirbi dibi di interesanu?

¹⁶ Pedru dibi di sta kontenti pa manera ku Jesus ka lunjusi del suma ki pidil pa i fasi! Kristu kontinua trena Pedru pa i sedu apostolu fiel i bon isemplu pa kristons. Anos tudu no pudi aprindi manga di bon lisons des trenamentu. Pedru fala di alguns des lisons na dus karta ki skirbi pa kongregasons di purmeru sekulu ku dipus fasi parti di Biblia. Na studu ku na bin no na papia un bokadu di kusas ku faladu nes kartas i kuma ku no pudi aplika elis aos.