Kopia manera di pensa di Jeova ku di Jesus

1-2. (a) Ke ku signifika ama Jeova? (b) Kuma ku Jesus mostra kila?

“AMA Siñor bu Deus ku tudu bu korson, ku tudu bu alma, ku tudu bu forsa, ku tudu bu ntindimentu.” (Luk 10:27) Jesus mostra di manera klaru di kuma, es i mandamentu mas importanti di Lei di Moisés. Nota di kuma no amor pa Jeova sta ligadu ku korson, ku nklui no diseẑus, no sentimentus ku no emosons. Tambi no amor pa Jeova sta ligadu ku tudu no alma i ku tudu no forsa, ku sedu, no forsa fisiku. Ma, amor pa Jeova sta tambi ligadu ku no ntindimentu, ku nklui manera ku no ta pensa. Mesmu manera ku no ka pudi ntindi di manera kompletu kuma ku Jeova ta pensa, no dibi di sforsa pa ba ta pensa suma el. Ma no pudi ntindi minjor pensamentu di Deus, ora ku no ta studa “pensamentu di Kristu”, pabia Jesus ta pensa suma si Pape. — 1 Kor 2:16 ku nota di studu “nós [ . . . ] temos a mente de Cristo.”

² Jesus ama Jeova ku tudu si ntindimentu. I sibiba ke ku Deus misti pa i fasi, tambi i staba disididu pa fasil mesmu si dibi di sufriba. Suma i konsentraba na fasi vontadi di si Pape, Jesus ka disa nada tujil yangasa ki objetivu.

3. Ke ku apostolu Pedru aprindi di Jesus, i ke ku Pedru nkoraẑa si ermons pa e fasi? (1 Pedru 4:1)

³ Pedru ku utrus apostolus teneba oportunidadi garandi di pasa tempu ku Jesus i di aprindi kuma ki ta pensa. Oca Pedru skirbi si purmeru karta nspiradu, i nkoraẑa kristons pa e fika firmi ku mesmu sintidu suma Kristu. (Lei 1 Pedru 4:1.) Oca ku Pedru skirbi palabras “fika firmi” na gregu, i usaba palabras ku na fala di tropas ku sta ekipadu ku armas purparadu pa gera. Pa kila, si kristons aprindi pensa suma ku Jesus ta pensa, e na tene ke ke pirsisa del pa luta kontra kualker diseẑu di fasi ke ki mal i luta kontra mundu di Satanas. — 2 Kor 10:​3-5; Ef 6:12.

4. Ke ku no na bin fala del nes studu?

⁴ No na jubi kal ki manera di pensa di Jesus i kuma ku no pudi kopial. No na diskubri kuma ku no pudi (1) kopia manera di pensa di Jeova, (2) sedu umildi, i (3) tene bon juisu.

KOPIA MANERA DI PENSA DI JEOVA

5. Kuma ku un bias Pedru ka pensa suma ku Jeova ta pensa?

⁵ Jubi un mumentu ku Pedru ka pensa suma ku Jeova ta pensa. Jesus kontaba ja si apostolus di kuma i ten di bai Jerusalen, nunde ku ŝefis riliẑiosu na prindil, kastigal, i dipus matal. (Mat 16:21) Pedru sibiba di kuma Jesus i Mesias ku faladuba kuma i na bin salva povu di Deus. Pa kila, i pudi seduba difisil pa i fia di kuma Jeova na disa pa Jesus matadu. (Mat 16:16) Asin, Pedru leba Jesus na un ladu i falal: “Siñor, ten pena di bu kabesa! Di nin un manera e kusa ka na ocau.” (Mat 16:22) Jesus ku Pedru ka konkordaba ku n̈utru, pabia Pedru ka staba na pensa suma ku Jeova ta pensa.

6. Di kal manera ku Jesus mostra di kuma si manera di pensa i suma di Jeova?

⁶ Jesus sibiba kuma ku si Pape ta pensa, i kopial di manera perfeitu. Jesus fala Pedru: “Sai ña dianti, Satanas! Bu na disvian di ña kamiñu, pabia bu pensamentu i ka bin di Deus, ma i di omi.” (Mat 16:23) Jesus sibiba di kuma pa fasi vontadi di Jeova i pirsisa di sufri i muri. Pa kila, i nega konsiju di Pedru, mesmu manera ki parsiba di kuma Pedru staba na tenta judal. Nes mumentu, Pedru aprindi di kuma i pirsisa di pensa suma Jeova. Es i un lison importanti ku no pirsisa tambi di aprindi.

7. Kuma ku mas tardi Pedru mostra di kuma, i misti muda si manera di pensa pa i sedu suma di Jeova? (Jubi diseñu.)

⁷ Mas tardi, Pedru mostra di kuma i misti aprindi pensa suma ku Jeova ta pensa. Tempu ciga pa jintis di nasons fasi parti di povu di Deus. Deus orienta Pedru pa i prega Kornéliu, ku bin sedu purmeru algin di utru nason ku torna kriston. Judeus kustuma ivita kualker kontaktu ku jintis di utru nasons. Pa kila, Pedru pirsisaba di muda si manera di pensa pa pudi prega ki jintis. Oca ku Pedru ntindi kal ki vontadi di Deus aserka di jintis di utru nasons, i muda si manera di pensa. Pa kila, oca ku Kornéliu pidi Pedru pa i bai visital, i bai “sin purfia”. (At 10:​28, 29) I prega Kornéliu ku si familia, dipus e batisa. — At 10:​21-23, 34, 35, 44-48.

8. Kuma ku no pudi mostra di kuma no ta pensa suma ku Jeova ta pensa? (1 Pedru 3:8)

⁸ Anus dipus, Pedru nkoraẑa si ermons pa e “tene un pensamentu”. (Lei 1 Pedru 3:8.) Suma povu di Jeova, no pudi pensa di mesmu manera, ora ku no kopia manera di pensa di Jeova suma ki mostradu na si Palabra. Pur isemplu, Jesus fala si sigiduris pa e pui pa Guvernu di Deus sedu kusa mas importanti na se vida. (Mat 6:33) Pabia des, un publikadur na bu kongregason pudi disidi kumsa sirvisu di tempu kompletu. En ves di falal pa i tene pena di si kabesa, no dibi di fala di kusas pusitivu aserka di si objetivu i judal.

SEDU UMILDI

9-10. Kuma ku Jesus mostra di kuma i seduba umildi dimas?

⁹ Na noti antis di muri, Jesus nsina Pedru ku utrus apostolus un lison importanti aserka di umildadi. Antis di kila, Jesus manda Pedru ku Jon pa e bai purpara ultimu sia ki na kume ku elis antis di muri. Talves un di kusas ke fasi, i pa jubi si i ten un basia ku tuajas pa pudi laba pe di ospris antis di sia. Ma, kin ku na sedu umildi pa laba pe di utrus?

¹⁰ Jesus ka burguñu fasi es tarbaju. I mostra di kuma i seduba umildi dimas. Apostolus dibi di fikaba dimiradu di oja Jesus na fasi un kusa ku un tarbajadur di kasa kustuma fasi. Jesus tira si ropa di riba, i mara un tuaja na si sintura, i pui yagu na un basia, i kumsa laba se pe. (Jon 13:​4, 5) Talves i toma tempu pa Jesus laba pe di tudu 12 apostolus. Te mesmu i laba pe di Judas ku na bin trail. Ma, ku umildadi, Jesus kaba fasi tudu ki tarbaju. Dipus, Jesus fala elis ku pasensa: “Bo ntindi e kusa ku N fasi bos? Bo ta coman Mestre ku Siñor. Bo fala bardadi, pabia ami i el. Si ami gora N sedu Siñor ku Mestre, N laba bos pe, abos tambi bo dibi di laba n̈utru pe.” — Jon 13:​12-14.

11. Kuma ku Pedru mostra di kuma i aprindi sedu umildi? (1 Pedru 5:5) (Jubi tambi diseñu.)

¹¹ Pedru aprindi di umildadi di Jesus. Dipus ku Jesus riba pa seu, Pedru fasi un milagri, i kura un omi ku sedu manku disna ki padidu. (At 1:​8, 9; 3:​2, 6-8) Manga di jintis ku oja es milagri e bai pertu Pedru i e dal volta. (At 3:11) Sera ki Pedru na misti pa jintis ngabal, manera ki kirsi na un kultura nunde ku jintis gosta ciu di sedu algin importanti? Nau. Pedru seduba umildi, i fala elis pa e ngaba Jeova ku Jesus oca i fala asin: ‘I fe na nomi di Jesus ku da forsa pa e omi, ku bo na oja, bo kunsi.’ (At 3:​12-16) Palabras ku Pedru usa na karta ki skirbi pa kristons aserka di nesesidadi di aprindi sedu umildi, ta lembrantanu di mumentu ku Jesus mara un tuaja na si sintura i laba pe di apostolus. — Lei 1 Pedru 5:5.

12. Kuma ku no pudi kontinua aprindi sedu umildi suma Pedru?

¹² No pudi kopia isemplu di Pedru i kontinua aprindi sedu umildi. Un algin umildi ta fasi mas di ki so papia kusas ku ta mostra di kuma i sedu umildi. Palabra ku Pedru usa i ku traduzidu pa “umildadi” ta mostra di kuma, umildadi nvolvi manera ku no ta pensa di no kabesa ku manera ku no ta pensa tambi di utrus. No ta fasi bon kusas pa utrus, pabia no ama Jeova tambi no ama jintis, i ka pabia no misti pa utrus ngabanu. No ta mostra di kuma na bardadi no sedu umildi, si no ta sirbi Jeova ku no ermons ku irmas ku kontentamentu, mesmu si utru jintis ka nota ke ku no ta fasi. — Mat 6:​1-4.

TENE BON JUISU

13. Ke ku signifika tene bon juisu?

¹³ Ke ku signifika “sedu seriu”, o tene bon juisu? (1 Ped 4:7) Un kriston ku tene bon juisu ta sforsa pa toma bon disisons ku sta di akordu ku manera di pensa di Jeova. I sibi di kuma si amisadi ku Jeova i kusa mas importanti na si vida. I ta ivita pui si kabesa na lugar ki ka dibi di pul, tambi i ta ntindi di kuma i ka sibi tudu kusa. I ta mostra si konfiansa na Jeova ora ki ta ora sempri pa buska si orientason.a

14. Kuma ku un bias Pedru ka konfia na Jeova?

¹⁴ Na ultimu noti antis di Jesus muri, i fala si disipulus asin: “E di noti abos tudu bo na disan”. Pedru ruspundi ku konfiansa: “Nin ku tudu disau, ma ami, nunka N ka na disau.” Ki di noti Jesus falaba alguns di si disipulus: “Bo toma sintidu, bo ora”. (Mat 26:​31, 33, 41) Si Pedru sigiba es konsiju, talves i na teneba koraẑen di fala di kuma i sedu disipulu di Jesus. En ves di kila, Pedru fala kuma i ka kunsi Jesus, i dipus i ripindi ciu. — Mat 26:​69-75.

15. Kuma ku Jesus kontinua tene bon juisu na si ultimu noti di vida na Tera?

¹⁵ Jesus pui tudu si konfiansa na Jeova. Mesmu manera ki sedu perfeitu, Jesus ora manga di bias. Kila dal koraẑen pa i fasi vontadi di Jeova. (Mat 26:​39, 42, 44; Jon 18:​4, 5) Sin duvida, Pedru nunka diskisi di kuma, Jesus ora manga di bias na ultimu noti di si vida na Tera.

16. Kuma ku Pedru mostra kuma i tene bon juisu? (1 Pedru 4:7)

¹⁶ Ku tempu, Pedru aprindi konfia mas na Jeova pa manera ki ta ora. Dipus ku Jesus lantandadu di mortu, i garanti Pedru ku utrus apostolus di kuma, e na risibi spiritu santu pa e pudi prega bon noba. Ma Jesus fala elis pa e pera na Jerusalen te ora ke risibi spiritu santu. (Luk 24:49; At 1:​4, 5) Ke ku Pedru fasi nkuantu i staba na pera? Pedru ku utrus disipulus “kontinua tudu juntadu na orason”. (At 1:​13, 14) Dipus, na si purmeru karta ki skirbi, Pedru nkoraẑa si ermons na fe, pa e tene bon juisu i pa e konfia na Jeova atraves di orason. (Lei 1 Pedru 4:7.) Pedru aprindi konfia na Jeova, tambi i bin sedu firkija na kongregason. — Gal 2:9.

17. Mesmu si no sibi fasi sertus kusas, ke ku no pirsisa di kontinua fasi? (Jubi tambi foto.)

¹⁷ Pa tene bon juisu, no dibi di ora sempri Jeova. Mesmu si no sibi fasi sertus kusas, no ta ntindi di kuma no pirsisa di pidi ajuda di Jeova na orason. Pa kila, ora ku no tene disisons importanti pa toma, no ta ora Jeova pa i orientanu ku konfiansa di kuma i sibi ke ki minjor pa nos.

18. Ke ku bu sta disididu pa fasi?

¹⁸ No na gardisi ciu Jeova manera ki kumpunu pa no pudi kopia si maneras di sedu. (Kum 1:26) Sin duvida, no ka pudi kopia Jeova di manera perfeitu. (Isa 55:9) Ma suma Pedru, no pudi muda no manera di pensa pa pudi kopia mas minjor manera di pensa di Jeova. No pudi fasi es ora ku no kontinua kopia manera di pensa di Jeova, sedu umildi i tene bon juisu.