Ke ku no pudi aprindi di dus kartas di Pedru?

1. Puku antis di apostolu Pedru muri, Jeova usal pa fasi ke?

APOSTOLU Pedru sibiba kuma, i ka na tarda i na muri. Duranti manga di anus di si sirvisu fiel, i yanda ku Jesus, i kumsa prega na nobu tiritorius, tambi i sirbi suma membru di korpu guvernanti. Ma, sirvisu di Pedru ka kaba. Serka di 62 te 64 EK, Jeova usal pa i skirbi dus kartas di Biblia, purmeru ku sugundu di Pedru. Pedru na speraba kuma es dus kartas na juda kristons dipus di si mortu. — 2 Ped 1:​12-15.

2. Ke ku manda kartas di Pedru ciga na bon mumentu?

² Pedru skirbi si kartas na un tempu ku si ermons na fe staba ‘tristi pabia di manga di koldadi probason.’ (1 Ped 1:6) Omis mau staba na tenta yentrada nsinus falsu ku mau komportamentu na kongregason. (2 Ped 2:​1, 2, 14) I ka na tarda, kristons ku mora na Jerusalen na oja “fin di tudu kusa” ku sedu distruison di sidadi ku si templu pa tropas romanu. (1 Ped 4:7) Sin duvida, kartas di Pedru juda kristons pa e oja kuma ke pudi nguenta situasons difisil ke sta na pasa i purpara elis pa kilis ku na bin.b

3. Pabia ku no dibi di studa kartas nspiradu di Pedru?

³ Pedru skirbi si kartas pa kristons di purmeru sekulu, ma mesmu asin, Jeova fasi pa es kartas fasi parti di si Palabra. Pa kila, no pudi benefisia des kartas gosi. (Rom 15:4) Suma no sta na vivi na un mundu ku ta nsentiva mau komportamentu, no ta pasa tambi purblemas ku ta pui pa i sedu difisil sirbi Jeova. Alen di kila, i ka na tarda, no na pasa un foronta mas garandi di ki kil ku kaba ku Jerusalen ku si templu. Es dus kartas di Pedru ta lembrantanu kusas importanti. Es na judanu kontinua pera dia di Jeova, vensi medu di omi i tene amor garandi pa n̈utru. Es kartas na juda tambi ansions oja kuma ke pudi juda ermons ku irmas na se kongregason pa e manti forti.

KONTINUA PERA

4. Suma ki mostradu na 2 Pedru 3:​3, 4, ke ku pudi torna no fe fraku?

⁴ No sta na vivi na un mundu nunde ku jintis ka ta fia na ke ku Biblia fala aserka di futuru. Manga di jintis ku sta kontra nos pudi gozanu, pabia desdi manga di anu no fala di kuma fin sta pertu. Alguns jintis ta fala di kuma mundu nunka ka na ciga di kaba. (Lei 2 Pedru 3:​3, 4.) Si no obi es palabras na boka di un algin ku no na prega, un kolega di tarbaju o un membru di familia, no fe pudi torna fraku. Pedru splika ke ku pudi judanu.

5. Ke ku pudi judanu pera fin des mundu ku pasensa? (2 Pedru 3:​8, 9)

⁵ I ten jintis ku ta pensa di kuma Jeova sta na tarda pa kaba kes mundu mau. Palabras di Pedru pudi judanu, pabia i ta lembrantanu di kuma manera ku Jeova ta oja tempu, diferenti ciu ku manera ku pekaduris ta ojal. (Lei 2 Pedru 3:​8, 9.) Pa Jeova, mil anu i suma un dia. Jeova i pasenseru, i ka misti pa ningin kabadu kel. Ora ku si dia ciga, es mundu na kabadu kel. I un privileẑiu garandi usa tempu ku sobra pa prega jintis na mundu ntidu.

6. Kuma ku no pudi fasi forsa pa dia di Jeova “ciga dipresa”? (2 Pedru 3:​11, 12)

⁶ Pedru fala pa no fasi forsa pa dia di Jeova “ciga dipresa”. (Lei 2 Pedru 3:​11, 12.) Kuma ku no pudi fasil? No pudi fasil ora ku no na tira tempu kada dia, pa pensa na kuma ku vida na sedu na nobu mundu. Imaẑina kuma bu sta na rispira ar puru, bu na kume bon kumida, bu sta na risibi jintis ku bu ama ku resusitadu i bu na nsina jintis ku viviba manga di tempu atras aserka di kumprimentu di profesias di Biblia. Pensa nes kusas na judau pera ki tempu ku diseẑu garandi i tene sertesa di kuma, i ka na tarda fin na ciga. ‘Suma ku no jumna no sibi es’ kusas ku na bin kontisi na futuru, es na judanu pa ka no “lebadu pa nganu” pa nsinaduris falsu. — 2 Ped 3:17.

VENSI MEDU DI OMI

7. Kuma ku medu di omi pudi afetanu?

⁷ Suma no sibi di kuma dia di Jeova na ciga i ka na tarda, no misti fasi tudu ku no pudi pa konta utrus bon noba. Ma, utrora no pudi medi papia. Pabia di ke? Pabia no medi ke ku utrus pudi pensa di nos o ke ke na fasinu. Es ku kontisi ku Pedru. Na noti ku Jesus prindidu, Pedru nega fala di kuma el i disipulu di Jesus. Te mesmu i nega tris bias di kuma i kunsil. (Mat 26:​69-75) Mas tardi, es mesmu apostolu vensi medu di omi. Ku tudu sertesa i fala sin: “Ka bo ten medu delis, nin ka bo tarpaja.” (1 Ped 3:14) Palabras di Pedru ta danu sertesa di kuma no pudi vensi medu di omi.

8. Ke ku pudi judanu vensi medu di omi? (1 Pedru 3:15)

⁸ Ke ku pudi judanu vensi medu di omi? Pedru falanu sin: “Bo rispita Kristu suma Siñor na bo korson.” (Lei 1 Pedru 3:15.) Es nklui lembra di kuma Jesus Kristu i no Rei, tambi i tene puder garandi. Si bu tene medu di konta bon noba ora ku bu tene oportunidadi, lembra di no Rei. Imaẑina ojal suma un Rei na seu, rodiadu pa milyons di anjus. Lembra di kuma i dadu “tudu puder na seu ku na tera”, tambi i na sta ku ‘bo tudu dia te na kabantada di tempu.’ (Mat 28:​18-20) Pedru falanu pa no sta “sempri pruntu” pa difindi no fe. Sera ki bu ka misti prega na kau di tarbaju, na skola o na utrus kaus? Pensa antis na mumentu ku bu pudi fasil. Ora bu pidi koraẑen, i tene konfiansa di kuma Jeova na judau vensi medu di omi. — At 4:29.

“BO AMA N̈UTRU KU TUDU BO KORSON”

9. Kuma ku Pedru ciga di falia na mostra amor? (Jubi tambi diseñu.)

⁹ Pedru aprindi kuma ki pudi mostra amor. I matiba oca Jesus fala: “N na da bos mandamentu nobu, pa bo ama n̈utru”. (Jon 13:34) Mesmu asin, mas tardi, Pedru nega kume ku ermons ku irmas ki ka judeu pabia i mediba kristons judeu. Apostolu Paulu coma ke ku Pedru fasi di “finjimentu”. (Gal 2:​11-14) Pedru seta koreson ku Paulu dal i tira lison. Na tudu dus kartas ki skirbi, Pedru mostra di kuma, no ka dibi di sinti so amor pa no ermons ku irmas, ma tambi no dibi di mostra es amor.

10. “Amor di bardadi” i rusultadu di ke? Bu pudi splika. (1 Pedru 1:22)

¹⁰ Pedru fala no dibi di tene “amor di bardadi” pa no ermons na fe. (Lei 1 Pedru 1:22.) Es amor i rusultadu di “obdisi bardadi”. Es bardadi nklui nsinu di kuma “Deus ka ta fasi skuju”. (At 10:​34, 35) No ka pudi obdisi mandamentu di Jesus aserka di amor, si no ama so sertus jintis na kongregason i no ka ama utrus. I bardadi di kuma no pudi tene mas intimidadi ku utrus, suma ku Jesus fasi. (Jon 13:23; 20:2) Ma Pedru lembrantanu di kuma, no dibi di ama tudu no ermons ku irmas, pabia e fasi parti di no familia. — 1 Ped 2:17.

11. Ke ku signifika ama utrus di ‘tudu no korson’?

¹¹ Pedru falanu sin: “Bo ten ku ama n̈utru ku tudu bo korson.” Ama di tudu korson signifika ama un algin, mesmu si difisil mostra amor pa rel. Pur isemplu, ke gora si un ermon yaranu? Na kumsada, talves no na misti tornal ke ki fasinu en ves di mostra amor. Ma, Jesus nsina Pedru di kuma, es manera di fasi ka ta kontenta Deus. (Jon 18:​10, 11) Pedru fala sin: “Ka bo torna mal pa mal; ka bo koba kil ku na koba bos. Te pa bo fasi asin, bo torna ku bon palabra di benson”. (1 Ped 3:9) Si no ama di tudu korson, kila na lebanu mostra bondadi ku rispitu, te mesmu pa kilis ku talves yaranu.

12. (a) Ke mas ku amor di tudu korson na lebanu fasi? (b) Ke ku bu misti sforsa pa fasi, suma ki mostradu na video Mantenha a União Cristã?

¹² Na si purmeru karta, Pedru usa palabras “bo ama n̈utru ku tudu bo korson”. Es amor ka ta kubri so alguns pekadu, ma “manga di pekadu.” (1 Ped 4:8) Talves Pedru lembra di lison ku Jesus nsinal aserka di purdon anus atras. Na ki tempu, talves Pedru pensaba di kuma i staba na sedu bon dimas, oca ki fala kuma i na purda si ermon “te seti bias”. Ma Jesus nsinal, tambi i nsinanu purda “seti te setenta bias.” Es signifika purda sin limiti. (Mat 18:​21, 22) Si i difisil pa bu aplika es konsiju ka bu disanima! Tudu servus di Jeova i imperfeitu, i utrora e ta tene difikuldadi di purda. Ke ki mas importanti i pa bu fasi ke ki pirsis pa purda bu ermon i fasi pas kel.c

ANSIONS, BO KUIDA DIRITU DI KONGREGASON

13. Pabia ki pudi sedu difisil pa ansions tene tempu pa nkoraẑa se ermons ku irmas?

¹³ Pedru nunka ka diskisi ke ku Jesus falal dipus ki lantandadu di mortu: “Bakia ña karnel.” (Jon 21:16) Si bu sedu un ansion, bu sibi kuma es instrusons ta aplika tambi pa bo. Ma, i pudi sedu difisil pa un ansion tene tempu pa kuida des tarbaju importanti. Purmeru, ansions dibi di kuida di se familia na sintidu fisiku, emosional i juda se familia pertusi di Jeova. E ta da tambi isemplu na tarbaju di pregason suma tambi na purpara i fasi se partis na runions, asembleias ku kongresus. Alguns tambi fasi parti di Kumison di Ligason ku Ospital o e ta juda Dipartamentu Lokal di Konstruson. Na bardadi, ansions i omis okupadu!

14. Ke ku pudi leba ansions na kuida diritu di kongregason? (1 Pedru 5:​1-4)

¹⁴ Pedru fala si kumpañeris ansions es palabras: “Bo toma konta di krentis na bo metadi, ku sedu karnel di Deus.” (Lei 1 Pedru 5:​1-4.) Si bu sedu ansion, no sibi kuma bu ama bu ermons ku irmas i bu misti kuida ben delis. Ma, utrora bu pudi sinti di kuma bu tene manga di kusas di fasi o bu sta kansadu dimas, i bu ka na pudi fasi es tarbaju. Ke ku bu pudi fasi? Konta Jeova bu preokupason. Pedru fala sin: “Si algin na sirbi, pa i sirbi konformi forsa ku Deus dal”. (1 Ped 4:11) Bu ermons ku irmas pudi sta na pasa purblemas ku ka pudi rosolvidu di manera kompletu nes mundu. Ma lembra di kuma Jesus Kristu “Ŝef di Pastoris”, pudi juda elis mas di ki, ke ku bu pudi fasi. I pudi fasil aos suma tambi na nobu mundu. Deus pidi so ansions pa e ama se ermons, pa e kuida ben delis i pa e “sirbi pa isemplu di rebañu.”

15. Ke ku un ansion fasi pa kuida ben di ermons ku irmas? (Jubi tambi foto.)

¹⁵ William, ku sirbi suma ansion pa manga di anus ntindi importansia di kuida di ermons ku irmas. Oca COVID-19 kumsa, el ku si kumpañeris ansions e fasi suma se prioridadi kontakta kada semana, kada ermon di se grupu. I splika pabia ke ta fasi kila. I fala sin: “Manga di no ermons ta dingi na kasa elis so. I fasil pa e kumsa tene pensamentus negativu.” Ora ku un ermon o irma tene purblema, William ta sukutal diritu pa sibi ke ki i pirsisa del i ke ku na preokupal. Dipus i ta jubi un publikason o video na no site ki pudi usa pa nkoraẑa ki ermon o irma. William fala sin: “Gosi ki mas pirsis kuida ben di no ermons ku irmas di ki antis. No ta fasi manga di sforsu pa juda jintis kunsi Jeova; no pirsisa di fasi mesmu sforsu pa kuida di no ermons ku irmas kontinua sirbi Jeova.”

DISA PA JEOVA FASIU SEDU KOMPLETU

16. Di kal maneras ku no pudi pui na pratika lisons ku no aprindi di kartas di Pedru?

¹⁶ No fala so di alguns lisons ku no pudi aprindi di dus kartas nspiradu di Pedru. Talves bu nota algun kusa ku bu misti minjoria. Pur isemplu, sera bu misti tira mas tempu pa pensa na bensons ku no na bin tene na nobu mundu? Bu fiksa objetivu di prega na kau di tarbaju, na skola o na utrus kau? Bu oja maneras ku “bu pudi minjoria na mostra amor di tudu korson pa bu ermons ku irmas? Ansions, sera ki bo sta disididu pa kuida ben di karnelis di Jeova di bo livri vontadi i ku diseẑu di sirbi? Si bu jubi diritu, bu pudi nota di kuma i ten kusas ku bu pudi minjoria, ma ka bu disanima. Siñor [Jesus] i bon” i na judau minjoria. (1 Ped 2:3) Pedru danu es garantia: “Deus . . . ta fasi bos kompletu, i ta firmanta bos, i ta fortifika bos, i ta da bos firmi alisersu.” — 1 Ped 5:10.

17. Si no ka disisti, no disa pa Jeova fasinu sedu kompletu, kal ki na sedu rusultadu?

¹⁷ Un bias, Pedru sinti di kuma i ka mersi sta dianti di fiju Deus. (Luk 5:8) Ma ku ajuda di Jeova ku Jesus, Pedru sigi Jesus di manera fiel. Suma rusultadu, Pedru “dadu entrada largu i libri na renu ku ka ta kaba di no Siñor i salbadur Jesus Kristu.” (2 Ped 1:11) Es i un benson garandi! Si bu ka disisti suma ku Pedru ka disisti i bu disa pa Jeova fasiu sedu kompletu o trenau, bu na bin risibi labaremu di vida ku ka ta kaba. Bu na bin ‘yangasa fin di bu fe, ku sedu salbason di bu alma.’ — 1 Ped 1:9.