PURGUNTA 5

Kuma ku N pudi lida ku buliduris na skola?

PABIA KI BON PENSA NES

Forma ku bu ta reaẑi dianti di buliduris pudi minjoria situason o pioral.

KE KU BU NA FASIBA?

Imaẑina es sena: Tomas ka misti bai skola aos. Nin amaña. Nin nunka. Tudu kumsa tris mis atras oca si kolegas di skola spalia mintida kontra el. Dipus e pul nomis di gozu. Utru ora algin ta bati si kadernus i finji kuma i ka nota, o un algin na grupu di jintis ta dal na kosta, i ora ku Tomas vira pa jubi, i ka ta sibi i kin ku dal. Aonti situason torna mas pior oca Tomas risibi un email di algin ku na ameasal . . .

Si bu seduba Tomas, kuma ku bu na reaẑiba?

PENSA UN BOKADU!

I ten ke ku bu pudi fasi! Na bardadi bu pudi vensi buliduris sin geria ku elis. Kuma?

KA BU REAẐI. Biblia fala: “Tulu ta pajiga tudu si raiba, ma algin jiru ta kontrolal.” (Ditus 29:11) Si bu manti kalmu, kila pudi fasi buliduris sai bu tras, pabia e na oja kuma bu ka medi elis.
KA BU TORNA. Biblia fala: “Ka bo torna ningin mal pa mal.” (Romanus 12:17) Si bu tenta vinga, kila na piora so situason.
DISVIA DI PURBLEMA. Biblia fala: “Algin ku ta pensa diritu i ta oja pirigu, i bai sukundi”. (Ditus 22:3) Te nunde ki pusivel, ivita di jintis ku pudi kausau purblema ku situasons nunde ku bu pudi sufri na mon di buliduris.
DA RESPOSTA KE KA SPERA. Biblia fala: “Bon rasposta ta kalma raiba”. (Ditus 15:1) Te mesmu bu pudi tenta da un resposta ngrasadu. Pur izemplu, si un bulidur fala kuma bu gurdu, bu pudi fasi ẑestus bu fala: “I bardadi N pirsisa di pirdi alguns kilus!”
BAI BU KAMIÑU. Nora di 19 anu di idadi fala: “Silensiu ta mostra kuma bu sedu maduru i bu mas forti di ki algin ku na buliu, tambi i ta mostra kuma bu pudi kontrola bu kabesa, kusa ku bulidur ka sibi fasi.” — 2 Timótiu 2:24.
DISENVOLVI BU AUTOKONFIANSA. Buliduris pudi nota si kontra se provokason na tene efeitu na bo. Ma, manga di buliduris na disisti di bo si e oja di kuma se provokason ka tene efeitu na bo.
KONTA UN ALGIN. Un algin ku ciga di sedu pursor fala sin: “N na nsentiva tudu kilis ku na sufri na mon di buliduris pa e konta un algin. I kusa sertu di fasi, tambi i pudi proteẑi algin di buliduris.”

Un joven sta na enfrenta un bulidur ku autokonfiansa — Autokonfiansa na dau forsa ku bulidur ka tene

**TESTI: KE KU BU SIBI ASERKA DI BULIDURIS**
VERDADEIRU O FALSU	RESPOSTAS
1 Buliduris i ka di aos, e iẑisti disna di milyaris di anus atras.	1 Verdadeiru. Na tempu di Noe, i tenba grupus di jintis ku ta buli utrus. Biblia coma elis di “jigantis”. — Kumsada 6:4.
2 Buli i so un brinkadera. I ka un kusa gravi.	2 Falsu. Buli i un di kusas ku ta pui manga di jovens mata kabesa.
3 Minjor manera di para buliduris i pa geria ku elis.	3 Falsu. Manga di bias buliduris ta tene mas forsa di ki jintis ke ta buli, asin i na sedu suma nada tenta geria ku elis.
4 Si bu oja un bulidur na buli un algin i minjor finji ka nota.	4 Falsu. Nes situason, bu ka pudi finji ka nota. Si bu oja un algin na sufri na mon di un bulidur i bu ka fala nada, bu na sedu parti di purblema en ves di sedu suluson di purblema.
5 Palabras di arogansia di buliduris i suma maskra pa tapa se frakesa.	5 Verdadeiru. Apesar di kuma alguns buliduris ta misti mostra kuma e sta konfianti, manga delis ka ta sinti suguru i e ta tenta rebaŝa utrus pa pudi sinti ben.
6 Buliduris pudi muda.	6 Verdadeiru. Si e judadu, buliduris pudi muda se manera di pensa i di aẑi.