LISON 11

Ke ku bu na gaña si bu ta lei Biblia?

Edison mprimidu

I ciga ja di akontisi ku bo, ki bu misti fasi un tarbaju garandi, ma i difisil dimas pa bo? I na sedu mas fasil si bu dividil na tarbajus pikininu i fasil puku-puku. I mesmu kusa ku no pudi fasi ora ku no na lei Biblia. Talves bu pudi punta: ‘Kuma ku N pudi kumsa ña leitura di Biblia?’ Nes lison, no na bin oja kusas simplis ku bu pudi fasi ku pudi judau gosta di lei i studa Biblia.

1. Pabia ku no dibi di lei Biblia kada dia?

Un algin ku ta lei Biblia, o “lei di SIÑOR,” kada dia i na sedu filis i na sai ben na vida. (Lei Salmu 1:1-3.) Pa kumsa, tenta ba ta lei un bokadu kada dia. Mas bu na kunsi Palabra di Deus, mas bu na gosta di leil.

2. Ke ku pudi judau benefisia di leitura di Biblia?

Pa benefisia mas di no leitura di Biblia, no pirsisa di para i pensa na ke ku no sta na lei. No dibi di leil, tambi “pensa diritu nel”. (Josué 1:8) Ora ku bu na lei fasi bu kabesa es purgunta: ‘Ke ku es ta sinan aserka di Jeova Deus? Kuma ku N pudi aplika es na ña vida? Kuma ku N pudi usa es versikulus pa juda utrus?’

3. Kuma ku bu pudi ranja tempu pa lei Biblia?

Pa bo, sera ki i difisil ranja tempu pa lei Biblia? I un purblema ku manga di nos tene. Tenta “proveita dirito tempo”. (Efésius 5:16, NOBO TESTAMENTO NA CRIOL) Bu pudi fasi kila, ora ku bu fiksa un tempu pa ba ta lei Biblia kada dia. Alguns jintis ta ranja tempu pa ba ta lei Biblia parmaña sedu. I utrus ta leil mas tardi, talves na mumentu di se folga pa kume. I ten utrus ku ta lei Biblia di noti antis de bai durmi. Kal ki minjor tempu pa bo?

APRINDI MAS

Aprindi kuma ku bu pudi fasi pa leitura di Biblia sedu mas interesanti. Jubi kuma ku bu pudi purpara diritu pa bu pudi aproveita mas di bu studu di Biblia.

Imaẑen: Un joven aprindi gosta di un tipu di kumida, dipus di pasa un sertu tempu. 1. Un rapasiñu sta na brinka ku kumida. 2. Oca ki kirsi, i sta na kume kumida. 3. Ocal ja mas garandi, e joven gosta di kume es kumida. — Suma ku no ta aprindi gosta di kume diferenti tipus di kumida, no pudi tambi aprindi gosta di lei Biblia.

4. Aprindi kuma ku bu pudi gosta di lei Biblia

I pudi ka sedu fasil kumsa lei Biblia. Ma, no pudi “faima” pa fasil, suma ku un algin ta aprindi gosta di un nobu kumida. Lei 1 Pedru 2:2, dipus bo kombersa aserka des purgunta:

Ke ku bu pensa, si bu ta lei Biblia kada dia, sera ki bu na gosta del, i misti leil mas?

Mostra VIDEO pa jubi kuma ku alguns jintis kumsa ku gosta di lei Biblia. Dipus bo kombersa aserka des purguntas:

VIDEO: Jovens ku Aprindi Gosta di Palabra di Deus (5:33)

Na video, kal difikuldadis ku es jovens vensi?
Ke ku juda elis manti se objetivu di lei Biblia kada dia?
Kuma ke torna se leitura di Biblia mas interesanti?

Suẑestons pa judau kumsa lei Biblia:

Kuji un traduson izatu ki fasil di ntindi. Tenta lei Tradução do Novo Mundo si ten na bu lingua o na utru lingua ku bu kunsi.
Purmeru, kumsa lei partis ku bu pensa bu na mas gosta del. Pa tene mas ideia, jubi tabela, “Kumsa lei Biblia kada dia.”
Marka ke ku bu lei ja. Usa tabela ku sta nes publikason “Marka bu leitura di Biblia”.
Usa aplikativu JW Library^®. Si bu tene es aplikativu na bu telefoni diẑital o utru apareliu, bu na pudi lei i obi leitura di Biblia na kualker kau.
Usa broŝura Ajuda pa Studa Palabra di Deus. I tene mapas ku tabelas ku pudi torna bu leitura di Biblia mas interesanti.

5. Purpara pa bu studu di Biblia

Lei Salmu 119:34, dipus bo kombersa aserka des purgunta:

Pabia di ke ku manda i bon ora antis di bu lei Biblia o antis di bu purpara bu studu di Biblia?

Kuma ku bu pudi aproveita diritu di kada parti di studu? Nkuantu bu na purpara kada lison, tenta fasi es ku faladu li:

Lei purmeru parti di lison.
Lei testus di Biblia, i tenta ntindi kuma ki sta ligadu ku asuntu ku na faladu del.
Subliña palabras o frasis importanti ku na ruspundi kada purgunta; kila na judau ora ku bu bin na kombersa ku kin ku ta studa Biblia ku bo.

Imaẑen: Un minjer sta na purpara pa si studu di Biblia. A. I sta na lei purmeru paẑina di lison. B. I sta na lei testus di Biblia ku sta na livru. C. I subliña palabras ku frasis importanti na lison.

Sera ki bu sibiba kuma?

Tustumuñas di Jeova usa diferentis tradusons di Biblia. Mesmu asin, no gosta mas di Tradução do Novo Mundo da Bíblia Sagrada pabia i izatu, i fasil di ntindi, i ta usa nomi di Deus.— Jubi artigu na internet, “Sera ki Tustumuñas di Jeova Tene se Propi Biblia?”

ALGUNS JINTIS TA FALA: “I difisil dimas studa Biblia, N ta sta okupadu. N ka tene tempu pa fasi kila.”